Watchtower ONLINE NGA LIBRARYA
Watchtower
ONLINE NGA LIBRARYA
Cebuano
  • BIBLIYA
  • PUBLIKASYON
  • MGA TIGOM
  • w99 6/1 p. 28-31
  • Mga Isigkamagbubuhat ni Pablo—Kinsa Sila?

Walay video nga available.

Sorry, dunay problema sa pag-load sa video

  • Mga Isigkamagbubuhat ni Pablo—Kinsa Sila?
  • Ang Bantayanang Torre Nagapahayag sa Gingharian ni Jehova—1999
  • Sub-ulohan
  • Susamang Materyal
  • Mga Kauban sa Pagbiyahe ug mga Tig-abiabi
  • Daghan Kaayong Higala
  • Maunongong Pagpaluyo Samtang Nabilanggo
  • “Kami mga Isigkamagbubuhat sa Diyos”
  • “Bug-os nga Pagpamatuod”
    “Bug-os nga Pagpamatuod” sa Gingharian sa Diyos
  • Ayawg Kahadlok—Si Jehova ang Imong Magtatabang
    Ang Bantayanang Torre Nagapahayag sa Gingharian ni Jehova (Tun-anan)—2020
  • “Hinlo Ko Gikan sa Dugo sa Tanang Tawo”
    “Bug-os nga Pagpamatuod” sa Gingharian sa Diyos
  • Si Pablo sa Roma
    Akong Basahon sa mga Estorya sa Bibliya
Uban Pa
Ang Bantayanang Torre Nagapahayag sa Gingharian ni Jehova—1999
w99 6/1 p. 28-31

Mga Isigkamagbubuhat ni Pablo​—Kinsa Sila?

DIHA sa basahon sa Bibliya sa Mga Buhat ug diha sa mga sulat ni Pablo gihisgotan ang mga usa ka gatos ka indibiduwal, mga membro sa unang-siglo nga Kristohanong kongregasyon kinsa personal nga nakig-uban sa “apostol ngadto sa kanasoran.” (Roma 11:13) Daghan ang nahibaloan bahin sa ubay-ubay kanila. Malagmit nasayod ka sa mga kalihokan ni Apolos, Bernabe, ug Silas. Sa laing bahin, tingali malisdan kang mosulti ug daghan mahitungod kang Arquipo, Claudia, Damaris, Lino, Persida, Pudente, ug Sopater.

Sa lainlaing mga yugto ug ubos sa nagkadaiyang mga kahimtang, daghang indibiduwal ang nagdulag aktibong papel sa pagpaluyo sa ministeryo ni Pablo. Ang pipila sama ni Aristarko, Lucas, ug Timoteo nag-alagad sa kiliran sa apostol sulod sa daghang tuig. Ang uban kauban niya sa dihang nabilanggo siya o samtang nagbiyahe siya, isip mga kauban sa pagbiyahe o isip mga tig-abiabi. Ikasubo, ang uban, sama kang Alejandro, Demas, Hermogenes, ug Figelo, wala molahutay diha sa Kristohanong pagtuo.

Mahitungod sa daghang uban pang higala ni Pablo, sama kang Asinkrito, Hermas, Julia, o Filologo sa paghisgot ug pipila lang, wala kaayo kitay nasayran bahin kanila gawas sa ilang mga ngalan. Sa kaso sa igsoong babaye ni Nereo o inahan ni Rufo o kadtong sa banay ni Chloe, wala kita mahibalo bisan sa ilang mga ngalan. (Roma 16:13-15; 1 Corinto 1:11) Bisan pa niana, ang pag-usisa sa gamayng impormasyon nga atong nabatonan mahitungod niining usa ka gatos o kapin pa nga mga indibiduwal maglamdag kanato bahin sa paagi nga nag-alagad si apostol Pablo. Kini usab nagtudlo kanato ug usa ka butang maylabot sa mga kaayohan sa pagkanalibotan sa daghan kaayong isigkamagtutuo ug kuging nakigtambayayong uban kanila.

Mga Kauban sa Pagbiyahe ug mga Tig-abiabi

Ang ministeryo ni apostol Pablo naglangkit ug ubay-ubayng pagbiyahe. Ang usa ka magsusulat nagkalkulo nga ang distansiya nga iyang gibiyahe sa mamala ug sa dagat sumala sa gitala diha sa Mga Buhat lamang maoy duolan ug mga 16,000 ka kilometro. Ang pagbiyahe niadtong panahona dili lamang makakapoy kondili peligroso usab. Lakip sa nagkadaiyang mga kapeligrohan nga iyang giatubang mao ang pagkalunod, mga kapeligrohan sa mga suba ug sa mga tulisan, mga kapeligrohan diha sa kamingawan, ug mga kapeligrohan sa dagat. (2 Corinto 11:25, 26) Sa kahaom, si Pablo talagsa rang nag-inusara sa iyang mga panaw gikan sa usa ka dapit ngadto sa lain.

Kadtong mikuyog kang Pablo maoy tinubdan sa pakig-uban, pagdasig, ug praktikal nga pag-abag diha sa ministeryo. Usahay, ibilin sila ni Pablo aron ilang maatiman ang espirituwal nga mga panginahanglan sa bag-ong mga magtutuo. (Buhat 17:14; Tito 1:5) Apan ang presensiya sa mga kauban malagmit nga hinungdanon alang sa kahilwas ug alang sa pagpaluyo sa pag-atubang sa mga kalisdanan sa pagpanaw. Busa ang mga indibiduwal sama kang Sopater, Segundo, Gayo, ug Trofimo, kinsa atong nahibaloan nga nalakip sa mga kauban ni Pablo sa pagbiyahe, mahimong nakabuhat ug hinungdanong papel sa kalamposan sa iyang ministeryo.​—Buhat 20:4.

Sa susama gidawat usab ang tabang nga gitanyag sa mga tig-abiabi. Sa dihang si Pablo miabot diha sa usa ka siyudad diin siya nagplano sa paghimog kampanya sa pagsangyaw o sa pagpalabay lamang sa gabii, ang unang himoon mao ang pagpangitag dapit nga kaestaran. Si bisan kinsa nga ingon ka palabiyahe kang Pablo kinahanglang matulog sa daghan kaayong lainlaing mga higdaan. Mahimo ra siyang makaestar sa usa ka balayng-abotanan, apan gihubit kini sa mga historyano ingong “peligroso ug dili-maayong mga dapit,” busa, kon diin posible, si Pablo malagmit miestar uban sa mga isigkamagtutuo.

Kita nahibalo sa mga ngalan sa pipila sa mga tig-abiabi ni Pablo​—si Aquila ug Prisca, Gayo, Jason, Lydia, Mnason, Filemon, ug Felipe. (Buhat 16:14, 15; 17:7; 18:2, 3; 21:8, 16; Roma 16:23; Filemon 1, 22) Sa Filipos, Tesalonica, ug Corinto, ang maong mga sak-anan nagtagana kang Pablo ug usa ka sentro nga gikan niana iyang maorganisar ang iyang misyonaryong mga kalihokan. Sa Corinto, gibuksan usab ni Ticio Justo ang iyang balay aron sa pagtagana sa apostol ug dapit nga gikan niana siya makapadayon sa iyang pagsangyaw.​—Buhat 18:7.

Daghan Kaayong Higala

Sumala sa madahom, ang mga kaila ni Pablo nahinumdoman sa lainlaing mga paagi tungod sa nagkalahi nga mga kahimtang nga niana iyang nahimamat sila. Si Maria, Persida, Febe, Trifena, ug Trifosa, pananglitan, tanan maoy mga babayeng isigkamagtutuo kinsa gidayeg tungod sa ilang mga paghago ug pagpangabudlay. (Roma 16:1, 2, 6, 12) Gibawtismohan ni Pablo si Crispo, Gayo, ug ang panimalay ni Estefanas. Si Dionisio ug Damaris midawat sa mensahe sa kamatuoran gikan kaniya sa Atenas. (Buhat 17:34; 1 Corinto 1:14, 16) Si Androniko ug Junia, “mga tawong inila taliwala sa mga apostol” kinsa nahimong mga magtutuo nga mas dugay na kay kang Pablo, gitawag nga iyang ‘mga isigkabihag.’ Tingali sila nabilanggo uban kaniya sa pipila ka okasyon. Kining duha, sama kang Herodion, Jason, Lucio, ug Sosipatro, gihisgotan usab ni Pablo ingong iyang “mga paryente.” (Roma 16:7, 11, 21) Bisan tuod ang Gregong pulong nga gigamit dinhi mahimong magkahulogan ug “mga isigkalungsoranon,” ang pangunang kahulogan niini maoy “mga kadugo sa mao ra nga kaliwatan.”

Daghan sa mga higala ni Pablo mibiyahe alang sa maayong balita. Gawas sa iyang mas-nailhang mga kauban, anaa usab si Acaico, Fortunato, ug Estefanas, kinsa mipanaw gikan sa Corinto paingon sa Efeso aron makighisgot uban kang Pablo maylabot sa espirituwal nga kahimtang sa ilang kongregasyon. Si Artemas ug Tiquico andam nga mobiyahe aron makig-uban kang Tito, kinsa nag-alagad sa isla sa Creta, ug si Zenas mibiyahe uban kang Apolos.​—1 Corinto 16:17; Tito 3:12, 13.

Anaa usab kadtong mga indibiduwal nga maylabot kanila si Pablo naghatag ug pipila ka diyutay ug makalingaw nga detalye. Pananglitan, kita gisuginlan nga si Epeneto mao ang “unang-bunga sa Asia,” nga si Erasto mao “ang tinugyanan sa siyudad” sa Corinto, nga si Lucas usa ka mananambal, nga si Lydia usa ka tigbaligyag purpura, ug nga si Tercio maoy gigamit ni Pablo sa pagsulat sa iyang sulat ngadto sa mga taga-Roma. (Roma 16:5, 22, 23; Buhat 16:14; Colosas 4:14) Alang sa tanan nga buot mahibalo ug dugang mahitungod sa maong mga indibiduwal, kining ginagmayng mga detalye sa impormasyon makapahinam tungod sa kamubo niini.

Ang uban sa mga kauban ni Pablo midawat ug personal nga mga mensahe, nga natala na karon diha sa Bibliya. Pananglitan, diha sa iyang sulat ngadto sa mga taga-Colosas, si Pablo miawhag kang Arquipo: “Padayon nga bantayi ang ministeryo nga imong gidawat diha sa Ginoo, nga imong matuman kini.” (Colosas 4:17) Si Euodia ug Sintique dayag nga may personal nga panagbangi nga sulbaron. Busa, si Pablo nagtambag kanila pinaagi sa wala-hinganli nga “kayugo” sa Filipos nga “magbaton ug samang kaisipan diha sa Ginoo.” (Filipos 4:2, 3) Segurado, maayo kini nga tambag alang kanatong tanan.

Maunongong Pagpaluyo Samtang Nabilanggo

Si Pablo makadaghang higayong nabilanggo. (2 Corinto 11:23) Niadtong mga higayona ang lokal nga mga Kristohanon, kon diha man ugaling, malagmit nga naghimo sa tanan nilang maarangan aron himoon ang iyang kasinatian nga mas maagwanta. Sa dihang naagom ni Pablo ang iyang unang pagkabilanggo sa Roma, gitugotan siya sa pag-abang sa iyang kaugalingong balay sulod sa duha ka tuig ug mahimong duawon sa iyang mga higala. (Buhat 28:30) Nianang yugtoa, nagsulat siya ngadto sa mga kongregasyon sa Efeso, Filipos, ug Colosas, maingon man ngadto kang Filemon. Kining maong mga tinubdan nagsugilon kanato ug daghan mahitungod niadtong suod kang Pablo panahon sa iyang pagkabilanggo.

Pananglitan, atong nasayran nga si Onesimo, ang milayas nga ulipon ni Filemon, nakigtagbo kang Pablo sa Roma, maingon man si Tiquico, nga maoy mikuyog kang Onesimo sa iyang pagpanaw balik sa iyang agalon. (Colosas 4:7-9) Anaa usab si Epafrodito, kinsa mihimo sa dugayng pagpanaw gikan sa Filipos nga nagdalag usa ka gasa gikan sa iyang kongregasyon ug dayon nasakit. (Filipos 2:25; 4:18) Kuging nag-alagad uban kang Pablo sa Roma mao si Aristarko, Marcos, ug Jesus nga gitawag ug Justo, nga bahin kanila si Pablo miingon: “Kini lamang sila ang akong mga isigkamagbubuhat sa gingharian sa Diyos, ug kini sila mismo nahimong makapalig-on nga tabang kanako.” (Colosas 4:10, 11) Uban niining tanang matinumanon, anaa ang mas-ilado nga si Timoteo ug Lucas, maingon man si Demas, kinsa sa ulahi, tungod sa gugma sa kalibotan, mibiya kang Pablo.​—Colosas 1:1; 4:14; 2 Timoteo 4:10; Filemon 24.

Dayag, walay usa kanila ang taga-Roma, bisan pa niana sila didto sa kiliran ni Pablo. Tingali ang uban mituyo sa pag-adto aron sa pag-abag kaniya panahon sa iyang pagkabilanggo. Walay duhaduha ang uban mitabang sa iyang mga panginahanglan, ang uban gipadala sa lagyong mga misyon, ug sa uban pa si Pablo nagdiktar ug mga sulat. Pagkamaayong pamatuod sa pagkasuod ug pagkamaunongon nga gibati niining tanan alang kang Pablo ug alang sa buluhaton sa Diyos!

Gikan sa mga paniklop sa pipila sa mga sulat ni Pablo, atong masabtan nga malagmit gilibotan siya ug dakong pundok sa Kristohanong mga igsoong lalaki ug babaye kansang mga ngalan wala malakip sa pipila nga atong nailhan. Sa lainlaing mga higayon, siya misulat: “Ang tanang mga balaan nagapadala sa ilang mga pangomosta” ug, “Ang tanan kanilang uban kanako nagapadala sa ilang mga pangomosta kanimo.”​—2 Corinto 13:13; Tito 3:15; Filipos 4:22.

Sa panahon sa malisod nga ikaduhang pagkabilanggo ni Pablo sa Roma sa dihang nagkaduol ang iyang kamatayon isip martir, ang mga isigkamagbubuhat ni Pablo maoy anaa gayod sa iyang hunahuna. Aktibo gihapon siya sa pagdumala ug pag-organisar sa mga buluhaton sa labing menos pipila kanila. Si Tito ug Tiquico gipadala alang sa mga misyon, si Cresente miadto sa Galacia, si Erasto nagpabilin sa Corinto, si Trofimo nabilin nga may sakit sa Mileto, apan si Marcos ug Timoteo miadto kaniya. Apan, si Lucas diha sa kiliran ni Pablo, ug sa dihang ang apostol misulat sa iyang ikaduhang sulat kang Timoteo, daghang uban pang mga magtutuo, lakip kang Eubulo, Pudente, Lino, ug Claudia, diha niadtong tungora sa pagpadala sa ilang mga pangomosta. Sila sa walay duhaduha naghimo sa ilang maarangan sa pagtabang kang Pablo. Sa samang higayon, si Pablo mismo nagpadalag mga pangomosta ngadto kang Prisca ug Aquila ug sa panimalay ni Onesiforo. Apan, ikasubo nga nianang maong panahon sa kalisdanan, siya gitalikdan ni Demas, ug si Alejandro naghimog daghang kadaot kaniya.​—2 Timoteo 4:9-21.

“Kami mga Isigkamagbubuhat sa Diyos”

Si Pablo talagsa rang nag-inusara panahon sa iyang mga kalihokan sa pagsangyaw. “Ang hulagway nga mopadayag,” matod sa komentarista nga si E. Earle Ellis, “mao kanang iyaha sa usa ka misyonaryo nga may daghan kaayong kauban. Sa pagkatinuod, si Pablo panagsa rang walay mga kauban.” Ubos sa paggiya sa balaang espiritu sa Diyos, si Pablo nakapalihok ug daghang tawo ug nakaorganisar ug epektibong misyonaryong mga kampanya. Gilibotan siya sa suod nga mga kauban, temporaryong mga kaabag, pipila ka kusganong mga personalidad, ug daghang mapainubsanong mga alagad. Apan, sila dili lamang mga isigkamagbubuhat. Dugay man o dali ra ang ilang pagpakigtambayayong o pagpakig-uban kang Pablo, ang bugkos sa Kristohanong gugma ug personal nga panaghigalaay maoy dayag.

Si apostol Pablo nagbaton ug gitawag nga “kinaiyanhong katakos sa pakighigala.” Dako siyag nahimo sa paghatod sa maayong balita ngadto sa kanasoran, apan wala siya magtinguha sa paghimo niini nga nag-inusara. Siya nakigtambayayong ug bug-os nga nagpahimulos sa organisadong Kristohanong kongregasyon. Si Pablo wala mag-angkon ug bisan unsang dungog alang sa iyang kaugalingon tungod sa mga resulta nga nakab-ot apan mapainubsanong giila nga siya usa ka ulipon ug nga ang tanang pasidungog angayng ihatag ngadto sa Diyos ingong ang usa nga maoy hinungdan sa pagtubo.​—1 Corinto 3:5-7; 9:16; Filipos 1:1.

Ang kapanahonan ni Pablo lahi kay sa atoa, apan bisan pa niana, walay usa diha sa Kristohanong kongregasyon karon ang angayng maghunahuna nga siya mahimo o nanginahanglan nga magkinaugalingon. Hinunoa, kita kinahanglan nga kanunayng mag-alagad uban sa organisasyon sa Diyos, uban sa atong lokal nga kongregasyon, ug uban sa atong mga isigkamagtutuo. Kinahanglan nato ang ilang tabang, pagpaluyo, ug paghupay sa maayong mga panahon ug sa malisod nga mga panahon. Kita adunay bililhong pribilehiyo nga nahimong bahin sa ‘tibuok kapunongan sa mga igsoon dinhi sa kalibotan.’ (1 Pedro 5:9) Kon kita matinumanon ug mahigugmaong mag-abayay sa pag-alagad ug pagpakigtambayayong kanilang tanan, nan sama gayod kang Pablo, kita usab makaingon nga “kami mga isigkamagbubuhat sa Diyos.”​—1 Corinto 3:9.

[Mga hulagway sa panid 31]

APOLOS

ARISTARKO

BERNABE

LYDIA

ONESIFORO

TERCIO

TIQUICO

    Cebuano Publications (1983-2025)
    Log Out
    Log In
    • Cebuano
    • Ipasa
    • Setting
    • Copyright © 2025 Watch Tower Bible and Tract Society of Pennsylvania
    • Kondisyones sa Paggamit
    • Polisa sa Pribasiya
    • Mga Setting sa Pribasiya
    • JW.ORG
    • Log In
    Ipasa