Unsay Mahimo Bahin sa Pagkaluya sa Buot?

SA UNSANG paagi mapakigbisogan sa usa ka tawo ang pagkaluya sa buot? Mao kini ang pangutana nga gisukna ngadto sa ubay-ubayng nagapanawng mga magtatan-aw, nga regular nga nagduawan sa mga kongregasyon sa mga Saksi ni Jehova. Ang ilang mga tubag makatabang kanato sa pag-analisar sa mga hinungdan sa pagkaluya sa buot ug sa mga solusyon niining kahimtanga nga makaapektar ni bisan kinsang Kristohanon.

Labaw pa kay sa pag-analisar lamang ang gikinahanglan sa pagsagubang sa pagkaluya sa buot, apan ang mga simtomas mahimong maglakip sa kakulang sa interes sa pag-ampo o sa personal nga pagtuon, pagkahimong di-regular sa pagtambong sa tigom, pagkahanaw sa kadasig, ug pagkabugnaw pa gani sa pagtagad ngadto sa kaubang mga Kristohanon. Apan, ang usa sa labing dayag nga ilhanan mao ang pagkawala sa kasibot sa pag-ebanghelyo. Susihon nato ang mga simtomas ug konsiderahon ang pipila ka solusyon.

Pagkaluya sa Buot Diha sa Atong Pag-ebanghelyong Buluhaton

Nahibalo si Jesu-Kristo sa mga kalisdanan nga nalangkit sa komisyon sa paghimog mga tinun-an. (Mateo 28:19, 20) Gipadala niya ang iyang mga sumusunod ingong “mga karnero taliwala sa mga lobo,” nga nahibalo nga ang ilang pagsangyaw nga kalihokan magpahinabo nga lutoson sila. (Mateo 10:16-23) Ugaling, dili kini katarongan nga maluya ang ilang buot. Sa pagkatinuod, ang mga alagad sa Diyos nga mainampoong nagsalig kang Jehova kasagarang napalig-on sa paglutos.​—Buhat 4:29-31; 5:41, 42.

Bisan sa dihang ang mga tinun-an ni Kristo wala mag-antos ug grabeng paglutos, dili kanunayng paborable ang pagdawat kanila. (Mateo 10:11-15) Sa susama, ang buluhaton nga pagsangyaw sa mga Saksi ni Jehova dili kanunayng gihimo sa sayon nga paagi karon.a Alang sa daghang tawo, ang pagtuo sa Diyos maoy personal nga butang nga dili nila buot nga hisgotan. Ang uban dili gustong mag-apil-apil sa relihiyosong organisasyon nga niana duna silay pipila ka pagpihig. Sa walay duhaduha, ang kawalay-pagtagad, ang kakulang sa mga resulta, o nagkadaiyang ubang mga suliran mahimong dagkong mga tinubdan sa pagkaluya sa buot. Sa unsang paagi mabuntog kining maong mga kababagan?

Pagbaton ug Mas Maayong mga Resulta

Ang kalipay nga atong matagamtam gikan sa atong ministeryo sa bahin nalangkit sa mga resulta nga nabatonan. Nan, sa unsang paagi mabatonan nato ang mas mabungahong ministeryo? Aw, kita maoy “mga mangingisda ug mga tawo.” (Marcos 1:16-18) Ang mga mangingisda sa karaang Israel nangisda sa gabii sa dihang makasikop sila ug kinadaghanang isda. Kita usab kinahanglang mag-analisar sa atong teritoryo aron kita “mangisda” sa dihang ang kadaghanan sa mga tawo anaa sa balay ug mas madinawaton sa atong mensahe. Kini mahimong sa gabii, sa mga hinapos-semana, o sa ubang panahon. Sumala sa usa ka nagapanawng magtatan-aw, kini praktikal sa mga dapit diin ang mga tawo nagtrabaho sa tibuok adlaw. Matod niya ang pagsangyaw sa gabii kasagarang magpahinabog maayo kaayong mga resulta. Ang pagsangyaw pinaagi sa telepono o sa di-pormal nga paagi makapaarang usab kanato nga maabot ang mas daghang tawo.

Ang paglahutay diha sa ministeryo magpatunghag maayong mga resulta. Sa Sidlakang Uropa ug sa pipila ka nasod sa Aprika, ang buluhatong pagsangyaw sa Gingharian nagaabante pag-ayo, ug kini miresulta sa dakong pag-uswag. Sa susama, daghang kongregasyon ang natukod sa mga dapit nga dugay nang giisip nga dili-mabungahon o bisan sa teritoryo nga kanunay kaayong makobrehan. Apan, komosta kon ang imoha wala magpatunghag ingong mga resulta?

Paghupot ug Maayong Tinamdan

Ang paghupot nga tin-aw diha sa hunahuna sa mga tumong nga gipakita ni Jesus motabang kanato nga dili maluya ang buot atubangan sa kawalay-pagtagad diha sa ministeryo. Buot ni Kristo nga mangita ang iyang mga tinun-an sa mga takos, dili ang paghimo ug tinagdaghan nga pagpangabig. Sa ubay-ubayng okasyon iyang gipunting nga ang kinabag-an dili modawat sa maayong balita, maingon nga ang kadaghanang Israelinhon wala mamati sa mga manalagna kaniadto.​—Ezequiel 9:4; Mateo 10:11-15; Marcos 4:14-20.

Ang “maayong balita sa gingharian” mapasalamatong gidawat sa mga tawo nga “mahunahunaon sa ilang espirituwal nga panginahanglan.” (Mateo 5:3; 24:14) Buot nilang moalagad sa Diyos sa paagi nga gitino niya. Busa, ang mga resulta sa atong kalihokan labawng nalangkit sa kahimtang sa kasingkasing sa katawhan kay sa atong kahanas sa pagpresentar sa mensahe. Siyempre, kinahanglang himoon nato ang atong kinamaayohan sa paghimo sa maayong balita nga makapadani. Bisan pa niana, ang mga resulta nagdepende sa Diyos, kay si Jesus miingon: “Walay tawo nga makaari kanako gawas kon ang Amahan, kinsa nagpadala kanako, magkabig kaniya.”​—Juan 6:44.

Ang atong buluhatong pag-ebanghelyo nagpaila sa ngalan ni Jehova. Mamati man o dili ang mga tawo, ang atong kalihokang pagsangyaw makaamot sa pagbalaan sa sagradong ngalan ni Jehova. Dugang pa, pinaagi sa atong buluhatong pag-ebanghelyo, atong gipamatud-an nga kita maoy mga tinun-an ni Kristo, ug kita dunay pribilehiyo nga makig-ambit sa labing hinungdanong misyon nga ginatuman sa atong adlaw.​—Mateo 6:9; Juan 15:8.

Pagkaluya sa Buot ug mga Relasyon

Ang pipila ka relasyon sa tawo, sa pamilya man o sa kongregasyon, makapahinabog pagkaluya sa buot. Pananglitan, anaa ang pagbati nga wala masabti. Ang mga pagkadili-hingpit sa mga isigkamagtutuo makapaluya usab sa atong buot. Sa makausa pa, ang Kasulatan dakog ikatabang kanato.

Ang “tibuok kapunongan sa mga igsoon” sa tibuok kalibotan naglangkob sa usa ka dakong espirituwal nga pamilya. (1 Pedro 2:17) Apan ang pagbati nga mahimong sakop sa nahiusang katawhan mahanaw sa dihang motungha ang mga suliran tungod sa mga panagsungi sa personalidad. May mga pamatuod nga ang unang-siglong mga Kristohanon nakasinati nianang mga sulirana, sanglit si apostol Pablo kinahanglang sublisubling magpahinumdom kanila nga magkahiusa. Pananglitan, gitambagan niya ang duha ka Kristohanong mga babaye​—si Euodia ug Sintique—​nga sulbaron ang ilang mga kasungian.​—1 Corinto 1:10; Efeso 4:1-3; Filipos 4:2, 3.

Kon mao kini ang suliran, sa unsang paagi mahaling nato pag-usab ang sinserong gugma alang sa atong mga igsoong lalaki ug babaye? Pinaagi sa pagpahinumdom sa atong kaugalingon nga si Kristo namatay alang kanila ug nga sila, sama kanato, nagpasundayag ug pagtuo sa iyang halad lukat. Mahimong hinumdoman usab nato nga daghan sa atong mga igsoon ang andam nga mosundog kang Jesu-Kristo pinaagi sa pagrisgo sa ilang kinabuhi alang kanato.

Pipila ka tuig kanhi, sa Paris, Pransiya, ang usa ka batan-ong Saksi wala mag-ukon-ukon sa pagkawhat sa maleta nga dunay bomba nga gibutang sa gawas sa Kingdom Hall. Nagdalidali siya pagkanaog sa pipila ka hut-ong sa mga hagdanan una kana ilabay ngadto sa fountain, diin kini mibuto. Sa gipangutana kon unsay nagtukmod kaniya sa pagrisgo sa iyang kinabuhi niining paagiha, siya mitubag: “Akong naamgohan nga nameligro ang among kinabuhi. Busa akong gihunahuna nga mas maayo pang ako ra ang mamatay kay sa kaming tanan ang mangamatay.”b Pagkadakong panalangin nga makabaton ug ingon nianang mga kauban nga andam mosunod pag-ayo sa panig-ingnan ni Jesus!

Dugang pa, atong mapalandong ang espiritu sa kooperasyon nga naglungtad taliwala sa mga Saksi ni Jehova nga didto sa mga kampo konsentrasyon panahon sa Gubat sa Kalibotan II.c Ning bag-ohay pa, ang atong mga igsoong lalaki ug babaye sa Malawi maunongon usab nga naghupot sa ilang integridad ingong matuod nga mga Kristohanon. Dili ba ang hunahuna nga ang atong mga igsoon sa lokal nga kongregasyon molihok sa samang paagi ilalom sa malisod nga mga kahimtang mopalihok kanato nga palabyon o bisag menosan na lang ang adlaw-adlawng mga kasungian ug mga suliran? Kon atong ugmaron ang hunahuna ni Kristo, ang atong adlaw-adlaw nga mga pakiglabot sa mga isigkamagsisimba mahimong tuboran sa kahupayan, dili pagkaluya sa buot.

Makapaluya sa Buot nga Personal nga mga Pagbati

“Ang pagdahom nga maoktaba makapasakit sa kasingkasing, apan ang butang nga gitinguha maoy usa ka kahoy sa kinabuhi sa dihang kini moabot.” (Proverbio 13:12) Sa mga mata sa pipila ka alagad ni Jehova, ang kataposan niining sistema sa mga butang morag dugay pa. Nakaplagan sa mga Kristohanon ang yugto nga kita nagkinabuhi ingong ‘makuyaw ug lisod sagubangon,’ sama sa nakaplagan sa daghang dili-magtutuo.​—2 Timoteo 3:1-5.

Apan, kasukwahi sa mga dili-magtutuo, ang mga Kristohanon kinahanglang magmaya sa pagkakita diha niining masulayong mga kahimtang sa “ilhanan” sa presensiya ni Jesus, nga nagpakita nga ang Gingharian sa Diyos sa dili madugay magtapos niining daotang sistema sa mga butang. (Mateo 24:3-14) Bisan pag mograbe ang kahimtang​—nga mao gayoy mahitabo panahon sa “dakong kasakitan”—​kini nga mga hitabo maoy tuboran sa atong kalipay tungod kay kini magpasulod sa nagsingabot nga bag-ong kalibotan sa Diyos.​—Mateo 24:21; 2 Pedro 3:13.

Ang pag-oktaba diha sa hunahuna sa pagsalga sa Gingharian sa presenteng-adlaw nga mga kalihokan mahimong magpahinabo sa usa ka Kristohanon sa paggugol ug dugang pang panahon sa materyal nga mga pangagpas. Kon tugotan niya ang mga butang sama sa sekular nga trabaho ug kalingawan nga mohurot sa iyang panahon ug kusog, malisdan siya sa pagtuman sa Kasulatanhong mga responsibilidad sa hustong paagi. (Mateo 6:24, 33, 34) Ang maong tinamdan nagpalambo sa kapakyasan ug sa ingon sa pagkaluya sa buot. Usa ka nagapanaw nga magtatan-aw mikomento: “Dili makataronganon nga mosulay pagtukod ug barot nga imitasyon sa bag-ong sistema niining sistemaha sa mga butang.”

Duha sa Labing Maayong mga Solusyon

Sa dihang nahimo na ang pagdayagnos, sa unsang paagi ang usa ka tawo makakaplag ug maayong solusyon? Ang personal nga pagtuon maoy usa sa labing maayong paagi nga mabatonan. Ngano man? “Kini nagpahinumdom kanato kon nganong kinahanglan natong buhaton ang atong gibuhat,” mikomento ang usa ka nagapanawng magtatan-aw. Ang lain pa misaysay: “Ang pagsangyaw tungod lamang kay obligasyon mahimong bug-at ngadtongadto.” Apan ang maayong personal nga pagtuon motabang kanato sa pagbaton pag-usab ug klarong panglantaw sa atong papel samtang nagkaduol kita sa kataposan. Sa samang hunahuna, ang Kasulatan sublisubling nagpahinumdom kanato sa panginahanglan nga mokaon pag-ayo sa espirituwal aron makabaton ug tinuod nga kalipay sa pagbuhat sa kabubut-on sa Diyos.​—Salmo 1:1-3; 19:7-10; 119:1, 2.

Ang mga ansiyano makatabang sa uban sa pagbuntog sa pagkaluya sa buot pinaagi sa paghimog makapadasig nga mga pagduaw isip magbalantay ngadto kanila. Panahon niining pribadong mga duaw, ang mga ansiyano makapakita nga ang matag usa kanato gipabilhan pag-ayo ug adunay hinungdanong dapit taliwala sa katawhan ni Jehova. (1 Corinto 12:20-26) Nagtumong sa mga isigka-Kristohanon, usa ka ansiyano miingon: “Aron mapasiugda ang ilang bili, ako silang pahinumdoman kon unsay ilang nalampos sa miagi. Akong ipunting nga sila bililhon sa mga mata ni Jehova ug nga ang dugo sa iyang Anak gihatag alang kanila. Kini nga pangatarongan kanunayng gidawat nga mahinangpon. Sa dihang paluyohan kini sa lig-ong mga reperensiya sa Bibliya, kadtong kinsa nangaluya ang buot anaa sa kahimtang nga magpahiluna ug bag-ong mga tumong, sama sa pag-ampo ug pagtuon ug pagbasa sa Bibliya ingong pamilya.”​—Hebreohanon 6:10.

Panahon sa mga pagduaw isip magbalantay, kinahanglang mag-amping ang mga ansiyano nga dili ipakitang morag lisod pahimut-an ang Diyos. Hinunoa, ang mga ansiyano makatabang sa isigkamagsisimba nga naluya ang buot sa pagkasabot nga gaan ang palas-anon sa mga sumusunod ni Jesus. Sa ingon, ang atong Kristohanong pag-alagad maoy tuboran sa kalipay.​—Mateo 11:28-30.

Pagbuntog sa Pagkaluya sa Buot

Bisan unsa pay mga hinungdan niini, ang pagkaluya sa buot maoy hampak nga kinahanglang pakigbisogan. Apan, hinumdomi nga wala kita mag-inusara niini nga pakigbisog. Kon maluya ang atong buot, dawaton nato ang tabang sa atong kaubang mga Kristohanon, ilabina sa mga ansiyano. Pinaagi sa pagbuhat niana, mamenosan nato ang mga pagbati sa pagkaluya sa buot.

Labaw sa tanan, kinahanglang modangop kita sa Diyos alang sa tabang sa pagbuntog sa pagkaluya sa buot. Kon mainampoon kitang mosalig kang Jehova, mahimong motabang siya kanato nga mabuntog sa bug-os ang pagkaluya sa buot. (Salmo 55:22; Filipos 4:6, 7) Sa bisan unsang kahimtang, ingong iyang katawhan makapakig-ambit kita sa gibati sa salmista kinsa miawit: “Malipayon ang katawhan nga nakaila sa malipayong pagsinggit. Oh Jehova, sa kahayag sa imong nawong sila padayong nagalakaw. Sa imong ngalan sila nagmalipayon sa tibuok nga adlaw ug sa imong pagkamatarong sila gibayaw. Kay ikaw mao ang katahom sa ilang kusog; ug pinaagi sa imong maayong kabubut-on ang among sungay pagabayawon.”​—Salmo 89:15-17.

[Mga footnote]

[Hulagway sa panid 31]

Ang makapalig-on nga mga pagduaw isip mga magbalantay sa mahigugmaong mga ansiyano makatabang sa mga Kristohanon nga mabuntog ang pagkaluya sa buot