Ipakita ang Pasidungog Ngadto sa Uban

“Manguna sa pagpakitag pasidungog sa usag usa.”​—ROMA 12:10.

1, 2. (a) Unsay kinahanglang atong batasanon sa pagpakita sa atong pagkamapaubsanon sa hunahuna? (b) Sa unsang paagi sagad gigamit sa Bibliya ang pulong “pasidungog,” ug kinsay mas sayonan sa pagpakitag pasidungog?

ANG atong milabayng artikulo nagpasiugda sa tambag sa Pulong sa Diyos: “Baksi ninyong tanan ang inyong kaugalingon sa pagkamapaubsanon sa hunahuna ngadto sa usag usa, tungod kay ang Diyos nagasupak sa mga mapahitas-on, apan siya nagahatag ug dili-takos nga kalulot sa mga mapainubsanon.” (1 Pedro 5:5) Usa ka paagi nga kita magbakos sa atong kaugalingon sa pagpaubos sa hunahuna mao ang pagbansay sa pagpakitag pasidungog sa uban.

² Ang pulong nga “pasidungog” sagad gigamit diha sa Bibliya sa pagpaila sa pagtahod, pagtamod, ug konsiderasyon nga angay natong ipakita sa uban. Atong mapasidunggan ang uban pinaagi sa pagkamaluloton kanila, pagtahod sa ilang dignidad, pagpamati sa ilang punto de vista, pagkaandam motuman sa ilang makataronganong mga hangyo kanato. Kadtong mapaubsanon sa hunahuna kasagarang dili malisdan niini. Bisan pa niana, kadtong magarbohon sa kasingkasing mahimong malisdan sa pagpakitag tinuod nga pasidungog ug tingalig mosulay hinuon pagbaton sa mga pabor ug mga bentaha pinaagi sa pag-ulog-ulog.

Si Jehova Nagapasidungog sa mga Tawo

3, 4. Giunsa ni Jehova pagpakitag pasidungog kang Abraham, ug ngano?

³ Ginahatag ni Jehova mismo ang panig-ingnan sa pagpakitag pasidungog. Iyang gilalang ang mga tawo nga may libreng kabubut-on ug wala magtratar kanila nga sama lamag mga robot. (1 Pedro 2:16) Pananglitan, sa giingnan niya si Abraham nga pagalaglagon ang Sodoma tungod sa tumang pagkadaotan, si Abraham nangutana: “Ikaw ba gayod magpapha sa mga matarong uban sa mga daotan? Pananglit adunay kalim-an ka tawong matarong taliwala sa siyudad. Nan, ikaw ba magpapha kanila ug dili magpasaylo sa dapit tungod ug alang sa kalim-an?” Si Jehova mitubag nga iyang luwason ang siyudad tungod sa 50 ka tawong matarong. Unya si Abraham mipadayon sa paghangyo nga mapaubsanon. Unsa na man kon aduna lamay 45? 40? 30? 20? 10? Si Jehova nagpasalig kang Abraham nga dili niya laglagon ang Sodoma bisan pag napulo lamang ka tawong matarong ang hikaplagan.​—Genesis 18:20-33.

⁴ Si Jehova nasayod nga walay napulo ka tawong matarong sa Sodoma, apan iyang gipasidunggan si Abraham pinaagi sa pagpamati sa iyang hunahuna ug pagpakiglabot kaniya sa matinahurong paagi. Ngano? Tungod kay si Abraham “nagbutang ug pagtuo kang Jehova; ug kadto iyang giisip kaniya ingong pagkamatarong.” Si Abraham gitawag nga “higala ni Jehova.” (Genesis 15:6; Santiago 2:23) Dugang pa, nakita ni Jehova nga si Abraham nagpasidungog sa uban. Sa dihang mitungha ang usa ka panaglalis bahin sa teritoryo tali sa iyang mga magbalantay sa kahayopan ug sa iya sa iyang pag-umangkong si Lot, si Abraham nagpasidungog kang Lot pinaagi sa pag-ingon nga siya ang unang mopili sa dapit nga gusto niya. Gipili ni Lot ang giisip niyang labing maayong yuta, ug si Abraham mibalhin ngadto sa laing dapit.​—Genesis 13:5-11.

5. Giunsa pagpasidungog ni Jehova si Lot?

⁵ Si Jehova susamang nagpasidungog sa matarong nga si Lot. Sa wala pa laglaga ang Sodoma, iyang gisugo si Lot nga mokalagiw ngadto sa usa ka bukirong dapit. Ugaling, si Lot miingon nga dili niya buot moadto didto; gipili niya ang haduol nga Zoar, bisan pag kadtong siyudara diha sa dapit nga laglagonon. Si Jehova miingon kang Lot: “Ania karon ako nagpakitag konsiderasyon kanimo hangtod niining sukora usab, pinaagi sa dili ko pagpukan sa siyudad nga imong gihisgotan.” Si Jehova nagpakitag pasidungog sa matinumanong si Lot pinaagi sa pagbuhat kon unsay iyang gihangyo.​—Genesis 19:15-22; 2 Pedro 2:6-9.

6. Giunsa pagpasidungog ni Jehova si Moises?

⁶ Sa dihang gipabalik ni Jehova si Moises ngadto sa Ehipto aron maoy manguna sa Iyang katawhan gikan sa kaulipnan ug makigsulti kang Paraon mahitungod sa pagpagawas sa Iyang katawhan, si Moises mitubag: “Pasayloa ako, Jehova, apan dili ako larinong mamumulong.” Si Jehova nagpasalig kang Moises: “Ako mismo magauban sa imong baba ug pagatudloan ko ikaw kon unsay imong buhaton.” Apan si Moises sa gihapon nag-ukon-ukon. Niana si Jehova nagpasalig pag-usab kang Moises ug mihikay nga ipadala ang iyang igsoong lalaki, si Aaron, ingong iyang tigpamaba.​—Exodo 4:10-16.

7. Nganong si Jehova andam sa pagpasidungog sa uban?

⁷ Nianang tanang higayon, si Jehova nagpakita sa iyang kaandam sa pagpasidungog sa uban, ilabina kadtong nag-alagad kaniya. Bisan pag ang ilang gipangayo tingali lahi sa orihinal nga katuyoan ni Jehova, iyang gitagad ang ilang mga hangyo ug gitugot kanila basta kadto wala makalapas sa iyang katuyoan.

Si Jesus Nagpasidungog sa Uban

8. Giunsa pagpasidungog ni Jesus ang usa ka babaye nga masakiton kaayo?

⁸ Si Jesus misundog kang Jehova sa pagpasidungog sa uban. Kas-a samtang taliwala sa panon sa mga tawo, dihay usa ka babaye nga nag-antos sa pagtalinugo sulod sa 12 ka tuig. Ang mga mananambal wala makaayo kaniya. Ilalom sa Moisesnong Balaod, siya giisip nga mahugaw sa seremonyal nga paagi ug angay nga dili siya moadto didto. Siya nagpalikod kang Jesus, naghikap sa iyang besti, ug naayo. Si Jesus wala moinsistir nga sundon ang mga detalye sa Balaod, pinaagi sa pagkasaba kaniya tungod sa iyang gibuhat. Sa kapulihay, kay nasayod sa mga sirkumstansiya, siya nagpasidungog kaniya, sa pag-ingon: “Anak, ang imong pagtuo nakapaayo kanimo. Lakaw nga malinawon, ug magmaayo sa panglawas gikan sa imong grabeng sakit.”​—Marcos 5:25-34; Levitico 15:25-27.

9. Giunsa pagpasidungog ni Jesus ang usa ka Hentil?

⁹ Sa laing panahon, ang usa ka babayeng taga-Penisya miingon kang Jesus: “Kaluy-i ako, Ginoo, Anak ni David. Ang akong anak nga babaye grabeng nademonyohan.” Kay nahibalo nga siya gipadala ngadto sa nasod sa Israel ug dili ngadto sa mga Hentil, si Jesus miingon: “Dili husto nga ang tinapay sa mga bata [sa Israel] kuhaon ug iitsa sa gagmay nga mga iro [mga Hentil].” Ang babaye mitubag: “Apan sa pagkatinuod ang gagmayng mga iro nagakaon sa mga usik nga nangahulog gikan sa lamesa sa ilang mga agalon.” Unya si Jesus miingon: “O babaye, dako ang imong pagtuo; ipahinabo kini kanimo sumala sa buot mo.” Ang iyang anak nga babaye naayo. Gipasidunggan ni Jesus ang maong Hentil tungod sa iyang pagtuo. Bisan ang iyang paggamit sa pamulong nga “gagmayng mga iro,” inay sa pagtumong sa ihalas nga mga iro, nakapalumo sa maong butang ug nagpakita sa iyang kahangawa.​—Mateo 15:21-28.

10. Unsang puwersadong pagtulon-an ang gitudlo ni Jesus sa iyang mga tinun-an, ug nganong gikinahanglan kadto?

¹⁰ Si Jesus nagpadayon sa pagtudlo sa iyang mga tinun-an mahitungod sa panginahanglan nga magmapaubsanon sa hunahuna ug sa pagpasidungog sa uban, sanglit sila nakabaton pa sa ako-ang-una nga suliran. Kausa human sa ilang panaglalis, si Jesus nangutana: “Unsay inyong giergohan?” Sila pabiling naghilom, kay “sila nag-ergohay taliwala sa ilang kaugalingon kon kinsa ang labaw.” (Marcos 9:33, 34) Bisan sa gabii una mamatay si Jesus, “dihay nahitabo usab nga init nga panaglalis taliwala kanila bahin sa kon kinsa kanila ang gihunahuna nga labing dako.” (Lucas 22:24) Busa panahon sa pagkaon sa Paskuwa, si Jesus “mibutang ug tubig sa palanggana ug misugod paghugas sa mga tiil sa mga tinun-an.” Pagkapuwersadong pagtulon-an! Si Jesus mao ang Anak sa Diyos, nga ikaduha lamang kang Jehova sa tibuok uniberso. Bisan pa niadto, iyang gitudloan ang iyang mga tinun-an sa usa ka mapasidunggong pagtulon-an pinaagi sa paghugas sa ilang mga tiil. Siya miingon: “Ako nagtagana sa sumbanan alang kaninyo, nga, ingon sa akong gibuhat kaninyo, kamo angay usab nga mobuhat.”​—Juan 13:5-15.

Si Pablo Nagpakitag Pasidungog

11, 12. Human ma-Kristohanon si Pablo, unsay iyang nakat-onan, ug giunsa niya pagpadapat ang maong pagtulon-an maylabot kang Filemon?

¹¹ Ingong usa ka manunundog ni Kristo, si apostol Pablo nagpasidungog sa uban. (1 Corinto 11:1) Siya miingon: “Ni nagtinguha kamig himaya gikan sa mga tawo . . . Sa kasukwahi, kami nagmalumo taliwala kaninyo, sama sa usa ka nagapasusong inahan nga nagapangga sa iyang kaugalingong mga anak.” (1 Tesalonica 2:6, 7) Ang usa ka nagapasusong inahan nagamahal sa iyang mga bata. Human ma-Kristohanon si Pablo, siya nakakat-on nga magmapaubsanon sa hunahuna ug nagpasidungog sa iyang isigka-Kristohanon pinaagi sa pagtagad kanila sa malumong paagi. Sa pagbuhat niana, siya nagtahod usab sa ilang libreng kabubut-on, ingon nga gipasundayag sa usa ka panghitabo nga nahitabo sa dihang siya usa ka binilanggo sa Roma.

¹² Usa ka milayas nga ulipon nga ginganlag Onesimo namati sa pagpanudlo ni Pablo. Siya nahimong Kristohanon ingon man higala ni Pablo. Ang tag-iya sa ulipon mao si Filemon, nga Kristohanon usab, kinsa nagpuyo sa Asia Minor. Sa usa ka sulat ngadto kang Filemon, si Pablo misulat kon unsa ka mapuslanon si Onesimo alang kaniya, nga miingon: “Buot ko unta siyang hawiran alang sa akong kaugalingon.” Bisan pa niana, giuli ni Pablo si Onesimo kang Filemon, kay siya misulat: “Dili ko buot mobuhat ug bisan unsa nga wala kay pag-uyon, aron nga ang imong maayong buhat mahimo nga, dili ilalom sa pagpugos, kundili maoy sa imong gawasnong pagbuot.” Wala pahimusli ni Pablo ang kamatuorang siya usa ka apostol, apan iyang gipasidunggan si Filemon pinaagi sa dili paghangyo nga hawiran si Onesimo sa Roma. Dugang pa, gitambagan ni Pablo si Filemon nga pasidunggan si Onesimo, nga tagdon siya nga “labaw pa kay sa usa ka ulipon, ingon nga igsoong hinigugma.”​—Filemon 13-16.

Pagpakitag Pasidungog sa Atong Adlaw

13. Unsay ginaingon sa Roma 12:10 nga atong buhaton?

¹³ Ang Pulong sa Diyos nagtambag: “Manguna sa pagpakitag pasidungog sa usag usa.” (Roma 12:10) Kini nagkahulogan nga dili nato angayng hulaton ang uban nga maoy unang magpakitag pasidungog kanato, apan angay nga kita maoy mouna sa pagpakita. “Padayong ipapangita sa matag usa, dili ang iyang kaugalingon nga kaayohan, apan nianang sa laing tawo.” (1 Corinto 10:24; 1 Pedro 3:8, 9) Busa, ang mga alagad ni Jehova mangitag kahigayonan sa pagpakitag pasidungog niadtong mga sakop sa pamilya, ngadto sa isigka-Kristohanon diha sa kongregasyon, ug bisan ngadto niadtong anaa sa gawas sa kongregasyon.

14. Sa unsang paagi ang pasidungog ipakita tali sa bana ug asawa?

¹⁴ Ang Bibliya nag-ingon: “Ang ulo sa matag lalaki mao ang Kristo; sa baylo ang ulo sa usa ka babaye mao ang lalaki.” (1 Corinto 11:3) Si Jehova nag-obligar sa lalaki nga tagdon ang iyang asawa sama sa gihimo ni Kristo sa kongregasyon. Sa 1 Pedro 3:7, ang bana gitugon nga maghatag sa iyang asawa ug “kadungganan samag ngadto sa sudlanan nga mas mahuyang, ang usa nga babaye.” Mahimo niya kini pinaagi sa pagpasundayag ug tiunay nga kaandam sa pagpamati ug pinaagi sa pagtagad sa mga sugyot sa iyang asawa. (Genesis 21:12) Mahimong siya maghatag sa iyang asawa sa unang pagpili kon walay isyu nga mameligro, ug mobuhat siya sa mga butang alang kaniya ug magmaluloton kaniya. Sa baylo, “ang asawa angayng adunay halalom nga pagtahod alang sa iyang bana.” (Efeso 5:33) Ang asawa mamati sa iyang bana, dili kanunayng maningkamot nga iyang gusto ang matuman, dili magtamay o mahimong yawyawan kaniya. Iyang ipakita ang pagkamapaubsanon sa hunahuna pinaagi sa dili pagsulay nga dominahon ang iyang bana, bisan pag siya adunay labawng mga katakos sa pipila ka natad.

15. Unsang pagtagad ang ipakita sa mga tigulang, ug angayng unsay ilang pagsanong?

¹⁵ Sulod sa Kristohanong kongregasyon, adunay mga angay ilabinang pasidunggan, sama sa mga tigulang. “Atubangan sa buhok nga ubanon motindog ka, ug magpakita ka ug pagtamod sa tigulang nga lalaki [o, babaye].” (Levitico 19:32) Kini tinuod ilabina niadtong matinumanong nag-alagad kang Jehova sulod sa daghang katuigan tungod kay “ang pagkaubanon maoy usa ka purongpurong sa katahom sa dihang kini makaplagan sa dalan sa pagkamatarong.” (Proverbio 16:31) Ang mga magtatan-aw angayng maghatag sa panig-ingnan pinaagi sa pagpakitag pagtahod sa isigka-Kristohanon nga mas tigulang kay kanila. Siyempre, ang mga tigulang kinahanglan usab nga magpasundayag ug matinahurong tinamdan ngadto sa mga mas bata, ilabina kadtong adunay kaakohan sa pagbantay sa panon.​—1 Pedro 5:2, 3.

16. Sa unsang paagi ang mga ginikanan ug mga anak magapasidungog sa usag usa?

¹⁶ Ang mga batan-on angayng magpasidungog sa ilang mga ginikanan: “Mga anak, magmasinugtanon sa inyong mga ginikanan kahiusa sa Ginoo, kay kini maoy matarong: ‘Pasidunggi ang imong amahan ug ang imong inahan’; nga maoy unang sugo nga may saad: ‘Aron magmauswagon ka ug ikaw motunhay sa taas nga panahon sa yuta.’” Sa baylo, ang mga ginikanan magapasidungog sa ilang mga anak, kay sila giingnan nga ‘dili palagoton ang ilang mga anak kundili padayong matutoon sila diha sa disiplina ug mapasiboong pagdumala-sa-kaisipan ni Jehova.’​—Efeso 6:1-4; Exodo 20:12.

17. Kinsa ang takos nga hatagan ug “dobleng dungog”?

¹⁷ Angay usab nga pakitaan ug pasidungog kadtong naghago sa pag-alagad sa kongregasyon: “Ipatamod ingong takos sa dobleng dungog ang mga ansiyano nga nagadumala sa maayong paagi, ilabina silang kinsa nagahago sa pagpamulong ug sa pagpanudlo.” (1 Timoteo 5:17) Usa ka paagi nga kita makapakita kanila sa maong pasidungog maoy pinaagi sa pagbuhat kon unsay ginaingon sa Hebreohanon 13:17: “Magmasinugtanon kamo kanilang nagapanguna taliwala kaninyo ug magmapinasakopon.”

18. Unsay angay natong buhaton niadtong anaa sa gawas sa kongregasyon?

¹⁸ Kinahanglan ba kitang magpakitag pasidungog niadtong anaa sa gawas sa kongregasyon? Oo. Pananglitan, kita gitugon: “Magpasakop ang tanang kalag sa labaw nga mga awtoridad.” (Roma 13:1) Kini sila mao ang sekular nga mga magmamando nga gitugotan ni Jehova nga magmando hangtod nga pulihan sila sa iyang Gingharian. (Daniel 2:44) Busa atong “ibayad ngadto sa tanan ang mga nahiangay kanila, kaniya nga nangayog buhis, ang buhis; kaniya nga nangayog tributo, ang tributo; kaniya nga nangayog kahadlok, ang maong kahadlok; kaniya nga nangayog dungog, ang maong dungog.” (Roma 13:7) Kinahanglang atong ‘pasidunggan ang tanang matang sa tawo.’​—1 Pedro 2:17.

19. Sa unsang paagi mahimo natong ‘buhaton kon unsay maayo’ ngadto sa uban ug ipakita kanila ang pasidungog?

¹⁹ Bisag matuod nga kinahanglang pasidunggan nato bisan kadtong anaa sa gawas sa kongregasyon, matikdi kon unsay gipasiugda sa Pulong sa Diyos: “Samtang kita may panahong paborable alang niini, buhaton nato ang maayo ngadto sa tanan, apan ilabina kanilang iglabot nato sa pagtuo.” (Galacia 6:10) Siyempre, ang labing maayong paagi nga mahimo natong “buhaton ang maayo” sa uban mao ang pag-ugmad ug pagtagbaw sa ilang espirituwal nga mga panginahanglan. (Mateo 5:3) Kini atong mahimo pinaagi sa pagpatalinghog sa pahinumdom ni apostol Pablo: “Buhata ang kutob sa imong maarangan nga ikapakita ang imong kaugalingon nga inuyonan sa Diyos, usa ka mamumuo nga walay angay ikaulaw, nga sa husto nagagamit sa pulong sa kamatuoran.” Sa dihang kita sa mataktikanhon magagamit sa matag higayon sa paghatag ug usa ka pamatuod, ‘nga nagabuhat sa bug-os sa atong ministeryo,’ kita wala lamang magabuhat ug maayo sa tanan kondili nagapakita usab ug pasidungog kanila.​—2 Timoteo 2:15; 4:5.

Pagpasidungog Kang Jehova

20. Unsay nahitabo kang Paraon ug sa iyang kasundalohan, ug ngano?

²⁰ Si Jehova nagapasidungog sa iyang mga linalang. Busa makataronganon nga kita, sa baylo, magapasidungog kaniya. (Proverbio 3:9; Pinadayag 4:11) Ang Pulong ni Jehova nagapahayag usab: “Silang nagpasidungog kanako akong pasidunggan, ug silang nagtamay kanako mahimong walay kapuslanan.” (1 Samuel 2:30) Sa giingnan si Paraon sa Ehipto nga pagawason ang katawhan sa Diyos, sa kahambogiro siya mitubag: “Kinsa ba si Jehova, aron akong sundon ang iyang tingog?” (Exodo 5:2) Sa dihang gipadala ni Paraon ang iyang kasundalohan aron sa pagpukan sa mga Israelinhon, gipabulag ni Jehova ang katubigan sa Pulang Dagat alang sa Israel. Apan sa dihang miagpas ang mga Ehiptohanon, gipabalik ni Jehova ang katubigan. “Ang mga karo ni Paraon ug ang iyang mga kasundalohan gitambog [ni Jehova] sa dagat.” (Exodo 14:26-28; 15:4) Busa ang mahambogong pagdumili ni Paraon sa pagpasidungog kang Jehova misangpot sa iyang kalaglagan.​—Salmo 136:15.

21. Nganong si Jehova mibatok kang Belsazar, ug unsay miresulta?

²¹ Si Haring Belsazar sa Babilonya midumili sa pagpasidungog kang Jehova. Panahon sa usa ka kombirang may paghuboghubog, iyang gitamay si Jehova pinaagi sa pag-inom ug bino gikan sa sagradong mga panudlanan nga bulawan ug plata nga nakuha gikan sa templo sa Jerusalem. Ug samtang iya kanang gibuhat, iyang gidayeg ang iyang paganong mga diyos. Apan ang alagad ni Jehova nga si Daniel miingon kaniya: “Ikaw wala magmapainubsanon sa imong kasingkasing . . . Apan batok sa Ginoo sa mga langit ikaw nagbayaw sa imong kaugalingon.” Niadtong gabhiona mismo si Belsazar gipatay, ug ang iyang gingharian gikuha gikan kaniya.​—Daniel 5:22-31.

22. (a) Nganong ang kapungot ni Jehova midangat sa mga pangulo sa Israel ug sa ilang katawhan? (b) Kinsay giuyonan ni Jehova, ug unsay resulta?

²² Sa unang siglo K.P., si Haring Herodes nagpahayag ngadto sa katilingban, ug sila misinggit: “Tingog sa usa ka diyos, ug dili sa tawo!” Ang mahambogong hari wala mosupak kondili nagtinguha sa himaya. Dihadiha, “ang anghel ni Jehova mihampak kaniya, tungod kay wala niya ihatag ang himaya ngadto sa Diyos.” (Buhat 12:21-23) Si Herodes nagpasidungog sa iyang kaugalingon, dili kang Jehova, ug gipatay. Ang relihiyosong mga pangulo niadtong panahona nagdaot sa dungog sa Diyos pinaagi sa pagsabotsabot sa pagpatay sa iyang Anak, si Jesus. Ang pipila ka magmamando nahibalo nga si Jesus nagtudlo sa kamatuoran apan wala mosunod kaniya, “kay ilang gihigugma ang himaya sa mga tawo nga labaw gani kay sa himaya sa Diyos.” (Juan 11:47-53; 12:42, 43) Ang nasod sa katibuk-an wala magpasidungog kang Jehova o sa iyang tinudlong Hawas, si Jesus. Ingong resulta, si Jehova wala magpadayon sa pagpasidungog kanila, nga mitugyan kanila ug sa ilang templo ngadto sa kalaglagan. Apan iyang gitipigang buhi kadtong nagpasidungog kaniya ug sa iyang Anak.​—Mateo 23:38; Lucas 21:20-22.

23. Unsay kinahanglan natong buhaton aron makapuyo sa bag-ong kalibotan sa Diyos? (Salmo 37:9-11; Mateo 5:5)

²³ Ang tanan nga buot mopuyo sa bag-ong kalibotan sa Diyos human nga malaglag kining sistemaha karon kinahanglang magpasidungog sa Diyos ug sa iyang Anak, si Kristo Jesus, ug magasugot kanila. (Juan 5:22, 23; Filipos 2:9-11) Kadtong dili magpakita sa maong pasidungog “pagaputlon gikan sa yuta.” Sa laing bahin, ang mga matul-id nga magapasidungog ug magasugot sa Diyos ug kang Kristo “mao ang magapuyo sa yuta.”​—Proverbio 2:21, 22.

Agig Pagsubli

◻ Unsay kahulogan sa pagpasidungog sa uban, ug giunsa kini pagbuhat ni Jehova?

◻ Giunsa ni Jesus ug ni Pablo pagpasidungog sa uban?

◻ Kinsa ang takos sa pasidungog sa atong adlaw?

◻ Nganong kinahanglang atong pasidunggan si Jehova ug si Jesus?

[Hulagway sa panid 17]

Si Jehova nagpasidungog kang Abraham pinaagi sa pagtagad sa iyang hangyo

[Hulagway sa panid 18]

Sa malamposong mga kaminyoon, ang bana ug asawa nagapasidungog sa usag usa