Nganong Motuman sa Imong mga Saad?

“IBOTO ang tawo nga diyutay rag mga saad; dili kaayo siya makapahigawad,” nag-ingon ang anhing magtatambag sa presidente nga si Bernard Baruch. Sa kalibotan karon daw gihimo ang mga saad aron pakyason. Kini mahimong mga panaad sa kaminyoon, mga kasabotan sa negosyo, o mga pasalig nga mogugol ug mas daghang panahon uban sa mga anak. Kaylap nga gibalewala ang gipasabot sa naandang panultihon, “Ang bili sa usa ka tawo masukod sa iyang pagtuman sa iyang mga saad.”

Hinuon, daghang tawo ang wala gayoy tuyo nga motuman sa ilang mga saad. Ang uban mohimog dinalidaling mga pasalig nga dili nila matuman o dili motuman sa ilang saad tungod lang kay kini mao ang kinasayonang dalan nga sundon.

Tinuod, lisod tingali ang pagtuman sa usa ka saad kon motungha ang wala-damhang mga kahimtang. Apan ang wala-tumanang saad makahatag ba gayod ug dako kaayong kadaot? Angay ba nimong tagdong seryoso ang imong mga saad? Ang daklit nga pagtan-aw sa panig-ingnan ni Jehova nga Diyos magtabang kanato sa pagkasabot kon nganong angay natong tagdong seryoso kining butanga.

Si Jehova Motuman sa Iyang mga Saad

Kita nagsimba sa Diyos kang kansang ngalan mismo suod nga nalanggikit sa katumanan sa iyang mga saad. Sa kapanahonan sa Bibliya ang usa ka ngalan sagad nga naghubit sa maong tawo. Tinuod usab kini sa ngalang Jehova, nga nagkahulogang “Siya nga Nagpahinabo.” (Exodo 3:14) Busa ang balaang ngalan naglakip sa ideya nga ang Diyos motuman sa iyang mga saad ug mohimo sa iyang mga katuyoan.

Sumala sa iyang ngalan, gituman ni Jehova ang tanang saad nga iyang gihimo sa karaang nasod sa Israel. Mahitungod niining mga saara, si Haring Solomon midawat: “Dalayegon si Jehova, nga naghatag ug pahulayanan sa iyang katawhang Israel sumala sa tanan niyang gisaad. Walay usa ka pulong nga napakyas sa tanan niyang maayong saad nga iyang gisaad pinaagi kang Moises nga iyang alagad.”​—1 Hari 8:56.

Ingon niana ang pagkakasaligan ni Jehova mao nga si apostol Pablo nakapangatarongan: “Sa dihang ang Diyos mihimo sa iyang saad ngadto kang Abraham, sanglit siya wala may kapanumpaan nga mas dako, siya nanumpa sa iyang kaugalingon.” (Hebreohanon 6:13) Oo, ang ngalan ug personalidad mismo ni Jehova maoy garantiya nga dili niya bawion ang iyang mga saad, bisan pag kini maghatag kaniyag dakong kapildihan. (Roma 8:32) Ang kamatuoran nga si Jehova motuman sa iyang mga saad mohatag kanatog paglaom nga maoy angkla alang sa atong kalag, o kinabuhi.​—Hebreohanon 6:19.

Mga Saad ni Jehova ug Atong Kaugmaon

Ang atong paglaom, atong pagtuo, ug atong kinabuhi mismo nag-agad tanan sa katumanan sa mga saad ni Jehova. Unsang paglaoma ang atong gipabilhan? “Adunay bag-ong mga langit ug usa ka bag-ong yuta nga atong ginapaabot sumala sa saad [sa Diyos], ug niini nila magapuyo ang pagkamatarong.” (2 Pedro 3:13) Ang Kasulatan naghatag usab kanatog basehanan sa pagtuo nga “aduna unyay pagkabanhaw sa mga matarong ug sa mga dili-matarong.” (Buhat 24:15) Ug kita makaseguro nga adunay mas labaw pa kay niining presenteng kinabuhi. Sa pagkamatuod, ang gitawag ni apostol Juan nga “sinaad nga butang” mao “ang walay-kataposang kinabuhi.” (1 Juan 2:25) Apan ang mga saad ni Jehova diha sa iyang Pulong dili lamang bahin sa umaabot. Kini naghatag ug kahulogan sa atong adlaw-adlawng kinabuhi karon.

Ang salmista nag-awit: “Si Jehova haduol kanilang tanan nga nagasangpit kaniya, . . . ug ang ilang pagtuaw alang sa tabang iyang pagadunggon.” (Salmo 145:18, 19) Ang Diyos nagpasalig usab kanato nga “siya nagahatag ug kusog sa usang gikapoy; ug sa walay dinamikong kabaskog siya magpadagaya sa bug-os nga gahom.” (Isaias 40:29) Ug pagkamakapahupay ang pagkahibalo nga ‘ang Diyos dili motugot nga tentalon kita labaw sa kon unsay atong maagwanta, apan uban sa tentasyon siya maghimo usab ug kalingkawasan’! (1 Corinto 10:13) Kon kita personal nga nakasinati sa katumanan niining mga saara, kita mahibalo nga si Jehova kasaligan gayod. Tungod sa mga kaayohan nga atong mabatonan gikan sa daghang saad nga gisaad ug gituman sa Diyos, sa unsang paagi angay natong lantawon ang atong mga saad kaniya?

Pagtuman sa Atong mga Saad sa Diyos

Ang atong pagpahinungod sa Diyos sa walay duhaduha mao ang labing hinungdanong saad nga atong mahimo. Pinaagi sa paghimo niini nga lakang, atong gipasundayag nga gusto natong moalagad kang Jehova sa walay kataposan. Bisan tuod ang kasugoan sa Diyos dili mabug-at, mahimong dili kanunayng sayon nga himoon ang iyang kabubut-on, tungod kay nagkinabuhi kita niining daotang sistema sa mga butang. (2 Timoteo 3:12; 1 Juan 5:3) Apan sa dihang kita ‘nakabutang na sa atong kamot diha sa daro’ ug nahimo nang dedikadong mga alagad ni Jehova ug mga tinun-an sa iyang Anak, si Jesu-Kristo, dili gayod kita angayng molingi pa sa mga butang sa kalibotan nga ato nang gibiyaan.​—Lucas 9:62.

Sa dihang kita mag-ampo kang Jehova, tingali matukmod kita sa pagsaad kaniya nga kita makigbugno aron mabuntog ang usa ka kahuyangan, maugmad ang usa ka Kristohanong hiyas, o mapauswag ang usa ka bahin sa atong teokratikanhong kalihokan. Unsay makatabang kanato sa pagtuman niining mga saara?​—Itandi ang Ecclesiastes 5:2-5.

Ang sinserong mga saad nagsumikad sa kasingkasing maingon man sa hunahuna. Busa, atong pamatud-an ang atong mga saad kang Jehova pinaagi sa pagbukas sa atong kasingkasing ngadto kaniya diha sa pag-ampo, nga matinud-anong magpahayag sa atong mga kahadlok, mga tinguha, ug mga kaluyahon. Ang pag-ampo bahin sa usa ka saad magpalig-on sa atong determinasyon sa pagtuman niana. Atong maisip ang atong mga saad sa Diyos ingong mga utang. Kon dagko ang mga utang, ang pagbayad kinahanglang anam-anam. Sa susama, daghan sa atong gipangsaad kang Jehova nagkinahanglag panahon aron matuman. Apan pinaagi sa regular nga paghatag kaniya sa atong maarangan, atong gipakita nga kita may tuyo nga motuman sa atong gisulti, ug siya mohatag kanatog angay nga panalangin.

Atong ikapasundayag nga atong gitagad nga seryoso ang atong mga saad pinaagi sa subsob nga pag-ampo bahin niini, tingali sa adlaw-adlaw. Kini magpakita sa atong langitnong Amahan nga kita sinsero. Kini magsilbi usab ingong usa ka regular nga pahinumdom. Si David nagbilin kanato ug maayong panig-ingnan maylabot niini. Pinaagig awit, iyang gihangyo si Jehova: “Paminawa, Oh Diyos, ang akong mapangaliyupoong pagtuaw. Pamatia ang akong pag-ampo. . . . Ako magaawit sa imong ngalan hangtod sa hangtod, aron ako makabayad sa akong mga panaad adlaw-adlaw.”​—Salmo 61:1, 8.

Pagtuman sa Atong mga Saad Magpalig-on sa Pagsalig

Kon ang mga saad ngadto sa Diyos angayng tagdon nga seryoso, mao usab ang ikaingon bahin niadtong atong gipangsaad sa atong mga isigka-Kristohanon. Dili nato angay trataron si Jehova sa usa ka paagi ug ang atong mga igsoon sa laing paagi. (Itandi ang 1 Juan 4:20.) Diha sa iyang Wali sa Bukid, si Jesus nag-ingon “Himoa lang ang imong pulong nga Oo nga magkahulogag Oo, ang imong Dili, Dili.” (Mateo 5:37) Ang pagpaneguro nga ang atong gisulti kanunayng kasaligan maoy usa ka paagi sa ‘pagbuhat ug maayo kanilang iglabot nato sa pagtuo.’ (Galacia 6:10) Ang matag saad nga atong tumanon magpalig-on sa pagsalig.

Ang kadaot nga mahimo tungod sa dili-pagtuman sa usa ka saad kasagarang modako kon nalangkit ang kuwarta. Kon nagbayad man ug utang, nagbuhat ug usa ka serbisyo, o naghimog kasabotan sa negosyo, ang usa ka Kristohanon kinahanglang motuman sa iyang saad. Kini magpahimuot sa Diyos ug magpalig-on sa pagsalig sa usag usa nga hinungdanon kaayo aron ang mga igsoon “magtipon pagpuyo diha sa panaghiusa.”​—Salmo 133:1.

Ang dili pagtuman sa mga kasabotan, hinunoa, makadaot sa kongregasyon maingon man sa mga indibiduwal nga direktang nalangkit. Usa ka nagapanawng magtatan-aw nag-ingon: “Ang mga kasungian sa negosyo​—nga kanunayng gipahinabo sa mga kasabotan nga sa labing menos giisip sa usa ka partido nga wala tumana—​kasagarang mahibaloan sa kadaghanan. Ingong resulta, ang mga igsoon magdapigdapig, ug ang kahimtang diha sa Kingdom Hall mahimong dili maayo.” Pagkahinungdanon nga mainampingong tagdon ang bisan unsang kasabotan nga atong himoon ug ibutang kana sa kasulatan!a

Kinahanglan usab nga mag-amping sa dihang mamaligyag mahalong mga produkto o magrekomendar ug mga negosyo, ilabina kon personal kitang makaganansiya gikan sa maong transaksiyon. Sa susama, kinahanglang mag-amping pag-ayo nga dili pasobrahan ang mga kaayohan sa pipila ka kagamitan o mga produkto alang sa panglawas o sa pagsaad ug dili realistikanhong mga ganansiya sa mga negosyo. Ang gugma angayng magpalihok sa mga Kristohanon nga ipatin-aw sa bug-os ang bisan unsang risgong nalangkit. (Roma 12:10) Sanglit kadaghanan sa mga igsoon limitadog kasinatian sa negosyo, sila tingali mosalig sa atong tambag tungod lang kay kita isigkamagtutuo nila. Pagkamakapasubo kon madaot kining maong pagsalig!

Ingong mga Kristohanon, dili kita makasagop ug mga kalihokan sa negosyo nga dili-matinud-anon o nga magbalewala sa lehitimong mga intereses sa uban. (Efeso 2:2, 3; Hebreohanon 13:18) Aron mabatonan ang pag-uyon ni Jehova ingong ‘mga dinapit sa iyang tolda,’ kita kinahanglang kasaligan. ‘Bisag nakapanumpa kita ug daotan alang kanato, kita dili mag-usab.’​—Salmo 15:1, 4.

Si Maghuhukom Jepte sa Israel nanaad nga kon ihatag sa Diyos kaniya ang kadaogan batok sa mga Ammonihanon, iyang ihatag kang Jehova ingong halad nga sinunog ang unang motagbo kaniya human nga makapauli gikan sa gubat. Ang mitagbo mao ang bugtong anak ni Jepte, apan wala niya bawia ang iyang saad. Uban sa kinasingkasing nga pagsugot sa iyang anak nga babaye, iyang gihalad siya alang sa permanenteng pag-alagad sa santuwaryo sa Diyos​—usa ka sakripisyo nga sa walay duhaduha masakit ug dakog kapildihan sa daghang paagi.​—Maghuhukom 11:30-40.

Ang mga ansiyano sa kongregasyon ilabinang may responsabilidad sa pagtuman sa ilang mga kasabotan. Sumala sa 1 Timoteo 3:2, ang usa ka magtatan-aw kinahanglang “dili-salawayon.” Mao kini ang paghubad sa Gregong termino nga nagkahulogang “walay ikasaway, dili buluyagon, dili badlongon.” Kini “nagsugyot nga ang tawo dili lamang maayog reputasyon, kondili nga siya takos gayod niini.” (A Linguistic Key to the Greek New Testament) Sanglit ang usa ka magtatan-aw kinahanglang dili-salawayon, ang iyang mga saad kinahanglan nga kanunayng masaligan.

Ubang mga Paagi sa Pagtuman sa Atong mga Saad

Unsay angay natong panglantaw sa mga saad nga atong gipanaad ngadto sa dili mga isigka-Kristohanon? “Palamdaga ang inyong kahayag atubangan sa mga tawo,” si Jesus nag-ingon, “aron ilang makita ang maayo ninyong mga buhat ug mohatag ug himaya sa inyong Amahan nga anaa sa mga langit.” (Mateo 5:16) Pinaagi sa pagpamatuod nga motuman kita sa atong saad, mahimong atong madani ang uban sa atong Kristohanong mensahe. Bisan pa sa tibuok-kalibotang pag-us-os sa mga sukdanan sa pagkamatinud-anon, ang kadaghanang tawo nagpabili gihapon sa integridad. Ang pagtuman sa atong mga saad maoy usa ka paagi sa pagpasundayag sa gugma alang sa Diyos ug silingan ug sa pagdani sa mga mahigugmaon sa pagkamatarong.​—Mateo 22:36-39; Roma 15:2.

Sa ilang 1998 nga tuig sa pag-alagad, ang mga Saksi ni Jehova naggugol ug kapin sa usa ka bilyong oras sa pagpahayag sa dayag sa maayong balita sa Gingharian sa Diyos. (Mateo 24:14) Ang uban niining maong pagsangyaw tingalig gibalewala tungod kay wala nato tumana ang atong saad diha sa mga transaksiyon sa negosyo o sa ubang mga butang. Sanglit naghawas kita sa Diyos sa kamatuoran, ang mga tawo magdahom kanato nga molihok sa matinud-anong paagi. Pinaagi sa pagkahimong kasaligan ug matinud-anon, kita ‘magdayandayan sa pagtulon-an sa atong Manluluwas, ang Diyos, sa tanang butang.”​—Tito 2:10.

Diha sa atong ministeryo, kita adunay mga kahigayonan sa pagtuman sa atong saad sa dihang kita mobalik sa pagduaw niadtong nagpahayag ug interes sa mensahe sa Gingharian. Kon kita moingon nga kita moduaw pag-usab, angay natong himoon kini. Ang pagbalik sumala sa atong gisaad maoy usa ka paagi sa ‘dili paghawid sa maayo gikan niadtong kini gikinahanglan.’ (Proverbio 3:27) Gisaysay sa usa ka sister kining butanga niining paagiha: “Sa daghang okasyon, nakahibalag akog interesadong mga tawong nag-ingon nga usa ka Saksi ang misaad nga mobalik pagduaw apan wala mobalik. Siyempre, nahibalo ko nga ang mga tagbalay wala tingali sa balay o nga ang mga kahimtang nagpalisod tingali sa pagbalik. Apan dili ko gusto nga adunay mosultig ingon niana bahin kanako, busa himoon ko kutob sa akong maarangan nga makita pag-usab ang maong tawo diha sa balay. Ako nagtuo nga kon makapahigawad akog tawo, kini makahatag ug dili maayong dungog kang Jehova ug sa akong mga igsoon sa katibuk-an.”

Sa pipila ka kahimtang, tingali wala kitay ganang mobalik tungod kay nakahinapos kita nga ang tawo dili tinuod nga interesado. Ang mao gihapong sister nagpatin-aw: “Dili ko mosulay nga hukman ang gidak-on sa interes. Ang akong kaugalingong kasinatian nagtudlo kanako nga ang unang impresyon kasagarang sayop. Busa naningkamot ko nga mahimong positibo, nga naglantaw sa kada tawo nga posibleng mahimong brader o sister.”

Diha sa Kristohanong ministeryo ug diha sa daghang ubang bahin, kinahanglang atong ipakita nga ang atong gisulti masaligan. Tinuod, ang pipila ka butang mas sayon nga isulti kay sa himoon. Ang maalamong tawo nag-ingon: “Ang panon sa mga tawo magamantala sa tagsatagsa sa iyang kaugalingong mahigugmaong-kalulot, apan kinsay makakaplag ug usa ka tawong matinumanon?” (Proverbio 20:6) Uban sa determinasyon, kita puwedeng mahimong matinumanon ug kasaligan sa atong saad.

Dagayang mga Panalangin Gikan sa Diyos

Ang tinuyo nga dili pagtuman sa saad maoy dili-matinud-anon ug mahimong ikatandi sa pagsulat ug tseke nga walay mga pondo sa bangko. Apan pagkadakong mga ganti ug mga panalangin ang atong madawat tungod sa pagtuman sa atong mga saad! Usa ka panalangin sa pagkamasaligan mao ang maayong tanlag. (Itandi ang Buhat 24:16.) Imbes sa nagahasol nga mga pagbati sa pagbasol, kita mobatig katagbawan ug kalinaw. Dugang pa, pinaagi sa pagtuman sa atong saad, kita makaamot sa panaghiusa sa kongregasyon, nga nag-agad sa pagsalig sa usag usa. Ang atong “matinud-anong sinultihan” nagrekomendar usab kanato ingong mga ministro sa Diyos sa kamatuoran.​—2 Corinto 6:3, 4, 7.

Si Jehova motuman sa iyang saad, ug siya nagdumot sa “dila nga bakakon.” (Proverbio 6:16, 17) Pinaagi sa pagsundog sa atong langitnong Amahan, kita mas mahiduol kaniya. Nan, tino nga kita adunay maayong katarongan sa pagtuman sa atong mga saad.

[Footnote]

[Mga hulagway sa panid 10]

Gituman ni Jepte ang iyang saad, bisan pag masakit ang paghimo niini

[Mga hulagway sa panid 11]

Kon nagsaad kang mobalik, pangandam ug maayo nga makabalik