Pasagdi nga Kita Mahimong ang Matang nga Adunay Pagtuo
“Kita . . . ang matang nga adunay pagtuo ngadto sa pagtipig nga buhi sa kalag.”—HEBREOHANON 10:39.
1. Nganong ikaingon nga ang pagtuo sa matag usa sa maunongong alagad ni Jehova bililhon?
SA SUNOD higayon nga anaa ka sa Kingdom Hall nga puno sa mga magsisimba ni Jehova, hunong ug tan-awa kanang anaa sa imong duol. Hunahunaa ang daghang paagi sa ilang pagpasundayag sa pagtuo. Ikaw tingali makakitag mga edaran nga nag-alagad sa Diyos sa daghan nang katuigan, mga batan-on nga nagsagubang sa pagpamit-os sa mga katalirongan, ug mga ginikanan nga nanglimbasog pag-ayo aron makamatuto ug mahinadlokon sa Diyos nga mga anak. Anaa ang mga ansiyano sa kongregasyon ug ministeryal nga mga alagad, nga nangabaga ug daghang kaakohan. Oo, ikaw makakita ug espirituwal nga mga igsoong lalaki ug babaye sa tanang pangedaron nga nagsagubang sa tanang matang sa mga kakulian aron makaalagad kang Jehova. Pagkabililhon sa pagtuo sa matag usa!—1 Pedro 1:7.
2. Nganong ang tambag ni Pablo sa Hebreohanon mga kapitulo 10 ug 11 mapuslanon kanato karong adlawa?
2 Pipila lamang ka mga tawong di-hingpit, kon aduna man ugaling, ang mas nakasabot sa bili sa pagtuo kay kang apostol Pablo. Ngani, siya miingon nga ang tinuod nga pagtuo mosangpot sa “pagtipig nga buhi sa kalag.” (Hebreohanon 10:39) Hinunoa, si Pablo nahibalo nga ang pagtuo maatake ug madaot niining walay-pagtuo nga kalibotan. Siya nabalaka pag-ayo sa Hebreohanong mga Kristohanon sa Jerusalem ug sa Judea, nga nakigbisog sa pagtipig sa ilang pagtuo. Sa dihang atong susihon ang mga bahin sa Hebreohanon mga kapitulo 10 ug 11, atong matikdan ang mga paagi nga gigamit ni Pablo sa paglig-on sa ilang pagtuo. Sa ingon, atong masabtan kon sa unsang paagi makatukod kita ug mas lig-ong pagtuo sa atong kaugalingon ug niadtong anaa sa atong duol.
Ipadayag ang Pagsalig sa Usag Usa
3. Sa unsang paagi ang mga pulong ni Pablo nga makita diha sa Hebreohanon 10:39 nagpakita nga siya may pagsalig sa iyang mga igsoong lalaki ug babaye sa pagtuo?
3 Ang unang butang nga atong mamatikdan mao ang positibong tinamdan ni Pablo diha sa iyang mamiminaw. Siya nagsulat: “Karon kita dili ang matang nga nagapanibog ngadto sa kalaglagan, kundili ang matang nga adunay pagtuo ngadto sa pagtipig nga buhi sa kalag.” (Hebreohanon 10:39) Si Pablo naghunahuna sa labing maayo, dili daotan, labot sa iyang matinumanong mga isigka-Kristohanon. Matikdi, usab, nga iyang gigamit ang ekspresyong “kita.” Si Pablo maoy usa ka matarong nga tawo. Bisan pa, wala siya magpakita nga labaw sa iyang mga mamiminaw, nga morag matarong kaayo siya kay kanila. (Itandi ang Ecclesiastes 7:16.) Hinunoa, iyang giapil ang iyang kaugalingon uban kanila. Siya nagpahayag ug kinasingkasing nga pagsalig nga siya ug ang iyang matinumanong Kristohanong mga magbabasa tanan magaatubang ug makapalugdang mga kakulian nga nagpatim-aw sa ilang atubangan, nga sila maisogong modumili sa pagsibog ngadto sa kalaglagan, ug nga sila mapamatud-an nga mahimong ang matang nga adunay pagtuo.
4. Sa unsang mga katarongan nga si Pablo may pagsalig sa iyang mga isigkamagtutuo?
4 Sa unsang paagi nakabaton si Pablo ug ingon niana nga pagsalig? Siya ba wala makakita sa kasaypanan sa Hebreohanong mga Kristohanon? Sa kasukwahi, iyang gihatagan sila ug espesipikong tambag aron tabangan sila sa pagbuntog sa ilang espirituwal nga mga kakulangan. (Hebreohanon 3:12; 5:12-14; 6:4-6; 10:26, 27; 12:5) Bisan pa, si Pablo labing menos dunay duha ka maayong katarongan sa pagsalig sa iyang mga igsoon. (1) Ingong usa ka tigsundog ni Jehova, si Pablo naningkamot sa pagtan-aw sa katawhan sa Diyos ingon sa pagtan-aw ni Jehova kanila. Kana dili lamang labot sa ilang mga kasaypanan kondili labot sa ilang maayong mga hiyas ug sa ilang posibilidad sa pagpili nga mohimog maayo sa umaabot. (Salmo 130:3; Efeso 5:1) (2) Si Pablo adunay bug-os nga pagtuo sa gahom sa balaang espiritu. Siya nahibalo nga walay mga kababagan, walay tawhanong kahuyangan, ang makapugong kang Jehova sa paghatag ug “gahom nga labaw sa kasarangan” ngadto sa kang bisan kinsang Kristohanon nga maningkamot sa pag-alagad Kaniya nga matinumanon. (2 Corinto 4:7; Filipos 4:13) Busa ang pagsalig ni Pablo sa iyang mga igsoong lalaki ug babaye dili maoy wala-sa-lugar, dili-realistiko, o binuta nga pagkamalaomon. Kini malig-on-ug-basehanan ug gipasukad sa Kasulatan.
5. Sa unsang paagi atong masundog ang pagsalig ni Pablo, ug unsa malagmit ang mosangpot?
5 Sa pagkatinuod, ang pagsalig nga gipasundayag ni Pablo nakita nga mananakod. Lagmit bililhon gayod kaayo sa mga kongregasyon sa Jerusalem ug Judea nga nagpahayag si Pablo kanila nga makapadasig kaayo. Sa atubangan sa matamayong pagbiaybiay ug mapahitas-ong pagkawalay pagtagad sa ilang mga magsusupak nga Hudiyohanon, ang Hebreohanong mga Kristohanon natabangan sa ingon niana nga mga ekspresyon aron makahukom sa ilang mga kasingkasing nga mahimong ang matang nga adunay pagtuo. Kita ba makahimo ug sama niana alang sa usag usa karong adlawa? Dali kaayong makakita diha sa uban ug hataas nga listahan lamang sa sayop ug lahi nga mga personalidad. (Mateo 7:1-5) Bisan pa, kita makatabang sa usag usa ug labaw pa kon atong matikdan ug pabilhan ang talagsaong pagtuo nga nabatonan sa matag usa. Uban sa pagdasig, ang pagtuo dakog kalagmitan nga motubo.—Roma 1:11, 12.
Tukmang Paggamit sa Pulong sa Diyos
6. Diin nagkutlo si Pablo sa dihang iyang gisulat ang mga pulong nga narekord sa Hebreohanon 10:38?
6 Gilig-on usab ni Pablo ang pagtuo sa iyang mga isigkamagtutuo pinaagi sa iyang mahanasong paggamit sa Kasulatan. Pananglitan, siya misulat: “‘Apan ang akong usa nga matarong mabuhi tungod sa pagtuo,’ ug, ‘kon siya mosibog, ang akong kalag walay kahimuot kaniya.’” (Hebreohanon 10:38) Si Pablo dinhi nagkutlo gikan kang manalagnang Habacuc.a Malagmit sinati niining mga pulonga ang mga magbabasa ni Pablo, nga Hebreohanong mga Kristohanon diin popular kanila ang matagnaong mga basahon. Kon hunahunaon ang iyang tumong—sa paglig-on sa pagtuo sa mga Kristohanon sa sulod ug duol sa Jerusalem sa mga tuig 61 K.P.—ang pananglitan ni Habacuc maoy usa ka maayong kapilian. Ngano?
7. Kanus-a gisulat ni Habacuc ang iyang tagna, ug unsay mga kahimtang sa Juda niadtong panahona?
7 Seguro gisulat ni Habacuc ang iyang basahon human sa mga duha ka dekada lamang una pa malaglag ang Jerusalem sa 607 W.K.P. Diha sa panan-awon, ang manalagna nakakita sa mga Caldeanhon (o, mga Babilonyanhon), usa ka “mapait ug madalidalion nga nasod,” nga nag-atake sa Juda ug naglaglag sa Jerusalem, nga naglamoy sa mga tawo ug mga nasod tungod niini. (Habacuc 1:5-11) Apan ang maong kalamidad gitagna sukad pa sa mga adlaw ni Isaias, nga kapin sa usa ka siglo sa miagi. Sa panahon ni Habacuc, si Jehoiakim mipuli sa buotang Haring Josias, ug midaghan na usab ang pagkadaotan sa Juda. Gilutos ug gipamatay pa gani ni Jehoiakim kadtong maghisgot sa ngalan ni Jehova. (2 Cronicas 36:5; Jeremias 22:17; 26:20-24) Dili ikahibulong nga ang naguol nga manalagnang Habacuc mituaw: “Hangtod kanus-a pa, Oh Jehova?”—Habacuc 1:2.
8. Nganong ang panig-ingnan ni Habacuc makatabang sa mga Kristohanon sa unang siglo ug karong adlawa?
8 Si Habacuc wala mahibalo kon unsa ka duol ang kalaglagan sa Jerusalem. Sa susama, ang unang-siglong mga Kristohanon wala mahibalo kon kanus-a matapos ang Hudiyohanong sistema sa mga butang. Ni nahibalo kita karong adlawa sa “adlaw ug takna” sa dihang ipakanaog ni Jehova ang paghukom batok niining daotang sistema. (Mateo 24:36) Nan, atong matikdan ang duha ka bahin sa tubag ni Jehova kang Habacuc. Una, iyang gipasaligan ang manalagna nga ang kataposan moabot sa hustong panahon. “Kini dili maglangan,” miingon ang Diyos, bisan pag sa tawhanong panglantaw, kini daw nalangan. (Habacuc 2:3) Ikaduha, gipahinumdoman ni Jehova si Habacuc: “Labot sa usa nga matarong, siya magpabiling buhi tungod sa iyang pagkamatinuohon.” (Habacuc 2:4) Pagkatahom, simpleng mga kamatuoran! Ang labawng hinungdanon mao, dili kon kanus-a moabot ang kataposan, kondili kon kita ba magpadayon sa pagkinabuhi sa usa ka kinabuhi nga adunay pagtuo.
9. Sa unsang paagi ang masinundanong mga alagad ni Jehova nagpabiling buhi tungod sa ilang pagkamatinuohon (a) sa 607 W.K.P.? (b) human sa 66 K.P.? (c) Nganong hinungdanon nga atong palig-onon ang atong pagtuo?
9 Sa dihang ang Jerusalem gilungkab sa 607 W.K.P., si Jeremias, ang iyang sekretaryo nga si Baruch, si Ebed-melech, ug ang maunongong mga Recabihanon nakakita sa pagkatinuod sa saad ni Jehova ngadto kang Habacuc. Sila ‘nagpabiling buhi’ pinaagi sa pagkalingkawas sa makalilisang nga kalaglagan sa Jerusalem. Ngano? Gigantihan ni Jehova ang ilang pagkamatinuohon. (Jeremias 35:1-19; 39:15-18; 43:4-7; 45:1-5) Sa susama, ang unang-siglong Hebreohanong mga Kristohanon dayag nga misanong gayod sa tambag ni Pablo, kay sa dihang giatake sa Romanong kasundalohan ang Jerusalem sa 66 K.P. ug dayon sa walay katarongan misibog, ang maong mga Kristohanon matinumanong namati sa pasidaan ni Jesus sa pagkalagiw. (Lucas 21:20, 21) Sila nagpabiling buhi tungod sa ilang pagkamatinuohon. Sa susama, kita magpabiling buhi kon kita makaplagang matinuohon inig-abot sa kataposan. Pagkadako nga katarongan sa pagpalig-on sa atong pagtuo karon!
Gibuhi ang mga Panig-ingnan sa Pagtuo
10. Sa unsang paagi gihubit ni Pablo ang pagtuo ni Moises, ug sa unsang paagi atong masundog si Moises niining bahina?
10 Si Pablo naglig-on usab sa pagtuo pinaagi sa paggamit ug mga panig-ingnan. Samtang magabasa ka sa Hebreohanon kapitulo 11, matikdi kon sa unsang paagi gibuhi niya ang mga panig-ingnan sa mga karakter sa Bibliya. Siya miingon, pananglitan, nga si Moises “nagpabilin mang lig-on nga daw sa nakita ang Usa kinsa dili-makita.” (Hebreohanon 11:27) Sa laing pagkasulti, si Jehova tinuod gayod kang Moises nga morag iyang makita ang dili-makita nga Diyos. Ingon ba usab kita niini? Sayon ang paghisgot bahin sa relasyon uban kang Jehova, apan ang pagtukod ug paglig-on niana nga relasyon nagkinahanglag paningkamot. Kana nga paningkamot maoy atong kinahanglang himoon! Si Jehova tinuod ba gayod kanato nga ato siyang pagatagdon kon maghimog mga desisyon, lakip sa daw gagmayng mga desisyon? Ang pagtuo nga ingon nianang matanga makatabang kanato sa paglahutay bisan sa grabeng pagsupak.
11, 12. (a) Ilalom sa unsang mga kahimtang ang pagtuo ni Enoc nasulayan? (b) Unsang makapadasig nga ganti ang nadawat ni Enoc?
11 Tagda, usab, ang pagtuo ni Enoc. Ang pagsupak nga iyang giatubang lisod kaayo natong mahanduraw. Kinahanglang ipahayag ni Enoc ang malala nga mensahe sa paghukom batok sa daotang mga tawo nga buhi niadtong panahona. (Judas 14, 15) Ang paglutos nga naghulga niining tawong matinuohon dayag nga grabe kaayo, mapintas kaayo, nga tungod niana “gilalin siya” ni Jehova, gikuha siya gikan sa buhi nga kahimtang ngadto sa kahimtang sa pagkatulog diha sa kamatayon sa dili pa siya madakop sa mga kaaway. Busa si Enoc wala makakita sa katumanan sa tagna nga iyang gipamulong. Apan, siya nakadawat ug gasa, nga sa pipila ka paagi, labi pang maayo.—Hebreohanon 11:5; Genesis 5:22-24.
12 Si Pablo nagpatin-aw: “Sa wala pa ang paglalin kaniya [si Enoc] nakabaton ug pagsaksi nga iyang napahimut-an pag-ayo ang Diyos.” (Hebreohanon 11:5) Unsay kahulogan niini? Sa wala pa siya matulog sa kamatayon, tingali si Enoc dunay usa ka matang sa panan-awon, tingali sa yutan-ong Paraiso diin siya momata sa dili madugay nga umaabot. Bisan unsa may kahimtang, gipahibalo ni Jehova kang Enoc nga Siya nalipay kaayo sa iyang matinuohon nga dalan. Si Enoc nakahatag ug kalipay sa kasingkasing ni Jehova. (Itandi ang Proverbio 27:11.) Ang paghunahuna sa kinabuhi ni Enoc makapatandog, dili ba? Buot ka ba nga magkinabuhi nga may ingon niana nga kinabuhi sa pagtuo? Nan palandonga ang maong mga panig-ingnan; tan-awa sila ingong tinuod nga mga tawo. Magmadeterminado sa pagkinabuhi diha sa pagtuo, sa adlaw-adlaw. Hinumdomi, usab, nga ang matang nga adunay pagtuo dili moalagad kang Jehova sumala sa usa ka petsa o tagal nga petsa kon kanus-a tumanon sa Diyos ang iyang tanang saad. Hinunoa, kita determinadong moalagad kang Jehova sa walay kataposan! Ang paghimo niini magkahulogan sa labing maayong paagi sa kinabuhi niining sistema sa mga butang ug sa sunod.
Kon Unsaon sa Pagkahimong Mas Malig-on sa Pagtuo
13, 14. (a) Sa unsang paagi ang mga pulong ni Pablo nga narekord diha sa Hebreohanon 10:24, 25 makatabang kanato sa paghimo sa atong mga tigom nga malipayong mga okasyon? (b) Unsa ang pangunang katarongan alang sa Kristohanong mga tigom?
13 Si Pablo nagpakita sa Hebreohanong mga Kristohanon ug pipila ka praktikal nga mga paagi aron ilang mapalig-on ang ilang pagtuo. Atong tagdon ang duha lamang. Kita tingali pamilyar sa iyang tambag diha sa Hebreohanon 10:24, 25, nga nag-awhag kanato sa pagtigom nga regular sa atong Kristohanong mga tigom. Apan, hinumdomi nga ang dinasig nga mga pulong ni Pablo didto wala magpasabot nga kita mahimong mga tumatan-aw lamang niining mga tigoma nga walay buhaton. Hinunoa, gibatbat ni Pablo ang mga tigom ingong mga higayon sa pagsinuoray sa usag usa, sa pagpalihok sa usag usa sa pag-alagad sa Diyos sa mas bug-os pa, ug sa pagdasigay sa usag usa. Kita atua didto aron mohatag, dili lamang modawat. Kana makatabang sa paghimo sa atong mga tigom nga malipayong mga okasyon.—Buhat 20:35.
14 Apan, sa panguna kita motambong sa Kristohanong mga tigom aron sa pagsimba kang Jehova nga Diyos. Atong himoon kini pinaagi sa pagduyog diha sa pag-ampo ug pag-awit, pinaagi sa pagpaminaw ug maayo, ug pinaagi sa pagtanyag sa “bunga sa mga ngabil”—mga ekspresyon sa pagdayeg ngadto kang Jehova diha sa atong mga komento ug mga bahin sa tigom. (Hebreohanon 13:15) Kon atong ibutang kining mga tumonga diha sa hunahuna ug molihok sumala niana diha sa matag tigom, ang atong pagtuo sa walay pagkapakyas molig-on sa matag higayon.
15. Nganong giawhag ni Pablo ang Hebreohanong mga Kristohanon sa pagkupot pag-ayo sa ilang ministeryo, ug nganong ang samang tambag tukma karong adlawa?
15 Laing paagi sa pagtukod sa pagtuo maoy pinaagi sa pagsangyaw nga buluhaton. Si Pablo nagsulat: “Atong panguptan pag-ayo ang pagpahayag sa dayag bahin sa atong paglaom nga walay pagpalingpaling, kay kasaligan siya nga misaad.” (Hebreohanon 10:23) Ikaw makaawhag sa uban sa pagkupot ug maayo sa usa ka butang kon sila daw nameligrong mohunong. Dayag nga gipit-os ni Satanas ang maong Hebreohanong mga Kristohanon aron mohunong sa ilang ministeryo, ug iyang gipit-os usab ang katawhan sa Diyos karong adlawa. Atubangan sa maong pagpit-os, unsay atong buhaton? Palandonga kon unsay gihimo ni Pablo.
16, 17. (a) Sa unsang paagi si Pablo nakabaton ug kaisog sa pag-alagad? (b) Unsang mga paagi ang atong himoon kon mahadlok kita sa ubang bahin sa atong Kristohanong ministeryo?
16 Ngadto sa mga Kristohanon sa Tesalonica, si Pablo misulat: “Human nga kami miantos una ug gitratar sa kawalay-tahod (ingon gayod sa inyong nahibaloan) sa Filipos, kami nagbaton ug kaisog pinaagi sa atong Diyos nga ipamulong kaninyo ang maayong balita sa Diyos uban ang kusganon nga pakigbisog.” (1 Tesalonica 2:2) Sa unsang paagi si Pablo ug ang iyang mga kauban “gitratar sa kawalay-tahod” sa Filipos? Sumala sa ubang mga eskolar, ang Gregong pulong nga gigamit ni Pablo nagpadayag ug makainsulto, makauulaw, o madagmalong pagtratar. Ang mga awtoridad sa Filipos nagbunal kanila sa garote, nagbanlod kanila sa bilanggoan, ug nagbutang kanila sa sipohan. (Buhat 16:16-24) Sa unsang paagi ang maong masakit nga eksperyensiya nakaapektar kang Pablo? Sila ba didto sa sunod nga siyudad sa iyang misyonaryong panaw, ang Tesalonica, nakakita kang Pablo nga misibog sa kahadlok? Wala, siya “nagbaton ug kaisog.” Iyang gidaog ang kahadlok ug nagpadayon sa pagsangyaw nga maisogon.
17 Diin gikan ang kaisog ni Pablo? Gikan ba sa kinailadman? Dili, matod pa niya nga siya nagbaton ug kaisog “pinaagi sa atong Diyos.” Usa ka reperensiyang basahon alang sa mga maghuhubad sa Bibliya nag-ingon nga kining pulonga mahimong hubaron “ang Diyos magkuha sa kahadlok gikan sa atong mga kasingkasing.” Busa kon wala ka kaayo mobatig kaisog labot sa imong ministeryo, o kon ang usa ka partikular nga bahin niana daw makahadlok, nganong dili mangaliyupo kang Jehova nga mao usay himoon diha kanimo? Hangyoa siya nga kuhaon ang kahadlok gikan sa imong kasingkasing. Hangyoa siya nga tabangan ka nga makabaton ug kaisog alang sa buluhaton. Dugang pa, paghimog pipila ka praktikal nga mga paagi. Pananglitan, paghikay nga may makauban sa buluhaton nga hanas sa matang sa pagsangyaw nga nakapabalaka kanimo. Basin naglangkit kini sa teritoryo sa negosyo, pagsangyaw sa kadalanan, di-pormal nga pagsangyaw, o pagsangyaw pinaagi sa telepono. Tingali ang imong kauban andam sa pagpanguna sa sinugdanan. Kon mao, paniid ug pagkat-on. Apan pagbaton ug kaisog sa pagsulay niini.
18. Unsang mga panalangin ang atong matagamtam kon magbaton kita ug kaisog sa atong pag-alagad?
18 Kon makabaton ka na ug kaisog, hunahunaa kon unsa unyay mosangpot. Kon ikaw molahutay ug dili ka magpadala sa pagkalugda, malagmit makabaton ka ug maayong mga eksperyensiya sa pagpaambit sa kamatuoran, mga eksperyensiya nga basin imong masayloan. (Tan-awa ang panid 25.) Ikaw makabaton ug katagbawan sa pagkahibalo nga ikaw nakapahimuot kang Jehova pinaagi sa pagbuhat ug usa ka butang nga malisod alang kanimo. Imong matagamtam ang iyang panalangin ug tabang sa pagbuntog sa imong mga kahadlok. Ang imong pagtuo mas molig-on. Sa pagkatinuod, dili ka makaalagad sa paglig-on sa pagtuo sa uban nga dili una lig-onon ang imong kaugalingong pagtuo sa samang higayon.—Judas 20, 21.
19. Unsang hamili nga ganti ang nagpaabot alang sa “matang nga adunay pagtuo”?
19 Hinaot nga ikaw makapadayon sa paglig-on sa imong pagtuo ug sa pagtuo niadtong anaa sa imong duol. Imong mahimo kini pinaagi sa paglig-on sa imong kaugalingon ug sa uban pinaagi sa hanas nga paggamit sa Pulong sa Diyos, pinaagi sa pagtuon sa mga panig-ingnan sa pagtuo diha sa Bibliya ug pagbuhi niini, pinaagi sa pagpangandam ug pagpakigbahin sa Kristohanong mga tigom, ug pinaagi sa pagkupot pag-ayo sa bililhong pribilehiyo sa publikong pag-alagad. Samtang imong himoon kining mga butanga, makasalig ka nga ikaw, sa pagkamatuod, maoy usa sa “matang nga adunay pagtuo.” Hinumdomi, usab, nga kadtong adunay ingon niining matanga sa pagtuo adunay hamili nga ganti. Sila mao “ang matang nga adunay pagtuo ngadto sa pagtipig nga buhi sa kalag.”b Hinaot nga ang imong pagtuo motubo, ug hinaot nga si Jehova nga Diyos magtipig kanimo nga buhi sa walay kataposan!
[Mga footnote]
a Gikutlo ni Pablo ang Septuagint nga hubad sa Habacuc 2:4, nga nag-apil sa mga pulong “kon may usang mosibog, ang akong kalag walay kahimuot kaniya.” Kining mga pulonga dili makita diha sa bisan unsang nabiling Hebreohanong manuskrito. Ang uban nag-ingon nga ang Septuagint gibase sa unang Hebreohanong mga manuskrito nga wala na maglungtad. Sa bisan unsa mang paagi, giapil kini ni Pablo dinhi ilalom sa pagdasig sa balaang espiritu sa Diyos. Sa ingon kini awtorisado sa Diyos.
b Ang tinuig nga teksto sa mga Saksi ni Jehova alang sa tuig 2000 mao: “Kita dili ang matang nga nagapanibog . . . kundili ang matang nga adunay pagtuo.”—Hebreohanon 10:39.
Unsaon Nimo Pagtubag?
◻ Sa unsang paagi gipahayag ni Pablo ang iyang pagsalig sa Hebreohanong mga Kristohanon, ug unsay atong makat-onan gikan niini?
◻ Nganong ang paghisgot ni Pablo sa manalagnang Habacuc tukma kaayo?
◻ Unsang Kasulatanhong mga panig-ingnan sa pagtuo ang gibuhi ni Pablo?
◻ Unsang praktikal nga mga paagi sa paglig-on sa pagtuo ang gisugyot ni Pablo?
[Hulagway sa panid 23]
Human sa madagmalon nga pagtratar kaniya sa Filipos, si Pablo nakabaton ug kaisog sa pagpadayon sa pagsangyaw
[Mga hulagway sa panid 24]
Makabaton ka ba ug kaisog sa pagsulay sa lainlaing mga matang sa pagsangyaw?