Nagmadaogon ang Tinuod nga Kristiyanidad!
‘Sa gamhanang paagi ang pulong ni Jehova padayong mitubo ug nagmadaogon.’—BUHAT 19:20.
1. Hubita ang pagtubo sa Kristiyanidad panahon sa unang siglo.
NAPADASIG tungod sa gahom sa balaang espiritu, masibotong giwali sa unang mga Kristohanon ang pulong sa Diyos nga dili mapugngan. Usa ka historyador nagsulat: “Ang Kristiyanidad kusog kaayong mikaylap sa tibuok Romanhong kalibotan. Sa tuig 100 lagmit ang matag lalawigan sa utlanan sa Mediteranyo dunay Kristohanong komunidad sulod niana.”
2. Sa unsang paagi misulay si Satanas sa pagsugpo sa maayong balita, ug sa unsang paagi kini gitagna?
2 Si Satanas nga Yawa dili makapahilom sa unang mga Kristohanon. Hinunoa, iyang gisugpo ang epekto sa maayong balita pinaagi sa laing pamaagi—apostasya. Gitagna ni Jesus kining panghitaboa diha sa iyang sambingay sa mga trigo ug mga bunglayon. (Mateo 13:24-30, 36-43) Si apostol Pedro nagpasidaan usab nga may motunghang bakak nga mga magtutudlo sulod sa kongregasyon, nga magpasulod ug malaglagong mga sekta. (2 Pedro 2:1-3) Sa susama, si apostol Pablo espesipikong nagpasidaan nga may motunghang apostasya una pa sa adlaw ni Jehova.—2 Tesalonica 2:1-3.
3.Unsay nahitabo sa dihang nangamatay na ang mga apostoles?
3 Sa dihang nangamatay na ang mga apostoles, ang maayong balita nalandongan sa paganong mga doktrina ug mga pilosopiya. Ingon sa gitagna, gituis ug gisambogan sa bakak nga mga magtutudlo ang putli nga mensahe sa kamatuoran. Sa hinayhinay, ang matuod nga Kristiyanidad nangitngitan sa usa ka mini nga gitawag ug Kakristiyanohan. Usa ka klero nga matang ang mitungha nga naningkamot nga ang ordinaryong mga tawo dili makabaton ug Bibliya. Bisan tuod miuswag ang gidaghanon niadtong nagtawag sa ilang kaugalingon nga mga Kristohanon, ang ilang pagsimba dili putli. Ang Kakristiyanohan mikaylap sa daghang kayutaan ug nahimong gamhanang institusyon ug nakaimpluwensiyag dako sa Kasadpang kultura, apan wala siya makabaton sa panalangin sa Diyos ni sa iyang espiritu.
4. Nganong ang laraw ni Satanas sa pagsanta sa katuyoan sa Diyos napakyas?
4 Apan, ang laraw ni Satanas sa pagsanta sa katuyoan ni Jehova napakyas. Bisan sa mangiob kaayong panahon sa mga adlaw sa apostasya, ang tinuod nga Kristiyanidad buhi gihapon taliwala sa pipila ka tawo. Ang mga tawo nga nagkopya sa Bibliya naningkamot sa pagkopya niini sa tukma gayod nga paagi. Busa, ang Bibliya nagpabiling bug-os, bisan tuod ang mensahe niini gisayop pagsabot sa daghan nga nag-angkong dunay awtoridad sa pagtudlo niini. Sulod sa kasiglohan ang mga eskolar sama kang Jerome ug Tyndale walay kahadlok nga naghubad ug nag-apod-apod sa Pulong sa Diyos. Milyonmilyong tawo nasinati sa Bibliya ug sa usa ka matang sa Kristiyanidad, bisag dili matuod.
5. Unsay gitagna ni manalagnang Daniel bahin sa “matuod nga kahibalo”?
5 Sa ngadtongadto, sama sa gitagna sa basahon sa Daniel, ‘ang matuod nga kahibalo midagaya.’ Kini nahitabo sa “panahon sa kataposan”—ang panahon nga atong gikinabuhian karon. (Daniel 12:4) Ang balaang espiritu maoy nagtultol sa mga mahigugmaon sa kamatuoran sa tibuok kalibotan ngadto sa tukmang kahibalo sa matuod nga Diyos ug sa iyang katuyoan. Bisan human sa daghang kasiglohan sa apostatang pagtulon-an, ang pulong sa Diyos nagmadaogon! Karong panahona, ang maayong balita ginawali sa tanang dapit, nga nag-agak sa mga tawo sa paglaom sa makapalipayng bag-ong kalibotan. (Salmo 37:11) Atong susihon karon kining modernong-adlawng pagtubo sa pulong sa Diyos.
Pagtubo sa Pulong Karong Panahona
6. Unsang mga kamatuoran ang nasabtan sa mga Estudyante sa Bibliya sa tuig 1914?
6 Sa ulahing bahin sa ika-19ng siglo, ang kamatuoran sa Bibliya nakadasig sa usa ka gamayng grupo sa mga Estudyante sa Bibliya, nga karon nailhan ingong mga Saksi ni Jehova. Sa 1914 ang Bibliya nabuhi diha kanila. Ilang nasabtan ang kahibulongang mga kamatuoran mahitungod sa katuyoan sa Diyos. Sila natandog gayod sa gugma ni Jehova pinaagi sa pagpadala sa iyang Anak dinhi sa yuta, nga sa ingon nagbukas sa dalan ngadto sa kinabuhing walay kataposan. Sila usab nakabatog kahibalo ug nagpabili sa ngalan ug personalidad sa Diyos. Dugang pa, ilang naamgohan nga “ang panahon sa mga Hentil” natapos na, nga nagtimaan nga duol na ang panahon nga ipadangat sa kagamhanan nga Gingharian sa Diyos ang mga panalangin alang sa katawhan. (Lucas 21:24, King James Version) Pagkamahimayaong maayong balita! Kining gamhanang mga kamatuoran kinahanglang ipaambit ngadto sa tanan, sa tanang dapit. Ang mga kinabuhi nameligro!
7. Sa unsang paagi ang kamatuoran sa Bibliya nagmadaogon sa modernong mga panahon?
7 Gipanalanginan ni Jehova kadtong pipila lang nga dinihogan-sa-espiritu nga mga Kristohanon. Niining panahona, ang gidaghanon niadtong midawat sa matuod nga Kristiyanidad milabaw sa sayis milyones. Ang pulong sa Diyos mikaylap usab sa daghang kayutaan, kay makita ang mga Saksi ni Jehova sa 235 ka nasod. Dugang pa, ang kamatuoran sa Bibliya nakahatag ug gahom, nga nagmadaogon batok sa tanang kababagan, relihiyoso man o dili. Kining tibuok-kalibotan nga buluhatong pagsangyaw nakahatag ug dugang dili malalis nga pamatuod nga si Jesus anaa na sa Gingharianong gahom.—Mateo 24:3, 14.
8. Unsay giingon sa uban bahin sa pagtubo sa mga Saksi ni Jehova?
8 Maingon nga ang mga historyador naghisgot sa talagsaong pagtubo sa Kristiyanidad sa unang siglo, daghang eskolar nagkomento bahin sa pagtubo sa gidaghanon sa katawhan ni Jehova sa modernong panahon. Sa Tinipong Bansa, duha ka eskolar nag-usang nagsulat: “Sulod sa 75 ka tuig ang mga Saksi ni Jehova nagpadayon sa talagsaong gidaghanon sa pagtubo . . . ug nagpadayon sa pagtubo sa tibuok kalibotan.” Usa ka basahon sa Sidlakang Aprika naghisgot sa mga Saksi ingong “usa sa labing kusog nga nagtubo ug labing tinahod nga mga relihiyon nga nailhan sa tibuok kalibotan tungod sa bug-os nga pagsunod niini sa mga pagtulon-an sa Bibliya.” Ug usa ka tradisyonal nga basahong Katoliko, nga gipatik sa Uropa, naghisgot sa “dako kaayong pagtubo sa gidaghanon sa mga Saksi ni Jehova.” Unsay hinungdan niini nga pagtubo?
Aktibong Nagalihok ang Balaang Espiritu Karon
9. (a) Unsa ang usa ka pangunang hinungdan nganong ang pulong sa Diyos nagmadaogon karon? (b) Sa unsang paagi ginakabig ni Jehova ang mga tawo ngadto kaniya?
9 Usa ka pangunang hinungdan nga nagmadaogon ang pulong sa Diyos karon maoy tungod kay ang espiritu ni Jehova gamhanang nagalihok, sama sa unang siglo. Si Jesus miingon: “Walay tawo nga makaagi kanako gawas kon ang Amahan, kinsa nagpadala kanako, magkabig kaniya.” (Juan 6:44) Kining mga pulonga nagpasabot nga malulotong gidani sa Diyos kadtong sa husto may kiling sa kamatuoran, nga nagpukaw ug nagdani sa mga kasingkasing. Pinaagi sa buluhatong pagsangyaw sa iyang mga Saksi, si Jehova nagkabig sa mga tawo aron mosimba kaniya “ang tilinguhaong mga butang sa tanang kanasoran”—ang maaghop, karnerohon nga mga tawo sa yuta.—Hageo 2:6, 7.
10. Unsang matanga sa mga tawo ang misanong sa pulong sa Diyos?
10 Dili lamang gitugahan ug gahom sa balaang espiritu ang katawhan sa Diyos sa pagdala sa pulong sa Diyos ngadto sa halayong bahin sa yuta; kini nakapalihok sa mga tawo sa tanang matang sa pagsanong sa maayong balita. Sa pagkamatuod, kadtong midawat sa pulong sa Diyos nagagikan sa “matag tribo ug pinulongan ug katawhan ug nasod.” (Pinadayag 5:9; 7:9, 10) Sila makita taliwala sa mga dato ug mga kabos, sa edukado kaayo ug sa dili edukado. Ang uban midawat sa pulong bisan sa panahon sa gubat ug sa mapintas nga paglutos, samtang ang uban midawat panahon sa kalinaw ug kauswagan. Ilalom sa matag matang sa kagamhanan, sa tanang kultura, gikan sa mga kampong konsentrasyon ngadto sa mga palasyo, ang mga lalaki ug mga babaye misanong gayod sa maayong balita.
11. Sa unsang paagi ang balaang espiritu nagalihok diha sa mga kinabuhi sa katawhan sa Diyos, ug unsang kalainan ang madayag?
11 Bisan pa sa talagsaong panagkadaiya sa katawhan sa Diyos, sila nagpuyo nga may panaghiusa. (Salmo 133:1-3) Kini nakahatag ug dugang pamatuod nga nagalihok ang balaang espiritu diha sa mga kinabuhi niadtong nag-alagad sa Diyos. Ang iyang espiritu maoy usa ka gamhanang puwersa alang sa kaayohan nga nagpalihok sa iyang mga alagad sa pagpasundayag sa gugma, kalipay, pakigdait, kalulot, ug ubang maayong mga hiyas. (Galacia 5:22, 23) Niining panahona, klaro natong makita ang gitagna ni manalagnang Malaquias sa dugay na kaayong panahon kanhi: “Kamo . . . makakita sa kalainan tali sa usa nga matarong ug sa usa nga daotan, tali sa usa nga nagaalagad sa Diyos ug sa usa nga wala mag-alagad kaniya.”—Malaquias 3:18.
Ang Pulong sa Diyos Nagmadaogon Diha sa Masibotong mga Magbubuhat
12. Unsay pagbati sa mga Saksi ni Jehova sa buluhatong pagsangyaw, ug unsay ilang gidahom nga reaksiyon diha sa ilang buluhatong pagsangyaw?
12 Ang mga Saksi ni Jehova karon dili mga maninimba nga walay ginahimo. Sila aktibong nagpakigbahin sa buluhatong pagsangyaw. Sama sa unang mga Kristohanon, ilang gitanyag ang ilang kaugalingon nga andam motuman sa kabubut-on sa Diyos, nga naningkamot nga makatabang sa uban sa pagkat-on bahin sa mga saad ni Jehova may kalabotan sa Gingharian. Sila maoy mga isigkamagbubuhat sa Diyos kinsa, kaharmonya sa iyang balaang espiritu, nagtigom sa uban diha sa pag-alagad kang Jehova. Sa pagbuhat niini, ilang gipabanaag ang kaluoy ug gugma ni Jehova ngadto sa dili-matinuohong katawhan. Ug ilang gihimo kini bisan pa sa kawalay-pagtagad, pagbiaybiay, ug paglutos. Giandam ni Jesus ang iyang mga sumusunod alang sa lainlaing mga reaksiyon ngadto sa maayong balita. Siya miingon: “Ang ulipon dili labaw kay sa iyang agalon. Kon sila nagalutos kanako, sila usab magalutos kaninyo; kon sila nagasunod sa akong pulong, sila magasunod usab sa inyoha.”—Juan 15:20.
13. Unsang mga bahin nga nagkulang ang Kakristiyanohan nga dagaya taliwala sa mga Saksi ni Jehova?
13 Kita maikag gayod nga susama ang mga Saksi ni Jehova karon ug niadtong midawat sa matuod nga Kristiyanidad sa unang siglo. Samang mamatikdan usab ang kalainan tali sa mga Saksi ni Jehova ug sa Kakristiyanohan karon. Human sa pagsulat bahin sa masibotong pag-ebanghelyo sa unang mga Kristohanon, ang usa ka eskolar nagmulo: “Gawas kon usbon ang presenteng polisa sa simbahan aron sa makausa pa ang buluhatong pag-ebanghelyo malantaw ingong obligasyon sa matag bawtismadong Kristohanon, ug gipaluyohan sa kalidad sa kinabuhi nga mas maayo kay sa mga tawong walay pagtuo, wala gayoy posibilidad nga kita mouswag.” Ang mismong mga bahin nga nagkulang ang Kakristiyanohan dagaya taliwala sa mga Saksi ni Jehova! Ang ila maoy usa ka buhi nga pagtuo, usa ka tinuod nga pagtuo, ug usa ka pagtuo nga gipasukad sa kamatuoran sa Bibliya nga nagpalihok kanila sa pagpaambit ngadto sa tanan nga mamati.—1 Timoteo 2:3, 4.
14. Giunsa paglantaw ni Jesus ang iyang ministeryo, ug unsang tinamdan ang gipasundayag sa iyang mga tinun-an karon?
14 Seryosong gitagad ni Jesus ang iyang ministeryo, gihimo kini nga iyang pangunang alatubangon. Siya miingon kang Pilato: “Tungod niini ako gipakatawo, ug tungod niini ako mianhi sa kalibotan, aron ako manaksi sa kamatuoran.” (Juan 18:37) Ang katawhan sa Diyos samag gibati ni Jesus. Uban sa kamatuoran sa Bibliya nga nasilsil sa ilang kasingkasing, sila naningkamot nga makakita ug mga paagi nga mapaambit kini ngadto sa mas daghan pa kon mahimo. Ang uban niining mga paagiha nagpabanaag ug talagsaong pamaagi sa pagsangyaw.
15. Sa unsang paagi gipakita sa pipila ang talagsaong pamaagi sa pagsangyaw sa maayong balita?
15 Diha sa usa ka nasod sa Amerika del Sur, tabokon sa mga Saksi ang mga suba nga katampo sa Amazon River aron maabot ang mga tawo sa kamatuoran. Apan, sa dihang miulbo ang sibil nga gubat sa 1995, ang pag-agi sa mga sibilyan diha sa suba gidili. Desidido nga padayong madawat sa mga interesado ang mga publikasyon sa Bibliya, nakadesidir ang mga Saksi sa pagpalutaw sa mensahe diha sa suba. Sila nagpadalag mga sulat ug gisulod kini uban sa mga kopya sa mga magasing Ang Bantayanang Torre ug Pagmata! diha sa basiyo nga botelyang plastik. Dayon ilang gilabay ang mga botelya diha sa suba. Nagpadayon kini sulod sa upat ka tuig ug tunga hangtod ang mga sibilyan gitugotan na usab sa pag-agi sa suba. Diha sa kadaplinan sa suba, gipasalamatan sa mga tawo ang mga Saksi sa literatura. Usa ka babaye nga estudyante sa Bibliya mihalog kanila nga may mga luha sa iyang mga mata ug miingon: “Abi nakog dili na ako makakita kaninyo pag-usab. Apan, sa nagsugod ako sa pagkadawat ug literatura diha sa mga botelya, nahibalo ako nga wala kamo makalimot kanako!” Ang uban nga nagpuyo sa daplin sa suba miingon nga ilang gibalikbalik ug basa ang mga magasin. Ang kadaghanang baryo dunay temporaryong “post office”—usa ka lilo nga dinhi ginakuha ang naglutawng mga butang. Diha niini nga ginasusi kanunay sa mga interesado ang bisan unsang “koreyo” gikan sa ibabawng suba.
16. Sa unsang paagi ang atong pagkamainandamon usahay magbukas ug dalan alang sa paghimog tinun-an?
16 Ang pagsangyaw sa maayong balita gidumala ug gipaluyohan ni Jehova nga Diyos ug sa iyang gamhanang mga manulonda. (Pinadayag 14:6) Pinaagi lamang sa atong pagkamainandamon, ang wala-paabotang mga kahigayonan sa paghimog mga tinun-an motungha usahay. Sa Nairobi, Kenya, duha ka Kristohanong babaye nga nakigbahin sa pag-alagad sa kanataran nakatapos sa pagduaw sa mga balay nga gitudlo kanila. Usa ka batan-ong babaye kalit nga miduol kanila ug malipayong miingon: “Nag-ampo ako nga makahibalag ug sama kaninyo.” Iyang gihangyo ang mga Saksi sa pag-uban ngadto sa iyang balay dihadiha alang sa panaghisgot, ug usa ka pagtuon sa Bibliya ang nasugdan uban kaniya niadto mismong adlawa. Nganong dalidaling giduol sa babaye ang duha ka Kristohanon? Sa miaging mga duha ka semana, namatyan siya ug anak. Busa sa dihang iyang nakita ang usa ka bata nga nagkapot ug tract nga “Unsay Paglaom Alang sa Namatay nga mga Minahal?” gusto kaayo niyang mobasa niini ug iyang gipangayo kini sa batang lalaki. Wala siya mosugot, apan gitudlo ang mga Saksi nga naghatag kaniya sa tract. Sa ngadtongadto miuswag ang espirituwalidad sa babaye ug medyo nakasugakod na sa masakit nga kamatayon sa iyang anak.
Ang Gugma sa Diyos Kinahanglang Modaog
17-19. Unsang gugma ang gipasundayag ni Jehova ngadto sa katawhan pinaagi sa lukat?
17 Ang pagtubo sa pulong sa Diyos diha sa tibuok yuta suod nga nalangkit sa halad lukat ni Kristo Jesus. Sama sa lukat, ang buluhatong pagsangyaw maoy usa ka pagpasundayag sa gugma ni Jehova alang sa mga tawo sa tanang dapit. Si apostol Juan gidasig sa pagsulat: ‘Gihigugma pag-ayo sa Diyos ang kalibotan [sa katawhan] mao nga iyang gihatag ang iyang bugtong Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.’—Juan 3:16.
18 Hunahunaa ang gugma nga gipakita ni Jehova sa pagtagana sa lukat. Sa dugay nang kapanahonan, gitagamtam sa Diyos ang suod nga relasyon uban sa iyang pinalangga, bugtong Anak, “ang sinugdan sa kalalangan sa Diyos.” (Pinadayag 3:14) Gihigugma pag-ayo ni Jesus ang iyang Amahan, ug gihigugma ni Jehova ang iyang Anak “sa wala pa ang pagkatukod sa kalibotan.” (Juan 14:31; 17:24) Gitugotan ni Jehova kining pinalanggang Anak nga makaagom ug kamatayon aron ang mga tawo makadawat ug kinabuhing walay kataposan. Pagkamakapadasig nga pagpasundayag sa gugma alang sa katawhan!
19 Ang Juan 3:17 nag-ingon: “Gipadala sa Diyos ang iyang Anak nganhi sa kalibotan, dili aron iyang hukman ang kalibotan, kondili aron luwason ang kalibotan pinaagi kaniya.” Busa, gipadala ni Jehova ang iyang Anak diha sa mahigugmaong misyon sa kaluwasan, dili alang sa paghukom o pagtunglo. Kini kaharmonya sa mga pulong ni Pedro: “Wala magatinguha [si Jehova] nga adunay malaglag apan nagatinguha nga makakab-ot ang tanan sa paghinulsol.”—2 Pedro 3:9.
20. Sa unsang paagi ang kaluwasan nalangkit sa pagsangyaw sa maayong balita?
20 Kay nakatagana sa legal nga basehanan sa kaluwasan nga dako kaayo ang iyang gisakripisyo, buot ni Jehova nga pahimuslan kini sa daghan kon mahimo. Si apostol Pablo nagsulat: “‘Ang matag usa nga magatawag sa ngalan ni Jehova maluwas.’ Apan, unsaon nila pagtawag kaniya kinsa wala sila magbutang ug pagtuo? Unsaon, sa baylo, pagbutang nila ug pagtuo kaniya kinsa wala nila madunggi? Unsaon, sa baylo, nila pagkadungog kon walay magwali?”—Roma 10:13, 14.
21. Unsay atong angayng bation bahin sa kahigayonan nga makapakigbahin sa buluhatong pagsangyaw?
21 Pagkadakong pribilehiyo ang pagpakigbahin niining tibuok-kalibotan nga buluhatong pagsangyaw ug pagpanudlo! Dili kini sayon nga buluhaton, apan pagkamalipayon ni Jehova sa dihang makita niya ang iyang katawhan nga matinumanong nagkinabuhi sa kamatuoran ug nakigbahin sa maayong balita ngadto sa uban! Busa bisag unsa pay inyong mga kahimtang, pasagdi nga ang espiritu ug gugma sa Diyos sa inyong kasingkasing mopalihok kaninyo sa pagpakigbahin niining buluhatona. Ug hinumdomi nga ang atong nakita nga ginahimo diha sa tibuok kalibotan maoy dakong pamatuod nga tumanon sa dili madugay ni Jehova nga Diyos ang iyang saad nga ipadangat ang mahimayaong “bag-ong mga langit ug usa ka bag-ong yuta” nga niini “magapuyo ang pagkamatarong.”—2 Pedro 3:13.
Nahinumdom Ka Ba?
• Nganong ang apostasya dili makapahilom sa mga magwawali sa maayong balita?
• Sa unsang paagi ang pulong sa Diyos nagmadaogon sa atong panahon?
• Sa unsang mga paagi nagalihok ang espiritu sa Diyos karon?
• Sa unsang paagi ang lukat nalangkit sa pagsangyaw sa maayong balita?
[Graph/Hulagway sa panid 16]
(Alang sa aktuwal nga pagkahan-ay, tan-awa ang publikasyon)
Pagtubo sa gidaghanon sa mga magmamantala sa Gingharian sa ika-20ng siglo
Aberids nga Magmamantala (sa minilyon)
6.0
5.5
5.0
4.5
4.0
3.5
3.0
2.5
2.0
1.5
1.0
0.5
1900 1910 1920 1930 1940 1950 1960 1970 1980 1990 2000
[Mga hulagway sa panid 15]
JEROME
TYNDALE
GUTENBERG
HUS
[Credit Line]
Gutenberg and Hus: From the book The Story of Liberty, 1878
[Hulagway sa panid 15]
Mga Estudyante sa Bibliya nga nagmantala sa maayong balita sa katuigang 1920
[Mga hulagway sa panid 16, 17]
Sa tibuok kalibotan ang mga tawo nagasanong sa maayong balita
[Hulagway sa panid 18]
Sama sa halad lukat ni Jesu-Kristo, ang buluhatong pagsangyaw naghimaya sa gugma sa Diyos