Pangitaa ang Diyos Uban sa Imong Kasingkasing ug Hunahuna

Ang matuod nga Kristiyanidad nagdasig sa paggamit sa kasingkasing ug hunahuna sa pagbaton ug pagtuo nga makapahimuot sa Diyos.

GANI, ang nagtukod sa Kristiyanidad, si Jesu-Kristo, nagtudlo nga angay natong higugmaon ang Diyos uban sa atong ‘tibuok hunahuna,’ o kaisipan, gawas pa sa atong ‘tibuok kasingkasing’ ug ‘tibuok kalag.’ (Mateo 22:37) Oo, ang atong gahom sa panghunahuna kinahanglang dunay dakong bahin sa atong pagsimba.

Sa dihang nag-awhag sa iyang mga mamiminaw sa pagpalandong sa iyang gitudlo, si Jesus kasagarang moingon: “Unsay imong hunahuna?” (Mateo 17:25; 18:12; 21:28; 22:42) Sa susama, si apostol Pedro misulat ngadto sa mga isigkamagtutuo aron ‘pukawon ang ilang tin-awng mga gahom sa panghunahuna.’ (2 Pedro 3:1) Ang labing daghan ug naadtoang lugar nga unang misyonaryo, si apostol Pablo, nagtambag sa mga Kristohanon sa paggamit sa ilang “gahom sa pagpangatarongan” ug sa ‘pagpamatuod sa ilang kaugalingon sa maayo ug dalawaton ug hingpit nga kabubut-on sa Diyos.’ (Roma 12:1, 2) Pinaagi lamang nianang bug-os, maampingong paagi sa pagsusi sa ilang gituohan nga ang mga Kristohanon makabaton ug pagtuo nga makapahimuot sa Diyos ug makapaarang kanila sa pagsagubang sa mga pagsulay nga motungha sa kinabuhi.—Hebreohanon 11:1, 6.

Aron matabangan ang uban nga makabaton sa maong pagtuo, ang unang Kristohanong mga ebanghelisador “nangatarongan kanila gikan sa mga Kasulatan, nga nagpatin-aw ug nagpamatuod pinaagig mga pangutlo” sa mga butang nga gitudlo. (Buhat 17:1-3) Ang maong makataronganong paagi sa pagsusi nakapukaw ug maayong reaksiyon gikan sa mga matinud-anog kasingkasing. Pananglitan, daghang tawo sa Macedonianhong siyudad sa Berea ang ‘midawat sa pulong sa Diyos uban ang tumang kaikag sa hunahuna, nga sa adlaw-adlaw maampingong nagasusi sa Kasulatan kon tinuod ba kining mga butanga’ nga gipatin-aw ni Pablo ug sa iyang mga kauban. (Buhat 17:11) Duha ka butang ang takos tagdon dinhi. Una, ang mga taga-Berea maikagon sa pagpamati sa Pulong sa Diyos; ikaduha, wala nila basta gidawat na lang nga husto ang ilang nadungog nga walay paghunahuna, kondili gikompirmar nila ang ilang nadungog pinaagi sa pagsusi sa Kasulatan. Ang Kristohanong misyonaryo nga si Lucas matinahorong nagdayeg sa mga taga-Berea tungod niini, nga nagtawag kanilang “hamilig-hunahuna.” Gibanaag mo ba ang maong hamiling hunahuna sa imong paagi sa pagsusi sa espirituwal nga mga butang?

Hunahuna ug Kasingkasing Nagtambayayongay

Sumala sa nahisgotan na, ang matuod nga pagsimba naglangkit sa hunahuna ug kasingkasing. (Marcos 12:30) Palandonga ang ilustrasyon sa nag-unang artikulo bahin sa sinuholang pintor nga migamit ug dili mao nga mga kolor sa dihang nagpintal sa usa ka balay. Kon namati pa unta siya pag-ayo sa mga instruksiyon sa nagsuhol kaniya, kinasingkasing unta niyang mahimo ang iyang buluhaton ug magmasaligon nga ang iyang gibuhat uyonan sa tag-iya. Ikapadapat usab kana sa atong pagsimba.

“Ang matuod nga mga magsisimba,” miingon si Jesus, “magasimba sa Amahan uban sa espiritu ug sa kamatuoran.” (Juan 4:23) Busa, si apostol Pablo misulat: “Mao usab nga kami . . . wala mohunong sa pag-ampo alang kaninyo ug sa paghangyo nga kamo unta mapuno sa tukmang kahibalo sa iyang kabubut-on diha sa tanang kaalam ug espirituwal nga pagsabot, aron kamo magalakaw nga takos kang Jehova aron bug-os nga makapahimuot kaniya.” (Colosas 1:9, 10) Ang maong “tukmang kahibalo” makapaarang sa sinserong mga tawo sa paglangkit sa ilang kasingkasing ug kalag diha sa ilang pagsimba uban ang bug-os nga pagsalig tungod kay sila “nagasimba sa [ilang] nailhan.”—Juan 4:22.

Tungod niini, ang mga Saksi ni Jehova dili magbawtismo sa masuso o sa bag-ong nainteresado nga mga tawo nga wala magtuon pag-ayo sa Kasulatan. Si Jesus nagsugo sa iyang mga sumusunod: “Paghimog mga tinun-an sa katawhan sa tanang kanasoran, . . . nga magatudlo kanila sa pagtuman sa tanang butang nga akong gisugo kaninyo.” (Mateo 28:19, 20) Human lamang makabaton ug tukmang kahibalo sa kabubut-on sa Diyos nga ang sinserong mga estudyante sa Bibliya makadesisyon binase sa tukmang kahibalo maylabot sa pagsimba. Nanglimbasog ka ba sa pagbaton nianang tukmang kahibalo?

Pagsabot sa Pag-ampo sa Ginoo

Aron makita ang kalainan tali sa pagbaton ug tukmang kahibalo sa Bibliya ug sa pagbaton ug limitadong kahibalo sa giingon niini, susihon nato ang komon nga gitawag ug Amahan Namo, o ang Pag-ampo sa Ginoo, nga nasulat diha sa Mateo 6:9-13.

Milyonmilyon ang kanunayng naglitok sa modelong pag-ampo ni Jesus diha sa simbahan. Apan pila ra ang natudloan sa kahulogan niini, ilabina sa unang bahin sa pag-ampo nga naghisgot bahin sa ngalan ug Gingharian sa Diyos? Kining mga butanga hinungdanon kaayo nga mao kiniy giuna ni Jesus diha sa pag-ampo.

Kini nagsugod: “Amahan namo nga anaa sa mga langit, pagabalaanon unta ang imong ngalan.” Matikdi nga si Jesus miingon nga mag-ampo nga balaanon ang ngalan sa Diyos. Para sa daghang tawo, nagpatungha kana ug labing menos duha ka pangutana. Una, unsa ang ngalan sa Diyos? Ug ikaduha, nganong kinahanglan kining balaanon?

Ang tubag sa unang pangutana makita diha sa kapin sa 7,000 ka bahin sa Bibliya sa orihinal nga mga pinulongan niini. Ang usa anaa sa Salmo 83:18: “Aron ang katawhan makaila nga ikaw, kansang ngalan mao si Jehova, ikaw lamang ang Labing Hataas ibabaw sa tibuok nga yuta.” Bahin sa ngalan sa Diyos, nga Jehova, ang Exodo 3:15 nag-ingon: “Kini ang akong ngalan hangtod sa panahong walay tino, ug kini ang handomanan kanako hangtod sa sunodsunod nga mga kaliwatan.”a Apan nganong ang ngalan sa Diyos, nga maoy larawan sa kaputli ug pagkabalaan, kinahanglan pang balaanon? Tungod kay kini gipakaulawan ug gitamay sukad pa sa sinugdanan sa tawhanong kasaysayan.

Sa Eden, giingnan sa Diyos si Adan ug Eva nga sila mamatay kon kaonon nila ang gidili nga bunga. (Genesis 2:17) Si Satanas sa kalampingasan misupak sa Diyos, nga miingon kang Eva: “Dili gayod kamo mamatay.” Busa, giakusar ni Satanas ang Diyos nga namakak. Apan, wala siya mohunong diha. Gihan-okan pa niyag dugang pakaulaw ang ngalan sa Diyos, nga nag-ingon kang Eva nga ang Diyos dili-makataronganong naghikaw kaniya sa bililhong kahibalo. “Kay nasayod ang Diyos nga sa mismong adlaw nga kamo mokaon gikan [sa kahoy sa kahibalo sa maayo ug daotan] ang inyong mga mata mangabuka ug kamo mahisama sa Diyos, nga mahibalo sa maayo ug sa daotan.” Pagkadakong pasipala!—Genesis 3:4, 5.

Pinaagi sa pagkaon sa gidiling bunga, si Adan ug Eva midapig kang Satanas. Sukad niadto, kadaghanan sa mga tawo, nahibaloan man nila o wala, nakadugang nianang orihinal nga pakaulaw pinaagi sa pagsalikway sa matarong nga mga sukdanan sa Diyos. (1 Juan 5:19) Ang mga tawo nagtamay gihapon sa Diyos pinaagi sa pagpasangil kaniya sa ilang giantos—bisan pag gumikan kana sa ila mismong daotang mga dalan. “Ang binuang sa usa ka tawo modaot sa iyang kinabuhi, ug unya mahiubos siya sa Ginoo,” nag-ingon ang Proverbio 19:3. (The New English Bible) Masabtan ba nimo kon nganong si Jesus, kinsa tinuod nga nahigugma sa iyang Amahan, nag-ampo nga balaanon ang Iyang ngalan?

“Paanhia ang Imong Gingharian”

Human mag-ampo nga balaanon ang ngalan sa Diyos, si Jesus miingon: “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.” (Mateo 6:10) Bahin nianang tekstoha, mangutana tingali kita: ‘Unsa ba ang Gingharian sa Diyos? Ug unsay kalabotan sa pag-anhi niini sa pagkatuman sa kabubut-on sa Diyos dinhi sa yuta?’

Sa Bibliya, ang pulong “gingharian” sa panguna nagpasabot ug “pagmando sa usa ka hari.” Nan, makataronganon nga ang Gingharian sa Diyos magtumong sa usa ka pagmando, o gobyerno, pinaagi sa Diyos, uban sa hari nga iyang pilion. Kining Haria walay lain kondili ang nabanhawng Jesu-Kristo—ang “Hari sa mga hari ug Ginoo sa mga ginoo.” (Pinadayag 19:16; Daniel 7:13, 14) Mahitungod sa Mesiyanikong Gingharian sa Diyos diha sa mga kamot ni Jesu-Kristo, si manalagnang Daniel misulat: “Sa mga adlaw nianang mga haria [tawhanong mga gobyerno nga nagmando karon] ang Diyos sa langit magatukod ug usa ka gingharian nga dili gayod malumpag. Ug ang maong gingharian dili igapasa ngadto sa lain nga katawhan. Kini magadugmok ug magatapos niining tanang gingharian, ug kini mobarog hangtod sa panahong walay tino,” sa ato pa, sa walay kataposan.—Daniel 2:44.

Oo, ang Gingharian sa Diyos bug-os nga momando sa yuta, nga magwagtang sa tanang daotan ug magmando “hangtod sa panahong walay tino,” sa ato pa, sa walay kataposan. Niining paagiha, ang Gingharian sa Diyos mao ang galamiton nga niana balaanon ni Jehova ang iyang ngalan, nga maghinlo niana sa tanang bakak nga pagpakaulaw ni Satanas ug sa daotang mga tawo.—Ezequiel 36:23.

Sama sa tanang gobyerno, ang Gingharian sa Diyos dunay mga sakop. Kinsa sila? Ang Bibliya mitubag: “Ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.” (Salmo 37:11) Sa susama, si Jesus miingon: “Malipayon ang mga malumog-buot, sanglit sila magapanunod sa yuta.” Siyempre, kining mga tawhana dunay tukmang kahibalo sa Diyos, nga maoy kinahanglanon sa kinabuhi.—Mateo 5:5; Juan 17:3.

Mahanduraw ba nimo ang tibuok yuta nga mapuno sa maaghop, malumog-buot nga mga tawo kinsa tinuod nga nahigugma sa Diyos ug naghigugmaay sa usag usa? (1 Juan 4:7, 8) Mao kiniy giampo ni Jesus sa dihang siya miingon: “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.” Nasabtan ba nimo kon nganong gitudloan ni Jesus ang iyang mga sumusunod sa pag-ampo nianang paagiha? Mas hinungdanon pa, nasabtan ba nimo kon sa unsang paagi ang katumanan sa maong pag-ampo mahimong makaapektar kanimo mismo?

Milyonmilyon ang Nangatarongan Karon Pinasukad sa Kasulatan

Gitagna ni Jesus ang usa ka tibuok-yutang kampanya sa espirituwal nga edukasyon nga magpahayag sa umaabot nga Gingharian sa Diyos. Siya miingon: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan [sa presenteng kalibotan, o sistema].”—Mateo 24:14.

Sa tibuok kalibotan mga unom ka milyong Saksi ni Jehova ang nagpaambit sa maayong balita ngadto sa ilang mga silingan. Giawhag ka nila sa pagkat-on ug dugang pa bahin sa Diyos ug sa iyang Gingharian pinaagi sa ‘maampingong pagsusi sa Kasulatan,’ ginamit ang imong gahom sa pagpangatarongan. Ang paghimo niana magpalig-on sa imong pagtuo ug makapalipay kanimo samtang ikaw maghunahuna bahin sa kinabuhi diha sa usa ka paraisong yuta, nga “mapuno sa kahibalo kang Jehova ingon sa katubigan nga nagtabon sa dagat mismo.”—Isaias 11:6-9.

[Footnote]

[Kahon/Hulagway sa panid 8]

SUNDOGA ANG DAKONG MAGTUTUDLO

Si Jesus kasagarang nagtudlo pinaagi sa pagsentro sa pagtagad diha sa espesipikong mga ulohan sa Bibliya. Pananglitan, human sa iyang pagkabanhaw gipatin-aw niya ang iyang papel diha sa katuyoan sa Diyos ngadto sa duha ka tinun-an nga naglibog labot sa iyang kamatayon. Ang Lucas 24:27 nag-ingon: “Sugod kang Moises ug sa tanang Manalagna gibadbad niya kanila ang mga butang maylabot sa iyang kaugalingon diha sa tibuok nga Kasulatan.”

Matikdi nga mipili si Jesus ug espesipikong ulohan—“iyang kaugalingon,” ang Mesiyas—ug nga mikutlo siya gikan sa “tibuok nga Kasulatan” diha sa iyang paghisgot. Busa gisumpaysumpay ni Jesus ang may kalabotang mga teksto sa Bibliya samag mga piraso sa jigsaw puzzle, nga nakapaarang sa iyang mga tinun-an sa pagkasabot sa tin-awng sumbanan sa espirituwal nga kamatuoran. (2 Timoteo 1:13) Tungod niini, wala lamang sila malamdagi kondili natandog usab pag-ayo. Ang asoy nagsugilon kanato: “Sila miingon sa usag usa: ‘Dili ba ang atong mga kasingkasing nagdilaab man samtang nakigsulti siya kanato sa dalan, samtang iyang gibuksan sa bug-os ang mga Kasulatan kanato?’”—Lucas 24:32.

Ang mga Saksi ni Jehova naningkamot sa pagsundog sa mga paagi nga gigamit ni Jesus diha sa ilang ministeryo. Ang ilang pangunang mga tabang sa pagtuon mao ang brosyur nga Unsay Gikinahanglan sa Diyos Kanato? ug ang librong Kahibalo nga Motultol sa Kinabuhing Walay Kataposan. Kini naghisgot sa daghang makaiikag nga mga ulohan sa Bibliya, sama sa: “Kinsa ang Diyos?,” “Nganong Gitugotan sa Diyos ang Pag-antos?,” “Sa Unsang Paagi Makaplagan Nimo ang Matuod nga Relihiyon?,” “Kini ang Kataposang mga Adlaw!,” ug “Pagtukod ug Pamilya nga Nagpasidungog sa Diyos.” Ang matag leksiyon dunay daghang teksto.

Giawhag ka sa pagkontak sa mga Saksi ni Jehova diha sa imong komunidad o sa pagsulat sa adres diha sa panid 2 niining magasina alang sa libreng pagtuon sa Bibliya bahin niini ug sa ubang mga ulohan diha mismo sa imong balay.

[Hulagway]

Abota ang kasingkasing sa imong estudyante pinaagi sa pagsentro sa pagtagad diha sa espesipikong mga ulohan sa Bibliya

[Mga hulagway sa panid 7]

Nasabtan ba nimo ang kahulogan sa modelong pag-ampo ni Jesus?

“Amahan namo nga anaa sa mga langit, pagabalaanon unta ang imong ngalan . . .”

“Paanhia ang imong [Mesiyanikong] gingharian . . .”

“Matuman unta ang imong kabubut-on, maingon sa langit, mao man usab sa yuta”