Ang Kristohanong Kongregasyon​—Usa ka Tinubdan sa Makapalig-ong Tabang

SI Popi, usa ka babaye nga kapin lag diyutay sa 20 anyos, nahigawad tungod sa masakit nga kahimtang sa pamilya nga naglangkit sa kakulang sa bukas nga komunikasyon uban sa iyang mga ginikanan.a Human mapadayag ang iyang gibati ngadto sa usa ka Kristohanong ansiyano ug sa iyang asawa, siya misulat kanila: “Daghang salamat sa paggahin ug panahon sa pagpakigsulti kanako. Wala lang kamo mahibalo kon unsa ka hinungdanon kanako nga kamo nagtagad. Nagpasalamat ako kang Jehova sa paghatag kanakog mga tawo nga akong masaligan ug ikasulti.”

Si Toula, di pa dugayng nabalo nga babaye nga may duha ka tin-edyer nga anak, naglibog tungod sa nagasamok nga emosyonal ug pinansiyal nga mga kalisdanan. Siya ug ang iyang mga anak regular nga nakadawat sa makapalig-ong mga duaw sa usa ka Kristohanong magtiayon gikan sa kongregasyon. Human niya malamposong nasagubang ang iyang kahimtang, iyang gipadalhan sila ug kard, nga nag-ingon: “Kanunay ko kamong giapil sa akong mga pag-ampo. Akong nahinumdoman ang daghang panahon nga kamo mitabang kanako ug mipaluyo kanako.”

Mibati ka ba usahay nga ikaw “nabug-atan” sa nagausbaw nga mga kapit-os niining kalibotana? (Mateo 11:28) Ang “panahon ug wala-damhang panghitabo” nagdaot ba sa imong kinabuhi pinaagi sa masakit nga mga kasinatian? (Ecclesiastes 9:11) Nan wala ka mag-inusara. Apan ingon sa nakaplagan na sa linibo nga masulub-on, ikaw usab makakaplag ug hinungdanong tabang diha sa Kristohanong kongregasyon sa mga Saksi ni Jehova. Sa unang siglo K.P., nakaplagan ni apostol Pablo nga ang pipila ka kaubang mga magtutuo ilabinang “makapalig-ong tabang” kaniya. (Colosas 4:10, 11) Ikaw mahimong makabaton ug susamang kasinatian.

Pagpaluyo ug Tabang

Diha sa Kristohanon Gregong Kasulatan, ang pulong “kongregasyon” gihubad gikan sa Gregong pulong nga ek·kle·siʹa, nga nagpasabot ug usa ka grupo sa katawhan nga gitigom. Kinaiyanhon nianang pulonga mao ang mga ideya sa panaghiusa ug pagpaluyo sa usag usa.

Ang Kristohanong kongregasyon nagtuboy sa kamatuoran sa Pulong sa Diyos ug nagmantala sa maayong balita sa Gingharian. (1 Timoteo 3:15; 1 Pedro 2:9) Apan, ang kongregasyon nagtagana usab ug espirituwal nga pagpaluyo ug tabang alang niadtong nakig-uban niana. Diha niana, ang usa makakaplag ug usa ka grupo sa mahigugmaon, mahangawaon, ug matinagdanong mga higala, nga andam ug kinabubut-ong motabang ug mohupay sa uban sa mga panahon sa kapit-os.​—2 Corinto 7:5-7.

Ang mga magsisimba ni Jehova kanunayng nakakaplag ug kahilwas ug kasegurohan diha sa iyang kongregasyon. Ang salmista nagpakita nga iyang nasinati ang kangaya ug ang pagbatig kasegurohan taliwala sa nagkatigom nga katawhan sa Diyos. (Salmo 27:4, 5; 55:14; 122:1) Sa susama karong adlawa, ang Kristohanong kongregasyon maoy kahugpongan sa kaubang mga magtutuo nga nagpalig-on ug nagdasig sa usag usa.​—Proverbio 13:20; Roma 1:11, 12.

Ang mga membro sa kongregasyon gitudloan sa ‘pagbuhat sa maayo ngadto sa tanan, apan ilabina kanilang iglabot [kanila] sa pagtuo.’ (Galacia 6:10) Ang pinasukad-sa-Bibliyang edukasyon nga ilang nadawat nagpalihok kanila nga ipasundayag ang inigsoong gugma ug malumong pagbati sa usag usa. (Roma 12:10; 1 Pedro 3:8) Ang espirituwal nga mga igsoong lalaki ug babaye diha sa kongregasyon napalihok nga mahimong maluloton, makigdaiton, ug mabination kaayo. (Efeso 4:3) Inay kay pormal lamang nga mga magsisimba, sila nagpakitag mahigugmaong kahangawa alang sa uban.​—Santiago 1:27.

Busa, diha sa kongregasyon ang mga tawong nabug-atan sa hilabihan makakaplag sa mainitong atmospera sa samag-pamilya nga palibot. (Marcos 10:29, 30) Ang pagbati sa pagkanahisakop sa usa ka suod ug mahigugmaong grupo nagpalig-on kanila. (Salmo 133:1-3) Pinaagi sa kongregasyon, “ang kasaligan ug mabuot nga ulipon” nagtagana ug makapahimsog nga espirituwal nga “pagkaon sa hustong panahon.”​—Mateo 24:45.

Tabang Gikan sa Mahigugmaong mga Magtatan-aw

Ang mga membro sa Kristohanong kongregasyon makadahom nga makaplagan diha niana ang mahigugmaon, masinaboton, ug kuwalipikadong mga magbalantay nga nagtaganag espirituwal nga pagpaluyo ug pagdasig. Ang mga magbalantay nga aduna nianang mga hiyasa maoy sama sa “usa ka tagoanang dapit gikan sa hangin ug usa ka dapit nga salipdanan gikan sa bagyo.” (Isaias 32:1, 2) Ang tinudlo-sa-espiritu nga mga ansiyano, o mga magtatan-aw, nag-atiman sa samag-karnerong katawhan sa Diyos, nagdasig sa mga masakiton ug masulub-on, ug nagtinguha sa pagpasig-uli niadtong nakasala.​—Salmo 100:3; 1 Pedro 5:2, 3.

Siyempre, ang lawas sa mga ansiyano sa kongregasyon dili usa ka grupo sa propesyonal nga mga terapista o mga espesyalista sa panglawas, nga makaayo sa pisikal o mental nga mga suliran sa panglawas nga giatubang sa mga isigkamagtutuo. Niining sistemaha sa mga butang, ang nagmasakiton sa gihapon “nagkinahanglan ug mananambal.” (Lucas 5:31) Bisan pa niana, ang maong mga magbalantay makatabang niadtong kinsa nanginahanglan sa espirituwal nga paagi. (Santiago 5:14, 15) Kon posible, ang mga ansiyano maghikay usab ug laing tabang.​—Santiago 2:15, 16.

Kinsa ang anaa sa luyo nianang mahigugmaong kahikayan? Si Jehova nga Diyos mismo! Si manalagnang Ezequiel naghulagway kang Jehova nga nagpahayag: “Pangitaon ko ang akong mga karnero ug atimanon sila. . . . Luwason ko sila gikan sa tanang dapit diin sila nagkatibulaag . . . Ako mismo ang magpakaon sa akong mga karnero, ug ako mismo ang magpakatulog kanila.” Ang Diyos may kahangawa usab sa maluya ug mahuyang nga mga karnero.​—Ezequiel 34:11, 12, 15, 16.

Tinuod nga Tabang sa Hustong Panahon

Ang tinuod nga tabang sa tinuoray mabatonan ba diha sa Kristohanong kongregasyon? Oo, ug ang mosunod nga mga panig-ingnan nag-ilustrar sa nagkadaiyang mga kahimtang nga niana ang kongregasyon napamatud-ang makatabang.

◆ Pagkamatay sa usa ka minahal. Ang bana ni Anna namatay human sa laygay nga sakit. “Sukad niadto, ako nakadawat ug mainitong gugma gikan sa Kristohanong panag-igsoonay,” siya nag-ingon. “Ang padayong malulotong mga pulong sa pagpaluyo ug pagdasig gikan sa akong kaubang mga magtutuo, nga naglakip sa ilang kinasingkasing nga mga halog, naglipay kanako inay kay mobating masulub-on kaayo, ug ako nagpasalamat kang Jehova. Ang ilang gugma nagpabati kanakong gipaluyohan pag-ayo, gilig-on pag-ayo, mabinationg giatiman.” Ikaw usab tingali dihay masakit nga kasinatian sa pagkahanaw sa usa ka minahal diha sa kamatayon. Sa maong mga panahon, ang mga membro sa kongregasyon makataganag kinahanglanon-kaayong kahupayan ug emosyonal nga pagpaluyo.

◆ Sakit. Si Arthur, usa ka nagapanawng magtatan-aw nga taga-Polandia, regular nga miduaw sa mga kongregasyon sa Sentral Asia aron sa paglig-on kanila sa espirituwal nga paagi. Panahon sa usa niini nga mga duaw, siya nahimong masakiton kaayo ug samtang siya nagpaayo nakaagom siyag seryosong mga komplikasyon. “Buot kong isulti kaninyo kon sa unsang paagi ang mga igsoong lalaki ug babaye sa [usa ka siyudad sa Kazakhstan] nag-atiman kanako,” nahinumdom si Arthur uban ang lalom nga pagpabili. “Ang mga igsoong lalaki ug babaye, kadaghanan kanila dili nako kaila​—ug bisan mga interesado​—nagdalag salapi, mga pagkaon, ug tambal. . . . Ug ilang gibuhat kana nga may dakong kangaya.

“Handurawa ang akong gibati sa dihang akong nadawat ang usa ka sobre nga may diyutayng salapi ug sa mosunod nga sulat: ‘Minahal nga Igsoon, Ako nagpadala kanimo ug mainitong mga pangomosta. Gihatagan ako ni Mama ug salapi alang sa sorbetes, apan mihukom ako nga ihatag kini kanimo alang sa tambal. Palihog pagpaayo sa labing madali. Si Jehova nagkinahanglan kanato sa taas nga panahon. Pag-ayoayo. Ug suginli kami ug pipila pa ka maayo, matulon-anong mga estorya. Vova.’” Oo, sumala sa gipakita niining kasoha, ang mga batan-on ug mga tigulang diha sa kongregasyon makataganag makapalig-ong tabang sa mga panahon sa pagkasakit.​—Filipos 2:25-29.

◆ Depresyon. Si Teri may kinasingkasing nga tinguha sa pag-alagad isip usa ka payunir, o bug-os-panahong magmamantala sa Gingharian. Apan, tungod sa mga kalisdanan siya kinahanglang mohunong sa pagpayunir. “Gibati ko ang hilabihang pagkasad-an sa pagsulay sa pag-alagad niini nga kapasidad ug wala gani makompleto ang usa ka tuig sa payunir nga pag-alagad,” siya nag-ingon. Si Teri sayop nga nagtuo nga ang pag-uyon ni Jehova nag-agad lamang sa gidak-on sa iyang pag-alagad kaniya. (Itandi ang Marcos 12:41-44.) Naguol pag-ayo, iyang gilain ang iyang kaugalingon. Apan unya ang makapalagsik nga tabang midangat gikan sa kongregasyon.

Si Teri nahinumdom: “Usa ka edarang payunir nga babaye mitabang dayon kanako ug naminaw kanako samtang akong gipadayag ang akong gibati. Sa dihang ako mibiya sa iyang balay, migaan ang akong paminaw. Sukad niadtong panahona padayon, kining payunir nga babaye ug ang iyang bana, nga usa ka ansiyano sa kongregasyon, nagtaganag bililhong tabang. Nakadawat ako matag adlaw ug mga tawag sa telepono gikan kanila nga nangomosta kanako. . . . Gitugotan nila ako usahay nga moapil sa ilang pagtuon sa pamilya, nga nagpasilsil kanako sa kahinungdanon nga ang mga pamilya magpabiling suod sa usag usa.”

Dili talagsaon sa kadaghanan​—bisan sa dedikadong mga Kristohanon​—nga magmagul-anon, maluya, ug magmamingawon. Pagkamapasalamaton nato nga ang mahigugmaon, dili-hakog nga tabang mabatonan diha sa kongregasyon sa Diyos!​—1 Tesalonica 5:14.

◆ Mga katalagman ug mga aksidente. Handurawa ang imong kaugalingon diha sa kahimtang sa usa ka pamilya nga may upat ka membro nga nawad-an sa tanan nilang kabtangan sa dihang ang ilang balay nasunog. Wala madugay ilang nabatonan ang ilang gitawag nga “usa ka makapadasig nga kasinatian nga kanunayng makapatandog kanamo ug nakapadayeg kanamo sa tinuod nga gugma taliwala sa katawhan ni Jehova.” Sila nagpatin-aw: “Halos dihadiha daghan kaayo ang sinserong mga tawag sa telepono sa pagpaluyo ug simpatiya gikan sa among espirituwal nga mga igsoong lalaki ug babaye. Ang telepono kanunayng mikiring. Ang tinuod nga kahangawa ug gugma sa tanan makapatandog gayod nga kami mihilak sa kamapasalamaton.”

Wala madugay, usa ka dakong grupo sa mga igsoong lalaki ang giorganisar sa mga ansiyano sa kongregasyon, ug sa pipila ka adlaw, ilang gitukod ang usa ka bag-ong balay alang niining pamilyaha. Usa ka silingan mipatugbaw: “Kinahanglang makita nimo kini! Tanang matang sa mga tawo ang nagtrabaho didto​—mga lalaki, mga babaye, mga itom, mga Katsilag kaliwat!” Kini maoy tin-awng pamatuod sa inigsoong gugma.​—Juan 13:35.

Ang kaubang mga Kristohanon mihatag usab sa pamilya ug sapot, pagkaon, ug salapi. Ang amahan nagkomento: “Kini nahitabo panahon sa Pasko sa dihang ang tanan nagahatag ug mga gasa, apan kita matinud-anong makaingon nga wala nay lain pa nga nakapahimulos sa matang sa tinuod, naghingaping kamahinatagon nga atong gibuhat.” Ug sila nagdugang: “Ang mga handomanan sa sunog anam-anam nga napapas ug napulihan sa malipayong mga handomanan sa malulotong mga buhat ug maayong mga higala. Nagpasalamat kami sa among mahigugmaong langitnong Amahan, si Jehova, nga kami nakabaton nianang kahibulongan, nahiusang pamilya sa mga igsoon sa yuta, ug kami mapasalamaton kaayo nga nahimong bahin niana!”

Siyempre, ang maong panginlabot dili posible, ni dahomon kini, diha sa matag trahedyang ingon niana. Apan kining hitaboa nag-ilustrar gayod sa pagpaluyo nga mahimong itagana sa kongregasyon.

Kaalam Gikan sa Kahitas-an

Daghan ang nakakaplag ug laing tinubdan sa tabang ug kalig-on diha sa Kristohanong kongregasyon. Unsa man kana? Mga publikasyon nga ginaandam sa “kasaligan ug mabuot nga ulipon.” Ang ilado niini mao ang mga magasing Ang Bantayanang Torre ug Pagmata! Aron sa pagtaganag maalamong tambag ug praktikal nga instruksiyon, kining mga publikasyona sa panguna nagasalig diha sa kaalam sa Diyos nga makaplagan sa Bibliya. (Salmo 119:105) Ang Kasulatanhong impormasyon gibuligan sa responsable ug awtoritatibong panukiduki bahin sa mga ulohan sama sa mental nga depresyon, pagpaayo gikan sa pag-abuso, nagkadaiyang katilingbanon ug ekonomikanhong mga suliran, mga hagit nga giatubang sa mga batan-on, ug mga kalisdanan nga linain sa nagaugmad nga mga nasod. Labaw sa tanan, kining mga publikasyona nagtuboy sa dalan sa Diyos ingong ang kinamaayohang dalan sa kinabuhi.​—Isaias 30:20, 21.

Matag tuig, ang Watch Tower Society makadawat ug linibo ka sulat sa pagpasalamat. Pananglitan, mahitungod sa usa ka artikulo sa Pagmata! bahin sa paghikog, usa ka batan-ong lalaki sa Rusya misulat: “Tungod sa akong kiling sa depresyon, . . . daghang panahon nga akong gihunahuna ang paghikog. Kini nga artikulo nagpalig-on sa akong pagtuo nga ang Diyos motabang kanako sa pagdumala sa akong mga problema. Buot niyang mabuhi ako. Ako nagpasalamat kaniya sa iyang gihatag nga pagpaluyo pinaagi niini nga artikulo.”

Kon ang way-hunong nga kasamok niining kalibotana daw mapintas na kaayo nga dili na masagubang, ikaw makaseguro nga adunay luwas nga dangpanan diha sa Kristohanong kongregasyon. Sa pagkamatuod, kon ang umaw nga desyerto niining way-gugma nga sistema magpaluya kanimo, ikaw makakaplag ug makapalig-on-pag-usab nga lunhawng luna diha sa organisasyon ni Jehova. Human masinati ang maong pagpaluyo, mahimo usab nimong ipatugbaw ang mga pagbati sa usa ka Kristohanong babaye nga malamposong nakasagubang sa grabeng balatian sa iyang bana ug misulat: “Tungod sa gugma ug pag-atiman nga gipakita kanamo, gibati nako nga daw si Jehova nagsapnay kanamo latas niini nga krisis. Pagkadako sa akong pasalamat nga nahimong bahin sa hamiling organisasyon ni Jehova!”

[Footnote]

[Mga hulagway sa panid 26]

Kita makatagana ug makapalig-ong tabang alang sa masakiton, sa nagbangotan, ug sa uban pa