Barog nga Bug-os ug May Hugot nga Pagtuo
Pagtabang sa mga Batan-on Uban sa Tukma-sa-Panahong Instruksiyon
SI Epafras maoy usa ka Kristohanon sa unang siglo nga nakapanaw sa Roma. Bisan pa niana, adunay maayong katarongan nga kanunay niyang gihunahuna ang Colosas, usa ka siyudad sa Asia Minor. Nakasangyaw siya sa maayong balita didto ug sa walay duhaduha nakatabang ug pipila ka taga-Colosas nga mahimong mga tinun-an ni Jesu-Kristo. (Colosas 1:7) Nabalaka pag-ayo si Epafras sa iyang mga isigkamagtutuo sa Colosas, kay gikan sa Roma, si apostol Pablo misulat kanila: “Si Epafras . . . nangomosta kaninyo, nga kanunayng nanlimbasog alang kaninyo sa iyang mga pag-ampo, aron kamo sa kataposan makabarog nga bug-os ug may hugot nga pagtuo sa bug-os nga kabubut-on sa Diyos.”—Colosas 4:12.
Sa susama, ang presenteng-adlaw nga Kristohanong mga amahan ug mga inahan mainitong nag-ampo alang sa espirituwal nga kaayohan sa ilang mga anak. Kining mga ginikanana naninguha sa pagtisok sa gugma alang sa Diyos diha sa kasingkasing sa ilang mga anak aron molig-on ang ilang pagtuo.
Daghang batan-ong mga Kristohanon ang nangayog tabang sa pagdumala sa mga hagit nga ilang ginaatubang sa eskuylahan ug sa bisan diin. Usa ka 15-anyos nga dalagita miingon: “Nagkagrabe ang among mga problema. Makahahadlok kaayo ang kinabuhi. Gikinahanglan namo ang tabang!” Gitubag ba ang mga hangyo sa maong mga batan-on ug ang mga pag-ampo sa diyosnong mga ginikanan? Oo! Ang binase-sa-Bibliya nga instruksiyon gitagana pinaagi sa “matinumanon ug maalamong ulipon.” (Mateo 24:45) Kining artikuloha naghisgot sa pipila ka literatura nga nakatabang sa ginatos ka libong batan-on sa ‘pagbarog nga bug-os ug may hugot nga pagtuo.’ Tagdon nato ang pipila niining mga publikasyona.
“Tan-awa . . . 15,000 ka Bag-ong mga Saksi!”
Niadtong Agosto 1941, nagtigom ang 115,000 ka tumatambong sa St. Louis, Missouri, T.B.A., alang sa kinadak-ang kombensiyon sa mga Saksi ni Jehova nga gihimo niadtong panahona. Sa kataposang adlaw niini—“Adlaw sa mga Bata”—mga 15,000 ka bata ang nanglingkod duol sa plataporma nga naminaw pag-ayo samtang si Joseph F. Rutherford naghisgot sa ulohang “Mga Anak sa Hari.” Sa hinapos nga bahin sa iyang pakigpulong, ang 71-anyos nga si Rutherford miingon diha sa usa ka amahanong tingog:
‘Kamong tanan . . . nga mga bata nga miuyon . . . sa pagsugot sa Diyos ug sa iyang Hari, palihog sa pagtindog.’ Ang mga bata nagdungan sa pagtindog. “Tan-awa,” matod ni Brader Rutherford, “kapin sa 15,000 ka bag-ong mga saksi sa Gingharian!” May sigabo nga pagpamakpak. Ang mamumulong midugang: “Kamong tanan nga mohimo kutob sa inyong maarangan sa pagsulti sa uban mahitungod sa gingharian sa Diyos . . . , palihog pag-ingon ug Oo.” Ang mga bata mitubag uban ang lanog nga “Oo!” Dayon iyang gipakita ang bag-ong libro nga Children, nga gidawat uban ang dugay nga pagpamakpak.
Human niining makapatandog nga pakigpulong, usa ka hataas nga linya sa mga bata ang misaka sa plataporma, diin si Brader Rutherford naghatag kanila ug gasa nga kopya sa bag-ong libro. Ang maong eksena nakapalugmaw sa mga luha sa mga tumatambong. Matod sa usa nga nakasaksi sa maong okasyon: “Ang tig-a lang ug kasingkasing ang dili matandog sa talan-awon nga ang mga batan-on [nagpasundayag] ug bug-os nga pagsalig ug pagtuo sa ilang Diyos, si Jehova.”
Didto sa maong halandomong asembliya, 1,300 ka batan-on ang nabawtismohan ingong simbolo sa ilang pagpahinungod kang Jehova. Daghan kanila ang nagpabiling malig-on sa pagtuo hangtod karong adlawa. Sila nagtabang sa lokal nga mga kongregasyon, nagboluntaryo sa Bethel, o nag-alagad ingong mga misyonaryo sa langyawng mga nasod. Sa pagkatinuod, ang “Adlaw sa mga Bata” ug ang librong Children malungtarong natisok sa daghang linghod nga mga kasingkasing!
“Kini Daw Miabot sa Hustong Panahon”
Sulod sa katuigang 1970, ang mga Saksi ni Jehova nagpatik ug dugang tulo ka libro nga nakatandog sa kasingkasing sa ginatos ka libong batan-on. Kini mao ang Pagpatalinghog sa Dakong Magtutudlo, Ang Imong Pagkabatan-on—Pagpahimulos sa Labing Maayo Niini, ug Akong Basahon sa mga Estorya sa Bibliya. Sa 1982 ang mga serye sa “Mga Batan-on Nangutana . . .” misugod sa paggula sa magasing Pagmata! Kining mga artikuloha nakapadani sa kasingkasing sa mga batan-on ug tigulang. “Kada gabii ako nagapasalamat sa Diyos tungod kay kini gipatik,” matod sa usa ka 14-anyos nga batan-on. “Nagustohan ko ang mga artikulo,” nag-ingon ang usa ka 13-anyos nga dalagita, “kini daw miabot sa hustong panahon.” Ang mga ginikanan ug tinudlong Kristohanong mga ansiyano mouyon nga kining mga artikuloha tukma sa panahon ug mapuslanon.
Pagka-1989 mga 200 ka artikulo sa “Mga Batan-on Nangutana . . .” ang migula sa Pagmata! Sa “Diyosnong Debosyon” nga Distritong Kombensiyon nianang tuiga, giluwatan ang librong Mga Pangutanang Gisukna sa mga Batan-on—Mga Tubag nga Mosaler. Nakatabang ba kini sa mga batan-on sa pagpabiling malig-on sa pagtuo? Tulo ka batan-on ang misulat: “Kining libroha dakog natabang kanamo sa pag-ila sa among mga problema ug sa pagkahibalo kon unsaon sa pagdumala niini. Salamat sa inyong paghunahuna alang sa among kaayohan.” Daghang batan-ong mga magbabasa sa tibuok kalibotan ang uyon niini.
“Giwagtang Niini ang Among Kagutom”
Niadtong 1999, ang mga Saksi ni Jehova nagpatunghag laing matang sa instruksiyon nga tukma sa panahon alang sa mga batan-on—ang video nga Young People Ask—How Can I Make Real Friends? Nakapainteres kaayo kini sa daghan. “Kini nga video nakatandog pag-ayo kanako,” miingon ang usa ka 14-anyos nga dalagita. “Kini mahimong usa ka regular nga bahin sa among espirituwal nga pagkaon,” nag-ingon ang usa ka nag-inusarang inahan. “Makapadasig ang pagkasayod nga ang atong labing maayong Higala, si Jehova, tinuorayng nahigugma ug nahingawa sa mga batan-on diha sa iyang tibuok-kalibotang organisasyon,” matod sa usa ka batan-ong babaye.
Unsay nalampos sa video? Ang mga batan-on nag-ingon: “Nakatabang kini kanako nga bantayan kon kinsa ang akong gipakig-ubanan, magpasangkad sa akong gugma diha sa kongregasyon, ug himoon si Jehova nga akong higala.” “Nakatabang kini kanako nga mobarog nga malig-on bisan pa sa pagpit-os sa akong isigkaingon.” “Nakapalig-on kini sa akong determinasyon nga moalagad kang Jehova kutob sa akong maarangan.” Ug usa ka magtiayon misulat: “Kinasingkasing kami nga nagpasalamat kaninyo sa pagtagana kanamo niining ‘pagkaona.’ Giwagtang niini ang among kagutom.”
Kay maunongon sa ilang hinatag-Diyos nga buluhaton, ang dinihogang “matinumanon ug maalamong ulipon” nagtaganag tukma-sa-panahong espirituwal nga pagkaon alang sa tanan nga modawat niini. Ug pagkamakalilipay nga makita kon sa unsang paagi ang maong Kasulatanhong instruksiyon nagatabang sa mga batan-on karong adlawa sa ‘pagbarog nga bug-os ug may hugot nga pagtuo sa bug-os nga kabubut-on sa Diyos’!