Sa Dihang Dagaya ang Pagkamahinatagon
KON ikaw dunay kahigayonan sa pagpresentar ug gasa ngadto sa usa ka hari, unsay imong ihatag kaniya? Komosta kon siya mao ang labing adunahan ug labing maalamong magmamando sa kalibotan? Makahunahuna ka ba ug bisan unsang gasa nga makapahimuot kaniya? Mga tulo ka libo ka tuig kanhi, ang rayna sa Sheba kinahanglang mamalandong nianang mga pangutanaha samtang nangandam sa pagduaw sa ingon gayod niana nga magmamando—si Haring Solomon sa Israel.
Ang iyang gasa, matod sa Bibliya, naglakip sa 120 ka talanton nga bulawan ug “daghan kaayong lana sa balsamo ug bililhong mga bato.” Sa bili karon, ang bulawan lamang nagkantidad ug mga $40,000,000. Ang lana sa balsamo, usa ka humot ug tambal nga lana, nalakip sa bulawan ingong bililhong manggad. Bisan pag ang Bibliya wala mag-ingon kon unsa ka daghang lana ang gihatag sa rayna kang Solomon, kini nagsulti kanato nga ang iyang gasa wala pa gayod matumbasi.—1 Hari 10:10.
Ang rayna sa Sheba dayag nga adunahan ug mahinatagon nga babaye. Dugang pa, ang iyang pagkamahinatagon gibalosan. Si “Haring Solomon,” ang Bibliya nag-ingon, “mihatag sa rayna sa Sheba sa tanang gikahimut-an niya nga iyang gipangayo, gawas pa sa kantidad nga iyang gidala ngadto sa hari.” (2 Cronicas 9:12) Tinuod, kostumbre tingali sa harianong mga tawo ang pagbayloanay ug mga gasa; apan, ang Bibliya espesipikong naghisgot sa “pagkabukas ug kamot” ni Solomon. (1 Hari 10:13) Si Solomon mismo misulat: “Ang kalag nga mahinatagon motambok, ug ang dagayang nagabisibis sa uban dagaya usab nga pagabisibisan.”—Proverbio 11:25.
Siyempre, ang rayna sa Sheba mihimo usab ug dakong pagsakripisyo sa panahon ug paningkamot sa pagduaw kang Solomon. Lagmit ang Sheba kaniadto nahimutang sa dapit sa presenteng-adlaw nga Republika sa Yemen; busa ang rayna ug ang iyang lumbay sa mga kamelyo mibiyaheg kapin sa 1,600 kilometros paingon sa Jerusalem. Sumala sa giingon ni Jesus, “siya mianhi gikan sa mga tumoy sa yuta.” Nganong ang rayna sa Sheba mihimog dako kaayong paningkamot? Sa panguna siya miadto “aron sa pagpaminaw sa kaalam ni Solomon.”—Lucas 11:31.
Ang 1 Hari 10:1, 2 nag-ingon nga ang rayna sa Sheba “miadto aron sa pagsulay [kang Solomon] pinaagi sa malisod nga mga pangutana. . . . [Siya] namulong kaniya sa tanan nga diha sa iyang kasingkasing.” Sa unsang paagi misanong si Solomon? “Sa baylo, si Solomon misugilon kaniya sa tanang buot niyang masayran. Walay butang nga natago gikan sa hari nga wala niya isulti kaniya.”—1 Hari 10:3.
Kay nahingangha sa iyang nadungog ug nakita, ang rayna mapainubsanong miingon: “Malipayon kining imong mga alagad nga nagabarog sa imong atubangan kanunay, nga nagapamati sa imong kaalam!” (1 Hari 10:4-8) Wala niya ipahayag nga malipayon ang mga alagad ni Solomon tungod kay sila gilibotan sa kadagaya—bisan pag mao kana ang ilang kahimtang. Hinunoa, bulahan ang mga alagad ni Solomon tungod kay sila kanunayng makapaminaw sa hinatag-sa-Diyos nga kaalam ni Solomon. Pagkamaayong panig-ingnan ang rayna sa Sheba alang sa katawhan ni Jehova karon, nga nagpahimulos sa kaalam sa Maglalalang mismo ug nianang sa iyang Anak, si Jesu-Kristo!
Takos tagdon usab ang sunod nga komento sa rayna kang Solomon: “Hinaot pagadayegon si Jehova nga imong Diyos.” (1 Hari 10:9) Dayag, iyang nakita ang pagpaluyo ni Jehova sa kaalam ug kauswagan ni Solomon. Nahiuyon kini sa gisaad ni Jehova kanhi sa Israel. ‘Ang pagtuman sa akong kabalaoran,’ siya miingon, “maoy inyong kaalam ug pagsabot atubangan sa mga mata sa mga katawhan nga makadungog niining tanang tulumanon, ug sila moingon, ‘Kining dako nga nasod sa walay duhaduha usa ka maalamon ug masinaboton nga katawhan.’”—Deuteronomio 4:5-7.
Pag-adto sa Maghahatag ug Kaalam
Sa modernong kapanahonan, minilyon usab ang nadani sa organisasyon ni Jehova tungod kay ilang nasabtan nga “ang Israel sa Diyos” maoy “maalamon ug masinaboton nga katawhan,” dili sa kinaiyanhon, kondili tungod kay ang hingpit nga mga balaod ug mga prinsipyo sa Diyos maggiya kanila. (Galacia 6:16) Ang gidaghanon sa nabawtismohan nagpakita nga sa di pa dugayng katuigan gatosan ka libo sa bag-ong mga tinun-an matag tuig ang miingon, sa pagkatinuod, sa espirituwal nga Israel: “Mouban kami kaninyo, kay kami nakadungog nga ang Diyos nagauban kaninyo.” (Zacarias 8:23) Pagkadako sa kahibulong niining mga bag-ohan sa dihang ilang makita ang bangkete sa espirituwal nga pagkaon nga gidalit ni Jehova atubangan sa iyang mga alagad! Wala pa gayod silay nakita nga sama niana sa ilang kanhing mga relihiyon.—Isaias 25:6.
Paghatag Ngadto sa Kinadak-ang Maghahatag
Kay daghan kaayo ang nadawat, ang mapabilhong mga tawo natural nga mamalandong kon unsa sa baylo ang ilang ikahatag sa labing bantogang Hari ug Maghahatag, si Jehova nga Diyos. Ang Bibliya nagbutyag nga ang kinamaayohang gasa nga atong ikahatag kang Jehova mao ang “halad sa pagdayeg.” (Hebreohanon 13:15) Ngano? Tungod kay kini nga halad direktang nalangkit sa pagluwas ug kinabuhi, ang pangunang kabalaka ni Jehova niining panahon sa kataposan. (Ezequiel 18:23) Dugang pa, ang paghatag sa atong kusog ug panahon sa pagtabang sa masakiton, masulub-on, ug uban pa maoy usa ka dalawatong halad.—1 Tesalonica 5:14; Hebreohanon 13:16; Santiago 1:27.
Ang mga amot nga salapi nagdula ug dakong papel. Kini nagpaposible sa pagpatik ug mga Bibliya, gipasukad-sa-Bibliyang mga literatura, ug sa pagkabaton ug mga dapit diin ang mga Kristohanon mahimong magtigom. (Hebreohanon 10:24, 25) Ang mga amot nagtagana usab ug mga hinabang nga salapi sa pagtabang sa mga biktima sa mga gubat ug kinaiyanhong mga katalagman.
Sa paggiya kanato maylabot sa paghatag, ang Pulong sa Diyos nagtaganag pipila ka maayong mga prinsipyo. Pananglitan, kini nagtudlo nga ang mga Kristohanon maghatag, dili sa gikota nga kantidad, kondili kon unsay ilang maarangan sa paghatag, nga magabuhat niana nga kinabubut-on, gumikan sa malipayong kasingkasing. (2 Corinto 9:7) Ang pipila makahatag ug dako; ang uban, sama sa kabos nga babayeng balo sa panahon ni Jesus, makaarang sa paghatag ug gamay lamang. (Lucas 21:2-4) Dili ba talagsaon nga si Jehova—ang Tag-iya sa tibuok uniberso—nagpabili sa matag maayog-tumong nga gasa ug halad nga gihimo sa iyang ngalan?—Hebreohanon 6:10.
Aron sila makahatag nga malipayon, ang katawhan ni Jehova kanunayng gipahibalo sa nagkadaiyang mga kinahanglanon ug sa epektibong mga paagi diin kanang mga kinahanglanona mahimong maabot. Ang balaang espiritu ni Jehova, sa ingon, magpalihok sa andam nga mga kasingkasing sa pagsanong. Sa karaang Israel kini nga pamaagi gisunod sa pagtukod sa tabernakulo ug, sa ulahi, sa templo. (Exodo 25:2; 35:5, 21, 29; 36:5-7; 39:32; 1 Cronicas 29:1-19) Sa unang siglo K.P., kanang samang pamaagi nagpaarang sa mga Kristohanon sa pagkabaton sa mga kahinguhaan nga ilang gikinahanglan sa pagdala sa maayong balita sa Gingharian ngadto sa mga nasod ug sa pagsuportar sa mga igsoon sa Israel panahon sa gutom.—1 Corinto 16:2-4; 2 Corinto 8:4, 15; Colosas 1:23.
Sa susama karon, si Jehova nagapanalangin sa iyang katawhan, ug siya magpadayon sa pagpanalangin kanila, pinaagi sa paghatag kanila sa ilang gikinahanglan sa pagtapos sa kinadak-ang kampanya sa pagsangyaw ug pagtudlo nga nasaksihan sukad sa kalibotan.—Mateo 24:14; 28:19, 20.
Unsa ang Presenteng mga Kinahanglanon?
Sa di pa dugayng katuigan ang mga Saksi ni Jehova narehistro sa daghang nasod diin sa nangagi gidili ang ilang buluhaton. Ingong resulta, daghan niining nasora nakasinatig dako kaayong pagtubo sa gidaghanon sa mga magmamantala. Siyempre, ang mga Bibliya ug pinasukad-sa-Bibliyang literatura gikinahanglan kaayo.
Mao man usab ang mga Kingdom Hall. Mga 9,000 ka bag-ong mga Kingdom Hall ang gikinahanglan sa tibuok kalibotan sa pagkakaron. Kon magtukod ug usa ka Kingdom Hall matag adlaw, magkinahanglan ug kapin sa 24 ka tuig aron makab-ot ang presenteng panginahanglan! Sa kasamtangan, mga pito ka kongregasyon ang ginaporma matag adlaw, daghan niini diha sa mga dapit sa kalibotan nga limitado ang panalapi. Sa laing bahin, daghan niining mga dapita wala magkinahanglan ug gastosong mga tinukod. Sa ubang mga dapit, ang usa ka Kingdom Hall nga magtagbaw sa panginahanglan ug magsilbi ingong maayong pamatuod sa komunidad mahimong makompleto sa kantidad nga ingon ka gamay sa $6,000.
Sa unang siglo, ang pipila ka Kristohanon mas arangan kay sa uban, busa si apostol Pablo misulat: “Pinaagi sa pag-angay-angay ang inyong sobra sa pagkakaron makasapal sa ilang kakulangan, aron nga ang ilang sobra arang usab makasapal sa inyong kakulangan, aron ang usa ka pag-angay-angay mahitabo.” (2 Corinto 8:14) Karong adlawa, ang susamang “pag-angay-angay” nagtaganag pondo nga gikinahanglan sa pagsuplay ug mga Bibliya, mga literatura sa Bibliya, mga Kingdom Hall, hinabang sa katalagman, ug ubang mga butang diha sa daghang bahin sa kalibotan. Pagkadakong panalangin ang maong paghatag—sa naghatag ug sa nakadawat!—Buhat 20:35.
Sumala sa gipakita sa mga sulat nga nadawat sa Sosyedad gikan sa mahinatagog-kasingkasing nga mga tawo, daghang magbabasa niini nga magasin buot nga motabang apan wala makaseguro sa lainlaing paagi nga mahimong himoon ang mga amot. Walay duhaduha ang kaubang kahon motabang sa pagtubag sa ilang mga pangutana.
Panahon sa mahimayaong pagmando ni Solomon, “ang tanang hari sa yuta” nga nakadungog bahin kaniya miadto sa pagduaw kaniya. Apan, ang Bibliya nagngalan sa usa lamang ka magmamando—ang rayna sa Sheba. (2 Cronicas 9:23) Pagkadakong sakripisyo ang iyang gihimo! Apan siya dagayang gipanalanginan—labihan ka dako nga sa kataposan sa iyang pagduaw, siya “nahingangha ug nahibulong.”—2 Cronicas 9:4, Today’s English Version.
Sa umaabot, si Jehova, ang labing bantogang Hari ug Maghahatag, mohimo ug mas dako pa kay sa nahimo ni Solomon alang niadtong mohimog mga pagsakripisyo Kaniya. Ingong sanong, kini sila ‘mahingangha ug mahibulong,’ kay dili lamang si Jehova moluwas kanila latas sa iyang makalilisang nga adlaw sa paghukom kondili human niana iyang ‘bukharon ang iyang kamot ug tagbawon ang tinguha sa tanang buhing butang.’—Salmo 145:16.
[Kahon sa panid 22]
Mga Paagi sa Paghatag nga Gipili sa Pipila
MGA AMOT NGADTO SA TIBUOK-KALIBOTANG BULUHATON
DAGHAN ang mogahin, o magbadyet, ug salapi nga ilang ihulog sa mga kahon sa amot nga gimarkahan ug “Contributions for the Society’s Worldwide Work—Matthew 24:14.” Kada bulan ang mga kongregasyon magpadala niining salapia ngadto kaha sa tibuok-kalibotang hedkuwarter sa Brooklyn, New York, o sa lokal nga sangang buhatan.
Ang kinabubut-ong mga donasyong salapi mahimong ipadala usab nga direkta ngadto sa Treasurer’s Office, Watch Tower Bible and Tract Society of the Philippines, P.O. Box 2044, 1060 Manila, o sa opisina sa Sosyedad nga nag-alagad sa inyong nasod. Ang alahas o ubang mahalong mga butang mahimong ikadonar usab. Ang mubong sulat nga nagpahayag nga kana maoy dihadihang gasa angay ipataban sa maong mga amot.
KONDISYONAL-DONASYON NGA KAHIKAYAN
Ang salapi ikahatag ngadto sa Watch Tower Society ilalom sa linaing kahikayan diin, engkaso ang tigdonar dunay personal nga panginahanglan, ang donasyon ibalik kaniya. Alang sa dugang impormasyon, palihog kontaka ang Treasurer’s Office sa adress nga gitala sa ibabaw.
PAGPLANO ALANG SA BUHAT SA KALUOY
Dugang pa sa dihadihang mga gasang salapi ug kondisyonal nga mga donasyong salapi, adunay ubang mga paagi sa paghatag aron makabenepisyo ang buluhaton sa Gingharian sa tibuok kalibotan. Kini nag-apil sa:
Insyurans: Ang Watch Tower Society manganlan nga benepisyaryo sa usa ka polisa sa life insurance o sa pagretiro/pensiyon nga programa.
Mga Kuwenta sa Bangko: Ang mga kuwenta sa bangko, mga sertipiko sa mga deposito, o indibiduwal nga mga kuwenta sa pagretiro mahimong ikabutang nga in trust for o himoong payable on death to sa Watch Tower Society, nga nahiuyon sa mga kinahanglanon sa lokal nga bangko.
Stocks and Bonds: Ang mga stock o aksiyones ug mga bond ikadonar ngadto sa Watch Tower Society ingong dihadihang gasa o ilalom sa kahikayan diin ang kinitaan padayong ibayad ngadto sa nagdonar.
Balay ug Yuta: Ang ikabaligyang balay ug yuta ikadonar ngadto sa Watch Tower Society pinaagi kaha sa paghatag dihadiha o pagreserba sa tibuok kinabuhi sa balay o yuta sa nagdonar, kinsa mahimong magpadayon sa pagpuyo niana samtang buhi pa siya. Ang usa kinahanglang mokontak sa Sosyedad sa dili pa buhatag papeles ang bisan unsang balay o yuta nga idonar sa Sosyedad.
Wills and Trusts: Ang propiedad o salapi mahimong ikabilin ngadto sa Watch Tower Society pinaagi sa usa ka legal nga pagkabuhat nga testamento, o ang Sosyedad kanganlang usa ka benepisyaryo sa usa ka trust agreement. Ang trust nga mapanunod sa usa ka relihiyosong organisasyon mahimong adunay pipila ka bentaha sa buluhisan.
Ingon sa gipasabot sa terminong “pagplano alang sa buhat sa kaluoy,” kining mga matanga sa donasyon kasagarang manginahanglan ug pagplano sa bahin sa nagdonar. Sa pag-abag sa mga indibiduwal nga nagtinguha nga makabenepisyo ang Sosyedad pinaagi sa pipila ka matang sa pagplano alang sa buhat sa kaluoy, ang Sosyedad nag-andam ug Iningles nga brosyur nga nag-ulohang Planned Giving to Benefit Kingdom Service Worldwide. Gisulat ang brosyur ingong pagsanong sa daghang pangutana nga nadawat sa Sosyedad bahin sa mga gasa, wills, ug trusts. Naundan usab kini ug dugang mapuslanong impormasyon sa pagplano bahin sa balay ug yuta, sa pinansiyal, ug sa buhis. Ug gidisenyo kini sa pagtabang sa mga indibiduwal sa Tinipong Bansa nga nagplano sa paghimog espesyal nga gasa ngadto sa Sosyedad karon o magbilin ug panulondon sa pagkamatay sa pagpilig labing mapuslanon ug episyenteng pamaagi uban ang angayang pagtagad sa ilang pamilya ug personal nga mga kahimtang. Kining brosyura mahimong mabatonan pinaagi sa paghangyo ug kopya nga direkta gikan sa Charitable Planning Office.
Human mabasa ang brosyur ug makonsulta ang Charitable Planning Office, daghan ang nakaabag sa Sosyedad ug sa samang higayon, nakapadako sa mga benepisyo sa buhis sa pagbuhat sa ingon. Ang Charitable Planning Office angayng pahibaloon ug makadawat ug kopya sa bisan unsang dokumento maylabot sa bisan asa niining mga kahikayana. Kon ikaw interesado sa bisan hain niini nga mga kahikayan sa pagplano alang sa buhat sa kaluoy, ikaw angayng mokontak sa Charitable Planning Office, pinaagi kaha sa sulat o sa telepono, diha sa adres nga gilista sa ubos o sa opisina sa Sosyedad nga nag-alagad sa inyong nasod.
CHARITABLE PLANNING OFFICE
Watch Tower Bible and Tract Society of Pennsylvania
100 Watchtower Drive, Patterson, New York 12563-9204
Telepono: (914) 306-1000
[Mga hulagway sa panid 23]
Ang mga kalihokan sa mga Saksi ni Jehova gisuportahan sa boluntaryong mga donasyon