Ikaw ba Adunay Samang “Kaisipan ni Kristo”?
“Hinaot ang Diyos nga nagahatag ug pag-agwanta ug paghupay magatugot kaninyo nga mabatonan . . . ang samang tinamdan sa pangisip nga gibatonan ni Kristo Jesus.”—ROMA 15:5.
1. Sa unsang paagi gilarawan si Jesus diha sa kadaghanang mga dibuho sa Kakristiyanohan, ug nganong dili kini makataronganong paglarawan kang Jesus?
“SIYA wala gayod sukad makita nga mikatawa.” Mao kanay pagbatbat kang Jesus sa usa ka dokumento nga bakak nga giangkon nga gisulat sa usa ka karaang Romanong opisyal. Kining dokumentoha, nga nailhan sa porma niini karon sukad pa sa mga ika-11ng siglo, ginaingon nga nakaimpluwensiya sa daghang pintor.a Diha sa ubay-ubayng mga dibuho, si Jesus makita ingong tawong masulub-on ug dagway nga panagsa ra, kon ugaling, mokatawa. Apan dili gayod kini makataronganong paglarawan kang Jesus, kinsa gihulagway sa mga Ebanghelyo ingong usa ka tawong mahigugmaon, maluloton-ug-kasingkasing nga lalom ug mga pagbati.
2. Sa unsang paagi atong maugmad “ang samang tinamdan sa pangisip nga gibatonan ni Kristo Jesus,” ug kini magsangkap kanato sa pagbuhat ug unsa?
2 Tin-aw, aron mahibaloan ang tinuod nga Jesus, atong kinahanglang pun-on ang atong mga kaisipan ug kasingkasing sa tukmang kahibalo kon unsang matanga sa tawo si Jesus samtang dinhi sa yuta. Busa atong susihon ang pipila ka asoy sa Ebanghelyo nga naghatag kanato ug pagsabot sa “kaisipan ni Kristo”—sa ato pa, iyang mga pagbati, iyang pagsabot, iyang mga hunahuna, ug iyang mga pangatarongan. (1 Corinto 2:16) Samtang atong himoon kana, atong hisgotan kon sa unsang paagi atong maugmad ang “samang tinamdan sa pangisip nga gibatonan ni Kristo Jesus.” (Roma 15:5) Sa ingon, kita mas masangkapan sa atong mga kinabuhi ug sa atong mga pagpakiglabot sa uban sa pagsunod sa sumbanan nga iyang gihatag kanato.—Juan 13:15.
Daling Maduol
3, 4. (a) Unsay situwasyon sa asoy nga narekord diha sa Marcos 10:13-16? (b) Unsay reaksiyon ni Jesus sa dihang ang iyang mga tinun-an misulay sa pagpugong sa mga bata sa pagduol kaniya?
3 Ang mga tawo nadani kang Jesus. Sa lainlaing okasyon, ang mga tawo nga lainlaig edad ug kagikan makaduol gayod kaniya. Tagda ang hitabo nga narekord sa Marcos 10:13-16. Kini nahitabo sa hapit nang matapos ang iyang ministeryo samtang siya nagpadulong sa Jerusalem sa kataposang higayon, aron atubangon ang masakit nga kamatayon.—Marcos 10:32-34.
4 Handurawa ang hitabo. Ang mga tawo nagsugod sa pagdala sa mga bata, apil ang mga masuso, aron sila panalanginan ni Jesus.b Apan, gipugngan sa mga tinun-an ang mga bata sa pagduol kang Jesus. Tingali ang mga tinun-an naghunahuna nga si Jesus dili gayod gustong magpasamok sa mga bata panahon niining malisod nga mga semana. Apan sayop sila. Sa dihang naamgohan ni Jesus ang gihimo sa mga tinun-an, siya wala malipay. Gitawag ni Jesus ang mga bata ngadto kaniya, nga nag-ingon: “Pasagdi ang mga bata nga moduol kanako; ayaw sila pagpugngi.” (Marcos 10:14) Dayon mihimo siya ug usa ka butang nga nagpasundayag sa tinuod nga maluloton ug mahigugmaong gawi. Ang asoy nag-ingon: “Iyang gikugos ang mga bata ug misugod sa pagpanalangin kanila.” (Marcos 10:16) Ang mga bata dayag nga relaks ug panimati sa dihang gikugos sila ni Jesus sa iyang mahigugmaong mga bukton.
5. Unsay gisugilon kanato diha sa asoy sa Marcos 10:13-16 mahitungod sa kon unsang matanga sa tawo si Jesus?
5 Kanang mubong asoy nagpakita kanato ug daghan kaayo mahitungod sa kon unsang matanga sa tawo si Jesus. Matikdi nga siya daling maduol. Bisag siya dunay hataas nga katungdanan sa langit, siya dili makahadlok ni matamayon sa mga tawong dili-hingpit. (Juan 17:5) Dili ba makahuloganon, usab, nga bisan ang mga bata relaks ug panimati uban kaniya? Siyempre dili gayod unta sila mosuod sa usa ka dili-mabination, walay kalipay nga tawo nga dili gayod mopahiyom o mokatawa! Ang mga tawo sa tanang pangedaron miduol kang Jesus tungod kay ilang namatikdan nga siya maoy usa ka mainiton, matinagdanong tawo, ug sila masaligon nga dili niya sila abogon.
6. Unsaon sa mga ansiyano sa paghimo sa ilang kaugalingon nga mas daling maduol?
6 Sa dihang mamalandong niining asoya, kita makapangutana sa atong kaugalingon, ‘Ako ba adunay samang kaisipan ni Kristo? Ako ba daling maduol?’ Niining malisod nga panahon, ang mga karnero sa Diyos nagkinahanglan ug daling maduol nga mga magbalantay, mga lalaki nga sama sa “usa ka salipdanan gikan sa hangin.” (Isaias 32:1, 2; 2 Timoteo 3:1) Mga ansiyano, kon inyong ugmaron ang tim-os, kinasingkasing nga interes sa inyong mga igsoon ug andam mohatag sa inyong kaugalingon alang kanila, ilang mamatikdan ang inyong kabalaka. Ilang makita kini diha sa inyong panagway, madungog kini sa inyong tono sa tingog, ug makita kini sa inyong maayong batasan. Ang maong tim-os nga kamainiton ug kabalaka makamugnag atmospera nga may pagsalig diin mas masayon alang sa uban, apil ang mga bata, sa pagduol kaninyo. Usa ka Kristohanong babaye nagsaysay kon nganong siya wala magpanuko sa pagpakigsulti sa usa ka ansiyano: “Siya nakigsulti kanako sa malumo ug mahangawaong paagi. Kon dili pa, maghilom na lang unta ako. Gipabati niya ako nga may kompiyansa.”
Mahunahunaon sa Uban
7. (a) Sa unsang paagi gipasundayag ni Jesus nga siya mahunahunaon sa uban? (b) Ngano kaha nga anam-anam nga gibalik ni Jesus ang panan-aw sa usa ka tawong buta?
7 Si Jesus mahunahunaon sa uban. Siya makasabot sa gibati sa uban. Ang pagtan-aw lamang sa sinakit nakatandog pag-ayo kaniya nga siya natukmod sa paghupay sa ilang pag-antos. (Mateo 14:14) Siya mahunahunaon usab sa mga limitasyon ug mga panginahanglan sa uban. (Juan 16:12) Kas-a, gidad-an siya sa mga tawo ug usa ka tawong buta ug nangaliyupo kang Jesus nga ayohon siya. Gibalik ni Jesus ang panan-aw sa tawo, apan iyang gihimo kini sa anam-anam. Sa sinugdan, ang tawo nakakitag mga tawo nga medyo hanap—‘morag mga kahoy, apan naglakawlakaw.’ Dayon, gibalik ni Jesus sa bug-os ang iyang panan-aw. Nganong anam-anam niyang giayo ang tawo? Tingali aron ang tawo nga naanad na sa kangitngit makapaangay sa kakurat sa kalit nga pagkakita sa hayag ug makalibog nga kalibotan.—Marcos 8:22-26.
8, 9. (a) Unsay nahitabo sa ulahi human nga si Jesus ug ang iyang mga tinun-an misulod sa rehiyon sa Decapolis? (b) Isaysay ang pag-ayo ni Jesus sa usa ka tawong bungol.
8 Palandonga usab ang hitabo human sa Paskuwa sa 32 K.P. Si Jesus ug ang iyang mga tinun-an misulod sa rehiyon sa Decapolis, sa sidlakan sa Dagat sa Galilea. Didto, nakita sila sa dakong panon sa mga tawo ug nagdala ngadto kang Jesus ug daghan nga masakiton ug baldado, ug iyang giayo silang tanan. (Mateo 15:29, 30) Makaikag, gihatagan ni Jesus ang usa ka tawo ug linaing pagtagad. Ang magsusulat sa Ebanghelyo nga si Marcos, nga mao lamay mirekord niining hitaboa, mitaho sa nahitabo.—Marcos 7:31-35.
9 Ang tawo bungol ug naglisod sa pagsulti. Tingali namatikdan ni Jesus ang kahadlok o kaulaw nga gibati niining tawhana. Dayon si Jesus mihimo ug usa ka butang nga medyo talagsaon. Iyang giagak ang tawo, ug gidala layo sa mga tawo, ngadto sa usa ka hilit nga dapit. Dayon si Jesus misenyas aron makasabot ang tawo sa iyang buhaton. Iyang ‘gibutang ang iyang mga tudlo sa dalunggan sa tawo ug, human makaluwa, iyang gihikap ang dila sa tawo.’ (Marcos 7:33) Sunod, si Jesus mihangad sa langit ug militok ug mainampoong panghupaw. Kining gipasundayag nga mga lihok samang nag-ingon sa tawo, ‘Ang akong himoon karon alang kanimo maoy tungod sa gahom nga gikan sa Diyos.’ Sa kataposan, si Jesus miingon: “Mabuksan ka.” (Marcos 7:34) Niana, naulian ang igdulungog sa tawo, ug siya normal nang makasulti.
10, 11. Sa unsang paagi kita makapakitag pagkamahunahunaon sa mga pagbati sa uban diha sa kongregasyon? sa pamilya?
10 Pagkamahunahunaon ang gipasundayag ni Jesus alang sa uban! Siya makasabot sa ilang gibati, ug kining pagkamaluluy-on, sa baylo, nagpalihok kaniya sa paglihok sa mga paagi nga naghunahuna sa ilang gibati. Ingong mga Kristohanon, maayong atong ugmaron ug ipakita ang kaisipan ni Kristo niining bahina. Ang Bibliya nagtambag kanato: “Pagbaton kamong tanan sa samang panghunahuna, nga magapakitag pagbati nga alang sa isigkaingon, nga magabaton ug inigsoong pagmahal, sa kalumo mabination, mapainubsanon sa hunahuna.” (1 Pedro 3:8) Kini nagkinahanglan nga kita mosulti ug molihok sa paagi nga hunahunaon ang pagbati sa uban.
11 Diha sa kongregasyon, atong ikapakita ang pagkamahunahunaon sa mga pagbati sa uban pinaagi sa pagtagad kanila nga may dignidad, tagdon sila sama sa atong buot nga itagad kanato. (Mateo 7:12) Kana maglakip sa pagbantay sa atong isulti maingon man sa atong paagi sa pagsulti niini. (Colosas 4:6) Hinumdomi nga ang ‘wala-hunahunaang mga pulong modulot sama sa espada.’ (Proverbio 12:18) Unsay ikasulti labot sa pamilya? Ang bana ug asawa nga tinuod nga naghigugmaay sa usag usa makasabot sa pagbati sa usag usa. (Efeso 5:33) Ilang likayan ang hait nga mga pulong, kanunayng pagpanaway, ug sakit nga kantalita—ang tanan makasakit sa pagbati nga dili daling maalim. Ang mga bata usab dunay pagbati, ug hunahunaon kini sa mahigugmaong mga ginikanan. Kon gikinahanglan ang pagbadlong, ang maong mga ginikanan mamadlong sa paagi nga magtahod sa dignidad sa ilang mga anak ug dili sila hatagan ug wala kinahanglanang kaulawan.c (Colosas 3:21) Busa sa dihang atong ipasundayag ang pagkamahunahunaon sa uban, atong gipakita nga atong nabatonan ang kaisipan ni Kristo.
Andam sa Pagsalig sa Uban
12. Si Jesus adunay unsang timbang, realistiko nga panghunahuna sa iyang mga tinun-an?
12 Si Jesus adunay timbang, realistiko nga panghunahuna sa iyang mga tinun-an. Siya nahibalo gayod nga sila dili hingpit. Gawas pa, siya makabasa sa tawhanong mga kasingkasing. (Juan 2:24, 25) Bisan pa niana, iyang nakita sila dili lamang sa ilang mga dili-kahingpitan kondili sa ilang maayong mga hiyas. Iyang nakita usab ang katakos niining mga tawhana nga gikabig ni Jehova. (Juan 6:44) Ang positibong panghunahuna ni Jesus sa iyang mga tinun-an nadayag sa paagi sa iyang pagpakiglabot ug pagtratar kanila. Sa panguna, siya nagpakitag pagkamainandamon sa pagsalig kanila.
13. Sa unsang paagi gipasundayag ni Jesus nga siya may pagsalig sa iyang mga tinun-an?
13 Sa unsang paagi gipasundayag ni Jesus kana nga pagsalig? Sa dihang mibiya siya sa yuta, iyang gisalig ang mabug-at nga responsibilidad ngadto sa iyang dinihogang mga tinun-an. Iyang gibutang diha sa ilang mga kamot ang responsibilidad sa pag-atiman sa tibuok-yuta nga mga intereses sa iyang Gingharian. (Mateo 25:14, 15; Lucas 12:42-44) Sa panahon sa iyang ministeryo, iyang gipakita bisan diha sa gagmay, dili-direktang mga paagi nga siya may pagsalig kanila. Sa dihang iyang gipadaghan ang pagkaon sa milagrosong paagi aron mapakaon ang panon sa mga tawo, iyang gitugyan ngadto sa iyang mga tinun-an ang responsibilidad sa pag-apod-apod sa pagkaon.—Mateo 14:15-21; 15:32-37.
14. Unsaon nimo pagsumaryo sa asoy nga narekord sa Marcos 4:35-41?
14 Palandonga, usab, ang asoy nga narekord sa Marcos 4:35-41. Niining okasyona si Jesus ug ang iyang mga tinun-an misakay ug sakayan ug milawig tabok sa sidlakan sa Dagat sa Galilea. Wala magdugay human sila nakagikan, si Jesus mihigda sa likod sa sakayan ug nahikatulog. Apan, sa ngadtongadto, ‘miabot ang kusog nga unos.’ Kining matanga sa mga unos kasagarang mahitabo diha sa Dagat sa Galilea. Tungod kay ubos ang lebel niini (mga 200 metros ubos sa lebel sa dagat), ang hangin mas init didto kay sa dapit sa palibot, ug kini ang hinungdan sa mga pagkadaot sa panahon. Dugang pa niini, ang kusog nga mga hangin mohaguros sa Walog sa Jordan gikan sa Bukid sa Hermon, nga nahimutang sa amihanan. Ang kalinaw sa usa ka yugto kalit nga mausab nga mahimong kusog nga unos sa sunod. Palandonga kini: Si Jesus nahibalo gayod sa naandang mga unos, kay siya nagdako man sa Galilea. Bisan pa niana, siya natulog nga malinawon, nagsalig sa mga katakos sa iyang mga tinun-an, nga ang pipila kanila maoy mga mananagat.—Mateo 4:18, 19.
15. Sa unsang paagi atong masundog ang pagkamainandamon ni Jesus sa pagsalig sa iyang mga tinun-an?
15 Kita makasundog ba sa pagkamainandamon ni Jesus sa pagsalig sa iyang mga tinun-an? Ang uban nalisdan sa pagtugyan ug mga responsibilidad ngadto sa uban. Kinahanglang sila gayod ang modala sa timon, pagaingnon pa. Sila tingali maghunahuna, ‘Kon buot ko nga mahimo ang usa ka butang sa hustong paagi, ako na lay mohimo niini mismo!’ Apan kon kitay mohimo sa tanang butang, peligro nga mautas kita ug tingali nagakuhag wala-kinahanglanang panahon gikan sa atong pamilya. Gawas pa, kon dili nato itugyan ang angay nga mga buluhaton ug mga responsibilidad ngadto sa uban, tingali baya ug atong gihikawan sila sa gikinahanglang kasinatian ug pagbansay. Maalamon nga magtuon sa pagsalig sa uban, itugyan ngadto kanila ang mga butang. Maayong atong pangutan-on ang atong kaugalingon sa pagkamatinud-anon, ‘Ako ba adunay kaisipan ni Kristo niining bahina? Ako ba andam sa pagtugyan sa pipila ka buluhaton ngadto sa uban, mosalig kanila nga himoon nila ang ilang labing maayo?’
Iyang Gipadayag ang Pagsalig sa Iyang mga Tinun-an
16, 17. Sa kataposang gabii sa iyang yutan-ong kinabuhi, unsang pasalig ang gihatag ni Jesus ngadto sa iyang mga apostoles, bisan pag siya nahibalo nga sila motalikod kaniya?
16 Si Jesus nagpasundayag ug positibong panghunahuna sa iyang mga tinun-an sa laing hinungdanong paagi. Iyang gipahibalo kanila nga siya may pagsalig kanila. Nadayag gayod kini diha sa mga pulong sa pagsalig nga iyang gisulti ngadto sa iyang mga apostoles nianang kataposang gabii sa iyang yutan-ong kinabuhi. Matikdi kon unsay nahitabo.
17 Okupado kaayo kadtong gabhiona alang kang Jesus. Iyang gihatagan ang iyang mga apostoles ug mapadapat nga leksiyon sa pagkamapainubsanon pinaagi sa paghugas sa ilang mga tiil. Human niadto, iyang gisugdan ang panihapon nga mahimong memoryal sa iyang kamatayon. Dayon, ang mga apostoles grabeng naglalis na usab bahin sa kon kinsa kanila ang daw labing dako. Kanunayng mapailobon, sila wala kasab-i ni Jesus apan nangatarongan kanila. Iyang gisultihan sila kon unsay mahitabo sa umaabot: “Kamong tanan mangapandol may kalabotan kanako niining gabhiona, kay nahisulat kini, ‘Akong hampakon ang magbalantay, ug ang mga karnero sa panon magkatibulaag.’” (Mateo 26:31; Zacarias 13:7) Siya nahibalo nga ang iyang labing suod nga mga kauban motalikod kaniya sa iyang panahon sa panginahanglan. Bisan pa, siya wala maghukom kanila. Sa kasukwahi, iyang gisultihan sila: “Apan human nga ako bangonon, mouna ako kaninyo sa Galilea.” (Mateo 26:32) Oo, iyang gipasaligan sila nga bisag ilang talikdan siya, siya dili motalikod kanila. Sa dihang kining makalilisang nga kasulayan moagi, siya makigkita kanila pag-usab.
18. Sa Galilea, gipiyalan ni Jesus ang iyang mga tinun-an ug unsang mabug-at nga sugo, ug sa unang paagi gisunod kini sa mga apostoles?
18 Gituman ni Jesus ang iyang gisulti. Sa ulahi, sa Galilea, ang nabanhawng Jesus mipakita ngadto sa 11 ka matinumanong mga apostoles, nga dayag nga nagtigom duyog sa daghan pang uban. (Mateo 28:16, 17; 1 Corinto 15:6) Didto, gihatagan sila ni Jesus ug mabug-at nga sugo: “Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagsunod sa tanang butang nga akong gisugo kaninyo.” (Mateo 28:19, 20) Ang basahon sa Buhat naghatag kanato ug klarong pamatuod nga bug-os nga gisunod sa mga apostoles ang maong sugo. Sila matinumanong nanguna sa buluhaton sa pagsangyaw sa maayong balita sa unang siglo.—Buhat 2:41, 42; 4:33; 5:27-32.
19. Unsay gipadayag kanato sa mga lihok ni Jesus human sa iyang pagkabanhaw may kalabotan sa kaisipan ni Kristo?
19 Unsay gitudlo niining madayganong asoy bahin sa kaisipan ni Kristo? Nakita ni Jesus diha sa iyang mga apostoles ang ilang kinangil-arang bahin, bisan pa iyang ‘gihigugma sila hangtod sa kataposan.’ (Juan 13:1) Bisan pa sa ilang mga kakulangan, iyang gipahibalo kanila nga siya may pagtuo kanila. Matikdi nga ang pagsalig ni Jesus anaa sa hustong lugar. Ang pagsalig ug pagtuo nga iyang gipadayag kanila tino nga nagpalig-on kanila sa paghukom diha sa ilang mga kasingkasing sa pagtuman sa buluhaton nga iyang gisugo kanila nga buhaton.
20, 21. Sa unsang paagi kita makapasundayag ug positibong panglantaw sa atong mga isigkamagtutuo?
20 Sa unsang paagi atong ikapasundayag ang kaisipan ni Kristo niining bahina? Ayaw pagbaton ug negatibong hunahuna sa imong mga isigkamagtutuo. Kon ang dili maayo maoy imong hunahunaon, ang imong mga pulong ug mga buhat lagmit magpadayag niana. (Lucas 6:45) Apan, ang Bibliya nag-ingon kanato nga ang gugma “nagatuo sa tanang butang.” (1 Corinto 13:7) Ang gugma positibo, dili negatibo. Kini molig-on imbes magbungkag. Ang mga tawo mas daling mosanong sa gugma ug pagdasig kay sa paghadlok. Kita makapalig-on ug makapadasig sa uban pinaagi sa pagpahayag ug pagsalig kanila. (1 Tesalonica 5:11) Kon, sama kang Kristo, kita positibo ug panghunahuna sa atong mga igsoon, atong tagdon sila sa paagi nga makapalig-on ug makapatungha sa labing maayo diha kanila.
21 Ang pag-ugmad ug pagpasundayag sa kaisipan ni Kristo mas dakog malampos kay sa pagsundog lamang sa pipila ka butang nga gihimo ni Jesus. Ingon sa gihisgotan sa nag-unang artikulo, aron kita makalihok nga sama gayod kang Jesus, kinahanglang magtuon una kita sa paglantaw sa mga butang ingon sa iyang paglantaw. Ang mga Ebanghelyo nagpaarang kanato sa pagkakita sa laing bahin sa iyang personalidad, sa iyang kaisipan ug pagbati may kalabotan sa iyang gitudlong buluhaton, ingon sa pagahisgotan sa sunod artikulo.
[Mga footnote]
a Diha sa dokumento, ang palsipikador nagbatbat sa giingong pisikal nga dagway ni Jesus, apil ang kolor sa iyang buhok, bungot, ug mga mata. Ang maghuhubad sa Bibliya nga si Edgar J. Goodspeed nagpatin-aw nga kining pagpalsipikar “gilaraw aron mahimong katuohan ang paghubit nga makita diha sa mga basahon sa mga pintor may kalabotan sa personal nga dagway ni Jesus.”
b Dayag nga ang mga bata lainlain ug edad. Ang pulong dinhi nga gihubad “mga bata” gigamit usab labot sa 12-anyos nga anak nga babaye ni Jairo. (Marcos 5:39, 42; 10:13) Apan, diha sa samang asoy, gigamit ni Lucas ang pulong nga gigamit usab may kalabotan sa mga masuso.—Lucas 1:41; 2:12; 18:15.
c Tan-awa ang artikulong “Gitahod ba Nimo ang Ilang Dignidad?” sa Abril 1, 1998, isyu sa Ang Bantayanang Torre.
Makapatin-aw Ka Ba?
• Unsay reaksiyon ni Jesus sa dihang misulay ang iyang mga tinun-an sa pagpugong sa mga bata sa pagduol kaniya?
• Sa unsang mga paagi si Jesus nagpakitag pagkamahunahunaon sa uban?
• Sa unsang paagi atong masundog ang pagkamainandamon ni Jesus sa pagsalig sa iyang mga tinun-an?
• Sa unsang paagi atong masundog ang pagsalig nga gipadayag ni Jesus sa iyang mga apostoles?
[Hulagway sa panid 16]
Ang mga bata relaks ug panimati uban kang Jesus
[Hulagway sa panid 17]
Gitagad nga mahangawaon ni Jesus ang uban
[Hulagway sa panid 18]
Panalangin ang daling-maduol nga mga ansiyano