Ang Basahon ni Daniel Gisaysay!
ANG mga kombensiyonista nahinam sa pagbaton sa ilang kopya sa bag-ong giluwatan nga 320-panid nga basahong, Patalinghogi ang Tagna ni Daniel! Unsay ilang gibati bahin sa basahon? Matikdi ang gisulti sa pipila.
“Sama sa kadaghanang tin-edyer, lisod para nako ang pagtuon ug karaang kasaysayan. Busa sa pagkadawat nako sa akong personal nga kopya sa bag-ong basahon, Patalinghogi ang Tagna ni Daniel! wala gyod ko mahinam sa pagbasa niini, apan ako ning gisulayan. Ay, pagkasayop diay sa akong tinamdan! Usa kini sa kinamaayohang mga basahon nga akong nabatonan. Makaiikag kaayo kini! Wala na ako mobati nga nagbasa bahin sa usa ka asoy nga nahitabo libolibong katuigan kanhi. Sa unang higayon, akong gibating ikabutang ko ang akong kaugalingon sa dapit ni Daniel. Ako gayong mahanduraw kon sama sa unsa nga kuhaon gikan sa imong pamilya, ipadala ngadto sa langyawng yuta, ug sulayan ang imong integridad sa makadaghan. Daghang salamat niining basahona.”—Anya.
“Ang nakatabang nako pag-ayo mao ang di-masayop nga mensahe nga si Jehova bug-os nga nagkontrolar sa mga hitabo nga makaapektar sa iyang katawhan. Pinaagi sa mga panan-awon ug mga damgo ni Daniel ug niadtong iya sa uban nga iyang gihubad, dayag nga ang atong Diyos kanunayng magtugot sa mga hitabo nga mahitabo sumala sa iyang katuyoan. Nagpalig-on kini sa paglaom nga atong nabatonan diha sa matagnaong paghulagway nga makaplagan diha sa Bibliya bahin sa bag-ong kalibotan nga iyang pagabuhaton.”—Chester.
“Nalingaw ako sa inyong paagi sa pagbuhi sa estorya ni Daniel. Mibati akong mas nakaila kaniya gumikan sa inyong paagi sa pagpalutaw sa iyang mga kahangawa ug mga kabalaka. Labi pa nakong nasabtan kon nganong si Jehova nakakaplag kaniyang tilinguhaon kaayo. Sa iyang tanang pagsulay ug mga paglutos, wala siya mabalaka bahin sa iyang kaugalingon. Ang iyang gikabalak-an pag-ayo mao ang bahin kang Jehova ug sa Iyang matahom nga ngalan. Salamat sa pagpalutaw niining mga puntoha.”—Joy.
“Kini ang among ginapaabot! Wala pa ipakita sukad masukad kon unsa ka dako sa basahon ni Daniel ang aktuwal nga mapadapat sa matag usa kanamo. Human mabasa ang dakong bahin sa bag-ong basahon sa gabii human sa akong pagkadawat niini, kinahanglan akong mohunong una ug magpasalamat kang Jehova diha sa pag-ampo.”—Mark.
“Ang wala namo damha mao ang mahimong epekto niini sa among mga anak. Singko ug tres anyos ang ilang pangedaron. . . . Bisan tuod ang mga sugilanon ni Daniel, Ananias, Misael, ug Asarias nalakip kanunay sa ilang mga paborito sa Akong Basahon sa mga Estorya sa Bibliya, ang pagkapresentar diha sa Tagna ni Daniel nga basahon nakaapektar kanila sa paaging wala namo damha. Bisan sa kalinghod sa ilang pangedaron, maorag malangkit na nila ang ilang kaugalingon niining matarong nga batan-ong mga lalaki. Pagkamaayong mga sumbanan alang sa among mga anak! Pagkakatingalahang himan ang inyong gihatag kanamo! Salamat, daghan kaayong salamat!”—Bethel.
“Akong gibating ako didto mismo uban sa batan-ong Hebreohanong mga lalaki samtang sila nakaagom sa mga pagsulay sa ilang pagtuo; ug kana nagdasig nako sa pagsusi sa akong pagtuo. Ang kahon sa pagrepaso nga nag-ulohang “Unsay Imong Nasabtan?” nagtisok sa kaundan sa kapitulo diha sa kasingkasing. Salamat na usab sa laing obra-maestra.”—Lydia.