“Lig-ona ang Inyong mga Kasingkasing”

“Kamo nanginahanglan ug pag-agwanta, aron nga, human ninyo mabuhat ang kabubut-on sa Diyos, kamo makadawat sa katumanan sa saad.”​—HEBREOHANON 10:36.

1, 2. (a) Unsay nahitabo sa daghang Kristohanon sa unang siglo? (b) Nganong sayon ra nga maluya ang pagtuo?

SA TANANG magsusulat sa Bibliya, walay mas subsob nga naghisgot ug pagtuo kay kang apostol Pablo. Ug sagad, naghisgot siya bahin niadtong kansang pagtuo naluya o namatay. Pananglitan, si Himeneo ug Alejandro “nakasinatig pagkalunod mahitungod sa ilang pagtuo.” (1 Timoteo 1:19, 20) Gibiyaan ni Demas si Pablo tungod kay “iyang gihigugma ang karong sistema sa mga butang.” (2 Timoteo 4:10) Ang pipila, pinaagi sa ilang dili-kristohanon, iresponsableng mga lihok “nagalimod sa pagtuo.” Ang uban nalimbongan sa bakak nga kaalam ug “nahitipas gikan sa pagtuo.”​—1 Timoteo 5:8; 6:20, 21.

² Nganong kadtong dinihogang mga Kristohanon napildi niining mga paagiha? Aw, “ang pagtuo mao ang may katinoan nga pagdahom sa mga butang nga gilaoman, ang tataw nga pagpanghimatuod sa mga katinuoran bisan tuod wala makita.” (Hebreohanon 11:1) Kita nagpasundayag ug pagtuo sa dili nato makita. Wala nato kana kinahanglana alang sa mga butang nga makita. Mas sayon ang paghago alang sa makitang bahandi kay sa dili makita nga espirituwal nga mga bahandi. (Mateo 19:21, 22) Daghang makitang mga butang​—sama sa ‘tinguha sa unod ug sa tinguha sa mga mata’—​nagdani pag-ayo sa atong dili-hingpit nga unod ug makapaluya sa atong pagtuo.​—1 Juan 2:16.

3. Unsang matanga sa pagtuo ang angayng ugmaron sa usa ka Kristohanon?

³ Bisan pa niana, matod ni Pablo, “siya nga nagaduol sa Diyos kinahanglang motuo nga siya mao ug nga siya maoy tigganti sa mga matinuorong nagapangita kaniya.” Si Moises may pagtuo nga ingon niana. Siya ‘mitutok ngadto sa bayad sa ganti’ ug ‘nagpabiling lig-on nga daw sa nakita ang Usa nga dili-makita.’ (Hebreohanon 11:6, 24, 26, 27) Ang usa ka Kristohanon nagkinahanglan niining matanga sa pagtuo. Sumala sa giingon sa miaging artikulo, si Abraham maoy maayong panig-ingnan niining bahina.

Kang Abraham nga Panig-ingnan sa Pagtuo

4. Sa unsang paagi ang dalan sa kinabuhi ni Abraham naapektahan sa iyang pagtuo?

⁴ Si Abraham didto sa Ur sa dihang nadawat niya ang saad sa Diyos nga siya mahimong amahan sa usa ka binhi nga mahimong panalangin sa katawhan sa tanang nasod. (Genesis 12:1-3; Buhat 7:2, 3) Pinasikad sa maong saad, gisugot ni Abraham si Jehova, nga mibalhin una ngadto sa Haran ug dayon sa Canaan. Didto, si Jehova misaad nga ihatag ang yuta ngadto sa binhi ni Abraham. (Genesis 12:7; Nehemias 9:7, 8) Bisan pa niana, kadaghanan sa gisaad ni Jehova nangatuman human mamatay si Abraham. Pananglitan, si Abraham mismo wala gayod makapanag-iya ug bisan unsang bahin sa Canaan​—gawas sa langob sa Macpela, nga iyang gipalit ingong lubnganan. (Genesis 23:1-20) Sa gihapon, mituo siya sa pulong ni Jehova. Labaw sa tanan, nagtuo siya sa usa ka umaabot nga “siyudad nga may tinuod nga mga patukoranan, nga ang magtutukod ug maghihimo niini nga siyudad mao ang Diyos.” (Hebreohanon 11:10) Ang maong pagtuo nagpalig-on kaniya sa tibuok niyang kinabuhi.

5, 6. Sa unsang paagi ang pagtuo ni Abraham gisulayan mahitungod sa saad ni Jehova?

⁵ Makita kini ilabina may kalabotan sa saad nga ang binhi ni Abraham mahimong usa ka dakong nasod. Aron mahitabo kini, nagkinahanglag anak si Abraham, ug siya nagpaabot ug dugay una panalangini ug usa ka anak. Wala kita mahibalo kon pilay iyang edad sa dihang una niyang nadungog ang saad sa Diyos, apan sa dihang gihimo niya ang dugay nga biyahe paingon sa Haran, si Jehova wala pa maghatag kaniya ug anak. (Genesis 11:30) Didto siya sa Haran sa igong gidugayon nga ‘makahipos ug mga manggad ug makatigom ug mga kalag,’ ug sa dihang mibalhin siya sa Canaan, siya 75 anyos ug si Sara 65. Sa gihapon, walay anak. (Genesis 12:4, 5) Sa dihang si Sara nag-edad na ug mga 75, siya nanghinapos nga siya tigulang na kaayo niadtong tungora nga dili na makahatag ug anak kang Abraham. Busa, nagsunod sa kostumbre sa maong panahon, gihatag niya ang iyang ulipon nga babaye nga si Agar ngadto kang Abraham, ug nakabaton siyag anak pinaagi kaniya. Apan kini dili mao ang gisaad nga bata. Si Agar ug ang iyang anak, si Ismael, ngadtongadto gipapahawa. Sa gihapon, sa dihang nangaliyupo si Abraham alang kanila, si Jehova misaad nga panalanginan si Ismael.​—Genesis 16:1-4, 10; 17:15, 16, 18-20; 21:8-21.

⁶ Sa gitakdang panahon sa Diyos​—dugay na kaayong panahon human nila unang nadungog ang saad—​ang 100-anyos nga si Abraham ug ang 90-anyos nga si Sara nanganak ug usa ka anak nga lalaki, si Isaac. Pagkakahibulongan gayod kaha kadto! Alang niining tigulang nga magtiayon, halos sama kini sa pagkabanhaw sa dihang ang ilang “patay” nga mga lawas nagpatunghag bag-ong kinabuhi. (Roma 4:19-21) Dugay ang pagpaabot, apan sa dihang sa kataposan natuman ang saad, takos ang pagpaabot.

7. Sa unsang paagi ang pagtuo nalangkit sa pag-agwanta?

⁷ Ang panig-ingnan ni Abraham nagpahinumdom kanato nga ang pagtuo dili kay sulod lamang sa mubong panahon. Gilangkit ni Pablo ang pagtuo sa pag-agwanta sa dihang siya misulat: “Kamo nanginahanglan ug pag-agwanta, aron nga, human ninyo mabuhat ang kabubut-on sa Diyos, kamo makadawat sa katumanan sa saad. . . . Kita dili ang matang nga nagapanibog ngadto sa kalaglagan, kundili ang matang nga adunay pagtuo ngadto sa pagtipig nga buhi sa kalag.” (Hebreohanon 10:36-39) Daghan ang nagpaabot ug dugay sa katumanan sa saad. Ang uban nagpaabot sa tibuok kinabuhi. Ang ilang lig-on nga pagtuo nagpalig-on kanila. Ug, sama kang Abraham, sila makadawat sa ganti sa gitakdang panahon ni Jehova.​—Habacuc 2:3.

Pagpamati sa Diyos

8. Sa unsang paagi kita mamati sa Diyos karon, ug nganong magpalig-on kana sa atong pagtuo?

⁸ Labing menos upat ka butang ang nagpalig-on sa pagtuo ni Abraham, ug ang mao gihapong mga butanga makatabang kanato. Una, iyang gipasundayag ang iyang ‘pagtuo nga ang Diyos mao’ pinaagi sa pagpatalinghog sa dihang misulti si Jehova. Busa, lahi siya sa mga Hudiyo sa adlaw ni Jeremias, kinsa nagtuo kang Jehova apan wala motuo sa iyang mga pulong. (Jeremias 44:15-19) Karon, si Jehova nagsulti kanato pinaagi sa mga panid sa Bibliya, iyang dinasig nga Pulong, nga giingon ni Pedro nga sama sa “usa ka lampara nga nagasidlak sa usa ka ngitngit nga dapit . . . sa inyong mga kasingkasing.” (2 Pedro 1:19) Sa dihang basahon nato ang Bibliya nga masanongon, kita “inamuma sa mga pulong sa pagtuo.” (1 Timoteo 4:6; Roma 10:17) Dugang pa, niining kataposang mga adlaw, “ang kasaligan ug mabuot nga ulipon” nagatagana ug espirituwal nga “pagkaon sa hustong panahon,” giya sa pagpadapat sa mga prinsipyo sa Bibliya ug pagsabot sa mga tagna sa Bibliya. (Mateo 24:45-47) Ang pagpamati kang Jehova pinaagi niini maoy kinahanglanon sa pagbaton ug lig-on nga pagtuo.

9. Unsay moresulta kon tinuod kitang nagtuo sa Kristohanong paglaom?

⁹ Ang pagtuo ni Abraham suod nga nalangkit sa iyang paglaom. “Pinasukad sa paglaom siya nagbatog pagtuo, nga siya mahimong amahan sa daghang kanasoran.” (Roma 4:18) Mao kini ang ikaduhang butang nga makatabang kanato. Kinahanglang dili gayod nato kalimtan nga si Jehova maoy “tigganti sa mga matinuorong nagapangita kaniya.” Si apostol Pablo miingon: “Kita nagahago ug nagapanlimbasog sa atong kaugalingon, tungod kay gipahimutang nato ang atong paglaom diha sa usa ka buhing Diyos.” (1 Timoteo 4:10) Kon kita tinuod nga nagtuo sa Kristohanong paglaom, ang atong tibuok nga paagi sa pagkinabuhi mahimong usa ka pagpasundayag sa atong pagtuo, ingon sa kaso ni Abraham.

Pagpakigsulti sa Diyos

10. Unsang matanga sa pag-ampo ang magpalig-on sa atong pagtuo?

¹⁰ Si Abraham nakigsulti sa Diyos, ug mao kini ang ikatulong butang nga nagpalig-on sa iyang pagtuo. Karon, kita usab makapakigsulti kang Jehova, nga naggamit sa gasa sa pag-ampo pinaagi ni Jesus-Kristo. (Juan 14:6; Efeso 6:18) Maoy human iasoy ang sambingay nga nagpasiugda sa panginahanglan sa kanunayng pag-ampo nga si Jesus misukna sa pangutana: “Sa dihang ang Anak sa tawo moabot, makaplagan ba gayod niya ang pagtuo dinhi sa yuta?” (Lucas 18:8) Ang nagapalig-on-sa-pagtuo nga pag-ampo dili kay wala-hunahunaa o awtomatiko. Kini makahuloganon kaayo. Pananglitan, ang kinasingkasing nga pag-ampo hinungdanon sa dihang duna kitay himoong importanteng mga desisyon o sa dihang nailalom kita sa hilabihang kapit-os.​—Lucas 6:12, 13; 22:41-44.

11. (a) Sa unsang paagi napalig-on si Abraham sa dihang gibuksan niya ang iyang kasingkasing ngadto sa Diyos? (b) Unsay atong makat-onan gikan sa kasinatian ni Abraham?

¹¹ Sa dihang si Abraham nagkatigulang na ug wala gihapon ihatag ni Jehova kaniya ang gisaad nga binhi, nakigsulti siya sa Diyos mahitungod sa iyang kabalaka. Gipasaligan siya pag-usab ni Jehova. Ang resulta? Si Abraham “mituo kang Jehova; ug kini iyang giisip kaniya ingon nga pagkamatarong.” Unya, si Jehova nagtagana ug ilhanan sa pagpalig-on sa iyang mapasaligong mga pulong. (Genesis 15:1-18) Kon buksan nato ang atong mga kasingkasing ngadto kang Jehova diha sa pag-ampo, dawaton ang mga pasalig ni Jehova diha sa iyang Pulong, ang Bibliya, ug tumanon siya diha sa bug-os nga pagtuo, nan si Jehova magpalig-on usab sa atong pagtuo.​—Mateo 21:22; Judas 20, 21.

12, 13. (a) Sa unsang paagi gipanalanginan si Abraham sa dihang gisunod niya ang paggiya ni Jehova? (b) Unsang matanga sa mga kasinatian ang magpalig-on sa atong pagtuo?

¹² Ang ikaupat nga butang nga nagpalig-on sa pagtuo ni Abraham mao ang pagpaluyo nga gihatag ni Jehova kaniya sa dihang gisunod niya ang giya sa Diyos. Sa dihang giluwas ni Abraham si Lot gikan sa misulong nga mga hari, gihatag ni Jehova kaniya ang kadaogan. (Genesis 14:16, 20) Bisan tuod nagkinabuhi si Abraham nga sama sa usa ka temporaryong molupyo sa yuta nga mapanunod sa iyang binhi, gipanalanginan siya ni Jehova sa materyal nga paagi. (Itandi ang Genesis 14:21-23.) Gigiyahan ni Jehova ang mga paningkamot sa iyang sulugoon aron mangita ug angayan nga asawa alang kang Isaac. (Genesis 24:10-27) Oo, si Jehova “nagpanalangin kang Abraham sa tanang butang.” (Genesis 24:1) Lig-on kaayo ang iyang pagtuo ingong resulta ug suod kaayo ang iyang relasyon uban kang Jehova nga Diyos nga gitawag siya ni Jehova nga “akong higala.”​—Isaias 41:8; Santiago 2:23.

¹³ Kita ba karon makabaton nianang lig-on nga pagtuo? Oo. Kon sama ni Abraham, sulayan nato si Jehova pinaagi sa pagsugot sa iyang mga sugo, panalanginan usab niya kita, ug kana magpalig-on sa atong pagtuo. Pananglitan, ang daklit nga pagtan-aw sa 1998 Tuig sa Pag-alagad nga Taho nagpakita nga daghan ang gipanalanginan sa kahibulongang paagi sa dihang ilang gisugot ang iyang sugo sa pagsangyaw sa maayong balita.​—Marcos 13:10.

Usa ka Talaan sa Pagtuo Karon

14. Giunsa pagpanalangin ni Jehova ang kampanya sa Kingdom News Num. 35?

¹⁴ Balik sa Oktubre 1997, ang tibuok-kalibotang kampanya sa Kingdom News Num. 35 maoy talagsaong kalamposan, tungod sa kasibot ug kadasig sa minilyong Saksi. Kasagaran ang nahitabo sa Ghana. Halos 2.5 ka milyong kopya ang napanagtag diha sa upat ka pinulongan, ug duolan sa 2,000 ang mihangyo nga magpatuon sa Bibliya ingong resulta. Sa Cipro duha ka Saksi nga nanagtag sa Kingdom News ang nakamatikod sa usa ka pari nga nagsunodsunod kanila. Pagkataudtaod, gitanyagan nila siya ug kopya sa Kingdom News. Nakadawat na siya ug kopya ug miingon: “Nakadayeg kaayo ako sa mensahe niini nga buot kong pahalipayan ang mga tawo nga nagsulat niini.” Sa Denmark, 1.5 ka milyong kopya sa Kingdom News ang napanagtag uban ang maayong mga resulta. Usa ka babaye nga nagtrabaho sa public relations didto miingon: “Ang tract dunay mensahe alang sa tanan. Sayon kining sabton, ug kini magpalihok kanimo, maghatag kanimo ug tinguha nga mahibalo ug dugang pa. Kini nakaigo gayod sa ig-anan!”

15. Unsang mga eksperyensiya ang nagpakita nga gipanalanginan ni Jehova ang paningkamot sa pag-abot sa mga tawo bisan asa?

¹⁵ Sa 1998 gihimo ang paningkamot sa pagsangyaw ngadto sa mga tawo dili lamang diha sa ilang puy-anan kondili bisan asa. Sa Côte d’Ivoire usa ka misyonaryong magtiayon miduaw sa 322 ka barko diha sa mga pantalan. Nakapahimutang sila ug 247 ka libro, 2,284 ka magasin, 500 ka brosyur, ug gatosan ka tract, maingon man mga video nga tan-awon sa mga marinero samtang naglawig. Sa Canada usa ka Saksi ang miadto sa ayohanan ug awto. Interesado ang tag-iya, ug ang igsoong lalaki nagpabilin sulod sa upat ka oras ug tunga, bisan tuod ang panahon nga gigugol sa pagsangyaw mitotal lamang ug usa ka oras o maingon-ingon niana tungod sa pag-atiman sa mga suki. Ngadtongadto, gihikay ang pagtuon sa alas 10:00 s.g. Apan, usahay wala kini masugdi hangtod sa tungang gabii ug mahuman hangtod sa alas dos sa buntag. Ang eskedyul lagmit usa ka suliran, apan may maayong mga resulta. Ang tawo mihukom sa pagsira sa iyang ayohanan sa ma-Dominggo aron makatambong sa mga tigom. Siya ug ang iyang pamilya sa wala madugay naghimog maayong pag-uswag.

16. Unsang mga eksperyensiya ang nagpakita nga ang brosyur nga Gikinahanglan ug ang librong Kahibalo maoy gamhanang mga himan sa buluhatong pagsangyaw ug pagpanudlo?

¹⁶ Ang brosyur nga Unsay Gikinahanglan sa Diyos Kanato? ug ang librong Kahibalo nga Motultol sa Kinabuhing Walay Kataposan maoy gamhanan gihapong mga instrumento sa buluhatong pagsangyaw ug pagpanudlo. Sa Italya usa ka madre nga naghulat ug bus midawat ug kopya sa Kingdom News. Pagkasunod adlaw, giduol na usab siya ug midawat sa brosyur nga Gikinahanglan. Kada adlaw human niadto, diha siyay 10- ngadto sa 15-minutos nga pagtuon sa Bibliya diha sa hunonganan sa bus. Human sa usa ka bulan ug tunga, mihukom siya sa pagbiya sa kombento ug sa pagpauli sa Guatemala aron sa pagpadayon sa iyang pagtuon. Sa Malawi usa ka mainitong tigsimba nga ginganlag Lobina wala mahimuot sa dihang ang iyang mga anak nga babaye nagsugod pagtuon sa Bibliya uban sa mga Saksi ni Jehova. Sa gihapon, ang mga anak nagpaambit sa kamatuoran sa Bibliya uban sa ilang inahan kon mahimo nila. Sa Hunyo 1997, nakita ni Lobina ang librong Kahibalo ug naikag sa ekspresyong “Kahibalo nga Motultol.” Sa Hulyo miuyon siya nga magtuon sa Bibliya. Sa Agosto mitambong siya sa distritong kombensiyon ug naminaw pag-ayo sa tibuok programa. Pagkatapos sa maong bulan, nakabiya na siya sa iyang simbahan ug mikuwalipikar ingong dili-bawtismadong magmamantala. Nabawtismohan siya sa Nobyembre 1997.

17, 18. Sa unsang paagi napamatud-ang mapuslanon ang mga video sa Sosyedad sa pagtabang sa mga tawo nga “makakita” sa espirituwal nga mga butang?

¹⁷ Ang mga video sa Sosyedad nakatabang sa daghan nga “makakita” sa espirituwal nga mga butang. Sa Mauritius usa ka tawo ang mibiya sa iyang simbahan tungod sa kawalay-panaghiusa didto. Usa ka misyonaryo nagpakita kaniya sa panaghiusa sa mga Saksi ni Jehova, ginamit ang video nga United by Divine Teaching. Nakadayeg, ang tawo miingon: “Kamong mga Saksi ni Jehova anaa na sa Paraiso!” Miuyon siya nga magtuon sa Bibliya. Usa ka igsoong babaye sa Hapon nagpakita sa iyang dili-magtutuong bana sa video nga Jehovah’s Witnesses​—The Organization Behind the Name, ug napalihok siya sa pagbaton ug regular nga pagtuon sa Bibliya. Human makita ang United by Divine Teaching, buot niyang mahimong usa sa mga Saksi ni Jehova. Ang tulo-ka-bahing serye nga nag-ulohang The Bible​—A Book of Fact and Prophecy mitabang kaniya sa pagpadapat sa mga prinsipyo sa Bibliya diha sa iyang kinabuhi. Sa kataposan, ang Jehovah’s Witnesses Stand Firm Against Nazi Assault nagpakita kaniya nga si Jehova nagapalig-on sa Iyang katawhan batok sa mga pag-atake ni Satanas. Ang tawo nabawtismohan sa Oktubre 1997.

¹⁸ Pipila lamang kini sa daghan, daghang eksperyensiya nga napahimuslan sa miaging tuig sa pag-alagad. Kini nagpakita nga ang mga Saksi ni Jehova dunay aktibong pagtuo ug nga si Jehova nagapalig-on sa maong pagtuo pinaagi sa pagpanalangin sa ilang kalihokan.​—Santiago 2:17.

Ugmara ang Pagtuo Karon

19. (a) Sa unsang paagi anaa kita sa mas maayong kahimtang kay kang Abraham? (b) Pila ang nagtigom sa miaging tuig sa paghandom sa haladnong kamatayon ni Jesus? (c) Unsang mga nasora ang dunay talagsaong gidaghanon sa nanambong sa Memoryal sa miaging tuig? (Tan-awa ang tsart sa mga panid 12 ngadto sa 15.)

¹⁹ Sa daghang paagi kita karon anaa sa mas maayong kahimtang kay kang Abraham. Nahibalo kita nga gituman ni Jehova ang tanan niyang saad kang Abraham. Ang kaliwat ni Abraham nakapanunod gayod sa Canaan, ug nahimo gayod silang usa ka dakong nasod. (1 Hari 4:20; Hebreohanon 11:12) Dugang pa, mga 1,971 ka tuig human mobiya si Abraham sa Haran, usa ka kaliwat niya, si Jesus, gibawtismohan sa tubig ni Juan Bawtista ug dayon sa balaang espiritu pinaagi ni Jehova mismo aron mahimong Mesiyas, Binhi ni Abraham diha sa bug-os, espirituwal nga diwa. (Mateo 3:16, 17; Galacia 3:16) Sa Nisan 14, 33 K.P., gihalad ni Jesus ang iyang kinabuhi ingong lukat niadtong magpasundayag ug pagtuo kaniya. (Mateo 20:28; Juan 3:16) Minilyon ang makapanalangin na karon sa ilang kaugalingon pinaagi kaniya. Sa miaging tuig, 13,896,312 ang nagtigom sa Nisan 14 aron sa paghandom niining kahibulongang buhat sa gugma. Pagkadakong bindikasyon kang Jehova, ang Dakong Tigtuman sa mga saad!

20, 21. Sa unsang paagi ang mga tawo gikan sa tanang nasod magapanalangin sa ilang kaugalingon pinaagi sa Binhi ni Abraham sa unang siglo, ug sa unsang paagi sila nagapanalangin sa ilang kaugalingon karon?

²⁰ Sa unang siglo, daghan gikan sa tanang nasod​—sugod sa unodnong Israel—​ang nagpasundayag ug pagtuo niining Binhi ni Abraham ug nahimong dinihogang mga anak sa Diyos, mga membro sa usa ka bag-o, espirituwal nga “Israel sa Diyos.” (Galacia 3:26-29; 6:16; Buhat 3:25, 26) Sila dunay seguradong paglaom sa imortal nga espiritung kinabuhi sa mga langit ingong kaubang mga magmamando sa Gingharian sa Diyos. Siyento kuwarentay kuwatro mil lamang ang panalanginan niining paagiha, ug pipila kanila ang nahibilin. (Pinadayag 5:9, 10; 7:4) Sa miaging tuig, 8,756 ang nagpamatuod sa ilang pagtuo nga sila lakip niini nga gidaghanon pinaagi sa pagpakig-ambit sa mga emblema panahon sa pagsaulog sa Memoryal.

²¹ Halos tanang Saksi ni Jehova karon maoy sakop sa “dakong panon” nga gitagna sa Pinadayag 7:9-17. Tungod kay gipanalanginan nila ang ilang kaugalingon pinaagi kang Jesus, sila adunay paglaom nga kinabuhing dayon sa usa ka paraisong yuta. (Pinadayag 21:3-5) Ang 5,888,650 nga nakig-ambit sa buluhatong pagsangyaw sa 1998 maoy pamatuod nga kining maong panon ‘dako’ gayod. Ilabinang makapahinam nga mahibalo nga ang Rusya ug Ukraine nagtaho ug kapin sa 100,000 ka magmamantala sa unang higayon. Talagsaon, usab, ang taho gikan sa Tinipong Bansa​—1,040,283 ka magmamantala sa Agosto! Tulo lamang kini sa 19 ka nasod nga nagtaho ug kapin sa 100,000 ka magmamantala sa miaging tuig.

Paglaom nga Matuman sa Dili Madugay

22, 23. (a) Nganong kinahanglan natong lig-onon ang atong mga kasingkasing karon? (b) Sa unsang paagi makapamatuod kita nga sama kang Abraham, dili sama sa mga dili-matinuohong mga tawo nga gihisgotan ni Pablo?

²² Ang mga nanambong sa Memoryal gipahinumdoman kon asa na kita karon sa katumanan sa mga saad ni Jehova. Sa 1914, si Jesus gientrono ingong Hari sa langitnong Gingharian sa Diyos, nga nagsugod sa iyang presensiya sa Gingharianong gahom. (Mateo 24:3; Pinadayag 11:15) Oo, ang Binhi ni Abraham naghari na karon sa langit! Si Santiago miingon ngadto sa mga Kristohanon sa iyang adlaw: “Magmapailobon; lig-ona ang inyong mga kasingkasing, tungod kay ang pagkaanaa sa Ginoo duol na.” (Santiago 5:8) Aw, kanang maong pagkaanaa maoy katinuoran na karon! Pagkadako pang katarongan nga lig-onon ang atong kasingkasing!

²³ Hinaot nga ang atong pagsalig sa mga saad sa Diyos kanunayng mapalunhaw pinaagi sa regular nga pagtuon sa Bibliya ug makahuloganong pag-ampo. Hinaot nga walay hunong gayod natong masinati ang panalangin ni Jehova samtang kita nagatuman sa iyang Pulong. Unya mahisama kita kang Abraham, dili sama niadtong kansang pagtuo naluya ug namatay, ingon sa gihisgotan ni Pablo. Walay makapabulag kanato gikan sa atong labing balaang pagtuo. (Judas 20) Kita mag-ampo nga kini mahitabo sa tanang alagad ni Jehova sulod sa 1999 nga tuig sa pag-alagad ug padayon ngadto sa walay kataposang umaabot.

Nahibalo Ka Ba?

◻ Sa unsang paagi makapamati kita sa Diyos karon?

◻ Unsang mga kaayohan ang makuha gikan sa makahuloganong mga pag-ampo ngadto sa Diyos?

◻ Kon kita masinugtanong nagasunod sa giya ni Jehova, sa unsang paagi mapalig-on ang atong pagtuo?

◻ Unsang mga bahin sa tinuig nga taho (mga panid 12 ngadto sa 15) ang imong nakaplagan nga ilabinang makapainteres?

[Chart sa panid 12-15]

1998 TUIG SA PAG-ALAGAD NGA TAHO SA MGA SAKSI NI JEHOVA SA TIBUOK KALIBOTAN

(Tan-awa ang publikasyon)

[Hulagway sa panid 16]

Kon mamati kita sa Pulong ni Jehova, ang atong pagsalig sa iyang mga saad mapalunhaw

[Hulagway sa panid 18]

Ang atong pagtuo molig-on sa dihang makigbahin kita sa ministeryo