Pagmaya Diha Kang Jehova Bisan pa sa mga Pagsulay

SUMALA SA GIASOY NI GEORGE SCIPIO

DSa Disyembre 1945, naglubog ako sa usa ka lawak sa ospital, nga bug-os nga paralisado gawas sa akong mga kamot ug mga tiil. Nagtuo ako nga temporaryo ra ang akong kahimtang, apan ang uban nagduhaduha nga makalakaw pa ako pag-usab. Pagkalisod kadto alang sa aktibong 17-anyos! Wala ako modawat sa maong panagna. Daghan kaayo kog mga plano, lakip ang usa ka biyahe ngadto sa Inglaterra uban sa akong amo pagkasunod tuig.

BIKTIMA ako sa epidemya sa polyo nga milukop sa among gipuy-ang isla sa St. Helena. Mipatay kini ug 11 ka tawo ug nagbilin ug daghang baldado. Samtang naglubog sa kama, daghan kog panahon sa pagpamalandong sa akong mubo nga kinabuhi ug sa akong kaugmaon. Samtang gihimo ko kadto, nagsugod ako sa pagkaamgo nga, bisan pa sa akong balatian, may rason ako nga magmaya.

Usa ka Ubos nga Sinugdanan

Sa 1933 sa dihang nag-edad ako ug singko anyos, ang akong amahan, si Tom, usa ka polis ug diakono sa Baptist Church, nakakuha ug pipila ka libro gikan sa duha ka Saksi ni Jehova. Sila maoy bug-os-panahong mga ebanghelisador, o mga payunir, nga miduaw sa isla sa mubong panahon.

Usa sa mga libro gitawag ug The Harp of God. Gigamit kadto sa akong amahan sa pagtuon sa Bibliya uban sa among pamilya ug uban sa daghang interesado. Lisod sabton kadto nga materyal, ug diyutay ray akong nasabtan niadto. Apan nahinumdom ko nga gimarkahan ang matag kasulatan nga among nahisgotan diha sa akong kopya sa Bibliya. Sa wala madugay nakaamgo ang akong amahan nga ang among gitun-an mao ang kamatuoran ug nga lahi kini sa iyang ginawali sa Baptist Church. Nagsugod siya sa pagsulti sa uban bahin niana ug sa pagwali gikan sa pulpito nga walay Trinidad, walay impiyerno nga kalayo, ug walay dili-mamatay nga kalag. Nagpahinabo kini ug dakong kasamok sa simbahan.

Ngadtongadto, sa paningkamot nga husayon ang isyu, gipatawag ang usa ka tigom sa simbahan. Ang pangutana gipatungha, “Kinsay modapig sa mga Baptist?” Daghan ang mihimo niana. Ang sunod nga pangutana mao, “Kinsay modapig kang Jehova?” Mga 10 o 12 ang mihimo niana. Gipabiya sila sa simbahan.

Mao kini ang ubos nga sinugdanan sa usa ka bag-ong relihiyon sa St. Helena. Gikontak sa akong amahan ang hedkuwarter sa Watch Tower Society sa Tinipong Bansa ug nangayog usa ka transcription machine aron ipatokar ngadto sa publiko ang mga plaka sa mga pakigpulong sa Bibliya. Giingnan siya nga dako ra kaayo ang makina nga ipadala sa St. Helena. Gipadala ang gamaygamayng ponograpo, ug ang mga igsoon sa ulahi nagpedido ug duha pa. Gilibot nila ang isla nga naglakaw ug nagsakay sa asno, nga nagdala sa mensahe ngadto sa mga tawo.

Samtang mikaylap ang mensahe, mao man usab ang pagsupak. Sa akong tunghaan, ang mga bata moawit: “Pamati kamong tanan, pamati kamong tanan, sa banda ni Tommy Scipio!” Kadto maoy grabeng pagsulay alang kanako, usa ka nagtungha nga bata nga buot sa pag-uyon sa iyang mga isigkaingon. Unsay nakatabang kanako sa paglahutay?

Ang among dakong pamilya​—nga may unom ka bata—​may regular nga pagtuon sa Bibliya. Duyog usab namong gibasa ang Bibliya kada buntag una mamahaw. Kini sa walay duhaduha mapuslanon sa pagtabang sa among pamilya nga makapadayong matinumanon sa kamatuoran latas sa katuigan. Ako mismo nakabaton ug gugma sa Bibliya sa linghod nga pangedaron, ug latas sa katuigan, namentinar nako ang batasan sa regular nga pagbasa sa Bibliya. (Salmo 1:1-3) Sa pag-undang nako sa pagtungha sa edad nga 14 anyos, ako lig-ong nakagamot sa kamatuoran, ug ang pagkahadlok kang Jehova anaa sa akong kasingkasing. Nakapaarang kini kanako sa pagmaya diha kang Jehova bisan pa niadtong mga pagsulay.

Dugang mga Pagsulay ug mga Kalipay

Samtang naglubog ako sa maong kama nga naghunahuna niadtong sayong katuigan ug sa akong mga kalaoman sa umaabot, nahibalo ako gikan sa akong pagtuon sa Bibliya nga kining sakita dili usa ka pagsulay o silot gikan sa Diyos. (Santiago 1:12, 13) Bisan pa niana, ang polyo maoy grabeng pagsulay, ug ang mga epekto niini nagpabilin kanako sa nahibiling bahin sa akong kinabuhi.

Samtang naulian ako, kinahanglan nakong magtuon pag-usab sa paglakaw. Dili na usab nako magamit ang pipila ka kaunoran sa akong mga bukton. Dili nako maihap ang mga panahon nga natumba ako kada adlaw. Bisan pa niana, uban sa mainitong pag-ampo ug mapinadayonong paningkamot, sa 1947, nakalakaw ako pag-usab sa tabang sa usa ka sungkod.

Niadtong panahona nahigugma ako sa usa ka dalaga, si Doris, nga pareho nakog relihiyosong mga tinuohan. Batan-on pa kaayo kami nga maghunahuna sa kaminyoon, apan natukmod ako sa paghimog dugang pag-uswag sa paglakaw. Gibiyaan usab nako ang akong trabaho tungod kay ang suweldo dili igong makabuhi ug asawa, ug nagtukod ako ug kaugalingong dental nga laboratoryo, nga naglihok sulod sa misunod nga duha ka tuig. Naminyo kami sa 1950. Nianang panahona nakasapi ako ug igoigo nga ikapalit ug gamayng sakyanan. Karon mapasakay na nako ang mga igsoon ngadto sa mga tigom ug sa pagsangyaw sa kanataran.

Teokratikanhong mga Kauswagan Diha sa Isla

Sa 1951 ang Sosyedad nagpadala sa ilang unang hawas nganhi kanamo. Siya mao si Jacobus van Staden, usa ka batan-ong lalaki nga taga-Habagatang Aprika. Bag-o pa lang kaming mibalhin sa usa ka hamugaway nga balay, busa amo siyang gipapuyo sulod sa usa ka tuig. Sanglit wala akoy amo sa akong trabaho, migugol kami ug daghang panahon sa buluhatong pagsangyaw nga magkauban, ug nakadawat ako ug daghang bililhong pagbansay gikan kaniya.

Si Jacobus, o Koos para kanamo, nag-organisar ug regular nga mga tigom sa kongregasyon, nga malipayong gitambongan namong tanan. May suliran kami sa sakyanan tungod kay diha lamay duha ka sakyanan taliwala sa tanang interesado. Batoon ug bukiron ang yuta, ug diyutay ra ang maayong dalan niadtong panahona. Busa, lisod kaayong buluhaton ang pagdala sa tanan ngadto sa mga tigom. Ang uban magsugod paglakaw sayo sa buntag. Magpasakay ko ug tulo sa akong gamayng sakyanan ug ihatod sila sa usa ka dapit diha sa dalan. Manganaog sila ug magpadayon sa paglakaw. Mobalik ako, ihatod ang tulo pa ug layolayo, pakanaogon sila, ug mobalik. Ngadtongadto, ang tanan nakaadto sa tigom niining paagiha. Human sa tigom, gisunod namo ang mao gihapong paagi aron makapauli ang tanan.

Gitudloan usab kami ni Koos kon unsaon paghatag ug epektibong mga presentasyon diha sa mga pultahan. Daghan kamig maayong mga eksperyensiya ug pipila nga dili-kaayo maayo. Apan ang kalipay nga among nabatonan diha sa pagsangyaw sa kanataran milabaw sa tanang pagsulay nga gipahinabo sa mga magsusupak sa among kalihokang pagsangyaw. Usa ka buntag niana nagsangyaw ako uban kang Koos. Samtang nagpadulong kami sa usa ka pultahan, nakadungog kamig tingog sa sulod. Usa ka tawo ang nagbasa ug kusog sa Bibliya. Tataw namong madungog ang sinating mga pulong sa Isaias kapitulo 2. Sa dihang nakaabot siya sa bersikulo 4, mituktok kami. Usa ka mahigalaong tigulang nga lalaki ang nagpadayon kanamo, ug gigamit namo ang Isaias 2:4 sa pagpatin-aw ngadto kaniya sa maayong balita sa Gingharian sa Diyos. Usa ka pagtuon sa Bibliya ang nasugdan uban kaniya bisan tuod nagpuyo siya sa lisod kaayo adtoong lugar. Kinahanglan kaming molugsong sa bungtod, motabok ug sapa agi sa mga bato, mokatkat ug laing bungtod, ug dayon molugsong paingon sa iyang balay. Apan takos kadto niana. Kining maaghop nga tawo midawat sa kamatuoran ug nabawtismohan. Aron makaadto sa mga tigom, milakaw siya nga duhay sungkod ngadto sa dapit diin mahimo nako siyang isakay sa nahibiling gilay-on. Sa ulahi namatay siya nga usa ka matinumanong Saksi.

Ang komisyonado sa polis supak sa among buluhaton ug makadaghang naghulga nga papahawaon si Koos. Kas-a sa usa ka bulan ipatawag niya si Koos aron sukitsukiton. Ang kamatuoran nga si Koos kanunayng mihatag kaniya ug laktod nga mga tubag gikan sa Bibliya mas nakapalagot pa kaniya. Sa matag higayon gipasidan-an niya si Koos nga kinahanglang mohunong siya sa pagsangyaw, apan matag panahon sangyawan siya. Nagpadayon siya sa pagsupak sa buluhaton bisan human mobiya si Koos sa St. Helena. Dayon ang komisyonado, usa ka dako, kusgan nga tawo, kalit lang nasakit ug mihugo pag-ayo. Ang mga doktor wala mahibalo kon unsay iyang sakit. Ingong resulta, mibiya siya sa isla.

Bawtismo ug Padayong Pag-uswag

Human sa tulo ka bulang pag-estar ni Koos sa isla, gibati niya nga haom nga mohimog serbisyo sa pagbawtismo. Ang pagpangitag angayan nga pool maoy suliran. Mihukom kami sa pagkalot ug dakong lungag, sementohon kana, ug kalosan ug tubig aron mapuno kana. Sa gabii una sa bawtismo, miulan, ug pagkabuntag nalipay kami sa pagkakita nga ang lungag napuno.

Nianang Dominggo sa buntag si Koos mipahayag sa pakigpulong sa bawtismo. Sa dihang gihangyo niya nga manindog ang mga kandidato sa bawtismo, 26 kanamo ang nanindog sa pagtubag sa naandang mga pangutana. Nakapribilehiyo kami sa pagkahimong unang mga Saksi nga nabawtismohan diha sa isla. Mao kadto ang labing malipayong adlaw sa akong kinabuhi tungod kay kanunay akong nabalaka nga ang Armagedon moabot sa dili pa ako mabawtismohan.

Duha ka kongregasyon ang natukod ngadtongadto, usa sa Levelwood ug ang usa sa Jamestown. Kada semana tulo o upat kanamo mobiyahe ug 13 kilometros ngadto sa usa ka kongregasyon aron sa pagdumala sa Tunghaan sa Teokratikanhong Ministeryo ug sa Tigom sa Pag-alagad sa Sabado sa gabii. Human sa pag-alagad sa kanataran sa Dominggo sa buntag, mopauli kami ug himoon ang mao gihapong tigom, maingon man ang Pagtuon sa Bantayanang Torre, sa among kaugalingong kongregasyon sa hapon ug gabii. Busa ang among mga hinapos sa semana napuno sa makalipayng teokratikanhong mga kalihokan. Nangandoy ako nga mosangyaw nga bug-os-panahon, apan may pamilya ako nga suportahan. Busa sa 1952, mibalik ako sa pagserbisyo sa gobyerno ingong regular nga dentista.

Sa 1955 ang nagapanawng mga magtatan-aw sa Sosyedad, mga magtatan-aw sa sirkito, misugod sa pagduaw sa isla kada tuig, ug nag-estar sila sa akong balay sa bahin sa ilang pagduaw. Sila maoy positibong impluwensiya sa among pamilya. Halos sa maong panahon, nakapribilehiyo usab ako sa pagpakig-ambit sa pagpasalida sa tulo ka pelikula sa Sosyedad sa tibuok isla.

Ang Kulbahinam nga Balaang Kabubut-on nga Asembliya

Sa 1958, aron makatambong sa Balaang Kabubut-on nga Internasyonal nga Asembliya sa New York, miluwat na usab ako sa pagserbisyo sa gobyerno. Kadtong asembliyaha maoy hinungdanong hitabo sa akong kinabuhi​—usa ka kahigayonan nga naghatag kanakog dakong rason nga magmaya diha kang Jehova. Tungod sa kakulang sa regular nga sakyanan paingon sa isla, wala kami makapauli sulod sa lima ka bulan ug tunga. Ang asembliya gidangtag walo ka adlaw, ug ang mga sesyon nagsugod sa alas nuybe sa buntag hangtod sa alas nuybe sa gabii. Apan wala gayod ako kapoya, ug gipaabot nako ang matag adlaw. Nakapribilehiyo ako sa pagrepresentar sa St. Helena sulod sa duha ka minuto diha sa programa. Ang pagpakigsulti sa dagkong mga panon sa Yankee Stadium ug Polo Grounds maoy makapanerbiyos nga kasinatian.

Ang asembliya nagpalig-on sa akong determinasyon nga magpayunir. Ang pakigpulong publiko nga, “Naghari na ang Gingharian sa Diyos​—Duol na ba ang Kataposan sa Kalibotan?,” ilabinang nakapadasig. Human sa asembliya, miduaw kami sa hedkuwarter sa Sosyedad sa Brooklyn ug milibot sa pabrika. Nakigsulti ako kang Brader Knorr, presidente kaniadto sa Watch Tower Society, mahitungod sa pag-uswag sa buluhaton sa St. Helena. Miingon siya nga gusto niyang moduaw sa isla sa umaabot. Nagdala kami ug mga tape recording sa tanang pakigpulong maingon man sa daghang salida sa asembliya aron ipakig-ambit sa among pamilya ug mga higala.

Nakab-ot ang Tumong nga Bug-os-Panahong Pag-alagad

Sa akong pagpauli, gitanyagan na usab ako sa akong kanhing trabaho, sanglit walay dentista sa isla. Apan, akong gipatin-aw nga buot nakong mosulod sa bug-os-panahong ministeryo. Human sa dugayng sabotsabot gikauyonan nga makatrabaho ako ug tulo ka adlaw kada semana, apan sa taastaas nga suweldo kay sa dihang nagtrabaho ako ug unom ka adlaw sa usa ka semana. Tinuod gayod ang mga pulong ni Jesus: “Nan, padayong pangitaa nga una ang gingharian ug ang iyang pagkamatarong, ug kining tanang ubang mga butang idugang kaninyo.” (Mateo 6:33) Ang pagbiyahe latas sa kabungtoran sa isla sa akong huyang nga mga bitiis dili kanunayng sayon alang kanako. Bisan pa niana, nagpayunir ako sulod sa 14 ka tuig ug nakatabang sa daghang taga-isla sa pagkahibalo sa kamatuoran​—tinong usa ka hinungdan sa dakong pagmaya.

Sa 1961 buot akong ipadala sa gobyerno ngadto sa Fiji Islands alang sa libreng duha-ka-tuig nga kursong pagbansay aron mahimo akong bug-os nga kuwalipikadong dentista. Mitanyag pa gani sila nga pakuyogon kanako ang akong pamilya. Madanihon kini nga tanyag, apan human sa ugdang nga pagpamalandong ako kining gibalibaran. Dili ko gustong biyaan ang mga igsoon sa ingon niana ka dugayng panahon ug biyaan ang pribilehiyo nga akong nabatonan sa pag-alagad uban kanila. Ang labawng medikal nga opisyal nga nag-organisar sa panaw nasuko pag-ayo. Matod niya: “Kon naghunahuna kang duol na kaayo ang kataposan, magamit gihapon nimo ang salapi nga imong kitaon kasamtangan.” Apan mibarog ako nga malig-on.

Pagkasunod tuig gidapit ako sa Habagatang Aprika aron sa pagtambong sa Tunghaan sa Ministeryo sa Gingharian, usa-ka-bulan nga kurso sa pagbansay alang sa mga magtatan-aw sa kongregasyon. Gihatagan kamig bililhong instruksiyon nga nakatabang kanamo sa pag-atiman nga mas epektibo sa among mga asaynment sa kongregasyon. Human sa pagtungha, nakadawat ako ug dugang pagbansay pinaagi sa pagbuhat duyog sa nagapanawng magtatan-aw. Dayon nag-alagad ako sa duha ka kongregasyon sa St. Helena sulod sa kapin sa napulo ka tuig ingong kapuling magtatan-aw sa sirkito. Ngadtongadto, diha nay ubang kuwalipikadong mga igsoong lalaki, ug gigamit ang turnoturno nga sistema.

Kasamtangan, mibalhin kami gikan sa Jamestown ngadto sa Levelwood, diin dihay mas dakong panginahanglan, ug nagpabilin kami didto sulod sa napulo ka tuig. Niining panahona, nagtrabaho ako pag-ayo nga wala kaayoy pahulay​—nagpayunir, nagtrabaho katulo sa usa ka semana alang sa gobyerno, ug nagdumala sa usa ka gamayng groseriya. Dugang pa, nag-atiman ako sa mga kalihokan sa kongregasyon, ug ang akong asawa ug ako nag-atiman sa usa ka pamilya sa upat ka nagtubong mga anak. Aron makasagubang, gibiyaan nako ang akong tulo-ka-adlaw nga trabaho, gibaligya ang tindahan, ug gidala ang tibuok pamilya sa Cape Town, Habagatang Aprika, alang sa tulo-ka-bulan nga bakasyon. Dayon mibalhin kami sa Ascension Island ug nagpabilin didto sulod sa usa ka tuig. Nianang panahona, nakatabang kami sa daghan nga makabaton ug tukmang kahibalo sa kamatuoran sa Bibliya.

Sa pagbalik namo sa St. Helena, mibalhin kami pag-usab sa Jamestown. Among gibag-o ang usa ka balay nga gisibay sa Kingdom Hall. Aron makatagana sa materyal, ang akong anak nga si John ug ako naghimo ug usa ka van sa sorbetes gikan sa usa ka Ford nga trak, ug nagbaligya kamig sorbetes sulod sa misunod nga lima ka tuig. Wala madugay human magsugod sa negosyo, naaksidente ako sa van. Natumba kini ug nadat-ogan ang akong mga bitiis. Ingong resulta, ang mga nerbiyos sa ubos sa akong tuhod namatay, ug gidangtag tulo ka bulan una ko maulii.

Dagayang mga Panalangin Kaniadto ug sa Umaabot

Latas sa katuigan, daghan kamig panalangin​—dugang nga mga rason sa pagmaya. Usa niini mao ang among biyahe sa Habagatang Aprika sa pagtambong sa nasodnong kombensiyon sa 1985 ug sa pagduaw sa bag-ong puy-anang Bethel, nga gikamulo pa pagtukod. Ang lain mao ang pagkabaton ug gamayng bahin, duyog sa akong anak nga si John, sa pagtukod sa maanindot nga Assembly Hall duol sa Jamestown. Nalipay usab kami nga tulo sa among mga anak nag-alagad ingong mga ansiyano, ug ang usa ka apo nga lalaki nag-alagad sa Bethel sa Habagatang Aprika. Ug tinong nakaani kami ug dakong kalipay ug katagbawan gikan sa pagtabang sa daghan nga makabaton ug tukmang kahibalo sa Bibliya.

Ang kanataran sa among ministeryo maoy limitado, nga dunay mga 5,000 lamang ka tawo. Bisan pa niana, ang pagsublisubli ug sangyaw sa mao gihapong teritoryo nagpatunghag maayong mga resulta. Diyutay ra kaayong tawo ang walay-tahod kanamo. Ang St. Helena ilado sa pagkamahigalaon niini, ug timbayahon ka bisag asa ka moadto​—naglakaw diha sa dalan o nagdrayb sa imong sakyanan. Ang akong eksperyensiya mao nga kon labi pang makaila nimo ang mga tawo, mas sayon ang pagsangyaw kanila. Karon duna kamiy 150 ka magmamantala, bisan tuod daghan ang milangyaw.

Sanglit ang tanan namong mga anak dagko na ug namalhin na, kaming duha na lang usab sa akong asawa, human sa 47 ka tuig nga kaminyoon. Ang iyang maunongong gugma ug pagpaluyo latas sa katuigan nakatabang kanako sa pagpadayon sa pag-alagad kang Jehova nga malipayon bisan pa sa mga pagsulay. Ang among pisikal nga kusog nagakaluya, apan ang among espirituwal nga kusog ginabag-o sa adlaw-adlaw. (2 Corinto 4:16) Ako, uban sa akong pamilya ug mga higala, nagpaabot sa usa ka kahibulongang kaugmaon sa dihang mapasig-uli ako sa pisikal nga mas maayo pa kay sa kon unsa ako sa 17 anyos nga panuigon. Ang akong gitinguha pag-ayo mao ang pagpahimulos sa kahingpitan sa tanang diwa ug, labaw sa tanan, ang pag-alagad sa among mahigugmaon ug mahangawaong Diyos, si Jehova, ug sa iyang nagamandong Hari, si Jesu-Kristo, sa walay kataposan.​—Nehemias 8:10.

[Hulagway sa panid 26]

Si George Scipio ug ang iyang tulo ka anak, kinsa nag-alagad ingong mga ansiyano

[Hulagway sa panid 29]

Si George Scipio uban sa iyang asawa, si Doris