Mga Pangutana Gikan sa mga Magbabasa
Gitugotan ni Jehova ang poligamiya taliwala sa iyang karaang mga alagad, ang mga Israelinhon, apan siya wala na magtugot niana karon. Mausab-usab ba diay ang iyang sukdanan?
Wala usba ni Jehova ang iyang panglantaw sa poligamiya. (Salmo 19:7; Malaquias 3:6) Dili kana bahin sa iyang kahikayan alang sa mga tawo sukad sa sinugdan, ug dili niya kana kahikayan karon. Sa dihang gilalang niya si Eva ingong asawa ni Adan, si Jehova nag-ingon nga ang diyosnong sukdanan maoy usa ka asawa alang sa usa ka bana. “Mao nga ang lalaki mobiya sa iyang amahan ug sa iyang inahan ug siya kinahanglang moipon sa iyang asawa ug sila mahimong usa ka unod.”—Genesis 2:24.
Sa dihang dinhi si Jesu-Kristo sa yuta, gisubli niya ang maong sukdanan agig tubag niadtong nangutana bahin sa diborsiyo ug pagminyo pag-usab. Siya miingon: “Wala ba ninyo mabasa nga siya nga naglalang kanila sukad sa sinugdan nagbuhat kanila nga lalaki ug babaye ug nag-ingon, ‘Tungod niini ang usa ka lalaki mobiya sa iyang amahan ug sa iyang inahan ug moipon sa iyang asawa, ug ang duha mahimong usa ka unod’? Mao nga dili na sila duha, kondili usa ka unod.” Si Jesus midugang: “Bisan kinsa nga makigdiborsiyo sa iyang asawa, gawas kon tungod sa pakighilawas, ug magminyog lain makapanapaw.” (Mateo 19:4-6, 9) Sumala niini, tin-aw nga ang pagpangasawag daghan maoy pagpanapaw usab.
Nan nganong gitugotan man ang poligamiya sa karaang mga panahon? Hinumdomi nga wala sugdi ni Jehova ang maong batasan. Ang unang tawo nga gihisgotan sa Bibliya nga nagbaton ug kapin sa usa ka asawa mao si Lamek, usa ka kaliwat ni Cain. (Genesis 4:19-24) Sa dihang gipadangat ni Jehova ang Lunop sa adlaw ni Noe, si Noe ug ang tulo niya ka anak nga lalaki adunay tagsatagsa lang ka asawa. Ang tanang poligamista nangamatay sa Lunop.
Kasiglohan sa ulahi sa dihang gipili ni Jehova ang mga Israelinhon ingong iyang katawhan, ang poligamiya naglungtad na sa ilang taliwala, bisan tuod ug dayag nga mas naandan ang pagbaton ug usa lang ka asawa. Ang Diyos wala magbaod nga bungkagon ang mga pamilya nga may kapin sa usa ka asawa. Hinunoa, estrikto niyang gikontrolar ang maong batasan.—Exodo 21:10, 11; Deuteronomio 21:15-17.
Nga ang maong pagtugot sa poligamiya temporaryo lamang masabtan dili lang sa giingon ni Jesus mahitungod sa orihinal nga sukdanan ni Jehova alang sa kaminyoon kondili sa gisulat usab ni apostol Pablo ubos sa inspirasyon sa balaang espiritu sa Diyos. Siya miingon: “Ang matag lalaki magbaton ug kaugalingong asawa ug ang matag babaye magbaton ug kaugalingong bana.” (1 Corinto 7:2) Si Pablo giinspirar usab sa pagsulat nga ang usa ka lalaki nga itudlo ingong magtatan-aw o ministeryal nga alagad diha sa Kristohanong kongregasyon kinahanglang “bana sa usa ka asawa.”—1 Timoteo 3:2, 12; Tito 1:6.
Busa, ang pagtugot ni Jehova sa poligamiya natapos sa dihang natukod ang Kristohanong kongregasyon mga 2,000 ka tuig kanhi. Niadtong panahona, ang sukdanan alang sa kaminyoon nahibalik sa kon unsa kini sa sinugdan sa paglalang sa Diyos sa lalaki ug babaye: usa ka bana alang sa usa ka asawa. Kana mao ang sukdanan taliwala sa katawhan sa Diyos karon sa tibuok kalibotan.—Marcos 10:11, 12; 1 Corinto 6:9, 10.