Dunay Usa nga Nagtagad Gayod
LIBOLIBONG tawo nagpakita nga sila gayod nagtagad. Wala nila batoni ang dili-mabination, hakog nga panglantaw nga wala silay labot sa mga suliran sa uban. Hinunoa, gibuhat nila ang tanan nga ilang maarangan—usahay nagpameligro pa gani sa ilang kaugalingong kinabuhi—aron makahupay sa pag-antos. Dako kaayo kini nga tahas, usa nga gihimong komplikado sa gamhanang mga puwersa nga dili nila makontrolar.
Ang mga suliran sama sa kadalo, politikanhong laraw, mga gubat, ug kinaiyanhong mga katalagman makapakyas bisan “sa labing nalamdagan ug determinadong mga paningkamot sa pagwagtang sa kagutom,” matod sa usa ka aid worker. Ang pagwala sa kagutom maoy usa lamang sa mga suliran nga giatubang sa mga tawo nga nagtagad. Sila usab nakigbisog sa mga suliran sama sa sakit, kakabos, inhustisya, ug sa grabeng pag-antos nga gipahinabo sa gubat. Apan sila ba nagmadaogon?
Ang pangulong ehekutibo sa usa ka ahensiya sa hinabang nag-ingon nga kadtong naghimo nianang “nalamdagan ug determinadong mga paningkamot” sa paghupay sa kagutom ug kasakit sama ra sa mabinationg Samaritano nga gihubit diha sa ilustrasyon ni Jesu-Kristo. (Lucas 10:29-37) Apan bisan unsay ilang himoon, siya miingon, padayong nagtubo ang gidaghanon sa mga biktima. Busa siya nangutana: “Unsay angayng buhaton sa maayong Samaritano kon siya mobiyahe sa mao gihapong ruta kada adlaw sulod sa daghang tuig ug makakaplag ug laing biktima sa mga tulisan kada semana diha sa daplin sa dalan?”
Sayon ra ang pagpadala sa gihubit ingong ‘makamatayng balatian sa kakapoy sa tig-atiman’ ug basta na lang molunga tungod sa kahigawad. Sa pagpasidungog kanila, kadtong tinuod nga nagtagad dili molunga. (Galacia 6:9, 10) Pananglitan, usa ka tawo nga nagsulat ngadto sa Jewish Telegraph sa Britanya nagdayeg sa mga Saksi ni Jehova, kinsa panahon sa Nazing Alemanya “mitabang sa libolibong Hudiyo nga nakalabang-buhi sa mga pag-antos sa Auschwitz.” “Sa dihang nihit ang pagkaon,” ang magsusulat nag-ingon, “ilang gipakig-ambit ang ilang tinapay sa among [Hudiyong] mga igsoong lalaki ug babaye.” Ang mga Saksi padayong naghimo sa ilang maarangan ginamit ang ilang mga kahinguhaan.
Bisan pa niana, ang tinuod mao nga bisag unsa pa ka daghang tinapay ang ipakig-ambit kini dili magpahinabo ug bug-os nga pagkahanaw sa pag-antos sa tawo. Dili tuyo niini nga ipakawalay-bili ang nahimo sa mabinationg mga tawo. Ang bisan unsang aksiyon nga tukmang magpamenos sa pag-antos maoy bililhon. Kadtong maong mga Saksi medyo naghupay sa kasakit sa mga isigkabinilanggo, ug ang Nazismo ngadtongadto nahugno. Bisan pa niana, ang sistema sa kalibotan nga nagpahinabo sa maong pagdaogdaog milahutay, ug ang walay-pagtagad nga mga tawo nagdaghan gihapon. Sa pagkatinuod, “adunay kaliwatan kansang mga ngipon maoy mga espada ug kansang mga bukog sa apapangig maoy mga kutsilyo nga pang-ihaw, aron sa paglamoy sa mga sinakit gikan sa yuta ug sa mga kabos gikan sa taliwala sa katawhan.” (Proverbio 30:14) Lagmit, nahibulong ka kon nganong ingon niini ang kahimtang.
Nganong Dunay Kakabos ug Pagdaogdaog?
Si Jesu-Kristo kas-a miingon: “Kanunayng anaa uban kaninyo ang mga kabos, ug sa dihang buot ninyo kanunay ninyo silang mabuhatan ug maayo.” (Marcos 14:7) Gipasabot ba ni Jesus nga ang kakabos ug pagdaogdaog dili gayod matapos? Sama sa pipila ka tawo, nagtuo ba siya nga ang maong pag-antos maoy bahin sa plano sa Diyos sa paghatag sa mga mabination sa kahigayonan sa pagpakita kon unsa ka dako ang ilang pagtagad? Wala! Si Jesus wala magtuo niana. Siya nagpasabot lamang nga ang kakabos mahimong bahin sa kinabuhi samtang maglungtad kining sistemaha sa mga butang. Apan si Jesus nasayod usab niini: Dili orihinal nga katuyoan sa iyang langitnong Amahan nga mahitabo ang maong mga kahimtang dinhi sa yuta.
Si Jehova nga Diyos naglalang sa yuta nga mahimong paraiso, dili usa ka dapit nga gihampak sa kakabos, inhustisya, ug pagdaogdaog. Iyang gipakita kon unsa ka dako ang iyang pagtagad sa tawhanong pamilya pinaagi sa paghimog kahibulongang mga tagana nga magdugang sa pagkalipay sa kinabuhi. Aw, hunahunaa lamang ang ngalan sa tanaman nga nahimutangan sa atong unang mga ginikanan, si Adan ug Eva. Gitawag kana ug Eden, nga nagkahulogang “Kahimuot.” (Genesis 2:8, 9) Si Jehova wala lamang magtagana sa tawo sa sukaranang mga panginahanglan aron mabuhi sa usa ka walay-kalipay, madaogdaogong palibot. Pagkahuman sa iyang buhat sa pagpanglalang, gisusi ni Jehova ang iyang nahimo ug miingon nga kini “maayo kaayo.”—Genesis 1:31.
Nan, nganong ang kakabos, pagdaogdaog, ug ang ubang mga hinungdan sa pag-antos kaylap sa tibuok yuta karon? Ang presenteng daotang sistema sa mga butang naglungtad tungod kay ang atong orihinal nga mga ginikanan mipili sa pagrebelde sa Diyos. (Genesis 3:1-5) Nagpatungha kini sa pangutana kon husto ba alang sa Diyos ang pagpangayog pagkamasinugtanon gikan sa iyang mga linalang. Busa gitugot ni Jehova sa mga kaliwat ni Adan ang limitadong yugto sa pagkaindependente. Nagtagad gihapon ang Diyos kon unsay nahitabo sa tawhanong pamilya. Naghimo siyag tagana aron mabungkag ang tanang kadaot nga ipatungha sa pagrebelde batok kaniya. Ug sa dili madugay, si Jehova magtapos sa kakabos ug pagdaogdaog—sa pagkatinuod, sa tanang pag-antos.—Efeso 1:8-10.
Usa ka Suliran nga Dili Masulbad sa Tawo
Latas sa kasiglohan sukad sa paglalang sa tawo, ang katawhan nag-anam ka layo sa mga sukdanan ni Jehova. (Deuteronomio 32:4, 5) Sa ilang padayong pagsalikway sa mga balaod ug prinsipyo sa Diyos, ang mga tawo nagbugnoay sa usag usa, ug “ang tawo nagamando sa tawo sa iyang kadaotan.” (Ecclesiastes 8:9) Ang tanang paningkamot sa pagpatungha ug katilingban nga tinuod nga may hustisya, nga walay bisan unsa nga magpaantos sa katawhan, nababagan sa kahakog niadtong buot mohimo sa mga butang sa ilang paagi inay kay magpasakop sa pagkasoberano sa Diyos.
Adunay laing suliran—usa nga hunahunaon tingali sa daghan ingong matuotuohong binuang. Ang tighulhog sa pagrebelde batok sa Diyos nag-aghat gihapon sa mga tawo nga mahimong daotan ug hakog. Siya mao si Satanas nga Yawa, ug si Jesu-Kristo nagtawag kaniya nga “magmamando niining kalibotan.” (Juan 12:31; 14:30; 2 Corinto 4:4; 1 Juan 5:19) Sa pinadayag nga gihatag ngadto kang apostol Juan, si Satanas giila ingong ang labawng tuboran sa kaalaotan—ang usa nga pangunang responsable sa ‘pagpasalaag sa tibuok pinuy-anang yuta.’—Pinadayag 12:9-12.
Bisag unsa pa ka dako ang pagtagad sa pipila ka tawo sa ilang mga isigkatawo, dili gayod sila makawagtang kang Satanas nga Yawa o makausab niining sistemaha nga nagpasamot sa pagdaghan sa mga biktima. Nan, unsay gikinahanglan aron masulbad ang mga suliran sa katawhan? Ang solusyon dili lamang nga may usang nagtagad. Dunay panginahanglan alang sa usa nga dunay determinasyon ug gahom sa pagwagtang kang Satanas ug sa iyang enterong walay-hustisya nga sistema.
‘Ang Imong Kabubut-on Matuman . . . sa Yuta’
Ang Diyos nagsaad sa paglaglag niining daotang sistema sa mga butang. Siya dunay determinasyon ug gahom nga gikinahanglan sa paghimo niana. (Salmo 147:5, 6; Isaias 40:25-31) Sa matagnaong basahon sa Bibliya ni Daniel, gitagna kini: “Ang Diyos sa langit magatukod ug usa ka gingharian nga dili gayod malumpag. Ug ang maong gingharian dili igapasa ngadto sa lain nga katawhan. Kini magadugmok ug magatapos niining tanang gingharian, ug kini mobarog hangtod sa panahong walay tino”—oo, sa walay kataposan. (Daniel 2:44) Anaa sa hunahuna ni Jesu-Kristo kining dumalayon ug maluluy-ong langitnong kagamhanan sa dihang gitudloan niya ang iyang mga tinun-an sa paghangyo sa Diyos diha sa pag-ampo: “Paanhia ang imong gingharian. Ipahinabo ang imong kabubut-on, maingon sa langit, nganhi usab sa yuta.”—Mateo 6:9, 10.
Si Jehova magtubag sa maong mga pag-ampo tungod kay nagtagad gayod siya sa tawhanong pamilya. Sumala sa matagnaong mga pulong sa Salmo 72, ang Diyos mag-awtorisar sa iyang Anak, si Jesu-Kristo, sa pagdala ug dumalayong kahupayan sa mga kabos, sa mga sinakit, ug sa dinaogdaog kinsa nagpaluyo sa pagmando ni Jesus. Busa, ang dinasig nga salmista miawit: “Pahukmi niya [Mesiyanikong Hari sa Diyos] ang mga sinakit diha sa katawhan, ipaluwas niya ang mga anak sa kabos, ug ipadugmok niya ang mga tikasan. . . . Iyang pagaluwason ang kabos nga nagatuaw alang sa tabang, usab ang sinakit ug ang bisan kinsa nga walay magtatabang. Siya maluoy sa timawa ug sa kabos, ug ang mga kalag sa mga kabos iyang pagaluwason. Gikan sa pagpanglupig ug sa kapintasan iyang tubson ang ilang kalag, ug ang ilang dugo mahimong bililhon sa iyang mga mata.”—Salmo 72:4, 12-14.
Sa panan-awon nga naglangkit sa atong adlaw, si apostol Juan nakakita ug “usa ka bag-ong langit ug usa ka bag-ong yuta,” usa ka bug-os nga bag-ong sistema sa mga butang nga gitukod sa Diyos. Pagkadakong panalangin sa nag-antos nga katawhan! Nagtagna kon unsay buhaton ni Jehova, si Juan misulat: “Nadungog ko ang usa ka kusog nga tingog gikan sa trono nga nag-ingon: ‘Tan-awa! Ang tolda sa Diyos anaa uban sa katawhan, ug siya mopuyo uban kanila, ug sila mahimong iyang mga katawhan. Ug ang Diyos mismo mouban kanila. Ug iyang pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.’ Ug ang Usa nga naglingkod sa trono miingon: ‘Tan-awa! Ginabag-o ko ang tanang butang.’ Usab, siya nagaingon: ‘Isulat, tungod kay kining mga pulonga kasaligan ug matuod.’”—Pinadayag 21:1-5.
Oo, makatuo kita niining mga pulonga, kay kini kasaligan ug matuod. Sa dili madugay si Jehova molihok aron wad-on gikan sa yuta ang kakabos, kagutom, pagdaogdaog, sakit, ug tanang inhustisya. Ingon sa subsob nga ipunting niining magasina gikan sa Kasulatan, ang daghang ebidensiya nagpakita nga kita nagkinabuhi sa panahon sa dihang kining maong mga saad mamatuman. Ang gisaad sa Diyos nga bag-ong kalibotan haduol na! (2 Pedro 3:13) Sa dili madugay, si Jehova ‘molamoy sa kamatayon hangtod sa hangtod’ ug “magpahid sa mga luha gikan sa tanang nawong.”—Isaias 25:8.
Hangtod nga kini mahitabo, malipay kita nga bisan karon dunay mga tawo nga tinuod nga nagtagad. Ang mas dakong hinungdan sa kalipay mao nga si Jehova nga Diyos mismo nagtagad gayod. Sa dili madugay iyang wagtangon ang tanang pagdaogdaog ug pag-antos.
Bug-os kang makasalig sa mga saad ni Jehova. Ang iyang alagad nga si Josue misalig gayod. Nga walay pagduhaduha, giingnan niya ang karaang katawhan sa Diyos: “Kamo nahibalo pag-ayo sa bug-os ninyong kasingkasing ug sa bug-os ninyong kalag nga walay usa ka pulong gikan sa tanang maayong pulong nga gipamulong ni Jehova nga inyong Diyos kaninyo nga napakyas. Silang tanan natuman alang kaninyo. Walay usa ka pulong kanila nga napakyas.” (Josue 23:14) Busa, samtang magpabilin kining presenteng sistema sa mga butang ayaw pagpadaog sa mga pagsulay nga imo tingaling atubangon. Itugyan kang Jehova ang tanan nimong kabalaka, kay siya tinuod gayod nga nagtagad.—1 Pedro 5:7.
[Mga hulagway sa panid 7]
Sa gisaad nga bag-ong kalibotan sa Diyos, mawala sa yuta ang kakabos, pagdaogdaog, sakit, ug inhustisya