Pagdedikar sa Watchtower Educational Center—Piyesta Alang Kang Jehova
SUKAD sa karaang kapanahonan, ang malipayong mga piyesta nahimong bahin na sa matuod nga pagsimba. Ang pipila sa mga piyesta nga gipahigayon sa karaang Israel milungtad ug pipila ka adlaw ug gitambongan sa libolibong magsisimba ni Jehova. Ang inagurasyon sa templo ni Solomon milungtad ug pito ka adlaw ug gisundan sa usa ka semana nga Piyesta sa mga Balongbalong. Naghatag kinig kahigayonan sa mga Israelinhon sa pagpamalandong bahin sa kahibulongang paagi nga si Jehova nakiglabot kanila. Sila namauli sa balay nga “nagmaya ug nagmalipayon sa kasingkasing tungod sa tanang kaayo nga gihimo ni Jehova.”—1 Hari 8:66.
Ang nahitabo sa Watchtower Educational Center sa Patterson, New York, T.B.A., niadtong Mayo 17-22, 1999, nagpahinumdom sa mga bisita niadtong karaang malipayong mga piyesta. Kini maoy semana sa linaing kalihokan nga nasentro sa pagdedikar sa 28 ka tinukod nga gidisenyo sa pagpalambo sa tibuok-kalibotang edukasyon sa Bibliya. Ang mga tagana gihimo alang sa tanang 5,400 ka kawani sa hedkuwarter sa Brooklyn, Walkill, ug Patterson sa paghimog bug-os nga paglibot sa mga pasilidad sa Patterson panahon nianang halandomong semana. Apil sa mga bisita mao ang kapin sa 500 ka kanhing mga kawani nga miambit sa buluhaton panahon sa pagtukod sa sentro sa edukasyon, mga hawas gikan sa 23 ka sanga sa Watch Tower Society, ug uban pa gikan sa duol nga mga kongregasyon—mitotal ug labing menos 8,100.
Mga Pasundayag sa Paglibot Nagtaganag Edukasyon
Ang espesyal nga mga pasundayag, edukasyonal nga mga presentasyon sa video, ug kinaugalingong mga paglibot gihikay aron masinati ang mga bisita sa sentro sa edukasyon. Sa pangunang lawak-hulatanan, ang mga bisita nadani dayon sa hulad sa templo nga naglungtad sa Jerusalem panahon sa ministeryo ni Jesus sa yuta. Ang ubang mga pasundayag nagpasiugda sa sayong kasaysayan sa Watchtower Bible School of Gilead, makasaysayanhong mga kombensiyon, mga tigom sa kongregasyon, modernong-adlaw nga kaugmaran sa mga pagtuon sa Bibliya sa balay—nga minilyon niana ang sa pagkakaron gidumala matag semana—ug ang gibuhat sa Legal Department aron magpadayong abli ang dalan alang nianang buluhatona maoy pagsugot sa sugo ni Jesus.—Mateo 28:19, 20.
Sa kasikbit nga awditoryum, nga komportableng makapalingkod ug 1,700, kadtong nagaduaw panahon sa piyesta sa pagpahinungod gipasalidahan ug 33-minutos nga presentasyon sa video nga nag-ulohag “Dili Pinaagi sa Kusog—Pinaagi sa Akong Espiritu!” Kini nga video nagpakita kon sa unsang paagi ang Watchtower Educational Center natukod. Ang mga interbiyo nagbutyag sa mga panghitabo nga tin-awng nagpaila sa pagtultol ni Jehova sa mga butang ug sa iyang pagpanalangin sa mga paningkamot nga malamposong matapos kining 15-ka-tuig nga proyekto. Linibo ang miambit sa aktuwal nga trabaho sa pagpanukod. Sa usa ka panahon sa 1994, dihay 526 ka trabahante diha sa gitukoran, lakip sa 350 ka bug-os-panahong mga boluntaryo, 113 ka temporaryong mga trabahante, ug 63 nga mag-adtoan matag adlaw aron motabang. Daghan pa ang misuportar sa buluhaton pinaagig mga donasyon. Silang tanan nakaamgo nga dili gayod kini mahimong posible kon wala ang espiritu ni Jehova.—Zacarias 4:6.
Kadtong milibot nakasabot nga ang gihatagag pagtagad sa buluhatong ginahimo diha sa sentro sa edukasyon mao ang pagpalambo sa diyosnong pagtulon-an. Ang pasundayag diha sa entrada sa Tunghaang Gilead sa unang andana sa tunghaan nagpasiugda sa dagayang espirituwal nga panulondon ug kasaysayan sa tunghaan. Sukad sa unang klase niini niadtong 1943 didto sa orihinal nga kampus sa eskuylahan sa South Lansing, New York, ang Tunghaang Gilead nakabansay nag kapin sa 7,000 ka estudyante alang sa misyonaryong pag-alagad. Ang mga pasundayag diha sa ikaduhang andana sa tunghaan nagtaganag mga talan-awon sa Tunghaan Alang sa mga Membro sa Komite sa Sanga ug sa Tunghaan Alang sa Nagapanawng mga Magtatan-aw, nga parehong magklase didto. Sukad sa pagsugod niini sa Nobyembre 1995, ang tunghaan sa sanga nakataganag mauswagong instruksiyon alang sa 360 ka membro sa Komite sa Sanga gikan sa 106 ka nasod.
Samtang ang mga bisita milibot, sila daling nakaamgo nga sa kadaghanang dapit, ilang nakita ang mas labaw pa kay sa mga pasundayag nga mga hulagway lamang. Sila nakasulod ngadto mismo sa lainlaing mga departamento, nakaduaw sa mga opisina ug ubang mga dapit trabahoan, ug nakabaton ug dulot nga panglantaw sa buluhatong ginahimo. Ang pinakahinungdanong bahin sa paglibot mao ang Audio/Video Services nga tinukod. Pagkamaayo kaayong mga pasilidad ang atua didto nga gigamit sa pagpalambo sa edukasyon sa Bibliya! Pinaagi sa mga serye sa matulon-anong mga pasundayag ug mugbong mga video, ang mga bisita gitabangan sa pagsabot kon giunsa pagrekord ang mga tingog ug kon giunsa pag-andam ang mga video. May nakat-onan sila bahin sa dugayng panukiduki nga gikinahanglan sa pag-andam sa mga galamiton ug mga besti. Ilang nakita kon giunsa paghan-ay ang mga galamiton sa matag esena nga menos ug gasto apan naghatag ug talagsaong pagtagad sa detalye. Ilang nasaksihan kon giunsa paggamit ang musika aron pabation ang mga tawo nga sila anaa sa aktuwal nga esena nga ilang ginalantaw. Sukad sa 1990 ang Sosyedad nakapatungha na ug napulo ka video diha sa 41 ka pinulongan, nga nagpasiugda sa lainlaing mga tema sa Bibliya, dugang pa sa ubang mga video alang niadtong naggamit ug American Sign Language.
Daghang naglibot ang miadto sa Photo Lab, Art Department, Information Services, nga nagtaganag pagbansay ug tabang maylabot sa kompiyuter, sa Service Department, nga nagdumala sa kalihokan sa 11,242 ka kongregasyon ug 572 ka nagapanawng mga magtatan-aw, ug sa Writing Correspondence, diin ang mga 14,000 ka pangutana bahin sa nagkalainlaing mga ulohan gidumala matag tuig. Sila nakadayeg sa panukiduki luyo sa mga sulat nga gipadala ug sa tinuod nga kahangawa nga gipakita alang niadtong kansang mga pangutana nagpamatuod nga sila naningkamot sa pagsagubang sa seryosong mga suliran.
Ang sunodsunod nga grupo sa nanaglibot miduaw sa Translation Services. Nakurat sila sa pagkahibalo nga sa miaging lima ka tuig, 102 ka dugang pinulongan ang gidugang ngadto sa gidaghanon sa pinulongan nga ang Sosyedad nagtaganag literatura sa Bibliya. Sa tibuok kalibotan, mga 80 porsiyento sa mga Saksi ni Jehova nagbasa sa mga publikasyon sa Sosyedad diha sa mga pinulongan gawas pa sa Ingles. Aron matagan-an ang ilang mga panginahanglan, adunay kapin sa 1,700 ka boluntaryo nga nagtrabaho sa natad sa paghubad diha sa 100 ka nasod. Gipakita sa pasundayag Ang Bantayanang Torre diha sa mga pinulongan sa kayutaan sa Amerika, Uropa, Asia, ug Aprika. Makita sa mga bisita ang New World Translation nga Bibliya diha sa 31 ka pinulongan nga niana kini gipatik. Ilang nahibaloan nga ang mga publikasyon sa Watch Tower mabatonan na karon sa 332 ka pinulongan ug nga ang brosyur nga Unsay Gikinahanglan sa Diyos Kanato? gipatik sa 219 niini nga mga pinulongan.
Ang mga bisita sa Legal Department gipakitaan sa lainlaing mga natad sa kalihokan nga nagkinahanglag legal nga pagtagad sa tibuok kalibotan. Diha sa video, ilang nakita ang aktuwal nga husay sa korte diin ang Saksing abogado nangatarongan dapig sa kaso nga naglangkit sa pag-abonog dugo. Ilang nasayran usab kon unsay ginabuhat aron padayong abli ang dalan alang sa publikong pagsangyaw sa maayong balita. (Filipos 1:7) Ang pagtagad gipunting ngadto sa desisyon sa Marso niining tuiga, pinaagi sa pederal nga korte sa distrito, nga nagsugo sa borough sa Oradell, New Jersey, T.B.A., sa pagbag-o sa mga balaod niini aron wagtangon ang mga panginahanglan sa permiso ug badge alang sa mga Saksi ni Jehova nga buot makig-ambit sa ilang publikong ministeryo sa balay ug balay sa maong komunidad.
Dili kay kadto ray nakita sa mga bisita. Ilang gisusi ang mga pasundayag sa pagtukod diha sa Precast Shop ug milibot sa mga pasilidad sa Wastewater Treatment, sa Powerhouse, sa Water-Softening Facility, ug sa daghang maintenance shop, apil sa uban pa. Kadto maoy talagsaong kahigayonan.
Programa sa Pagdedikar Nagpasiugdag Diyosnong Edukasyon
Ang aktuwal nga programa sa dedikasyon gipahigayon sa Miyerkoles, Mayo 19, nga nagsugod sa alas 4:00 s.h. Ang malipayong panon sa 6,929 naglakip sa kawani sa hedkuwarter, mga dinapit sa Sosyedad, ug 372 nga natigom sa sangang buhatan sa Canada, nga gikutay sa elektronikong paagi.
Ang mga mamiminaw nalipay gayod sa pagkadungog sa makapadasig nga mga pulong sa pag-abiabi ni Milton G. Henschel, ang presidente sa Watch Tower Society. Si Theodore Jaracz, usa ka membro sa Nagamandong Lawas ug tsirman sa maong okasyon, sunod nga mipailaila kang William Malenfant. Sa pagpresentar sa “Mga Hinungdanong Bahin sa Programa sa Pagtukod,” iyang giinterbiyo ang tulo ka igsoon nga dihay importanteng mga papel sa kaugmaran, disenyo, ug pagtukod sa Watchtower Educational Center. Sa lakat sa mga interbiyo, gisulti nga sulod sa katuigan sa aktuwal nga buluhatong pagtukod, kapin sa 8,700 ka temporaryong mga trabahante ang nangabot sa ilang kaugalingong gasto sa pagtrabaho diha sa proyekto. Pagkamaayong pamatuod sa panaghiusa ug pagkamahinatagon nga nahimong posible pinaagi sa diyosnong pagtulon-an!
Sunod gisugdan ang simposyum nga nag-ulohag “Diyosnong Edukasyon sa Tibuok-Kalibotang Gilapdon.” Kadto gipresentar sa upat ka membro sa Nagamandong Lawas. Gipasiugda ni John E. Barr nga ang diyosnong edukasyon gipasikad sa Pulong sa Diyos, ang Bibliya, nga nagdasig sa mga Kristohanon nga “magapamunga sa tanang maayong buhat ug magalambo diha sa tukmang kahibalo sa Diyos.” (Colosas 1:10) Gihisgotan ni Daniel Sydlik kon sa unsang paagi ang diyosnong edukasyon giorganisar sa teokratikanhong paagi gikan sa ulo sa Kristohanong kongregasyon, si Jesu-Kristo, hangtod sa matag membro sa tibuok-kalibotang panag-igsoonay. (1 Corinto 12:12-27) Ang kataposang duha ka bahin sa simposyum, nga gisaysay ni Gerrit Lösch ug Carey Barber, nagpakita kon sa unsang paagi ang diyosnong edukasyon magkuwalipikar sa mga ministro sa pag-abot sa tanang tawo bisan asa ug paghatag kanilag instruksiyon aron sila usab makalakaw diha sa dalan sa Diyos.—Isaias 2:1-4; 2 Corinto 3:5.
Aron masinati ang mga mamiminaw sa lainlaing mga tunghaan nga naglihok niining sentro sa edukasyon, ang mga interbiyo ug mga panaghisgot gidumala uban sa mga instruktor maingon man sa ubang nalangkit sa palakaw niini. Ang papel sa matag tunghaan sa pagtuman sa diyosnong edukasyonal nga programa diha sa tibuok-kalibotang gilapdon gipakita. Gipunting nga ang Tunghaang Gilead nagsentro sa pagtagad sa pagtuon sa matag basahon sa Bibliya, sa modernong-adlaw nga kasaysayan sa katawhan ni Jehova, ug sa pagpangandam alang sa misyonaryong pag-alagad. Ang tunghaan sa sanga maoy talagsaong malangkobong pagtuon sa daghang natad sa kalihokan nga niana ang mga membro sa Komite sa Sanga nalangkit. Ang Tunghaan Alang sa Nagapanawng mga Magtatan-aw gidisenyo dili lamang sa pagtagana sa mga panginahanglan sa nagapanawng mga igsoong lalaki kondili sa pagsangkap usab kanila aron makatagana sa matang sa espirituwal nga tabang nga ilabinang makabenepisyo sa mga kongregasyon.
Sa pagtiklop sa maanindot nga programa, si Lloyd Barry sa Nagamandong Lawas mihatag sa pakigpulong sa dedikasyon bahin sa ulohang “Pagtukod Uban sa Atong Dakong Maglalalang.” Iyang gipunting nga ang Maglalalang, si Jehova, nahimuot sa tanan niyang kalalangan ug nagdapit kanato sa pagmaya uban niya. (Isaias 65:18) Sanglit “siya nga nagtukod sa tanang butang mao ang Diyos,” ngadto kang Jehova nga Diyos ihatag ang bug-os nga pasidungog tungod niining tanang pagpanukod. (Hebreohanon 3:4) Sa napahayag na ang maong hunahuna, ang mamumulong mitanyag ug kinasingkasing nga pag-ampo, nga nagdedikar sa Watchtower Educational Center ngadto kang Jehova, ang atong Dakong Maglalalang.a
Walay duhaduha nga ang tibuok semana nga piyesta dili gayod malimtan niadtong nanambong. Nganong dili hikayon nga moduaw sa Watchtower Educational Center? Kami nakaseguro nga ang pagduaw ug paglibot niini makapadasig kanimo sa imong mga paningkamot sa pagkahibalo ug dugang bahin sa atong mahigugmaong Maglalalang ug sa pagkinabuhi sumala sa iyang matarong nga mga sukdanan.
[Footnote]
a Si Brader Barry nakatapos nga matinumanon sa iyang yutan-ong dalan niadtong Hulyo 2, 1999. Tan-awa Ang Bantayanang Torre, Oktubre 1, 1999, panid 16.
[Mga hulagway sa panid 10]
Ang napuno nga awditoryum ug ang daghan kaayong mamiminaw diha sa lawak kan-anan
[Mga hulagway sa panid 10]
Ang paglibot mao ang ilabinang malipayong bahin