Unsa ka Dako ang Imong Paghigugma sa Pulong sa Diyos?
“Pagkadako sa akong paghigugma sa imong balaod! Sa tibuok adlaw kini mao ang akong gipalandong.”—SALMO 119:97.
1. Unsa ang usa ka paagi nga ang mahinadlokon-sa-Diyos nga mga indibiduwal nagpasundayag sa ilang gugma sa Pulong sa Diyos?
GINATOS ka milyong lalaki ug babaye ang nanag-iyag kopya sa Bibliya. Apan dunay kalainan tali sa pagpanag-iyag Bibliya ug paghigugma sa Pulong sa Diyos. Husto kaha nga ang usa ka tawo moangkon nga nahigugma sa Pulong sa Diyos kon talagsa ra niya kining basahon? Siyempre dili! Sa kasukwahi, ang pipila nga kanhi diyutay rag pagtamod sa Bibliya nagbasa niini karon sa adlaw-adlaw. Sila nakakat-on sa paghigugma sa Pulong sa Diyos, ug sama sa salmista, sila namalandong na karon sa Pulong sa Diyos “sa tibuok adlaw.”—Salmo 119:97.
2. Sa unsang paagi nalig-on ang pagtuo sa usa sa mga Saksi ni Jehova ilalom sa malisod nga mga kahimtang?
2 Ang usa nga nakakat-on sa paghigugma sa Pulong sa Diyos mao si Nasho Dori. Kauban sa mga isigkamagtutuo, siya milahutay sa daghang dekada, nga nag-alagad kang Jehova sa iyang yutang natawhan sa Albania. Sa dakong bahin nianang panahona, ang mga Saksi ni Jehova gidili, ug diyutay rang literatura sa Bibliya ang nadawat niining matinumanong mga Kristohanon. Bisan pa niana, ang pagtuo ni Brader Dori nagpabiling lig-on. Sa unsang paagi? “Ang akong tumong,” matod niya, mao ang “pagbasa sa Bibliya sa labing menos usa ka oras kada adlaw, nga maoy akong gihimo sulod sa mga 60 ka tuig sa wala pa mohanap ang akong panan-aw.” Di pa lang dugay nga ang tibuok Bibliya mabatonan sa pinulongan sa Albania, apan si Brader Dori nakakat-on ug Grego sa bata pa, busa iyang nabasa ang Bibliya sa maong pinulongan. Ang regular nga pagbasa sa Bibliya nagpalig-on kang Brader Dori latas sa nagkadaiyang mga pagsulay, ug makapalig-on usab kini kanato.
“Ugmara ang Pagpangandoy” sa Pulong sa Diyos
3. Unsang tinamdan bahin sa Pulong sa Diyos ang angayng ugmaron sa mga Kristohanon?
3 “Sama sa bag-o pang nahimugso nga mga bata,” misulat si apostol Pedro, “ugmara ang pagpangandoy sa walay-sambog nga gatas nga iya sa pulong.” (1 Pedro 2:2) Sama nga ang usa ka masuso mangandoy pag-ayo sa gatas sa iyang inahan, ang mga Kristohanong mahunahunaon sa ilang espirituwal nga panginahanglan malipay kaayo sa pagbasa sa Pulong sa Diyos. Ingon ba niana ang imong gibati? Kon dili, ayaw wad-a ang imong paglaom. Ikaw usab makaugmad ug pagpangandoy sa Pulong sa Diyos.
4. Unsay nalangkit sa paghimo sa pagbasa sa Bibliya nga usa ka adlaw-adlawng batasan?
4 Aron maugmad ang pagpangandoy, disiplinaha una ang imong kaugalingon sa paghimo sa pagbasa sa Bibliya nga usa ka regular nga batasan, adlaw-adlaw kon posible. (Buhat 17:11) Dili ka tingali makagugol ug usa ka oras kada adlaw sa pagbasa sa Bibliya sama sa gihimo ni Nasho Dori, apan tingali makagahin ka ug panahon matag adlaw sa pagkonsiderar sa Pulong sa Diyos. Daghang Kristohanon ang mobangon ug pipila ka minutos nga mas sayo aron makapamalandong sa usa ka bahin sa Bibliya. Aduna pa bay mas maayong paagi sa pagsugod sa adlaw? Ang uban mas gusto nga taposon ang adlaw pinaagi sa pagbasa sa Bibliya sa dili pa matulog. Ang uban usab magbasa sa Bibliya sa laing kombenyenteng panahon. Ang hinungdanong butang mao ang regular nga pagbasa sa Bibliya. Dayon, paggahin ug pipila ka gutlo sa pagpalandong sa imong nabasa. Atong tagdon ang pipila ka panig-ingnan sa mga tawo nga nakabatog kaayohan tungod sa pagbasa ug pagpalandong sa Pulong sa Diyos.
Usa ka Salmista nga Nahigugma sa Kasugoan sa Diyos
5, 6. Bisan tuod wala nato mahibaloi ang iyang ngalan, unsay atong makat-onan bahin sa magsusulat sa ika-119ng Salmo 119 pinaagi sa pagbasa ug pagpalandong sa iyang sinulat?
5 Ang magsusulat sa ika-119ng Salmo tinong may lalom nga pagpabili sa Pulong sa Diyos. Kinsay nagsulat sa maong salmo? Ang magsusulat wala gipaila diha sa Bibliya. Apan, diha sa konteksto atong mahibaloan ang pipila ka detalye bahin kaniya, ug kita mahibalo nga siya nakasinatig mga suliran sa iyang kinabuhi. Ang uban sa iyang mga kaila nga mga magsisimba man unta ni Jehova dili sama niya nga may gugma sa mga prinsipyo sa Bibliya. Bisan pa niana, wala tugoti sa salmista ang ilang tinamdan nga makapugong kaniya sa pagbuhat kon unsay husto. (Salmo 119:23) Kon ikaw nagpuyo o nagtrabaho uban sa usa ka tawo nga wala magtahod sa mga sukdanan sa Bibliya, tingali may makita kang mga kaamgiran tali sa kahimtang sa salmista ug sa imoha.
6 Bisan pag diyosnon nga tawo, ang salmista wala gayod magpakamatarong sa kaugalingon. Prangka niyang giila ang iyang kaugalingong pagkadili-hingpit. (Salmo 119:5, 6, 67) Apan, wala niya tugoti ang sala nga mokontrolar kaniya. “Sa unsang paagi hinloan sa usa ka batan-ong lalaki ang iyang dalan?” siya nangutana. Ang iyang tubag: “Pinaagi sa pagbantay sumala sa imong pulong.” (Salmo 119:9) Dayon, sa pagpasiugda sa gamhanang puwersa sa Pulong sa Diyos alang sa kaayohan, ang salmista midugang: “Sa akong kasingkasing ginatipigan ko ang imong pulong, aron dili ako makasala batok kanimo.” (Salmo 119:11) Ang usa ka puwersa nga makatabang kanato sa paglikay nga makasala batok sa Diyos maoy gamhanan gayod!
7. Nganong angay nga ang mga batan-on ilabinang magmahunahunaon sa panginahanglan nga magbasa sa Bibliya sa adlaw-adlaw?
7 Maayo alang sa Kristohanong mga batan-on nga tagdon ang mga pulong sa salmista. Ang batan-ong mga Kristohanon nailalom karon sa pag-atake. Ang Yawa gusto gayod kaayong modaot sa mas batan-ong kaliwatan sa mga magsisimba ni Jehova. Ang tumong ni Satanas mao ang paghaylo sa batan-ong mga Kristohanon nga magpadala sa unodnong mga tinguha ug molapas sa mga balaod sa Diyos. Ang mga pelikula ug mga programa sa telebisyon sagad nga nagbanaag sa hunahuna sa Yawa. Ang mga artista sa maong mga programa daw makabibihag ug makapahimuot; ang ilang imoral nga mga relasyon gipasundayag ingong normal. Ang mensahe? ‘Dalawaton alang sa dili-minyo nga mga tawo nga makigsekso basta sila tinuod nga naghigugmaay sa usag usa.’ Ikasubo, kada tuig daghang batan-on nga mga Kristohanon ang mabiktima sa ingon nianang pangatarongan. Ang uban makaagom ug pagkalunod sa ilang pagtuo. Busa adunay pagpit-os! Apan ang pagpit-os ba dako kaayo nga imposible alang kaninyong mga batan-on nga makasagubang? Dili gayod! Si Jehova nagtagana ug paagi alang sa batan-ong mga Kristohanon aron mabuntog ang dili maayong mga tinguha. Sila makasukol sa bisan unsang hinagiban nga mamugna sa Yawa pinaagi sa ‘pagbantay sumala sa Pulong sa Diyos, nga nagtipig sa mga pulong sa Diyos diha sa ilang kasingkasing.’ Unsa ka daghang panahon ang inyong ginagugol sa regular personal nga pagbasa ug pagpamalandong sa Bibliya?
8. Sa unsang paagi ang mga pananglitan nga gihisgotan niining parapoha magtabang nga motubo ang imong pagpabili alang sa Moisesnong Balaod?
8 Ang magsusulat sa ika-119ng Salmo mipatugbaw: “Gihigugma ko gayod ang imong balaod!” (Salmo 119:97) Unsang balaod ang iyang buot ipasabot? Ang gipadayag nga pulong ni Jehova, lakip ang kodigo sa Moisesnong Kasugoan. Sa unang pagtan-aw ang pipila tingali mag-isip nga ang kodigo sa Kasugoan karaan na ug matingala kon sa unsang paagi si bisan kinsa makahigugma niini. Hinunoa, samtang kita mamalandong sa nagkadaiyang bahin sa Moisesnong Kasugoan, sama sa gihimo sa salmista, kita makaapresyar sa kaalam luyo sa maong Balaod. Gawas pa sa daghang matagnaong mga dagway sa Balaod, kini may mga kondisyon bahin sa sanitasyon ug pagkaon, nga nagpalambo sa kahinlo ug maayong panglawas. (Levitico 7:23, 24, 26; 11:2-8) Ang Balaod nagdasig sa pagkamatinud-anon diha sa mga palakaw sa negosyo ug nag-awhag sa mga Israelinhon sa pagpakitag empatiya ngadto sa mga isigkamagsisimba nga nanginahanglan. (Exodo 22:26, 27; 23:6; Levitico 19:35, 36; Deuteronomio 24:17-21) Ang hudisyal nga mga desisyon kinahanglang himoon nga walay pagpihig. (Deuteronomio 16:19; 19:15) Samtang nag-uswag ang kasinatian sa kinabuhi sa magsusulat sa Salmo 119, walay duhaduha iyang nakita ang maayong mga resulta alang niadtong nagpadapat sa Balaod sa Diyos, ug ang iyang paghigugma niini mas milig-on. Sama usab karon, samtang ang mga Kristohanon nagmalamposon tungod sa pagpadapat sa mga prinsipyo sa Bibliya, ang ilang gugma ug pagpabili alang sa Pulong sa Diyos mas modako.
Usa ka Prinsipe nga Nangahas nga Malahi
9. Unsang tinamdan bahin sa Pulong sa Diyos ang giugmad ni Haring Ezequias?
9 Ang kaundan sa ika-119ng Salmo 119 kaharmonya kaayo sa atong nahibaloan bahin kang Ezequias sa dihang usa pa lang siya ka batan-ong prinsipe. Ang pipila ka eskolar sa Bibliya nagsugyot nga si Ezequias mao ang magsusulat sa maong salmo. Bisan tuod dili kini tino, kita nasayod nga si Ezequias may dakong pagtahod sa Pulong sa Diyos. Pinaagi sa iyang dalan sa kinabuhi, iyang gipakita nga siya kinasingkasing nga miuyon sa mga pulong sa Salmo 119:97. Bahin kang Ezequias, ang Bibliya nag-ingon: “Siya nagpabilin kang Jehova. Siya wala mobiya sa pagsunod kaniya, apan siya nagpadayon sa pagtuman sa iyang mga sugo nga gisugo ni Jehova kang Moises.”—2 Hari 18:6.
10. Unsa ang mahatag nga pagdasig sa panig-ingnan ni Ezequias ngadto sa mga Kristohanon nga wala matutoa sa diyosnong mga ginikanan?
10 Sumala sa asoy, si Ezequias wala magdako diha sa usa ka diyosnong panimalay. Ang iyang amahan, si Haring Acas, maoy usa ka walay-pagtuong tigsimbag idolo nga nagsunog nga buhi sa labing menos usa sa iyang mga anak nga lalaki—igsoon mismo ni Ezequias—agig halad ngadto sa usa ka bakak nga diyos! (2 Hari 16:3) Bisan pa niining daotang panig-ingnan, si Ezequias nakahimo sa ‘paghinlo sa iyang dalan’ gikan sa paganong mga impluwensiya pinaagi sa pagkasinati sa Pulong sa Diyos.—2 Cronicas 29:2.
11. Samtang nagtan-aw si Ezequias, unsay resulta sa gihimo sa iyang dili-matinumanong amahan?
11 Samtang nagtubo si Ezequias, nakita niya mismo kon sa unsang paagi gidumala sa iyang idolatrosong amahan ang mga kalihokan sa Gingharian. Ang Juda gilibotan sa mga kaaway. Diha si Rezin, ang hari sa Sirya, nga nakigkomboya kang Haring Peka sa Israel sa pag-atake sa Jerusalem. (2 Hari 16:5, 6) Dihay mga Edomihanon ug mga Pilistihanon, nga nagmalamposon sa pag-atake sa Juda ug nakabihag pa ganig pipila ka siyudad sa Judea. (2 Cronicas 28:16-19) Giunsa pag-atubang ni Acas kini nga mga krisis? Imbes mangayog tabang kang Jehova batok sa Sirya, si Acas miduol sa hari sa Asirya, nga naghiphip kaniyag bulawan ug plata, lakip niadtong gikan sa tipiganag-bahandi sa templo. Apan wala kini magpahinabog malungtarong kalinaw sa Juda.—2 Hari 16:6, 8.
12. Malikayan ni Ezequias ang pagsubli sa mga sayop sa iyang amahan pinaagi sa pagbuhat sa unsa?
12 Sa ngadtongadto, namatay si Acas ug si Ezequias nahimong hari sa edad nga 25 anyos. (2 Cronicas 29:1) Medyo batan-on pa siya, apan wala kana magpugong kaniya nga mahimong usa ka malamposong hari. Imbes sundogon ang panggawi sa iyang dili-matinumanong amahan, iyang gisunod ang Balaod ni Jehova. Kini naglakip ug linaing sugo alang sa mga hari: “Sa dihang [ang hari] molingkod sa trono sa iyang gingharian, siya kinahanglang magsulat ug basahon alang kaniya sa usa ka hulad niini nga balaod nga gihuptan sa mga saserdote, ang mga Levihanon. Ug kini magpabilin kaniya, ug kinahanglang basahon niya kini sa tanan nga adlaw sa iyang kinabuhi, aron makakat-on siya sa pagkahadlok kang Jehova nga iyang Diyos aron magbantay sa tanang pulong niini nga balaod.” (Deuteronomio 17:18, 19) Pinaagi sa pagbasa sa Pulong sa Diyos adlaw-adlaw, si Ezequias makakat-on sa pagkahadlok kang Jehova ug makalikay sa pagsubli sa mga sayop sa iyang dili-diyosnong amahan.
13. Sa unsang paagi makaseguro ang usa ka Kristohanon nga sa espirituwal nga diwa, ang tanan niyang pagahimoon molampos?
13 Dili lamang mga hari sa Israel ang gidasig nga maghunahuna kanunay sa Pulong sa Diyos kondili gidasig usab ang tanang mahadlokon-sa-Diyos nga mga Israelinhon nga mobuhat sa ingon. Ang unang Salmo naghubit sa tinuod nga malipayong tawo ingong usa kansang “kalipay anaa sa balaod ni Jehova, ug sa hinayng tingog siya nagabasa sa iyang balaod sa adlaw ug gabii.” (Salmo 1:1, 2) Bahin sa ingon niana nga tawo, ang salmista nag-ingon: “Ang tanang butang nga iyang pagahimoon molampos.” (Salmo 1:3) Sa kasukwahi, bahin sa usa nga walay pagtuo kang Jehova nga Diyos, ang Bibliya nag-ingon: “Siya usa ka tawong maduhaduhaon, mabalhinon sa tanan niyang mga dalan.” (Santiago 1:8) Kitang tanan gusto nga mahimong malipayon ug malamposon. Ang regular, makahuloganong pagbasa sa Bibliya makadugang sa atong kalipay.
Ang Pulong sa Diyos Nagpalig-on Kang Jesus
14. Sa unsang paagi si Jesus nagpakita ug gugma alang sa Pulong sa Diyos?
14 Sa usa ka higayon, ang mga ginikanan ni Jesus nakakaplag kaniya nga naglingkod taliwala sa mga magtutudlo diha sa templo sa Jerusalem. Ang mga batid sa Balaod sa Diyos ‘padayon gayod nga nahibulong sa iyang pagsabot ug sa iyang mga tubag’! (Lucas 2:46, 47) Kadto maoy sa 12-anyos pa si Jesus. Oo, bisan sa linghod nga edad, siya dayag nga may paghigugma sa Pulong sa Diyos. Sa ulahi, gigamit ni Jesus ang Kasulatan sa pagbadlong sa Yawa, nga nag-ingon: “Ang tawo mabuhi, dili sa tinapay lamang, apan sa matag pamulong nga nagagula sa baba ni Jehova.” (Mateo 4:3-10) Wala madugay human niana, si Jesus nagsangyaw ngadto sa mga molupyo sa iyang lungsod sa Nasaret, nga naggamit sa Kasulatan.—Lucas 4:16-21.
15. Sa unsang paagi si Jesus nagpakita ug panig-ingnan sa dihang nagsangyaw sa uban?
15 Si Jesus kanunayng mokutlo gikan sa Pulong sa Diyos aron sa pagsuportar sa iyang pagpanudlo. Ang iyang mga mamiminaw ‘nahingangha sa iyang paagi sa pagpanudlo.’ (Mateo 7:28) Ug dili ikatingala—ang mga pagpanudlo ni Jesus naggikan kang Jehova nga Diyos mismo! Si Jesus miingon: “Ang akong ginatudlo dili akoa, kundili iyaha sa nagpadala kanako. Siya nga nagasulti sa iyaha rang kaugalingon nagatinguha sa iyang kaugalingong himaya; apan siya nga nagatinguha sa himaya niya nga nagpadala kaniya, kini siya matuod, ug walay pagkadili-matarong diha kaniya.”—Juan 7:16, 18.
16. Sa unsang gilapdon gipasundayag ni Jesus ang iyang gugma alang sa Pulong sa Diyos?
16 Dili sama sa magsusulat sa Salmo 119, “walay pagkadili-matarong” kang Jesus. Siya walay sala, ang Anak sa Diyos, nga “mipaubos sa iyang kaugalingon ug nagmasinugtanon hangtod sa kamatayon.” (Filipos 2:8; Hebreohanon 7:26) Apan, bisan pag siya hingpit, si Jesus nagtuon ug nagtuman sa Balaod sa Diyos. Mao kini ang pangunang hinungdan sa iyang katakos sa paghupot sa iyang integridad. Sa dihang gigamit ni Pedro ang usa ka espada sa pagtinguha nga dili madakop ang iyang Agalon, gibadlong ni Jesus ang apostol ug nangutana: “Nagahunahuna ba kamo nga dili ako makapangamuyo sa akong Amahan sa paghatag kanako niining yugtoa ug labaw sa napulog-duha ka lehiyon nga mga anghel? Nianang kahimtanga, unsaon man pagkatuman sa mga Kasulatan nga kinahanglan kining mahitabo niining paagiha?” (Mateo 26:53, 54) Oo, ang katumanan sa Kasulatan mas hinungdanon kang Jesus kay sa paglikay sa usa ka mabangis ug makauulaw nga kamatayon. Pagkatalagsaong gugma alang sa Pulong sa Diyos!
Ubang mga Tigsundog ni Kristo
17. Unsa ka hinungdanon ang Pulong sa Diyos ngadto kang apostol Pablo?
17 Si apostol Pablo misulat ngadto sa mga isigka-Kristohanon: “Magmahimong mga tigsundog kanako, sama gayod nga ako mao kang Kristo.” (1 Corinto 11:1) Sama sa iyang Agalon, naugmad ni Pablo ang gugma alang sa Kasulatan. Siya mipahayag: “Sa kinasuloran sa akong pagkatawo gihigugma ko gayod ang Balaod sa Diyos.” (Roma 7:22, The Jerusalem Bible) Si Pablo kanunayng mokutlo sa Pulong sa Diyos. (Buhat 13:32-41; 17:2, 3; 28:23) Sa dihang iyang gihatag ang iyang kataposang mga instruksiyon kang Timoteo, nga usa ka hinigugmang isigkaministro, gipasiugda ni Pablo ang hinungdanong bahin nga pagadulaon sa Pulong sa Diyos diha sa matag adlawng kinabuhi sa tagsa ka “tawo sa Diyos.”—2 Timoteo 3:15-17.
18. Paghatag ug pananglitan sa usa kinsa, sa modernong kapanahonan, nagpakitag pagtahod alang sa Pulong sa Diyos.
18 Daghang matinumanong mga alagad ni Jehova sa modernong kapanahonan ang susamang nagsundog sa gugma ni Jesus alang sa Pulong sa Diyos. Sa sayong bahin niining sigloha, usa ka batan-ong lalaki nakadawat ug Bibliya gikan sa usa ka higala. Iyang gihubit ang epekto diha kaniya niining bililhong gasa: “Ako nakahukom nga himoong hinungdanong bahin sa akong kinabuhi ang pagbasag usa ka bahin sa Bibliya kada adlaw.” Kadtong batan-ong lalaki mao si Frederick Franz, ug ang iyang gugma sa Bibliya misangpot sa iyang pagtagamtam ug taas ug malamposong kinabuhi diha sa pag-alagad kang Jehova. Siya gihandom tungod sa iyang katakos sa memoryadong pagkutlo sa tibuok nga mga kapitulo sa Bibliya.
19. Giunsa pag-eskedyul sa uban ang senemanang pagbasa sa Bibliya alang sa Tunghaan sa Teokratikanhong Ministeryo?
19 Ang mga Saksi ni Jehova naghatag ug dakong pagpasiugda sa regular nga pagbasa sa Bibliya. Kada semana, ingong pagpangandam alang sa usa sa ilang Kristohanong mga tigom, ang Tunghaan sa Teokratikanhong Ministeryo, sila magbasag ubay-ubayng kapitulo sa Bibliya. Ang dagkong mga punto sa giasayn nga pagbasa sa Bibliya hisgotan panahon sa tigom. Ang pipila ka Saksi nakakaplag nga kombenyente ang pagbahin sa pagbasa sa Bibliya sa maong semana ngadto sa pito ka mas gamayng mga seksiyon ug magbasag usa ka seksiyon matag adlaw. Samtang sila magbasa, sila mamalandong bahin sa gibasa. Kon posible, sila maghimog dugang panukiduki pinaagi sa tabang sa binase-sa-Bibliya nga mga publikasyon.
20. Unsay gikinahanglan aron makagahin ug panahon alang sa regular nga pagbasa sa Bibliya?
20 Tingali kinahanglan kang ‘mopalit sa nahiangayng panahon’ gikan sa ubang mga kalihokan aron regular nga makabasa sa Bibliya. (Efeso 5:16) Hinunoa, ang mga kaayohan molabaw pa kaayo kay sa bisan unsang mga sakripisyo. Samtang imong ginaugmad ang batasan sa adlaw-adlawng pagbasa sa Bibliya, ang imong gugma sa Pulong sa Diyos motubo. Sa dili madugay, mapalihok ka sa pagsulti uban sa salmista: “Pagkadako sa akong paghigugma sa imong balaod! Sa tibuok adlaw kini mao ang akong gipalandong.” (Salmo 119:97) Ang ingon nianang tinamdan magpahinabog dagkong mga kaayohan karon ug sa umaabot, ingon sa ipakita sa sunod nga artikulo.
Nahinumdom Ka Ba?
◻ Sa unsang paagi gipadayag sa magsusulat sa Salmo 119 ang lalom nga gugma alang sa Pulong sa Diyos?
◻ Unsang mga pagtulon-an ang atong makuha gikan sa mga panig-ingnan ni Jesus ug Pablo?
◻ Sa unsang paagi kita sa personal motubo sa atong gugma alang sa Pulong sa Diyos?
[Mga hulagway sa panid 10]
Ang matinumanong mga hari kinahanglang regular nga magbasa sa Pulong sa Diyos. Ginahimo mo ba kini?
[Hulagway sa panid 12]
Bisan sa bata pa, si Jesus may gugma sa Pulong sa Diyos