Unsay Gipangayo ni Jehova Kanato Karon?

“Usa ka tingog gikan sa panganod [nag-ingon]: ‘Kini mao ang akong Anak, ang hinigugma, kinsa akong giuyonan; pamati kamo kaniya.’”​—MATEO 17:5.

1. Kanus-a natuman ang katuyoan sa Balaod?

GIHATAGAN ni Jehova ang nasod sa Israel ug Balaod, uban ang daghang bahin niini. Mahitungod niini, si apostol Pablo nagsulat: “Kini sila maoy legal nga mga kinahanglanon maylabot sa unod ug gipatuman hangtod sa tinudlong panahon sa pagtul-id sa mga butang.” (Hebreohanon 9:10) Sa dihang giagak sa Balaod ang nahibiling mga Israelinhon sa pagdawat kang Jesus ingong Mesiyas, o Kristo, kini nakatuman sa katuyoan niini. Busa, si Pablo nagpahayag: “Si Kristo mao ang kataposan sa Balaod.”​—Roma 10:4; Galacia 3:19-25; 4:4, 5.

2. Kinsa ang nailalom sa Balaod, ug kanus-a sila napahigawas gikan niini?

² Kini nagpasabot ba nga ang Balaod dili na aplikado kanato karon? Sa pagkatinuod, ang kinabag-an sa katawhan wala gayod mailalom sa Balaod, ingon sa gisaysay sa salmista: “Gipakita [ni Jehova] ang iyang pulong ngadto kang Jacob, ang iyang mga regulasyon ug ang iyang mga tulumanon ngadto sa Israel. Wala niya kana mahimo ngadto sa bisan unsa nga nasod; ug mahitungod sa iyang mga tulumanon, sila wala mahibalo niana.” (Salmo 147:19, 20) Sa dihang gitukod sa Diyos ang bag-ong pakigsaad pinasukad sa halad ni Jesus, bisan ang nasod sa Israel dili na obligado sa pagsunod sa Balaod. (Galacia 3:13; Efeso 2:15; Colosas 2:13, 14, 16) Nan, kon ang Balaod dili na aplikado, unsay gipangayo ni Jehova ngadto niadtong buot moalagad kaniya karon?

Kon Unsay Gipangayo ni Jehova

3, 4. (a) Unsa sa paninugdan ang gipangayo ni Jehova kanato karon? (b) Nganong kinahanglang sundon nato pag-ayo ang mga tunob ni Jesus?

³ Panahon sa kataposang tuig sa ministeryo ni Jesus, ang iyang mga apostoles nga si Pedro, Santiago, ug Juan miuban kaniya ngadto sa usa ka hataas nga bukid, tingali sa bakilid sa Bukid Hermon. Didto nakakita sila ug matagnaong panan-awon kang Jesus diha sa matahom nga himaya ug nakadungog sa kaugalingong tingog sa Diyos nga nag-ingon: “Kini mao ang akong Anak, ang hinigugma, kinsa akong giuyonan; pamati kamo kaniya.” (Mateo 17:1-5) Sa paninugdan, mao kanay gipangayo ni Jehova kanato​—mamati sa iyang Anak ug mosunod sa iyang panig-ingnan ug mga pagtulon-an. (Mateo 16:24) Busa, si apostol Pedro nagsulat: “Si Kristo nag-antos alang kaninyo, nga nagbilin kaninyo ug sulondan aron inyong sundon pag-ayo ang iyang mga tunob.”​—1 Pedro 2:21.

⁴ Nganong kinahanglang sundon nato pag-ayo ang mga tunob ni Jesus? Tungod kay pinaagi sa pagsundog kaniya, kita nagsundog kang Jehova nga Diyos. Si Jesus nahibalo pag-ayo sa Amahan, sanglit siya nakagugol ug dili-maihap nga binilyong katuigan uban kaniya sa langit sa wala pa moanhi sa yuta. (Proverbio 8:22-31; Juan 8:23; 17:5; Colosas 1:15-17) Samtang dinhi sa yuta, si Jesus maunongong naghawas sa iyang Amahan. Siya misaysay: “Ingon sa gitudlo sa amahan kanako ako nagapamulong niining mga butanga.” Sa pagkatinuod, si Jesus misundog gayod pag-ayo kang Jehova nga siya nakaingon: “Siya nga nakakita kanako nakakita usab sa Amahan.”​—Juan 8:28; 14:9.

5. Nailalom sa unsang balaod ang mga Kristohanon, ug kanus-a kanang balaora gipatuman?

⁵ Unsay nalangkit sa pagpamati kang Jesus ug pagsundog kaniya? Kini nagpasabot ba sa pagkanailalom sa balaod? Si Pablo nagsulat: “Ako mismo dili ilalom sa balaod.” Siya nagpunting dinhi sa “daang pakigsaad,” ang pakigsaad sa Balaod nga gihimo uban sa Israel. Hinuon si Pablo midawat nga siya “ilalom sa balaod ngadto kang Kristo.” (1 Corinto 9:20, 21; 2 Corinto 3:14) Sa natapos ang daang pakigsaad sa Balaod, usa ka ‘bag-ong pakigsaad’ ang gipatuman duyog sa ‘balaod ni Kristo’ nga obligado ang tanang ulipon ni Jehova karon sa pagtuman.​—Lucas 22:20; Galacia 6:2; Hebreohanon 8:7-13.

6. Sa unsang paagi ang ‘balaod ni Kristo’ ikahubit, ug sa unsang paagi ato kining masunod?

⁶ Wala himoa ni Jehova ang ‘balaod ni Kristo’ nga usa ka matang sa kalagdaan, nga gihan-ay kini ngadto sa nagkalainlaing mga kategoriya, sama sa gihimo diha sa daang pakigsaad sa Balaod. Kining bag-ong balaod alang sa mga sumusunod ni Kristo walay listahan sa detalyadong mga regulasyon. Apan, diha sa iyang Pulong, si Jehova nagtipig ug upat ka detalyadong mga asoy bahin sa kinabuhi ug mga pagtulon-an sa iyang Anak. Dugang pa, gidasig sa Diyos ang pipila sa unang mga sumusunod ni Jesus sa pagtaganag sinulat nga mga instruksiyon labot sa personal nga paggawi, mga kalihokan sa kongregasyon, pamatasan sulod sa panimalay, ug ubang mga butang. (1 Corinto 6:18; 14:26-35; Efeso 5:21-33; Hebreohanon 10:24, 25) Kon atong ipahiuyon ang atong mga kinabuhi sa panig-ingnan ug mga pagtulon-an ni Jesu-Kristo ug mosunod sa tambag sa dinasig nga unang-siglong mga magsusulat sa Bibliya, kita nagsunod sa ‘balaod ni Kristo.’ Si Jehova nagpangayo niini diha sa iyang mga alagad karon.

Ang Pagkahinungdanon sa Gugma

7. Sa unsang paagi gipasiugda ni Jesus ang diwa sa iyang balaod panahon sa kataposang Paskuwa uban sa iyang mga apostoles?

⁷ Samtang ang gugma hinungdanon ilalom sa Balaod, kini mismo ang kahulogan, o diwa, sa balaod ni Kristo. Kining kamatuorana gipasiugda ni Jesus sa dihang nagtigom siya uban sa iyang mga apostoles aron sa pagsaulog sa Paskuwa sa 33 K.P. Sumala pa sa sumaryo ni apostol Juan sa nahitabo niadtong gabhiona, ang kinasingkasing nga mga pulong ni Jesus naglakip ug 28 ka paghisgot sa gugma. Napasiugda niini ngadto sa iyang mga apostoles ang diwa, o espiritu, sa iyang balaod. Labawng hinungdanon, gisugdan ni Juan ang iyang pagtaho sa mga hitabo niadtong halandomong gabii pinaagi sa pag-ingon: “Tungod kay siya nahibalo sa wala pa ang kasaulogan sa paskuwa nga ang iyang takna miabot na aron siya mobiya gikan niining kalibotana paingon sa Amahan, si Jesus, nga nahigugma sa mga iyaha nga diha sa kalibotan, nahigugma kanila hangtod sa kataposan.”​—Juan 13:1.

8. (a) Unsay nagpakita nga dihay nagpadayong panaglalis taliwala sa mga tinun-an? (b) Sa unsang paagi gitudloan ni Jesus ang iyang mga apostoles ug leksiyon sa pagkamapainubsanon?

⁸ Gihigugma ni Jesus ang iyang mga apostoles, bisan pag naningkamot siya nga walay kalamposan sa pagtabang kanila sa pagbuntog sa ilang dakong pagtinguhag gahom ug posisyon. Mga bulan sa wala pa sila moabot sa Jerusalem, ‘sila naglalis kon kinsa kanila ang mas labaw.’ Ug sa wala pa sila moabot sa siyudad alang sa Paskuwa, ang panaglalis bahin sa posisyon mitungha na usab. (Marcos 9:33-37; 10:35-45) Nga usa kini ka nagpadayong suliran gipakita nianang nahitabo wala magdugay human nga nanulod ang mga apostoles sa itaas nga lawak aron makig-ambit nianang mahimong ilang kataposang Paskuwa nga magkauban. Niadtong tungora walay nagpahimulos sa higayon sa pagpakita sa naandan, maabiabihong pag-alagad sa paghugas sa mga tiil sa uban. Aron matudloan silag leksiyon sa pagkamapainubsanon, si Jesus mismo ang naghugas sa ilang mga tiil.​—Juan 13:2-15; 1 Timoteo 5:9, 10.

9. Sa unsang paagi gipakiglabotan ni Jesus ang kahimtang nga nahitabo human sa kataposang Paskuwa?

⁹ Bisan pa nianang leksiyona, human sa pagsaulog sa Paskuwa ug pagsugod ni Jesus sa Memoryal sa iyang nagsingabot nga kamatayon, matikdi kon unsay nahitabo na usab. Nag-ingon ang asoy sa Ebanghelyo ni Lucas: “Dihay nahitabo usab nga init nga panaglalis taliwala kanila bahin sa kon kinsa kanila ang gihunahuna nga labing dako.” Imbes masuko sa mga apostoles ug kasab-an sila, si Jesus malulotong nagtambag kanila bahin sa panginahanglan nga mahimong lahi gikan sa gutom-ug-gahom nga mga magmamando sa kalibotan. (Lucas 22:24-27) Dayon siya naghatag nianang mahimong tawgong pundasyon sa balaod ni Kristo, nga nag-ingon: “Ako magahatag kaninyo ug usa ka bag-ong sugo, nga kamo maghigugmaay sa usag usa; ingon sa akong paghigugma kaninyo, nga kamo usab maghigugmaay sa usag usa.”​—Juan 13:34.

10. Unsang sugo ang gihatag ni Jesus sa iyang mga tinun-an, ug unsay nalangkit niini?

¹⁰ Sa ulahi niadtong gabhiona si Jesus naghisgot kon unsa ka malukpanon ang samag-Kristo nga gugma. Siya nag-ingon: “Mao kini ang akong sugo, nga kamo maghigugmaay sa usag usa ingon sa akong paghigugma kaninyo. Walay usa nga may gugmang labaw pa niini, nga ang usa magatugyan sa iyang kalag alang sa iyang mga higala.” (Juan 15:12, 13) Ang buot bang ipasabot ni Jesus nga ang iyang mga sumusunod kinahanglang andam nga magpakamatay alang sa isigkamagtutuo kon gikinahanglan kini sa higayon? Mao kanay pagsabot ni Juan, nga nakasaksi mismo niining okasyona, kay siya sa ulahi nagsulat: “Pinaagi niini atong nahibaloan ang gugma, tungod kay kanang usa [Jesu-Kristo] mitugyan man sa iyang kalag alang kanato; ug nailalom kita sa obligasyon nga itugyan ang atong kalag alang sa atong mga igsoon.”​—1 Juan 3:16.

11. (a) Sa unsang paagi matuman nato ang balaod ni Kristo? (b) Unsang panig-ingnan ang gihatag ni Jesus?

¹¹ Busa, kita wala makatuman sa balaod ni Kristo pinaagi lamang sa pagtudlo sa uban mahitungod kaniya. Kita kinahanglan usab nga magkinabuhi ug magpakitag paggawi sama kang Jesus. Tinuod, si Jesus migamit ug matahom, maayong pagkapiling mga pulong sa iyang mga diskurso. Bisan pa niana, siya nagtudlo usab pinaagig panig-ingnan. Bisag si Jesus nahimong usa ka gamhanang espiritung linalang sa langit, gipahimuslan niya ang higayon sa pag-alagad sa intereses sa iyang Amahan dinhi sa yuta ug sa pagpasundayag kon sa unsang paagi kita magkinabuhi. Siya mapainubsanon, maluloton, ug mahunahunaon, nga mitabang niadtong nabug-atan ug dinaogdaog. (Mateo 11:28-30; 20:28; Filipos 2:5-8; 1 Juan 3:8) Ug si Jesus nag-awhag sa iyang mga sumusunod sa paghigugma sa usag usa, sama sa iyang paghigugma kanila.

12. Nganong ikaingon nga gihatagan ug dakong pasiugda sa balaod ni Kristo ang panginahanglan sa paghigugma kang Jehova?

¹² Unsay dapit sa gugma alang kang Jehova​—ang kinalabwang kasugoan sa Balaod—​diha sa balaod ni Kristo? (Mateo 22:37, 38; Galacia 6:2) Ikaduha bang dapit? Dili gayod! Ang gugma alang kang Jehova ug ang gugma alang sa atong isigka-Kristohanon nalambigit gayod. Ang usa dili mahimong tinuod nga nahigugma kang Jehova nga dili usab mahigugma sa iyang igsoon, kay si apostol Juan nag-ingon: “Kon adunay mopahayag: ‘Gihigugma ko ang Diyos,’ apan nagadumot sa iyang igsoon, siya bakakon. Kay siya nga wala magahigugma sa iyang igsoon, kinsa iyang nakita, dili makahigugma sa Diyos, kinsa wala niya makita.”​—1 Juan 4:20; itandi ang 1 Juan 3:17, 18.

13. Unsa ang epekto sa pagsugot sa mga tinun-an ni Jesus sa bag-ong kasugoan?

¹³ Sa dihang gihatagan ni Jesus ang iyang mga tinun-an ug bag-ong sugo sa paghigugma sa usag usa maingon nga siya nahigugma kanila, iyang gisaysay ang epekto nga mahimo niini. “Pinaagi niini ang tanan makaila nga kamo akong mga tinun-an,” siya miingon, “kon kamo adunay gugma taliwala kaninyo.” (Juan 13:35) Sumala pa kang Tertullian, nga nabuhi kapin sa usa ka gatos ka tuig human mamatay si Jesus, ang inigsoong gugma sa unang mga Kristohanon adunay epekto nga sama niana. Si Tertullian nagkutlog dili mga Kristohanon nga nag-ingon bahin sa mga sumusunod ni Kristo: ‘Tan-awa kon unsa ka dako sa ilang paghigugma sa usag usa ug sa ilang pagkaandam pa gani nga magpakamatay alang sa usag usa.’ Kita makapangutana sa atong kaugalingon, ‘Ako ba nagpakita sa maong gugma sa isigka-Kristohanon nga nagpamatuod nga usa ako sa mga tinun-an ni Jesus?’

Kon sa Unsang Paagi Kita Makapamatuod sa Atong Gugma

14, 15. Unsay makapalisod tingali sa pagtuman sa balaod ni Kristo, apan unsay makatabang kanato sa pagtuman niini?

¹⁴ Hinungdanon nga ang mga alagad ni Jehova magpakitag samag-Kristo nga gugma. Apan naglisod ka ba sa paghigugma sa isigka-Kristohanon nga nagpasundayag ug hakog nga mga kinaiya? Aw, sumala sa ato nang nakita, bisan ang mga apostoles naglalis ug naningkamot sa pagpalambo sa ilang kaugalingong mga intereses. (Mateo 20:20-24) Ang mga taga-Galacia usab nag-awayay sa usag usa. Human sa pagpunting nga ang paghigugma sa silingan nakatuman sa Balaod, si Pablo nagpasidaan kanila: “Apan, kon kamo padayong magpinahitay ug magtinukbanay sa usag usa, pagbantay nga kamo dili mahurot ug kalaglag sa usag usa.” Human sa pagtandi sa mga buhat sa unod ug sa mga bunga sa espiritu sa Diyos, si Pablo nagdugang sa tambag: “Dili kita magpakaimportante sa kaugalingon, nga magaaghat ug panag-indigay sa usag usa, nga magasinahay sa usag usa.” Dayon ang apostol nag-awhag: ‘Padayong magpinas-anay sa mga kabug-at sa usag usa, ug sa ingon tumana ang balaod ni Kristo.’​—Galacia 5:14–6:2.

¹⁵ Pinaagi sa pagpangayo nga tumanon ang balaod ni Kristo, sobra ra ba kaayo ang gipangayo ni Jehova kanato? Bisan tuod lisod ang pagpakitag kalulot niadtong kinsa, sa baylo, naningka kanato ug nakapasakit kanato, kita obligado sa “pagkahimong mga tigsundog sa Diyos, ingon nga hinigugmang mga anak, ug padayon sa paglakaw diha sa gugma.” (Efeso 5:1, 2) Kita kinahanglang magpadayon sa pagtan-aw sa panig-ingnan sa Diyos, kinsa “nagarekomendar sa iyang kaugalingong gugma kanato sa pagkaagi nga, samtang kita mga makasasala pa, si Kristo namatay alang kanato.” (Roma 5:8) Pinaagi sa paghimog unang lakang sa pagtabang sa uban, lakip niadtong nagapalabilabi kanato, atong matagamtam ang katagbawan sa kasayoran nga kita nagasundog sa Diyos ug masinugtanon sa balaod ni Kristo.

16. Sa unsang paagi kita makapamatuod sa atong gugma sa Diyos ug kang Kristo?

¹⁶ Angay natong hinumdoman nga atong mapamatud-an ang atong gugma pinaagi sa atong binuhatan, dili lamang kon unsay atong isulti. Bisan si Jesus niadto nakakitag usa ka bahin sa kabubut-on sa Diyos nga lisod dawaton tungod sa tanang nalangkit niini. “Amahan, kon buot mo, kuhaa kining kopa gikan kanako,” si Jesus nag-ampo. Apan siya dalidaling midugang: “Hinuon, ipahinabo, dili ang akong kabubut-on, apan ang imoha.” (Lucas 22:42) Bisan pa sa tanang giantos ni Jesus, iyang gituman ang kabubut-on sa Diyos. (Hebreohanon 5:7, 8) Ang pagkamasinugtanon maoy pamatuod sa atong gugma ug nagpasundayag nga atong gidawat nga ang dalan sa Diyos mao ang labing maayo. “Ang paghigugma sa Diyos nagakahulogan niini,” nag-ingon ang Bibliya, “nga atong sundon ang iyang mga sugo.” (1 Juan 5:3) Ug gisultihan ni Jesus ang iyang mga apostoles: “Kon kamo nahigugma kanako, inyong sundon ang akong mga sugo.”​—Juan 14:15.

17. Unsang linaing sugo ang gihatag ni Jesus sa iyang mga sumusunod, ug sa unsang paagi kita nahibalo nga kini aplikado usab kanato karon?

¹⁷ Gawas sa pagsugo sa iyang mga sumusunod sa paghigugma sa usag usa, unsang linaing sugo ang gihatag ni Kristo kanila? Siya nagsugo nga ilang himoon ang buluhatong pagsangyaw nga alang niini iyang gibansay sila. Si Pedro nag-ingon: “Siya nagsugo kanamo nga magwali ngadto sa mga tawo ug maghatag ug bug-os nga pagsaksi.” (Buhat 10:42) Si Jesus espesipikong nagsugo: “Panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, mga magtudlo kanila sa pagsunod sa tanang butang nga akong gisugo kaninyo.” (Mateo 28:19, 20; Buhat 1:8) Gipadayag ni Jesus nga ang maong mga sugo aplikado usab ngadto sa iyang mga sumusunod karon sa “panahon sa kataposan,” kay siya nag-ingon: “Kining maayong balita sa gingharian igawali sa tibuok gipuy-ang yuta ingong usa ka pagsaksi ngadto sa tanang kanasoran; ug unya moabot ang kataposan.” (Daniel 12:4; Mateo 24:14) Sa pagkatinuod, kabubut-on sa Diyos nga kita mosangyaw. Bisan pa, ang uban tingali maghunahuna nga sobra ra kaayo ang Diyos sa pagsugo kanato nga atong himoon kining buluhatona. Apan tinuod ba?

Kon Nganong Kini Daw Lisod Kaayo

18. Unsay angay natong hinumdoman kon kita mag-antos tungod sa pagtuman sa gipangayo ni Jehova?

¹⁸ Sumala sa ato nang nakita, si Jehova naghangyo sa iyang katawhan sa pagsunod sa nagkalainlaing mga kinahanglanon sa tibuok kasaysayan. Ug maingon nga ang gihangyo kanila nga buhaton nagkalainlain, mao man ang kinaiyahan sa mga pagsulay nga ilang naagoman. Ang pinalanggang Anak sa Diyos nakaagom ug labing malisod nga mga pagsulay, nga gipatay sa ulahi diha sa labing mabangis nga paagi tungod kay nagtuman sa gihangyo sa Diyos. Apan sa dihang kita mag-antos tungod kay nagtuman sa gipangayo ni Jehova kanato, angay natong hinumdoman nga dili siya mao ang hinungdan sa atong mga pagsulay. (Juan 15:18-20; Santiago 1:13-15) Ang pag-alsa ni Satanas nagpasulod sa sala, pag-antos, ug kamatayon, ug siya ang usa nga nagpahinabo sa mga kahimtang nga kasagarang magpalisod kaayo sa pagtuman sa gihangyo ni Jehova sa iyang mga alagad.​—Job 1:6-19; 2:1-8.

19. Nganong usa ka pribilehiyo ang pagtuman sa gipangayo sa Diyos kanato pinaagi sa iyang Anak?

¹⁹ Pinaagi sa iyang Anak, si Jehova nagsugo nga niining panahon sa kataposan, iwali sa Iyang mga alagad sa tibuok yuta nga ang bugtong kasulbaran sa tanang pag-antos sa tawo mao ang pagmando sa Gingharian. Wagtangon niining kagamhanan sa Diyos ang tanang suliran sa yuta​—gubat, krimen, kawalad-on, pagkatigulang, sakit, kamatayon. Ipasulod usab sa Gingharian ang usa ka mahimayaong yutan-ong paraiso, nga diha niana bisan ang mga patay pagabanhawon. (Mateo 6:9, 10; Lucas 23:43; Buhat 24:15; Pinadayag 21:3, 4) Pagkadakong pribilehiyo ang pagmantala sa maayong balita nianang mga butanga! Nan, matin-aw nga walay problema kanang gipangayo ni Jehova nga atong buhaton. Kita makasugat ug pagsupak, apan si Satanas nga Yawa ug ang iyang kalibotan maoy responsable niini.

20. Sa unsang paagi masagubang nato ang bisan unsang suliran nga ihatag sa Yawa?

²⁰ Sa unsang paagi malamposon natong masagubang ang bisan unsang suliran nga ihatag ni Satanas? Pinaagi sa pagsilsil diha sa hunahuna niining mga pulonga: “Magmaalamon, anak ko, ug lipaya ang akong kasingkasing, aron matubag ko siya nga nagtamay kanako.” (Proverbio 27:11) Si Jesus naghatag kang Jehova ug usa ka tubag sa pagtamay ni Satanas pinaagi sa pagbiya sa kasegurohan sa langitnong kinabuhi aron tumanon ang kabubut-on sa iyang Amahan dinhi sa yuta. (Isaias 53:12; Hebreohanon 10:7) Ingong tawo, giantos ni Jesus ang tanang pagsulay nga gihatag kaniya, bisan kamatayon diha sa kahoy sa pagsakit. Kon kita mosunod kaniya ingong atong Sulondan, kita usab makasagubang sa mga pag-antos ug mobuhat sa gipangayo ni Jehova kanato.​—Hebreohanon 12:1-3.

21. Unsay imong pagbati labot sa gugma nga gipakita ni Jehova ug sa iyang Anak?

²¹ Pagkadako sa gugma sa Diyos ug sa iyang Anak nga gipasundayag alang kanato! Tungod sa halad ni Jesus, ang mga tawong masinugtanon adunay palaabotong mabuhi sa walay kataposan sa Paraiso. Busa dili nato tugotan ang bisan unsa nga maglubog sa atong paglaom. Hinunoa, sundon gayod nato ang gihimong posible ni Jesus, maingon man diha kang Pablo, kinsa nag-ingon: “Ang Anak sa Diyos . . . nahigugma kanako ug nagtugyan sa iyang kaugalingon alang kanako.” (Galacia 2:20) Ug hinaot nga kita magpakitag kinasingkasing nga pasalamat sa atong mahigugmaong Diyos, si Jehova, kinsa dili gayod mangayog sobra ra kaayo kanato.

Unsaon Nimo Pagtubag?

◻ Unsay gipangayo ni Jehova karon kanato?

◻ Panahon sa iyang kataposang gabii uban sa mga apostoles, sa unsang paagi gipasiugda ni Kristo ang pagkahinungdanon sa gugma?

◻ Sa unsang paagi atong mapamatud-an nga atong gihigugma ang Diyos?

◻ Nganong usa ka pribilehiyo ang pagtuman sa gipangayo ni Jehova kanato?

[Hulagway sa panid 23]

Unsang leksiyon ang gitudlo ni Jesus pinaagi sa paghugas sa mga tiil sa iyang mga apostoles?

[Hulagway sa panid 25]

Bisan pa sa pagsupak, ang pagpaambit sa maayong balita maoy usa ka makapalipayng pribilehiyo