Kristohanong mga Magbalantay, ‘Pasangkara ang Inyong Kasingkasing’!

“SI Jehova mao ang akong Magbalantay. Walay makulang kanako.” Nianang mga pulonga, gipahayag ni David ang iyang bug-os nga pagsalig sa iyang Diyos. Si Jehova nagtultol kaniya, sa espirituwal nga pagkasulti, ngadto sa “mga sibsibanan” ug “daghag-tubig nga mga dapit-pahulayanan,” nga nagatultol kaniya “diha sa mga alagianan sa pagkamatarong.” Sa dihang gilibotan sa mga magsusupak, si David nakadawat ug pagpaluyo ug pagdasig, nga nag-aghat kaniya sa pag-ingon kang Jehova: “Ako walay kahadlokan nga daotan, kay ikaw magauban kanako.” Kay nakabaton nianang Supremong Magbalantay, si David determinado nga “magapuyo sa balay ni Jehova hangtod sa walay kataposan.”—Salmo 23:1-6.

Ang bugtong Anak sa Diyos nakasinati usab sa mahigugmaong pag-atiman ni Jehova, ug siya hingpit nga nagpabanaag niini nga pag-atiman diha sa iyang mga pakiglabot uban sa iyang mga tinun-an panahon sa iyang temporaryong pagpuyo sa yuta. Busa ang Kasulatan nagtawag kaniya ingong ang ‘maayong magbalantay,’ ‘dakong magbalantay,’ ug ‘pangulong magbalantay.’—Juan 10:11; Hebreohanon 13:20; 1 Pedro 5:2-4.

Si Jehova ug si Jesu-Kristo padayong nagbantay niadtong nahigugma kanila. Ang ilang pagkamagbalantay gipahayag, sa bahin, diha sa mahigugmaong pagtagana sa luyoluyong mga magbalantay diha sa kongregasyon. Si Pablo nagtumong nianang mga luyoluyong magbalantay sa dihang siya miingon: ‘Tagda ang inyong kaugalingon ug ang tanan nga panon, nga diha niana kamo gikatudlo sa balaang espiritu nga mga magtatan-aw, aron magbantay sa kongregasyon sa Diyos, nga iyang gipalit pinaagi sa dugo sa iyang kaugalingon nga Anak.’—Buhat 20:28.

Ang pagbantay sa panon subay sa sumbanan nga gipahiluna ni Jehova ug Kristo Jesus dili sayon nga buluhaton, apan kini mas hinungdanon karon kay sukad masukad. Hunahunaa ang kapin sa usa ka milyong Saksi nga nabawtismohan sulod sa miaging tulo ka tuig! Ang maong mga bag-ohan walay espirituwal nga kahibalo nga naggikan sa daghang tuig sa kalihokan. Hunahunaa, usab, kadtong mga Saksi nga mga bata pa o mga tin-edyer pa. Sila nagkinahanglag pagtagad dili lamang gikan sa ilang mga ginikanan kondili gikan usab sa mga luyoluyong magbalantay sa kongregasyon.

Sa pagkamatuod, ang matag Kristohanon nailalom sa mga pagpit-os sa gawas, lakip sa pagpit-os sa isigkaingon. Ang tanan kinahanglang makigbisog sa pagsukol sa kusganong butad sa pagsunod sa dalan sa kalibotan sa pagpatuyang-sa-kaugalingon. Sa ubang mga nasod, ang mga magmamantala sa Gingharian maluya tingali tungod sa kakulang sa pagsanong sa ilang mensahe. Daghang magmamantala ang adunay grabeng mga sakit. Ang pinansiyal nga mga suliran tingali maghikaw sa uban sa ilang panukmod sa pagpangita pag-una sa Gingharian. Sa pagkatinuod, kitang tanan—lakip kadtong dugay na sa kamatuoran—nagkinahanglan ug takos sa tabang sa mahigugmaong mga magbalantay.

Hustong Panukmod

Ang unang-siglong mga Kristohanon gitambagan: ‘Pasangkara ang inyong kasingkasing’! (2 Corinto 6:11-13) Maayong sundon sa Kristohanong mga ansiyano kining tambaga sa pag-atiman sa ilang mga katungdanan isip magbalantay. Sa unsang paagi mabuhat nila kini? Ug komosta ang ministeryal nga mga alagad, nga daghan kanila maoy umaabot nga mga magbalantay?

Aron mahimong usa ka panalangin sa panon ang Kristohanong mga ansiyano, sila kinahanglang matukmod dili lamang tungod sa pagbati nga katungdanan nila kini. Sila gitambagan: ‘Bantayi ninyo ang panon sa Diyos nga anaa sa inyong pag-atiman, dili nga pinugos, kondili kinabubut-on; ni tungod sa gugma sa dili-matarong nga ganansiya, kondili masiboton.’ (1 Pedro 5:2) Busa ang epektibong pagkamagbalantay naglakip sa pagkaandam ug pagkamasiboton sa pag-alagad sa uban. (Juan 21:15-17) Kana nagkahulogan sa paglantaw sa mga panginahanglan sa mga karnero ug pagkadaling mosanong. Kana nagkahulogan ug pagpasundayag sa Kristohanong mga hiyas nga nailhan ingong mga bunga sa espiritu sa Diyos samtang makiglabot sa uban.—Galacia 5:22, 23.

Ang pagkamagbalantay usahay naglakip sa pagduaw sa mga igsoon diha sa ilang mga balay.a Apan ang mga magbalantay nga ‘magpasangkad sa ilang kasingkasing’ mogamit sa ilang kaugalingon. Buot ipasabot, buhaton nila ang mas labaw pa kay sa panalagsang mga pagduaw isip magbalantay. Ilang pahimuslan ang tanang kahigayonan sa pagbantay sa uban diha panon.

Pagbansay sa Uban Aron Mahimong mga Magbalantay

Si bisan kinsang igsoong lalaki, way sapayan sa edad, nga “nagapangab-ot sa katungdanan sa pagkamagtatan-aw . . . matinguhaon sa usa ka maayong buhat.” (1 Timoteo 3:1) Daghang ministeryal nga mga alagad ang nagpasundayag ug pagkaandam sa pagpangab-ot ug dugang mga pribilehiyo. Busa, ang mga ansiyano malipay sa pagtabang niining andam nga mga igsoong lalaki sa paghimo niining hinungdanong tikang sa ‘pagpangab-ot sa katungdanan sa pagkamagtatan-aw.’ Kini nagkahulogan sa pagbansay kanila nga mahimong epektibong mga magbalantay.

Tungod sa pagsunod gayod sa hataas nga mga sukdanan sa Diyos, ang Kristohanong kongregasyon ni Jehova wala mapahuyang sa bakak nga mga magbalantay sama nianang gihubit sa Ezequiel 34:2-6. Kini sila talamayon sa panan-aw ni Jehova ug angayan lamang. Inay pakaonon ang panon, ang ilang kaugalingon ang gipakaon. Napakyas sila sa pagpalig-on sa masakiton, pag-ayo sa may balatian, pagbendahe sa napiang, o sa pagpangita sa nagkatibulaag o nawala. Kay naglihok nga mas samag mga lobo kay sa mga magbalantay, ilang gidaogdaog ang mga karnero. Ang napasagdan nga mga karnero nagkatibulaag, naglatagaw nga walay nag-atiman kanila.—Jeremias 23:1, 2; Nahum 3:18; Mateo 9:36.

Dili sama niadtong dili-matinumanong mga magbalantay, ang Kristohanong mga magbalantay nagsunod sa panig-ingnan ni Jehova. Sila nagtabang sa pagtultol sa mga karnero ngadto sa espirituwal nga “mga sibsibanan” ug “daghag-tubig nga mga dapit-pahulayanan.” Sila naningkamot sa pagtultol kanila “diha sa mga alagianan sa pagkamatarong” pinaagi sa pagtabang kanila nga masabtan ang Pulong ni Jehova sa hustong paagi ug mapadapat kana sa ilang kaugalingon. Sila makahimo niini sa epektibong paagi tungod kay sila “kuwalipikado sa pagpanudlo.”—1 Timoteo 3:2.

Ang kadaghanang pagtudlo sa mga ansiyano ginahimo diha sa plataporma panahon sa mga tigom sa kongregasyon. Bisan pa niana, ang mga ansiyano nagtudlo usab diha sa personal nga paagi. Siyempre, ang pipila mas maayo sa pagtudlo diha sa tinagsatagsa nga paagi, samtang ang uban mas may abilidad sa paghatag ug mga pakigpulong. Apan ang menos ug abilidad sa usa ka bahin sa pagtudlo dili awtomatikong magdiskuwalipikar sa usa ingong magtutudlo. Ang mga ansiyano magtudlo, ginamit ang tanang paagi nga bukas alang kanila, lakip sa pagkamagbalantay. Ang ubang pagduaw isip magbalantay ginahimo diha sa pormal nga paagi, pananglitan, diha sa naorganisar nga mga pagduaw. Apan daghang pagduaw isip magbalantay ang mahimong himoon usab diha sa mas impormal nga paagi, nga mapuslanon usab kaayo.

Mga Magbalantay ug mga Magtutudlo sa Tanang Panahon

Ang doktor nagkinahanglag kahibalo ug kasinatian aron mahimo ang iyang trabaho. Apan pabilhan sa iyang mga pasyente kon siya magpakitag kalulot, pagkamabination, kahangawa, ug tim-os nga interes. Kining mga hiyasa kinahanglang mahimong bahin sa iyang personalidad. Ang susamang mga hiyas kinahanglang mahimong bahin usab sa personalidad sa usa ka maayong magtutudlo ug magbalantay, bahin sa iyang normal nga kinaiya. Ang tinuod nga magtutudlo magmaandam sa pagtudlo niadtong anaa sa iyang palibot kon gikinahanglan. “Ang usa ka pulong sa hustong panahon Oh pagkamaayo!” nag-ingon ang Proverbio 15:23. Ang “hustong panahon” tingali maoy sa dihang siya nagsulti sa plataporma, sa dihang siya nagsangyaw sa balay ug balay, o sa dihang siya nakig-estorya diha sa Kingdom Hall o diha sa telepono. Sa susama, ang usa ka maayong magbalantay maningkamot sa pagpasundayag ug maayo, mahangawaong mga hiyas sa tanang panahon, dili lamang sa dihang siya naghimog mga pagduaw isip magbalantay. Kay ‘gipasangkad ang iyang kasingkasing,’ iyang pahimuslan ang tanang kahigayonan sa pagbantay sa mga karnero, nga maghatag kanilag pag-atiman nga ilang gikinahanglan sa hustong panahon. Kini ang maghimo kaniyang hiligugmaon sa panan-aw sa mga karnero.—Marcos 10:43.

Si Wolfgang, karon usa na ka ansiyano, nahinumdom sa usa ka mahigalaon nga pagduaw nga gihimo diha sa iyang pamilya sa usa ka ministeryal nga alagad ug sa iyang asawa. Siya nag-ingon: “Ang among mga anak nalipay pag-ayo sa atensiyon nga ilang nadawat ug sa malipayong panahon nga among gisalohan. Sila naghisgot pa gihapon bahin niana.” Oo, kining ministeryal nga alagad nagpakita nga siya may pagtagad; siya ‘nagpasangkad sa iyang kasingkasing.’

Ang laing kahigayonan sa ‘pagpasangkad sa kasingkasing sa usa’ maoy sa pagduaw sa masakiton, pagpadala kanila ug mubong sulat sa pagdasig, o pagtawag kanila diha sa telepono—bisan unsa aron pahibaloon sila nga ikaw may pagtagad! Itanyag ang tabang kon gikinahanglan. Kon buot nilang mosulti, paminaw pag-ayo. Paghisgot bahin sa positibo, makapalipay nga teokratikanhong mga kalihokan diha sa lokal nga kongregasyon ug bisan asa. Tabangi sila sa pagsentro sa pagtagad diha sa mahimayaong umaabot nga gitagana alang kanilang nahigugma kang Jehova.—2 Corinto 4:16-18.

Dugang pa sa mga Pagduaw Isip Magbalantay

Nga anaa sa hunahuna ang katuyoan sa pagkamagbalantay, dayag nga ang paghimog pormal nga mga pagduaw isip magbalantay diha sa mga balay sa mga igsoon, bisag hinungdanon, maoy bahin lamang sa kon unsay nalangkit. Ang usa ka mahigugmaong magbalantay ‘magpasangkad sa iyang kasingkasing’ pinaagi sa pagkadaling maduol ilalom sa tanang kahimtang ug sa tanang panahon. Ang mainit nga relasyon nga iyang giugmad uban sa iyang mga igsoon magpasalig kanila nga sa peligrosong mga panahon, dili sila kinahanglang mahadlok sa daotan, kay nahibalo nga ang ilang mahigugmaong igsoon, ang Kristohanong magbalantay, may pagtagad kanila.—Salmo 23:4.

Oo, ‘pasangkara ang inyong kasingkasing’ kamong tanang Kristohanong mga magbalantay. Ipasundayag ang tim-os nga gugma sa inyong mga igsoon—dasiga sila, palagsika sila, palig-ona sila sa espirituwal sa tanang paagi nga inyong mahimo. Tabangi sila nga magmalig-on diha sa pagtuo. (Colosas 1:23) Kay gipanalanginan ug Kristohanong mga magbalantay nga ‘nagpasangkad sa ilang kasingkasing,’ walay makulang sa mga karnero. Sila magmadeterminado, sama ni David, sa pagpuyo sa balay ni Jehova hangtod sa walay kataposan. (Salmo 23:1, 6) Dili ba mao kanay gitinguha sa usa ka mahigugmaong magbalantay?

[Footnote]

[Kahon sa panid 30]

Ang Kristohanong mga Magbalantay

• Nag-alagad nga masiboton ug kinabubut-on

• Nagpakaon ug nag-atiman sa panon

• Nagtabang sa uban sa pagpangab-ot nga mahimong mga magbalantay

• Nagduaw sa masakiton ug nag-atiman kanila

• Igmat sa pagtabang sa ilang mga igsoon sa tanang panahon

[Mga hulagway sa panid 31]

Maanaa man sa pag-alagad sa kanataran, sa mga tigom, o diha sa sosyal nga mga okasyon, ang mga ansiyano kanunayng mga magbalantay