Mga Pangutana Gikan sa mga Magbabasa

Unsa ka seryoso nga angayng isipon sa mga Kristohanon ang kasabotan sa pagminyo?

Ang kasabotan sa pagminyo maoy hinungdan sa kalipay, apan kini usab maoy usa ka seryosong butang. Dili angayng pakamenoson sa usa ka hamtong nga Kristohanon ang kasabotan sa pagminyo, nga siya mobating sa bisan unsang panahon makatapos niana tungod sa gamayng hinungdan. Ang yugto sa kasabotan sa pagminyo maoy panahon usab nga ang managtrato mas magkailhanay una pa ang kaminyoon.

Sa paghisgot niining ulohana, angay natong ilhon nga ang katilingbanong mga kustombre maylabot sa kaminyoon, ug ang mga tikang nga motultol ngadto niana, magkalahi pag-ayo diha sa nagkalainlaing mga dapit ug mga panahon. Gipakita kini sa Bibliya.

Ang duha ka anak nga babaye ni Lot, nga “wala pa gayod makigdulog uban sa usa ka lalaki,” maoy sa usa ka paagi nakigsabot nga makigminyo sa duha ka lalaki sa maong dapit. Ang ‘mga umagad nga lalaki ni Lot makigminyo sa iyang mga anak nga babaye,’ bisan pa niana ang Bibliya wala magsulti kanato kon ngano o kon sa unsang paagi nahitabo ang maong mga kasabotan sa pagminyo. Hamtong na ba ang mga anak nga babaye? Makabuot na ba sila sa pagpili kon kinsay minyoan? Sila ba nakigsabot sa pagminyo pinaagi sa paghimog pipila ka lakang nga makita sa katilingban? Wala kita masayod. (Genesis 19:8-14) Kita nasayod nga si Jacob naghimo sa iyang kaugalingong pakigsabot sa amahan ni Raquel sa pagpakigminyo kang Raquel human sa iyang pagpangagad ug pito ka tuig kaniya. Bisan ug si Jacob nagtumong kang Raquel ingong “akong asawa,” wala silay seksuwal nga relasyon sulod sa maong mga tuig. (Genesis 29:18-21) Ingong laing pananglitan, una pa siya makaminyo sa anak babaye ni Saul, kinahanglang makadaog si David sa mga Filistehanon. Dihang natuman na ang gipangayo ni Saul, si David nakaminyo sa anak nga babaye, si Michal. (1 Samuel 18:20-28) Kining “mga kasabotan sa pagminyo” managkalahi sa usag usa ug sa kon unsay komon sa daghang yuta karon.

Ang Balaod Mosaiko adunay mga regulasyon bahin sa kaminyoon ug kasabotan sa pagminyo. Pananglitan, ang usa ka lalaki mahimong magbaton ug kapin sa usa ka asawa; mahimong makigbulag siya gumikan sa daghang hinungdan, bisan tuod tin-aw nga ang asawa di-makabulag. (Exodo 22:16, 17; Deuteronomio 24:1-4) Ang usa ka lalaki nga nanglugos sa di-sinayoran nga ulay kinahanglang makigminyo kaniya kon mosugot ang amahan, ug dili gayod siya makabulag kaniya. (Deuteronomio 22:28, 29) Ang ubang mga balaod gipadapat sa kaminyoon, sama sa kon kanus-a pagalikayan ang seksuwal nga relasyon. (Levitico 12:2, 5; 15:24; 18:19) Unsang mga regulasyon ang may kalabotan sa kasabotan sa pagminyo?

Ang sinayoran nga babayeng Israelinhon lahi ug kahimtang sumala sa balaod kay nianang sa di-sinayorang babaye; sa pipila ka paagi siya giisip na nga minyo. (Deuteronomio 22:23-29; Mateo 1:18, 19) Ang mga Israelinhon dili-mahimong makigsabot sa pagminyo o makaminyo sa pipila ka mga partidos. Sagad kini maoy mga kadugo, apan ang ubang mga kasabotan sa pagminyo ug mga kaminyoon gidili gumikan sa mga katungod sa panulondon. (Levitico 18:6-20; tan-awa ang The Watchtower sa Marso 15, 1978, mga panid 25-8.) Dayag nga ang mga alagad sa Diyos dili angayng magpakamenos sa kasabotan sa pagminyo.

Ang mga Israelinhon nailalom nianang tanang regulasyon sa Balaod, apan ang mga Kristohanon dili ilalom sa maong Balaod, lakip sa mga regulasyon niini bahin sa kasabotan sa pagminyo o sa kaminyoon. (Roma 7:4, 6; Efeso 2:15; Hebreohanon 8:6, 13) Ngani, si Jesus nagtudlo nga ang Kristohanong sukdanan sa kaminyoon lahi gikan nianang iya sa Balaod. (Mateo 19:3-9) Sa gihapon, wala niya pakamenosa ang kaseryoso sa kaminyoon, ni ang kasabotan sa pagminyo. Nan, komosta kining ulohan nga gihisgotan, ang kasabotan sa pagminyo taliwala sa mga Kristohanon?

Sa daghang nasod ang mga indibiduwal mao mismo ang mopili kon kinsay ilang minyoan. Sa dihang ang lalaki ug babaye magsinaaray sa pagminyo, sila giisip nga minyoonon o sinayoran. Sagad, walay dugang pormal nga lakang nga gikinahanglan aron palig-onon ang kasabotan sa pagminyo. Ibutang ta, sa pipila ka dapit maoy naandan nga ang pamanhonon mohatag sa iyang pangasaw-onon ug singsing aron sa pagpaila sa ilang kasabotan sa pagminyo. O maoy naandan ang pagpahibalo sa kasabotan sa pagminyo ngadto sa mga paryente ug mga higala, diha man sa pagpangaon sa pamilya o sa ubang gagmayng tapoktapok. Personal na kini nga mga pagpili, dili Kasulatanhong mga kinahanglanon. Ang naglangkob sa kasabotan sa pagminyo mao ang panag-uyonay sa duha.a

Ang usa ka Kristohanon dili angayng magdalidali sa pagpanarato, pagpakigsabot sa pagminyo, o pagminyo. Among gipatik ang gipasukad-sa-Bibliyang materyal nga makatabang sa mga dalaga ug ulitawo sa pagdesidir kon maalamon na bang mosugod sa pagpanarato o sa paghimog mga lakang ngadto sa kasabotan sa pagminyo o sa kaminyoon.b Ang pangunang diwa sa tambag mao nga ang Kristohanong kaminyoon maoy permanente.​—Genesis 2:24; Marcos 10:6-9.

Ang duha ka Kristohanon kinahanglang masinati pag-ayo sa usag usa una pa sila mosugod sa paghunahuna nga makigsabot sa pagminyo. Ang matag usa makasukna, ‘Segurado ba gayod ako sa iyang espirituwalidad ug debosyon sa Diyos? Ako bang malantaw ang pag-alagad sa Diyos uban kaniya sa tibuok nga kinabuhi? Nagkasuhitohay na ba kami pag-ayo sa among mga batasan? Masaligon ba ako nga kami magkauyonay sa dayon? Nagkasayranay na ba kami pag-ayo bahin sa kanhing mga lihok ug presenteng mga kahimtang?’

Sa dihang ang duha ka Kristohanon namalaye ug napamalay-an na, angayan nga sila ug ang uban magdahom nga mosunod na ang kaminyoon. Si Jesus nagtambag: “Himoa lang ang imong pulong nga Oo nga magkahulogag Oo, ang imong Dili, Dili.” (Mateo 5:37) Ang mga Kristohanon nga nakigsabot na sa pagminyo kinahanglang mag-isip nianang seryoso. Diha sa talagsaong kahimtang, hinunoa, ang minyoonong Kristohanon tingali mahibalo nga may butang seryoso nga wala ipahibalo o gitago una pa sa pagpamalaye. Kini mahimong seryosong kamatuoran bahin sa nangagi sa usa, kriminal o imoral nga mga buhat pa gani. Ang Kristohanon nga masayod niini kinahanglang mohukom kon unsay buhaton. Tingali hisgotan pag-ayo sa duha ang maong butang ug magkauyon nga ipadayon ang ilang kasabotan sa pagminyo. O kaha silang duha modesidir sa pagtapos sa kasabotan sa pagminyo. Bisan tuod ang pagbuhat sa ingon usa tingali ka pribadong butang​—usa ka butang nga dili angayng hilabtan sa uban, sulayan sa pagpanaghap, o hukman—​kini maoy usa ka bug-at kaayong desisyon. Sa laing bahin, ang usa nga nasayod sa seryosong isyu tingali sa personal mapalihok sa pagtapos sa kasabotan sa pagminyo, bisan kon ang kapikas gusto nga kini ipadayon.—Tan-awa ang “Mga Pangutana Gikan sa mga Magbabasa” diha sa The Watchtower sa Hunyo 15, 1975.

Dunay maayong katarongan sa paghusay sa maong mga suliran una pa mosulod sa kaminyoon. Matod ni Jesus ang bugtong Kasulatanhong pasikaranan sa panagbulag nga magpalibre sa usa sa pagminyo pag-usab mao ang por·neiʹa, grabeng seksuwal nga imoralidad sa bahin sa kapikas sa kaminyoon. (Mateo 5:32; 19:9) Wala siya moingon nga ang usa ka legal nga kaminyoon mahimong taposon pinaagi sa panagbulag kon ang usa mahibalo sa usa ka grabeng suliran o kalapasan una pa ang kasal.

Pananglitan, sa adlaw ni Jesus ang pagkanataptag sanla mahimong posible gayod. Kon ang usa ka banang Hudiyo masayod nga ang iyang kapikas (nahibaloan man o wala) sanlahon sa dihang kini nakigminyo kaniya, duna ba siyay pasikaranan sa pagpakigbulag? Busa ang usa ka Hudiyo ilalom sa Balaod mahimong makabulag, apan si Jesus wala mag-ingon nga kini haom alang sa iyang mga sumusunod. Tagda ang pipila ka modernong-adlaw nga mga kahimtang. Ang usa ka lalaki nga may sipilis, herpes sa kinatawo, HIV, o lain pang grabe ka mananakod nga sakit tingali magminyo nga dili magbutyag nianang impormasyona. Tingali ang iyang impeksiyon nakuha pinaagi sa seksuwal nga imoralidad una pa o sa panahon nga may kasabotan na sa pagminyo. Ang pagkahibalo sa asawa sa ulahi sa iyang sakit o miaging imoralidad (bisan ang pagkabaog o pagkainutil) wala magbag-o sa kamatuoran nga sila karon minyo na. Ang dili maayong kagahapon una pa ang kasal dili Kasulatanhong pasikaranan sa pagtapos sa kaminyoon sama ra usab kon siya natakboyag usa ka sakit o kaha nagtago sa pagsabak pinaagi sa laing lalaki sa dihang nagminyo. Sila karon minyo na ug nakigsaad na sila sa usag usa.

Ibutang ta, ang maong makasubong mga kahimtang talagsaon, apan kining mga pananglitana angayng magdugang sa pagpasiugda sa pangunang punto: Ang kasabotan sa pagminyo dili angayng pakamenoson. Una pa o panahon nga may kasabotan na sa pagminyo, ang mga Kristohanon kinahanglang maningkamot nga magkailhanay pag-ayo. Sila kinahanglang matinud-anon bahin sa kon unsay buot masayran sa kapikas o may katungod sa pagkasayod. (Sa pipila ka nasod ang mga paris sumala sa balaod kinahanglang magpahiling sa doktor una pa ang kaminyoon. Ang uban tingali buot sa maong pagpasusi alang sa ilang kaugalingon.) Busa ang pagkamalipayon ug pagkaseryoso sa kasabotan sa pagminyo magsilbig dungganong katuyoan samtang ang duha mouswag ngadto sa mas malipayon ug seryosong kahimtang sa kaminyoon.​—Proverbio 5:18, 19; Efeso 5:33.

[Mga footnote]