“Duol sa Diyos, ug Siya Moduol Kaninyo”

Kaniadto ug Karon—Nakaplagan Niya ang Gahom sa Pagbag-o

SI SANDRA, usa ka babaye nga taga-Mexico, naghubit sa iyang kaugalingon ingong anak nga salawayon sa iyang pamilya. Ang pagkasinalikway ug kawalay-pagbati nagdaot sa katuigan sa iyang pagkatin-edyer. Siya miingon: “Nagakahingkod ako nga haw-ang kanunay ang pagbati ug daghag pagduhaduha bahin sa akong paglungtad ug bahin sa kinabuhi sa katibuk-an.”

Samtang nagtungha sa hayskul, si Sandra misugod sa pag-inom sa bino nga nabatonan sa iyang amahan diha sa balay. Sa kadugayan, misugod na siya pagpalit ug kaugalingon niyang bino ug nahimong alkoholiko. “Nawad-an akog kadasig nga mabuhi,” miangkon siya. Tungod sa pagkadesperado, si Sandra misugod sa paggamit ug mga droga. “Ang bugtong butang nga nakatabang kanako sa paghikalimot sa akong mga problema,” matod niya, “mao ang akong gidala sa akong gamayng bag: usa ka botelya sa bino, pipila ka droga, o diyutayng marijuana.”

Human makalampos si Sandra sa medikal nga tunghaan, siya mas pang nahitumpawak sa alkoholismo. Misulay siya sa paghunos sa iyang kinabuhi. Apan wala siya mamatay.

Wala makita ni Sandra diha sa daghang nagkalainlaing mga relihiyon ang espirituwal nga tabang ug emosyonal nga pagpaluyo. Tungod kay nawad-ag paglaom, sublisubli siyang mituaw sa Diyos: “Hain ka man? Nganong dili mo ako tabangan?” Ubos na kaayo ang iyang pagtamod sa kaugalingon sa dihang usa sa mga Saksi ni Jehova ang nakig-estorya kaniya. Mitultol kini ngadto sa usa ka personal nga pagtuon sa Bibliya. Natandog pag-ayo si Sandra sa dihang iyang nakat-onan nga “si Jehova haduol niadtong mga dugmok ug kasingkasing.”—Salmo 34:18.

Ang nagtudlo kang Sandra sa Bibliya nagtabang kaniya sa pagsabot nga si Jehova nga Diyos nahibalo kon unsa kita ka huyang tungod sa sala ug pagkadili-hingpit nga atong napanunod gikan kang Adan. Naamgohan ni Sandra nga nakasabot ang Diyos nga dili nato makab-ot sa hingpit ang matarong nga mga sukdanan. (Salmo 51:5; Roma 3:23; 5:12, 18) Nalipay siya sa pagkahibalo nga si Jehova wala magsentro sa iyang pagtagad nganha lamang sa atong mga kahuyangan, ug siya wala magdahom kanato ug labaw kay sa atong mahimo. Ang salmista nangutana: “Kon mga kasaypanan mao pa ang imong gibantayan, Oh Jah, Oh Jehova, kinsa ba ang makabarog?”—Salmo 130:3.

Usa ka hinungdanong kamatuoran sa Bibliya nga nakapalipay sa kasingkasing ni Sandra mao ang halad lukat ni Jesu-Kristo. Pinaagi niana, si Jehova maluluy-ong naghatag sa masinugtanong mga tawo ug matul-id nga baroganan bisan pa sa ilang mga pagkadili-hingpit. (1 Juan 2:2; 4:9, 10) Oo, atong maangkon “ang kapasayloan sa atong kalapasan” ug sa ingon matabangan nga mabuntog ang bisan unsang mga pagbati sa pagkawalay-pulos.—Efeso 1:7.

Si Sandra nakakat-on ug hinungdanong mga leksiyon gikan sa panig-ingnan ni apostol Pablo. Gipabilhan pag-ayo ni Pablo ang kalulot sa Diyos tungod sa mapuangorong pagpasaylo sa iyang nangaging mga kasaypanan ug pagpaluyo sa iyang kusganong pagpakigbisog sa pagbuntog sa nagbalikbalik nga mga kahuyangan. (Roma 7:15-25; 1 Corinto 15:9, 10) Gitul-id ni Pablo ang iyang dalan sa kinabuhi, nga ‘gimakmak ang iyang lawas ug gihimo kini nga samag ulipon’ aron makapabilin diha sa dalan nga giuyonan sa Diyos. (1 Corinto 9:27) Wala niya tugoti ang iyang makasasalang mga kiling nga maoy moulipon kaniya.

Ang mga kahuyangan ni Sandra naghasol kaniya, apan siya padayong nakigbugno niana. Tim-os siyang nag-ampo alang sa tabang ni Jehova sa pagbuntog niana ug nagtinguha sa iyang kaluoy. (Salmo 55:22; Santiago 4:8) Kay nakamatikod sa personal nga interes sa Diyos diha kaniya, si Sandra nakahimo sa pag-usab sa iyang kinabuhi. “Nalipay ako sa pagtudlo sa uban sa Bibliya nga bug-os panahon,” siya nag-ingon. Si Sandra nakapribilehiyo sa pagtabang sa iyang magulang ug manghod nga mga babaye nga makahibalo bahin kang Jehova. Samtang ‘gibuhat niya ang maayo,’ siya usab kinabubut-ong naggamit sa iyang medikal nga mga katakos diha sa mga kombensiyon sa mga Saksi ni Jehova.—Galacia 6:10.

Komosta ang bahin sa mga pagkagiyan ni Sandra? Siya masaligong miingon: “Tin-aw ang akong hunahuna. Wala na ako moinom ug alkoholikong ilimnon, manabako, o mag-abuso ug droga. Wala ko kana kinahanglana. Ako nang nakaplagan ang akong gipangita.”

[Blurb sa panid 9]

“Ako nang nakaplagan ang akong gipangita”

[Kahon sa panid 9]

Mga Prinsipyo sa Bibliya nga Makapabag-o

Ang mosunod mao ang pipila ka prinsipyo sa Bibliya nga nakatabang sa daghan nga makalingkawas gikan sa makapahugawng mga pagkagiyan:

“Hinloan nato ang atong kaugalingon sa tanang kahugawan sa unod ug espiritu, nga magahingpit sa pagkabalaan diha sa kahadlok sa Diyos.” (2 Corinto 7:1) Ang Diyos magapanalangin niadtong nakahinlo na sa ilang kaugalingon sa kahugawan, nga naglikay sa dili-hinlong mga binuhatan.

“Ang pagkahadlok kang Jehova mao ang pagdumot sa daotan.” (Proverbio 8:13) Ang masimbahong kahadlok sa Diyos motabang sa usa ka tawo sa paglingkawas gikan sa daotang mga batasan, nga naglakip sa pag-abuso sa droga. Gawas nga mapahimut-an si Jehova, ang nausab nga tawo mapanalipdan batok sa makalilisang nga mga sakit.

“Magpasakop ug magmasinugtanon sa mga kagamhanan ug sa mga awtoridad ingon nga mga magmamando.” (Tito 3:1) Diha sa daghang dapit, ang paghupot o paggamit sa usa ka matang sa droga maoy paglapas sa balaod. Ang matuod nga mga Kristohanon dili maghupot o maggamit ug ilegal nga mga droga.