“Dayega si Jehova, Oh Kalag Ko”

“SA DILI pa dugayng mga bulan ang akong ministeryo nahimong makapalaay ug dili makapalipay,” matod ni Nancy.a Sa mga napulo ka tuig, siya nag-alagad ingong payunir, usa ka bug-os-panahong magwawali sa maayong balita. Apan, siya midugang: “Wala ako makaangay sa nagakahitabo kanako. Maorag nagtanyag ako sa mensahe sa Gingharian nga walay kadasig ug dili kinasingkasing. Unsay akong angayng buhaton?”

Tagda, usab, ang kaso ni Keith, ansiyano sa usa ka kongregasyon sa mga Saksi ni Jehova. Pagkadako sa iyang kakurat sa pagkadungog sa iyang asawa nga miingon: “Duna gyod kay gihunahuna. Sa bag-o lang nimong pag-ampo, imong gipasalamatan ang pagkaon, bisag dili karon tingkaon!” Si Keith miadmitir: “Akong nakita nga ang akong mga pag-ampo nahimong mekanikal.”

Sa walay duhaduha, dili nimo buot nga ang imong mga pahayag sa pagdayeg kang Jehova nga Diyos mahimong bugnaw ug mekanikal. Sa kasukwahi, gusto nimong kini mahimong kinasingkasing, nga magsumikad sa mga pagbati sa pagkamapasalamaton. Hinunoa, ang pagbati dili masul-ob o mahubo sama sa usa ka besti. Kinahanglang magtubod kini gikan sa sulod sa usa ka tawo. Sa unsang paagi ang usa mobating mapasalamaton nga kinasingkasing? Ang ika-103 nga Salmo nagtagana kanatog pagsabot niining bahina.

Si Haring David sa karaang Israel nagkomposo sa ika-103 nga Salmo. Siya misugod uban sa mga pulong nga: “Dayega si Jehova, Oh kalag ko, bisan ang tanan sa sulod kanako, ang iyang balaang ngalan.” (Salmo 103:1) “Ang pulong dayega, nga gitumong sa Diyos,” matod sa usa ka basahon, “nagkahulogan sa pagdayeg, nga nagpasabot kanunay ug kusganong pagbati alang kaniya maingon man ang pagbati sa pagkamapasalamaton.” Kay nagtinguha sa pagdayeg kang Jehova uban ang kasingkasing nga puno sa gugma ug pagpabili, si David nag-awhag sa iyang kalag​—iyang kaugalingon—​sa ‘pagdayeg kang Jehova.’ Apan unsay nagpatungha niining mainitong pagbati diha sa kasingkasing ni David ngadto sa Diyos nga iyang gisimba?

Si David nagpadayon: “Ayawg kalimti ang tanan niyang [ni Jehova] mga buhat.” (Salmo 103:2) Ang mapasalamatong pagbati kang Jehova dayag nga nalangkit sa mapabilhong pagpamalandong sa ‘iyang mga buhat.’ Unsa man gayod ang mga buhat ni Jehova nga diha sa hunahuna ni David? Ang paglantaw sa kalalangan ni Jehova nga Diyos, sama sa punog-bituon nga kalangitan sa usa ka walay-dag-om nga kagabhion, sa pagkatinuod magpapuno sa kasingkasing uban ang pagpasalamat sa Maglalalang. Ang bituonong kalangitan nakatandog pag-ayo kang David. (Salmo 8:3, 4; 19:1) Apan, sa ika-103 nga Salmo 103, nahinumdoman ni David ang laing matang sa kalihokan ni Jehova.

Si Jehova “Nagapasaylo sa Tanan Nimong Kasaypanan”

Niini nga salmo, giasoy ni David ang mga buhat sa mahigugmaong-kalulot sa Diyos. Sa pagtumong sa una ug panguna niini, siya miawit: ‘Si Jehova nagapasaylo sa tanan nimong kasaypanan.’ (Salmo 103:3) Si David nasayod gayod sa iyang makasasalang kahimtang. Human si Natan nga propeta miatubang kaniya bahin sa iyang mananapawng relasyon uban kang Bat-seba, si David miangkon: “Batok kanimo [Jehova], kanimo lamang, nakasala ako, ug nabuhat ko ang daotan sa imong pagtan-aw.” (Salmo 51:4) Uban ang masulub-ong kasingkasing, siya nangaliyupo: “Pabori ako, Oh Diyos, sumala sa imong mahigugmaong-kalulot. Sumala sa kadagaya sa imong kaluoy palaa ang akong mga kalapasan. Hugasi ako sa bug-os gikan sa akong kasaypanan, ug hinloi ako bisan gikan sa akong kasal-anan.” (Salmo 51:1, 2) Pagkadako sa gibating pasalamat ni David nga gipasaylo! Ingong di-hingpit nga tawo, nakahimo siyag uban pang mga sala sa iyang kinabuhi, apan wala gayod siya mapakyas sa paghinulsol, sa pagdawat ug pagbadlong, ug sa pagtul-id sa iyang mga dalan. Ang pagpamalandong sa kahibulongang mga buhat sa Diyos sa kalulot ngadto kaniya nagpalihok kang David sa pagdayeg kang Jehova.

Dili ba usab kita makasasala? (Roma 5:12) Bisan si apostol Pablo nasubo: “Ako nahimuot gayod sa balaod sa Diyos sumala sa akong pagkatawo sa sulod, apan akong nakita sa akong mga sangkap ang laing balaod nga nagapakigbugno batok sa balaod sa akong kaisipan ug nagadala kanakong bihag ngadto sa balaod sa sala nga ania sa akong mga sangkap. Alaot ako nga tawo! Kinsa ang magaluwas kanako gikan sa lawas nga nagaagom niining kamatayon?” (Roma 7:22-24) Pagkadako sa atong pasalamat nga si Jehova wala magtala sa atong mga kalapasan! Siya malipayong magpapas niini kon kita maghinulsol ug mangayog pasaylo.

Si David nagpahinumdom sa iyang kaugalingon: “[Si Jehova] nagaayo sa tanan nimong balatian.” (Salmo 103:3) Sanglit ang pag-ayo maoy buhat sa pagpasig-uli, nagpasabot kinig labaw pa kay sa pagpasaylo sa kasaypanan. Naglakip kini sa pagkuha sa “balatian”​—ang daotang mga resulta sa kasaypanan sa atong mga dalan. Sa bag-ong kalibotan nga iyang himoon, si Jehova magwagtang gayod sa pisikal nga mga resulta sa sala, sama sa sakit ug kamatayon. (Isaias 25:8; Pinadayag 21:1-4) Apan, bisan karon ang Diyos nagaayo kanato sa espirituwal nga balatian. Alang sa pipila, naglakip kini sa di-maayong tanlag ug naputol nga relasyon uban kaniya. “Ayawg kalimot” sa nahimo na ni Jehova alang sa matag usa kanato sa personal nga paagi niining bahina.

Siya “Nagabawi sa Imong Kinabuhi”

“[Si Jehova] nagabawi sa imong kinabuhi gikan sa gahong,” si David miawit. (Salmo 103:4) Ang “gahong” mao ang komon nga lubnganan sa katawhan​—ang Sheol, o Hades. Bisan sa wala pa mahimong hari sa Israel, si David nameligrong mamatay. Pananglitan, si Haring Saul sa Israel naghambin ug mabunoong pagdumot kang David ug misulay sa pagpatay kaniya sa daghang okasyon. (1 Samuel 18:9-29; 19:10; 23:6-29) Ang mga Filistehanon buot usab nga mopatay kang David. (1 Samuel 21:10-15) Apan sa matag higayon, si Jehova nagluwas kaniya gikan “sa gahong.” Pagkadako sa gibating pasalamat ni David sa paghinumdom niining mga buhata ni Jehova!

Komosta ang bahin kanimo? Gipalig-on ka ba ni Jehova latas sa mga yugto sa depresyon o sa mga panahon nga namatyan? O may nahibaloan ka bang mga kahimtang nga iyang gibawi ang kinabuhi sa iyang matinumanong mga Saksi gikan sa kamatayon sa atong mga panahon? Tingali natandog ka sa pagbasa sa mga asoy sa iyang mga buhat sa pagluwas diha sa mga panid niining magasina. Nganong dili maggahin ug panahon nga palandongon sa mapabilhong paagi kining mga buhat sa matuod nga Diyos? Ug, siyempre, kitang tanan adunay rason nga magmapasalamaton kang Jehova sa paglaom sa pagkabanhaw.​—Juan 5:28, 29; Buhat 24:15.

Si Jehova naghatag kanatog kinabuhi ug nianang mga butang nga makapahimo niining malipayon ug takos nga mabuhi. Ang salmista mipahayag nga ang Diyos “magpurongpurong kanimo uban ang mahigugmaong-kalulot ug mga kaluoy.” (Salmo 103:4) Sa oras sa atong panginahanglan, si Jehova dili mobiya kanato kondili motabang kanato pinaagi sa iyang makitang organisasyon ug sa tinudlong mga ansiyano, o mga magbalantay, diha sa kongregasyon. Ang maong tabang magpaarang kanato sa pag-atubang sa usa ka masulayong kahimtang nga dili mawad-an sa atong pagtahod sa kaugalingon ug dignidad. Ang Kristohanong mga magbalantay nagaatiman pag-ayo sa mga karnero. Ilang dasigon ang masakiton ug magul-anon ug buhaton ang tanan nilang mahimo sa pagpasig-uli niadtong nangahulog. (Isaias 32:1, 2; 1 Pedro 5:2, 3; Judas 22, 23) Ang espiritu ni Jehova nagadasig niining mga magbalantay nga magmabination ug magmahigugmaon sa panon. Ang iyang “mahigugmaong-kalulot ug mga kaluoy” nahisama gayod sa usa ka purongpurong nga nagadayandayan kanato ug nagahatag kanatog dignidad! Kay dili gayod malimot sa iyang mga buhat, atong dayegon si Jehova ug ang iyang balaang ngalan.

Nagpadayon sa iyang pagmaymay sa kaugalingon, ang salmistang David miawit: “[Si Jehova] nagatagbaw sa imong panahon sa kinabuhi kon unsay maayo; ang imong pagkabatan-on padayong nagabag-o sama nianang iya sa agila.” (Salmo 103:5) Ang kinabuhing ihatag ni Jehova maoy makapatagbaw ug makapalipay. Aw, ang kahibalo sa kamatuoran mismo maoy bahanding dili ikatandi ug usa ka tinubdan sa hilabihang kalipay! Ug tagda kon unsa gayod ka makapatagbaw ang buluhaton nga gihatag ni Jehova kanato, kanang pagsangyaw ug paghimog mga tinun-an. Pagkadakong kangaya ang pagkakaplag ug usa ka tawong maikagon sa pagkat-on bahin sa matuod nga Diyos ug sa pagtabang kaniya sa pagkahibalo bahin kang Jehova ug sa pagdayeg kaniya! Apan, kon sa atong dapit aduna may maminaw o wala, maoy usa ka dakong pribilehiyo ang pagpakigbahin sa buluhaton nga nalangkit sa pagdayeg sa ngalan ni Jehova ug sa pagbayaw sa iyang pagkasoberano.

Samtang nagapadayon sa buluhaton sa pagwali sa Gingharian sa Diyos, kinsa bay dili kapuyan o maluya? Apan si Jehova padayong nagabag-o sa kusog sa iyang mga alagad, nga nagahimo kanilang ‘samag mga agila’ nga may puwersadong mga pako ug makalupad nga taas kaayo diha sa kalangitan. Pagkamapasalamaton nato nga ang atong mahigugmaong langitnong Amahan nagatagana sa maong “dinamikong kusog” aron kita matinumanong makatuman sa atong ministeryo adlaw-adlaw!​—Isaias 40:29-31.

Sa pag-ilustrar: Si Clara adunay bug-os-panahong sekular nga trabaho ug naggugol usab ug 50 oras matag bulan diha sa ministeryo sa kanataran. Siya miingon: “Usahay kapoyon ko, ug akong pugson ang akong kaugalingon sa pag-alagad sa kanataran tungod lamang kay nakigsabot akog igsoon nga akong kuyogan. Apan iniggula nako sa kanataran, ako kanunayng mobating nabaskog.” Ikaw usab mahimong nakasinatig kabaskog gumikan sa pagpaluyo sa Diyos diha sa Kristohanong ministeryo. Hinaot nga ikaw matukmod sa pag-ingon, sama kang David diha sa pangbukas nga mga pulong niini nga salmo: “Dayega si Jehova, Oh kalag ko, bisan ang tanan sa sulod kanako, ang iyang balaang ngalan.”

Si Jehova Nagaluwas sa Iyang Katawhan

Ang salmista miawit usab: “Si Jehova nagabuhat ug pagkamatarong ug hudisyal nga mga desisyon alang sa tanang ginalimbongan. Iyang gipahibalo ang iyang mga paagi kang Moises, ang iyang mga pakiglabot bisan sa mga anak ni Israel.” (Salmo 103:6, 7) Lagmit, si David naghunahuna sa ‘paglimbong’ sa mga Israelinhon ilalom sa Ehiptohanong mga malupigon sa mga adlaw ni Moises. Ang pagpamalandong kon sa unsang paagi gipahibalo ni Jehova ang iyang mga paagi sa pagluwas ngadto kang Moises nagpatungha gayod sa pagbati sa pagpasalamat diha sa kasingkasing ni David.

Kita usab matukmod sa samang pagkamapasalamaton pinaagi sa pagpalandong sa mga pakiglabot sa Diyos sa mga Israelinhon. Apan dili kita angayng malimot sa pagpalandong sa mga kasinatian sa modernong-adlaw nga mga alagad ni Jehova, sama nianang gihisgotan sa mga kapitulo 29 ug 30 sa librong Mga Saksi ni Jehova—Mga Magmamantala sa Gingharian sa Diyos. Ang mga asoy nga gipamatud-an diha niana ug sa ubang mga publikasyon sa Watch Tower Society magpaarang kanato sa pagsabot kon sa unsang paagi si Jehova nagtabang sa iyang katawhan sa modernong mga panahon sa pagsagubang sa pagkabilanggo, pag-atake sa magubtanong panon, mga pagdili, mga kampong konsentrasyon, ug mga kampo sa pinugos nga pamuo. Dihay mga pagsulay sa nagusbat-sa-gubat nga kayutaan, sama sa Burundi, Liberia, Rwanda, ug sa kanhing Yugoslavia. Bisan kanus-a nga dunay paglutos, ang kamot ni Jehova kanunayng nagpalig-on sa iyang matinumanong mga alagad. Ang pagpamalandong niining mga buhat sa atong dakong Diyos, si Jehova, makaapekto kanato sama nga nakaapekto kang David ang pagpamalandong sa asoy sa pagluwas gikan sa Ehipto.

Tagda usab kon unsa ka maluluy-on ang pagluwas ni Jehova kanato gikan sa kabug-at sa sala. Iyang gitagana “ang dugo ni Kristo” aron “mohinlo sa atong mga tanlag gikan sa patayng mga buhat.” (Hebreohanon 9:14) Kon kita maghinulsol sa atong mga sala ug mangayog pasaylo pinasikad sa giulang dugo ni Kristo, ipahilayo sa Diyos ang atong mga kalapasan gikan kanato​—“ingon ka layo sa sidlakan gikan sa kasadpan”—​ug magpasig-uli kanato diha sa iyang pag-uyon. Ug hunahunaa ang mga tagana ni Jehova pinaagi sa Kristohanong mga tigom, makapalig-ong kaubanan, mga magbalantay sa kongregasyon, ug sa gipasukad-sa-Bibliyang mga publikasyon nga atong madawat pinaagi sa “kasaligan ug mabuot nga ulipon.” (Mateo 24:45) Dili ba kining mga buhata ni Jehova magtabang kanato sa paglig-on sa atong relasyon uban kaniya? Si David nagmantala: “Si Jehova maluluy-on ug mapuangoron, mahinay sa pagkasuko ug dagaya sa mahigugmaong kalulot. . . . Wala niya buhata kanato ang angay sa atong mga sala; ni siya nagabalos kanato sa angay sa atong mga kasal-anan.” (Salmo 103:8-14) Ang pagpamalandong sa mahigugmaong pag-atiman ni Jehova magpalihok gayod kanato sa paghimaya kaniya ug pagbayaw sa iyang balaang ngalan.

“Dayega si Jehova, Kamong Tanan Niyang mga Buhat”

Sa pagtandi sa pagkaimortal ni Jehova, ang “Diyos sa kahangtoran,” ang “mga adlaw” sa “mortal nga tawo” mubo gayod​—“sama nianang iya sa lunhawng balili.” Apan si David mapabilhong namalandong: “Ang mahigugmaong-kalulot ni Jehova gikan sa panahong walay katinoan bisan ngadto sa panahong walay katinoan ngadto kanilang nahadlok kaniya, ug ang iyang pagkamatarong ngadto sa mga anak sa mga anak, ngadto kanilang nanagsunod sa iyang pakigsaad ug ngadto kanilang nagahinumdom sa iyang mga mando aron sa pagtuman niini.” (Genesis 21:33, potnot; Salmo 103:15-18) Si Jehova dili malimot niadtong nahadlok kaniya. Sa hustong panahon, iyang hatagan silag kinabuhing walay kataposan.​—Juan 3:16; 17:3.

Sa pagpahayag sa iyang pagpabili sa pagkahari ni Jehova, si David miingon: “Si Jehova lig-ong nagtukod sa iyang trono sa kalangitan; ug ibabaw sa tanang butang ang iyang pagkahari nagamando.” (Salmo 103:19) Bisag ang pagkahari ni Jehova gipadayag sa makitang paagi sa usa ka panahon pinaagi sa gingharian sa Israel, ang iyang trono atua gayod sa langit. Pinasikad sa iyang pagka-Maglalalang, si Jehova mao ang Soberanong Magmamando sa uniberso ug nagabuhat sa iyang balaang kabubut-on sa langit ug dinhi sa yuta sumala sa iyang mga katuyoan.

Si David nag-awhag pa gani sa mga linalang nga mga manulonda sa langit. Siya miawit: “Dayega si Jehova, Oh kamong mga manulonda niya, gamhanan sa kagahom, nga nagatuman sa iyang pulong, pinaagi sa pagpaminaw sa tingog sa iyang pulong. Dayega si Jehova, kamong tanan niyang mga panon, kamong mga alagad niya, nga nagabuhat sa iyang kabubut-on. Dayega si Jehova, kamong tanan niyang mga buhat, sa tanang dapit sa iyang dominyo. Dayega si Jehova, Oh kalag ko.” (Salmo 103:20-22) Dili ba ang atong pagpalandong sa mga buhat sa mahigugmaong-kalulot ni Jehova kanato magpalihok usab kanato sa pagdayeg kaniya? Segurado gayod! Ug kita makaseguro nga ang atong tingog sa personal nga pagdayeg ngadto sa Diyos dili mawala taliwala sa kusganong koro sa mga magdadayeg nga maglakip bisan sa matarong nga mga manulonda. Hinaot nga kita kinasingkasing nga magdayeg sa atong langitnong Amahan, nga kanunayng magsultig maayo bahin kaniya. Sa pagkatinuod, atong itisok sa kasingkasing ang mga pulong ni David, “Dayega si Jehova, Oh kalag ko.”

[Footnote]

[Hulagway sa panid 23]

Namalandong si David sa mga buhat ni Jehova sa mahigugmaong-kalulot. Ikaw ba usab?