Ang mga Prinsipyo nga Gihatag sa Diyos Makabenepisyo Kanimo

TINONG nasayod ka nga ang mga hayop gigamhan sa kinaiyanhong mga hiyas. Daghang makina ang gidisenyo nga mosunod ug mga instruksiyon. Apan ang mga tawo gilalang gayod nga kinahanglang magiyahan sa mga prinsipyo. Sa unsang paagi nimo matino kana? Buweno, si Jehova, ang Tagmugna sa tanang matarong nga mga prinsipyo, nag-ingon sa dihang iyang gihimo ang unang mga tawo: “Buhaton nato ang tawo sumala sa atong larawan, sumala sa atong dagway.” Ang Maglalalang maoy usa ka espiritu; siya walay pisikal nga lawas sama kanato, busa kita samag “larawan” kaniya sa diwa nga kita makapabanaag sa iyang kinaiya, nga nagpasundayag ug usa ka sukod sa iyang maayong mga hiyas. Ang mga tawo dunay katakos sa pagkinabuhi subay sa mga prinsipyo, sa ato pa, subay sa ilang gituohan nga usa ka kalagdaan sa hustong panggawi. Daghan niining mga prinsipyoha gipasulat ni Jehova diha sa iyang Pulong.—Genesis 1:26; Juan 4:24; 17:17.

‘Apan ang Bibliya naundan ug gatosan ka prinsipyo,’ may moingon tingali. ‘Imposibleng mahibaloan nako kining tanan.’ Tinuod. Apan tagda kini nga kamatuoran: Bisan tuod makahatag ug benepisyo ang tanang prinsipyo nga gihatag sa Diyos, ang pipila mas hinungdanon kay sa uban. Imo kanang masabtan diha sa Mateo 22:37-39, diin gipakita ni Jesus nga sa tanang mga sugo ug katugbang nga mga prinsipyo sa Moisesnong Kasugoan, ang pipila mas hinungdanon kay sa uban.

Hain niini ang mas hinungdanong mga prinsipyo? Ang labing hinungdanong mga prinsipyo sa Bibliya mao kanang direktang nag-apektar sa atong relasyon kang Jehova. Kon atong tumanon kining mga prinsipyoha, ang Maglalalang mao na ang may dakong impluwensiya diha sa atong moral nga kompas. Dugang pa, dunay mga prinsipyo nga mag-apektar sa atong relasyon sa ubang mga tawo. Ang pagpadapat niini magtabang kanato nga masuklan ang pagkamaki-ako, bisag unsa pay gingalan niini.

Magsugod kita sa usa sa labing hinungdanong mga kamatuoran diha sa Bibliya. Unsa kanang kamatuorana, ug sa unsang paagi kana makaapektar kanato?

“Ang Labing Hataas Ibabaw sa Tibuok nga Yuta”

Giklaro sa Balaang Kasulatan nga si Jehova mao ang atong Dakong Maglalalang, ang Diyos nga Labing Gamhanan. Dili gayod siya hitupngan o kapulihan. Kini maoy usa ka hinungdanong kamatuoran nga gisulat diha sa Bibliya.—Genesis 17:1; Ecclesiastes 12:1.

Usa sa mga magsusulat sa basahon sa Mga Salmo nag-ingon bahin kang Jehova: “Ikaw lamang ang Labing Hataas ibabaw sa tibuok nga yuta.” Si Haring David sa kakaraanan misulat: “Imo ang gingharian, Oh Jehova, ang Usa usab nga nagpataas sa imong kaugalingon ingong pangulo ibabaw sa tanan.” Ug ang iladong manalagna nga si Jeremias napalihok sa pagsulat: “Wala gayoy bisan usa nga sama kanimo, Oh Jehova. Ikaw dako, ug ang imong ngalan dako sa pagkagamhanan.”—Salmo 83:18; 1 Cronicas 29:11; Jeremias 10:6.

Sa unsang paagi angay natong ipadapat kanang mga kamatuorana bahin sa Diyos diha sa adlaw-adlawng kinabuhi?

Klaro kon kinsay angayng mangibabaw diha sa atong kinabuhi—ang atong Maglalalang ug Maghahatag-Kinabuhi. Nan, dili ba angayan lang nga santaon ang bisan unsang kiling nga ipasiugda ang atong kaugalingon—usa ka kiling nga tingali mas kusganon diha sa pipila kay sa uban? Ang usa ka maalamong giya nga prinsipyo mao ang ‘paghimo sa tanang butang alang sa kahimayaan sa Diyos.’ (1 Corinto 10:31) Ang manalagnang si Daniel nagpakita ug maayong panig-ingnan maylabot niana.

Nahibaloan nato gikan sa natalang kasaysayan nga si Haring Nabucodonosor sa Babilonya natugaw kanhi sa usa ka damgo ug gustong mahibalo sa kahulogan niini. Bisan tuod nalibog ang tanan, si Daniel tukma nga misulti ngadto sa hari sa buot niyang mahibaloan. Nagpasigarbo ba si Daniel tungod niini? Wala, iyang gihatag ang himaya ngadto sa “Diyos sa kalangitan nga Tigpadayag sa mga tinago.” Si Daniel mipadayon: “Dili tungod kay nagbaton ako ug kaalam nga labaw kay sa uban nga buhi nga kining maong tinago gipadayag kanako.” De-prinsipyong tawo si Daniel. Dili ikatingala nga diha sa basahon sa Daniel, siya makatulo nga gihubit ingong “tilinguhaon kaayo” sa mga mata sa Diyos.—Daniel 2:28, 30; 9:23; 10:11, 19.

Makabenepisyo ka kon imong sundogon si Daniel. Sa pagsundog sa panig-ingnan ni Daniel, ang hinungdanong elemento mao ang motibo. Kinsay angay nga makadawat sa pasidungog tungod sa imong mahimo? Bisag unsa pa ang imong kahimtang, ikaw dunay katakos sa paglihok uyon niining hinungdanon kaayong prinsipyo sa Bibliya—si Jehova mao ang Soberanong Ginoo. Ang imong paglihok nga uyon niini maghimo kanimong “tilinguhaon kaayo” sa iyang mga mata.

Tagdon nato karon ang duha ka paninugdang mga prinsipyo nga makagiya kanato diha sa natad sa tawhanong mga relasyon. Tungod sa kaylap nga pagpasiugda sa kaugalingon, kining maong natad sa kinabuhi ilabinang malisod.

“Uban sa Pagpaubos sa Hunahuna”

Kadtong magauna sa ilang kaugalingon talagsa rang matagbaw. Ang kadaghanan gustog mas maayo pang kinabuhi, ug gusto nila kini karon dayon. Alang kanila, ang pagkamakasaranganon maoy usa ka ilhanan sa kahuyangan. Ilang giisip ang pagpailob ingong usa ka butang nga ang uban ray angayng magpasundayag. Kon mahitungod sa ilang tinamdan bahin sa pagkaprominente o kalamposan, ang bisan unsa puwede. Sa imong hunahuna ikaw kaha dunay kapilian inay kay maggawi nga sama nila?

Ang mga alagad sa Diyos masugamak nianang maong tinamdan adlaw-adlaw, apan dili kana angayng motakod kanila. Gidawat sa hamtong nga mga Kristohanon ang prinsipyo nga “dili ang usa nga nagrekomendar sa iyang kaugalingon ang inuyonan, kondili ang tawo nga ginarekomendar ni Jehova.”—2 Corinto 10:18.

Makatabang ang pagpadapat sa prinsipyo sa Filipos 2:3, 4. Kanang tekstoha magdasig kanimo ‘nga dili magbuhat ug bisan unsa tungod sa pagkamatigion o tungod sa pagpaimportante sa kaugalingon, kondili uban sa pagpaubos sa hunahuna nga magaisip nga ang uban labaw kay kanimo.’ Sa ingon ikaw ‘magatan-aw, dili lamang sa personal nga interes sa mga butang labot sa imong kaugalingon, kondili sa personal nga interes usab sa uban.’

Ang usa nga may hustong tinamdan bahin sa iyang kaugalingon ug naghimog makataronganong pagtimbangtimbang sa iyang kaugalingong bili, mao si Gideon, usa ka maghuhukom taliwala sa karaang mga Hebreohanon. Wala niya tinguhaa nga mahimong lider sa Israel. Apan, sa dihang gihatag kaniya ang maong katungdanan, si Gideon naghisgot bahin sa iyang pagkadili-takos. “Ang akong usa ka libo mao ang kinagamyan sa Manases, ug ako ang kinagamyan sa balay sa akong amahan,” siya nagpatin-aw.—Maghuhukom 6:12-16.

Dugang pa, human ihatag ni Jehova kang Gideon ang kadaogan, ang kalalakin-an sa Efraim nangitag away kaniya. Unsay reaksiyon ni Gideon? Nahimo ba siyang hambogiro tungod sa maong kadaogan? Wala. Iyang nalikayan ang katalagman pinaagi sa paghatag ug malumong tubag. “Unsa karon ang akong nabuhat kon itandi kaninyo?” Si Gideon mapaubsanon sa hunahuna.—Maghuhukom 8:1-3.

Tinuod, ang mga hitabo nga naglangkit kang Gideon dugay nang nahitabo. Bisan pa niana, hinungdanon pa gihapon nga hatagag pagtagad ang maong asoy. Imong mamatikdan nga si Gideon may tinamdan nga lahi gayod kay sa kasagaran kaayo karon, ug nagkinabuhi siya uyon niini, nga nakabenepisyo kaniya.

Ang kaylap nga tinamdang nagsentro sa pagtagad diha sa kaugalingon makatuis sa atong panglantaw bahin sa pagtamod sa kaugalingon. Ang mga prinsipyo sa Bibliya motul-id nianang maong pagtuis, nga magtudlo kanato sa atong tinuod nga bili kon itandi sa Maglalalang ug sa uban.

Pinaagi sa pagtuman sa mga prinsipyo sa Bibliya, atong mabuntog kining maong hilig sa pagkamaki-ako. Dili na kita magamhan sa mga pagbati o mga kinaiya. Kon kita magtuon ug dugang bahin sa matarong nga mga prinsipyo, mas masinati nato ang Tigmugna niini. Oo, ang paghatag ug linaing pagtagad sa mga prinsipyo nga gihatag sa Diyos sa dihang magbasa sa Bibliya maoy takos gayod sa paningkamot.—Tan-awa ang kahon.

Gilalang ni Jehova ang mga tawo nga labaw kay sa mga hayop, nga gigiyahan ilabina sa kinaiyanhong mga hiyas. Ang pagtuman sa kabubut-on sa Diyos naglakip sa pagpadapat sa iyang mga prinsipyo. Nianang paagiha mahuptan nato ang atong moral nga kompas diha sa maayong kondisyon, usa ka kompas nga motultol kanato ngadto sa bag-ong sistema nga himoon sa Diyos. Ang Bibliya naghatag kanatog katarongan sa pagdahom nga hapit na gayong molungtad ang usa ka bag-ong sistema sa tibuok kalibotan nga niana “magpuyo ang pagkamatarong.”—2 Pedro 3:13.

[Kahon/Hulagway sa panid 6]

Pipila ka Mapuslanong mga Prinsipyo sa Bibliya

Sulod sa pamilya:

“Magpadayon pagpangita ang matag usa, dili sa iyang kaugalingong kaayohan, kondili nianang sa laing tawo.”—1 Corinto 10:24.

“Ang gugma . . . dili mangita sa kaugalingong kaayohan niini.”—1 Corinto 13:4, 5.

“Kinahanglang higugmaon gayod sa matag usa ang iyang asawa sama sa iyang kaugalingon.”—Efeso 5:33.

“Kamong mga asawa, magpasakop sa inyong mga bana.”—Colosas 3:18.

“Pamati sa imong amahan nga nanganak kanimo, ug ayaw tamaya ang imong inahan tungod lang kay siya tigulang na.”—Proverbio 23:22.

Sa eskuylahan, sa trabahoan, o diha sa mga pagpakiglabot sa negosyo:

“Ang usa ka timbangan nga limbongan maoy dulumtanan . . . Ang daotan nagadawat sa limbong nga mga suhol.”—Proverbio 11:1, 18.

“Ang kawatan kinahanglan nga dili na mangawat, hinuon maghago siya.”—Efeso 4:28.

“Kon adunay dili buot magtrabaho, ayaw usab siya pakan-a.”—2 Tesalonica 3:10.

“Bisan unsay inyong ginabuhat, buhata kini nga tibuok-kalag ingon nga alang kang Jehova.”—Colosas 3:23.

“Buot namong magmaminatud-on sa tanang butang.”—Hebreohanon 13:18.

Tinamdan maylabot sa bahandi:

“Siya nga nagadali sa pagbaton ug mga bahandi dili magpabiling inosente.”—Proverbio 28:20.

“Ang mahigugmaon lamang sa salapi dili matagbaw sa salapi.”—Ecclesiastes 5:10.

Pagtimbangtimbang sa kaugalingong katakos:

“Ang pagpangita sa mga tawo sa kaugalingon nilang himaya, himaya ba kana?”—Proverbio 25:27.

“Padayega kanimo ang usa ka estranyo, ug dili ang imong kaugalingong baba.”—Proverbio 27:2.

“Ako magasulti sa tanan dinha sa inyong taliwala nga dili maghunahuna ug labaw bahin sa iyang kaugalingon kay sa angay nga hunahunaon.”—Roma 12:3.

“Kay kon ang usa naghunahuna nga siya mahinungdanon samtang siya walay pulos, siya naglimbong sa iyang kaugalingong hunahuna.”—Galacia 6:3.

[Hulagway sa panid 5]

Gihatag ni Daniel ang nahiangayng pasidungog ngadto sa Diyos

[Hulagway sa panid 7]

Ang pagpakiglabot sa uban uyon sa mga prinsipyo nga gihatag sa Diyos makaamot sa maayong mga relasyon ug kalipay

[Picture Credit Line sa panid 7]

U.S. Fish & Wildlife Service, Washington, D.C./Robert Bridges