Pagkat-on sa Kinalabwang Dalan sa Gugma

Kosovo, Lebanon, ug Irlandia. Kini maoy mga ngalan nga subsob nga makita diha sa mga balita sa di pa dugayng katuigan. Kini makapahanduraw sa mga tawo sa mga esena sa pag-ula ug dugo, pagpamomba, ug pagpamatay. Siyempre, ang mapintas nga mga gubat nga gipahinabo sa relihiyoso, rasanhon, etniko, o ubang mga kalainan dili bag-o. Sa pagkatinuod, ang mga panid sa kasaysayan napuno niana, ug kini nagpahinabo ug hilabihang pag-antos sa mga tawo.

KAY nakita nga daghag gubat sa tibuok kasaysayan, daghan ang nakahinapos nga ang mga gubat dili gayod kalikayan ug nga kinaiyanhon sa mga tawo nga magdumtanay sa usag usa. Apan, ang maong mga panglantaw kasukwahi kaayo sa mga pagtulon-an sa Pulong sa Diyos, ang Bibliya. Ang Kasulatan dayag nga nag-ingon: “Siya nga wala magahigugma wala makaila sa Diyos, tungod kay ang Diyos gugma.” (1 Juan 4:8) Tin-awng buot sa Maglalalang nga ang mga tawo maghigugmaay sa usag usa.

Ang Bibliya nagpadayag usab nga ang tawo gilalang sa dagway sa Diyos. (Genesis 1:26, 27) Kini nagpasabot nga ang mga tawo gihatagan sa kapasidad sa pagsumbalik-silaw sa mga hiyas sa Diyos, nga ang kinalabwan niana mao ang gugma. Sanglit ingon niini, nganong ang mga tawo wala gayod magpakita ug gugma sa usag usa latas sa kasaysayan? Sa makausa pa, ang Bibliya nagtagana ug hait nga panabot. Tungod kini kay ang unang tawhanong magtiayon, si Adan ug Eva, mirebelde sa Diyos ug nakasala. Ingong resulta, ang tanan nilang kaliwat nakapanunod sa sala ug pagkadili-hingpit. Ang Roma 3:23 nagsaysay: “Ang tanan nakasala ug wala makaabot sa himaya sa Diyos.” Ang atong hinatag-Diyos nga katakos sa paghigugma nadaot sa atong napanunod nga sala ug pagkadili-hingpit. Nagpasabot ba kini nga ang mga tawo dili na makaarang sa paghigugmaay sa usag usa? Duna bay paglaom nga makapahimulos pa kita ug malinawon, mahigugmaong relasyon uban sa atong mga isigkatawo?

Kinahanglang Makakat-on Kita sa Paghigugma sa Diyos

Si Jehova nga Diyos nahibalo nga bisan pa sa tanan, ang tawo makaarang gihapon sa pagpakita ug gugma. Mao nga iyang gibaoran ang tanan nga buot mopahimuot kaniya sa pagpasundayag ug gugma sa labing maayo nga ilang maarangan. Kining maong kinahanglanon gipatin-aw sa Anak sa Diyos, si Jesu-Kristo, sa dihang gihangyo siya sa pagngalan sa kinadak-ang sugo sa Kasugoan nga gihatag ngadto sa Israel. Siya miingon: “‘Higugmaon mo gayod si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.’ Kini ang kinadak-an ug unang sugo.” Dayon siya midugang: “Ang ikaduha, nga susama niini, mao kini, ‘Higugmaon mo gayod ang imong silingan ingon sa imong kaugalingon.’ Niining duha ka sugo nahisang-at ang tibuok Balaod.”​—Mateo 22:37-40.

Apan, daghang tawo ang mibati nga lisod kaayo ang paghigugma sa usa ka persona nga dili nila makita, ug kitang mga tawo dili makakita kang Jehova nga Diyos tungod kay siya Espiritu. (Juan 4:24) Sa gihapon, naapektahan kita kada adlaw sa ginahimo sa Diyos, sanglit kitang tanan nagdepende sa daghang maayong mga butang nga iyang gilalang alang sa atong kaayohan. Gipunting ni apostol Pablo kining maong kamatuoran sa dihang miingon siya: “Wala biyai [sa Diyos] ang iyang kaugalingon nga walay saksi sa pagkaagi nga siya naghimo ug maayo, nga naghatag kaninyog ulan gikan sa langit ug mabungahong mga panahon, nga nagbuhong sa inyong mga kasingkasing sa pagkaon ug sa kasaya.”​—Buhat 14:17.

Bisan tuod ang tanan makabenepisyo gikan sa mga tagana sa Maglalalang sa usa ka paagi o sa lain, diyutay lamang kaayo ang mapasalamaton kaniya o natukmod sa paghatag ug pasalamat kaniya. Busa, kinahanglang repasohon nato ang tanang maayong mga butang nga nahimo sa Diyos alang kanato ug palandongon ang kahibulongang mga hiyas nga nag-apektar sa tanang gihimo niya. Ang pagbuhat niana kinahanglang makapaarang kanato sa pag-ila sa makalilisang nga kaalam ug gahom sa atong Dakong Maglalalang. (Isaias 45:18) Labaw sa tanan, kinahanglang motabang kini kanato sa pagsabot kon unsa siya ka mahigugmaon nga Diyos, sa pagkaagi nga wala lamang niya ihatag kanato ang kinabuhi kondili nagpaposible nga mapahimuslan nato ang daghang kalipayan sa pagkinabuhi.

Pananglitan, hunahunaa ang nagkadaiya kaayong matahom nga kabulakan nga gilalang sa Diyos dinhi sa yuta. Pagkakahibulongan nga gihatagan usab niya kita ug katakos sa pagkakita ug pagbaton ug dakong kahimuot gikan niining matahom nga mga butang! Sa susama, gitagana sa Diyos ang tanang matang sa sustansiyadong pagkaon alang sa atong pagkinabuhi. Pagkamahunahunaon niya nga gilalang usab niya diha kanato ang sentido sa pagtilaw aron masinati nato ang maong kalipay gikan sa pagkaon! Dili ba kini dayag nga mga pamatuod nga ang Diyos tinuod nga nahigugma kanato ug naghunahuna sa labing ikaayo nato?​—Salmo 145:16, 17; Isaias 42:5, 8.

Gawas pa sa pagpadayag sa iyang kaugalingon kanato pinaagi sa “basahon sa kalalangan,” ang Maglalalang, pinaagi sa iyang Pulong, ang Bibliya, nagpakita kanato kon unsa siyang matanga sa pagka-Diyos. Tungod kini kay diha sa Bibliya nasulat ang daghang mahigugmaong mga butang nga nahimo ni Jehova nga Diyos sa nangagi ug ang daghan kaayong panalangin nga iyang gisaad nga ihatag sa katawhan sa haduol nga umaabot. (Genesis 22:17, 18; Exodo 3:17; Salmo 72:6-16; Pinadayag 21:4, 5) Labaw sa tanan, ang Bibliya nagpadayag kanato sa kinadak-ang pagpahayag sa gugma sa Diyos ngadto sa katawhan​—ang paghatag sa iyang bugtong Anak nga mahimong atong Manunubos aron kita mahigawas gikan sa pagkaulipon sa sala ug kamatayon. (Roma 5:8) Sa pagkatinuod, kon mas daghan ang atong mahibaloan bahin sa atong mahigugmaong Maglalalang, labi pa kitang matukmod sa paghigugma kaniya gikan sa atong kasingkasing.

Pagkat-on sa Paghigugma sa Atong mga Isigkatawo

Sumala sa gipunting ni Jesus, dugang pa sa paghigugma sa Diyos uban sa atong tibuok kasingkasing, kalag, ug hunahuna, angay natong higugmaon ang atong silingan sama sa atong kaugalingon. Sa pagkatinuod, ang gugma sa Diyos nag-obligar kanato sa paghigugma sa atong mga isigkatawo. Si apostol Juan misaysay: “Mga hinigugma, kon ang Diyos mihigugma kanato niining paagiha, nan kita sa atong kaugalingon nahailalom sa obligasyon nga maghigugmaay sa usag usa.” Gipasiugda pa niya: “Kon adunay mopahayag: ‘Gihigugma ko ang Diyos,’ apan nagadumot sa iyang igsoon, siya bakakon. Kay siya nga wala magahigugma sa iyang igsoon, kinsa iyang nakita, dili makahigugma sa Diyos, kinsa wala niya makita. Ug kini nga sugo atong nabatonan gikan kaniya, nga ang usa kinsa nahigugma sa Diyos kinahanglan usab magahigugma sa iyang igsoon.”​—1 Juan 4:11, 20, 21.

Karon nagkinabuhi kita sa kalibotan diin ang kadaghanang tawo nagpakita ug ako-una nga tinamdan, “mahigugmaon sa ilang kaugalingon,” sumala sa gitagna sa Bibliya. (2 Timoteo 3:2) Busa, kon buot natong makat-onan ang kinalabwang dalan sa gugma, kinahanglang maningkamot kita pag-ayo sa pagbag-o sa atong hunahuna ug pagsundog sa atong mahigugmaong Maglalalang, inay kay sundon ang hakog nga mga dalan sa mga tawo sa katibuk-an. (Roma 12:2; Efeso 5:1) Ang Diyos gani “malulot ngadto sa mga dili-mapasalamaton ug mga tuman-kadaotan,” ug “nagapasubang siya sa iyang adlaw diha sa mga tawong daotan ug sa mga maayo ug nagapaulan diha sa mga tawong matarong ug sa mga dili-matarong.” Sanglit ang atong langitnong Amahan nagpakita sa maong halangdong panig-ingnan alang kanato, kinahanglang maningkamot kita nga mahimong maluloton ug matinabangon sa tanan. Sa pagbuhat niana, atong mapamatud-an ang atong kaugalingon nga ‘mga anak sa atong mahigugmaong langitnong Amahan.’​—Lucas 6:35; Mateo 5:45.

Usahay ang maong mahigugmaong mga buhat moresulta sa pagtabang sa mga tawo nga mahimong mga magsisimba sa matuod nga Diyos. Pipila ka tuig kanhi usa ka asawa nga usa sa mga Saksi ni Jehova misulay sa pagpaambit sa mensahe sa Bibliya sa iyang silingan, apan hugot nga gisalikway. Bisan pa niana, wala siya maluya sa maong pagsanong. Hinunoa, nagpadayon siya sa pagpakita ug kalulot ug misulay sa pagkahimong matinabangon sa maong silingan. Usa ka higayon niana gitabangan niya ang silingan nga mobalhin ngadto sa laing balay. Sa laing higayon gihikay niya nga dunay makakuyog sa silingan ngadto sa erport aron pagsugat sa mga paryente sa maong silingan. Sa ulahi, ang silingan midawat ug pagtuon sa Bibliya ug ngadtongadto nahimong masibotong Kristohanon bisan pa sa grabeng paglutos gikan sa iyang bana. Oo, kadtong mga pagpahayag sa gugma nagpahiluna ug pundasyon alang sa walay-kataposang mga panalangin.

Kon magmatinud-anon kita bahin niana, atong dawaton nga gihigugma kita sa Diyos dili tungod kay daghan kita ug dalayegong mga hiyas. Sa kasukwahi, siya nahigugma kanato bisan tuod daghan kitag mga sayop ug mga kakulangan. Kay ingon niana, kinahanglang makakat-on usab kita sa paghigugma sa atong mga isigkatawo bisan pa sa daghan nilang mga sipyat. Kon bansayon nato ang atong kaugalingon sa pag-ila ug pag-apresyar sa maayong mga hiyas sa uban inay kay pangitaan silag mga sayop, makaplagan natong mas sayon kaayo ang paghigugma kanila. Ang atong bation ngadto kanila mahimong mosaylo pa gani sa gugma nga gimandoan sa prinsipyo ug maglakip sa mainit nga pagbati ug kahinangop nga naglungtad tali sa suod nga managhigala.

Pagpatubo sa Imong Gugma

Ang gugma ug panaghigalaay kinahanglang amomahon ug ugmaron, ug lakip sa hinungdanong mga sangkap niini mao ang katim-os ug pagkamatinud-anon. Ang uban mosulay sa pagtago sa ilang mga kakulangan aron magbilin ug maayong dungog sa mga tawo nga gusto nilang higalaon. Apan, ang maong dalan kasagarang mosumbalik, sanglit ang uban ngadtongadto makadiskobre sa kamatuoran ug mabugnaw sa maong pagkadili-matinud-anon. Busa, kinahanglang dili kita mahadlok nga mahibaloan sa uban kon unsa gayod kita​—bisan tuod duna kitay mga kakulangan nga atong gipaningkamotan nga mabuntog. Mahimong motabang kini sa pagpakighigala kanila.

Pananglitan, usa ka tigulang nga Saksi nga babaye sa usa ka kongregasyon sa Halayong Sidlakan mubo lamang ug edukasyon. Bisan pa niana, wala gayod siya mosulay sa pagtago nianang maong kamatuoran gikan sa uban. Siya prangkang modawat, pananglitan, nga dili siya makaarang sa pagpakita sa uban kon unsaon pagpamatuod gikan sa mga tagna ug kasaysayan sa Bibliya nga ang Hentil nga Kapanahonan natapos sa 1914.a Apan, nagpakita siya ug maayo kaayong panig-ingnan sa kasibot alang sa ministeryo, maingon man sa gugma ug kamanggihatagon sa mga igsoon, nga siya mabinationg gitawag ingong mutya sa kongregasyon.

Sa ubang mga kultura, ang dayag nga pagpakitag pagmahal wala uyoni; ang mga tawo gitudloan sa pagpakita ug matinahurong pormalidad sa ilang mga pagpakiglabot sa uban. Bisan tuod kanunayng maayo nga magmatinahuron ug magmahunahunaon, kinahanglang dili nato tugotan ang atong pagkamatinahuron nga mosanta o mopugong kanato sa pagpakitag pagkamabination sa uban. Si Jehova wala maulaw sa pag-angkon sa iyang pagmahal alang sa iyang pinili nga katawhan, ang karaang Israel, nga nag-ingon kanila: “Gihigugma ko ikaw sa gugma nga hangtod sa panahong walay tino.” (Jeremias 31:3) Sa susama, giingnan ni apostol Pablo ang iyang kaubang mga magtutuo sa Tesalonica: “Kay may malumong pagmahal kaninyo, kami nahimuot pag-ayo nga ipaambit kaninyo, dili lamang ang maayong balita sa Diyos, apan usab ang among kaugalingong mga kalag, tungod kay kamo nahimo mang hinigugma alang kanamo.” (1 Tesalonica 2:8) Busa samtang kita maningkamot sa pag-ugmad ug tiunay nga pagmahal alang sa mga isigkatawo, mas kaharmonya sa pagtulon-an sa Bibliya nga tugotan ang maong pagbati nga kinaiyanhong ipahayag inay kay pugngan.

Gikinahanglan ang Padayong Paningkamot

Ang pagkakat-on sa pagbati ug pagpakita ug gugma ngadto sa uban maoy nagapadayon nga proseso. Ang paghimo niana nagkinahanglan ug dakong paningkamot sa atong bahin tungod kay kinahanglan kitang maningkamot aron mabuntog ang atong mga pagkadili-hingpit maingon man makigbisog sa kusganong impluwensiya niining walay-gugma nga kalibotan. Apan, ang dagayang mga ganti nga dad-on niini naghimo niining takos gayod.​—Mateo 24:12.

Bisan niining dili gayod hingpit nga kalibotan, makatagamtam kita ug mas maayong relasyon uban sa atong mga isigkatawo, nga moresulta sa dakong kalipay, kalinaw, ug katagbawan alang kanato ug sa uban. Pinaagi sa paghimo nianang maong paningkamot, atong mapamatud-an ang atong kaugalingon nga takos sa kahibulongang paglaom nga mabuhi sa walay kataposan sa bag-ong kalibotan sa Diyos. Labaw sa tanan, pinaagi sa pagkat-on sa kinalabwang dalan sa gugma, mahimong mabatonan nato ang pag-uyon ug mga panalangin sa atong mahigugmaong Maglalalang, karon ug hangtod sa kahangtoran!

[Footnote]

[Mga hulagway sa panid 10]

Ang Kristohanong gugma ikapakita pinaagi sa malulotong mga buhat

[Picture Credit Line sa panid 8]

UN PHOTO 186226/​M. Grafman