Kon sa Unsang Paagi Natabangan sa Usa ka Anak ang Iyang Amahan
SI James, nga taga-Inglaterra, nga lapas lang ug diyutay sa pangedarong 30, adunay grabeng mga depekto sa hunahuna ug gamayng autismo. Bisan pa niana, sulod sa daghang katuigan siya nagatambong sa mga tigom sa mga Saksi ni Jehova uban sa iyang inahan ug igsoong babaye. Apan, ang iyang amahan wala gayod magpakitag interes sa ilang pagtuo. Usa ka gabii human sa tigom nga dunay demonstrasyon nga nagpakita kon unsaon pagdapit sa usa ka kaila nga motambong sa Memoryal sa kamatayon ni Kristo, si James midalidali pagsulod sa iyang lawak. Kay nabalaka, misunod dayon ang iyang inahan kaniya ug nakaplagan si James nga natarantar sa pagpangukay sa daang mga gula sa mga magasing Bantayanang Torre ug Pagmata! Gikuha niya ang usa nga may hulad sa imbitasyon sa Memoryal sa luyong panid ug midalidali pag-adto sa iyang amahan. Gitudlo una niya ang hulagway ug dayon gitudlo ang iyang amahan ug miingon “Ikaw!” Ang iyang inahan ug amahan nagtinan-away sa usag usa sa kahibulong tungod kay ilang naamgohan nga si James nagdapit sa iyang amahan nga motambong sa Memoryal. Ang iyang amahan miingon nga basig makatambong siya.
Sa gabii sa Memoryal, miadto si James sa aparador sa iyang amahan, mipilig karsones, gidala kini ngadto sa iyang amahan, ug misenyas nga kinahanglang isul-ob niya kini. Mitubag ang iyang amahan nga dili siya moadto sa tigom. Busa, si James ug ang iyang inahan lang ang miadto sa Kingdom Hall.
Apan, sa paglabay sa pipila ka panahon, si James dili na mosunod sa dihang sugoon siya sa iyang inahan sa pagpangandam alang sa pagtambong sa mga tigom sa kongregasyon, nga mipalabi hinuon sa pagpabilin sa balay uban sa iyang amahan. Dayon usa niana ka Dominggo sa buntag, wala na usab si James mosunod sa dihang gipaandam siya sa iyang inahan alang sa pagtambong sa tigom. Sa dakong katingala sa iyang inahan, ang amahan ni James miadto kaniya ug miingon, “James, kon motambong ko sa tigom karon, motambong ka ba usab?” Midan-ag ang nawong ni James. Mihalog siya sa iyang amahan ug miingon nga “Oo!” ug silang tulo nangadto sa Kingdom Hall.
Sukad niadto, ang amahan ni James padayong nagatambong sa tanang tigom sa Dominggo ug wala madugay miingon nga kon siya buot mouswag, kinahanglang tambongan usab niya ang ubang mga tigom. (Hebreohanon 10:24, 25) Gihimo niya kini, ug duha ka bulan sa ulahi misugod siya sa pagtuon sa Bibliya nga regular. Kusog ang iyang pag-uswag, nga naghimo gilayon ug gikinahanglang mga kausaban sa iyang kinabuhi, ug wala madugay misugod na siya sa pagpakig-ambit sa buluhatong pagsangyaw sa Gingharian. Usa ka tuig human siya nagsugod sa pagtuon sa Bibliya, iyang gipahinungod ang iyang kinabuhi kang Jehova ug gisimbolohan kana pinaagi sa bawtismo sa tubig. Sa pagkakaron siya nag-alagad ingong ministeryal nga alagad sa iyang kongregasyon. Karon ang tanan sa pamilya nag-alagad kang Jehova nga nahiusa.