Kon sa Unsang Paagi ang Pipila Nahinumdoman
MGA tulo ka libo ka katuigan kanhi, milayas si David gikan kang Haring Saul sa Israel. May gipaadto si David kang Nabal, usa ka adunahang tigbuhig karnero ug kanding, aron mangayog pagkaon ug tubig. Sa tinuoray, si Nabal may utang-kabubut-on kang David ug sa iyang mga sumusunod tungod sa ilang pagpanalipod sa mga panon sa kahayopan ni Nabal. Bisan pa niadto, wala magpakitag pagkamaabiabihon si Nabal. Gisinggitan ug gikasab-an pa ni Nabal ang mga tawo ni David. Gipameligro ni Nabal ang iyang kaugalingon, kay si David dili tawo nga kayagayagaan.—1 Samuel 25:5, 8, 10, 11, 14.
Ang tinamdan ni Nabal wala mahiuyon sa tradisyon sa Tungang Sidlakan sa pag-abiabi sa mga bisita ug mga estranghero. Busa, unsang dungog ang giugmad ni Nabal alang sa iyang kaugalingon? Ang talaan sa Bibliya nag-ingon nga siya “mapig-oton ug daotan sa iyang mga binuhatan” ug “walay-silbing tawo.” Ang iyang ngalan nagkahulogan nga “walay-salabotan,” ug siya nagpasundayag gayod sa maong mga kinaiya. (1 Samuel 25:3, 17, 25) Buot ba nimong mahinumdoman sa maong paagi? Ikaw ba mapig-oton ug gahian sa dihang makiglabot sa uban, ilabina kon sila daw mahuyang? O ikaw ba maluloton, maabiabihon, ug may konsiderasyon?
Si Abigail—Usa ka Masinabtanon nga Babaye
Tungod sa iyang mapig-otong tinamdan, si Nabal nahasugamak sa suliran. Gitakin ni David ug sa iyang 400 ka tawo ang ilang mga espada ug sila milakaw aron tudloan ug leksiyon si Nabal. Si Abigail, ang asawa ni Nabal, nakadungog sa nahitabo. Nahibalo siya nga ang panag-away hapit nang mahitabo. Unsay iyang mahimo? Nagdalidali siyag andam ug daghang pagkaon ug ilimnon ug milakaw aron pagpugong kang David ug sa iyang mga tawo. Sa iyang nahinagbo sila, siya nangaliyupo kang David nga dili mag-ula ug dugo sa walay hinungdan. Nalukmay ang kasingkasing ni David. Gipatalinghogan ni David ang iyang mga hangyo ug miuyon. Wala madugay human sa maong mga panghitabo, namatay si Nabal. Unya, kay naila ni David ang maayong mga hiyas ni Abigail, iyang gipangasawa siya.—1 Samuel 25:14-42.
Unsang dungog ang giugmad ni Abigail alang sa iyang kaugalingon? Siya “maayo sa panghukom,” o “intelihente,” sumala sa pagpahayag niana diha sa orihinal nga Hebreohanon. Dayag nga siya masinabtanon ug praktikal ug nahibalo kon sa unsang paagi ug kanus-a molihok. Sa pagkamaunongon siya milihok aron panalipdan ang iyang hungog nga bana ug iyang panimalay batok sa kadaotan. Sa kadugayan siya namatay, apan may talagsaong dungog ingong usa ka masinabtanong babaye.—1 Samuel 25:3; New International Version.
Unsang Rekord ang Gibilin ni Pedro?
Moabante kita sa unang siglo K.P. ug hisgotan ang 12 ka apostoles ni Jesus. Sa walay duhaduha ang labing mapadayganon ug mapahinaykon mao si Pedro o Cefas, nga sa nangagi maoy mangingisda sa Galilea. Dayag nga siya puwersado ug personalidad nga dili mahadlok nga mopahayag sa iyang mga pagbati. Pananglitan, dihay okasyon nga si Jesus naghugas sa mga tiil sa iyang mga tinun-an. Unsay sanong ni Pedro sa dihang turno na sa paghugas sa iyang mga tiil?
Si Pedro miingon kang Jesus: “Ginoo, hugasan mo ba ang akong mga tiil?” Sa pagtubag si Jesus miingon: “Ang akong ginabuhat dili nimo masabtan sa pagkakaron, apan imo rang masabtan kining mga butanga pagkahuman niini.” Si Pedro mitubag: “Dili mo gayod pagahugasan ang akong mga tiil.” Matikdi ang puwersado apan mapahinaykon nga sanong ni Pedro. Unsay tubag ni Jesus?
“Gawas kon ako maghugas kanimo,” mitubag si Jesus, “ikaw walay bahin kanako.” Si Simon Pedro miingon kaniya: “Ginoo, dili lamang ang akong mga tiil kondili ang akong mga kamot usab ug ang akong ulo.” Sa maong higayon si Pedro mipahayag nga hinobra kaayo! Apan ang mga tawo nahibalo kanunay kon unsay tinamdan ni Pedro. Siya dili malinglahon.—Juan 13:6-9.
Si Pedro mahinumdoman usab tungod sa iyang tawhanon kaayo nga mga kahuyangan. Pananglitan, gilimod niyag katulo si Kristo atubangan sa mga tawo nga nag-akusar nga siya sumusunod sa hinukman-sa-kamatayong si Jesus nga taga-Nasaret. Sa naamgohan ni Pedro ang iyang sayop, siya mihilak sa hilabihan. Dili siya mahadlok nga mopahayag sa iyang kasubo ug pagbasol. Makahuloganon usab nga kining asoya bahin sa paglimod ni Pedro gitala sa mga magsusulat sa Ebanghelyo—nga lagmit gayod tungod sa impormasyon nga gihatag ni Pedro mismo! Siya may igong pagkamapaubsanon sa pag-admitir sa iyang mga kahuyangan. Nahuptan mo ba ang maong hiyas?—Mateo 26:69-75; Marcos 14:66-72; Lucas 22:54-62; Juan 18:15-18, 25-27.
Paglabay sa pipila ka semana human sa iyang paglimod kang Kristo, si Pedro, kay nahupngan sa balaang espiritu, maisogong nagwali ngadto sa panon sa mga Hudiyo panahon sa Pentekostes. Kadto usa ka seguradong ilhanan nga ang nabanhaw nga Jesus may pagsalig na kaniya.—Buhat 2:14-21.
Sa laing higayon, si Pedro nabitik sa laing lit-ag. Gipatin-aw ni apostol Pablo nga sa wala pa moabot ang pipila ka Hudiyong mga igsoon sa Antioquia, si Pedro dayag nga nakig-uban sa Hentil nga mga magtutuo. Apan, mibulag siya kanila “kay nahadlok man kanila nga mga tinuli” nga bag-o pang nangabot gikan sa Jerusalem. Giyagyag ni Pablo ang dobleng sukdanan ni Pedro.—Galacia 2:11-14.
Bisan pa, kinsa ba ang tinun-an nga maisogong nagpahayag sa iyang hunahuna sa makuyaw nga gutlo sa dihang kadaghanan sa mga sumusunod ni Jesus andam nga mobiya kaniya? Kadto ang higayon nga gibutyag ni Jesus ang usa ka bag-ong butang, ang mahitungod sa kahulogan sa pagkaon sa iyang unod ug pag-inom sa iyang dugo. Siya miingon: “Gawas kon kamo mokaon sa unod sa Anak sa tawo ug moinom sa iyang dugo, kamo walay kinabuhi diha sa inyong kaugalingon.” Kadaghanan sa Hudiyong mga sumusunod ni Jesus nangapandol ug miingon: “Kining mga pulonga makapakugang; kinsa ang makapatalinghog niini?” Unsay nahitabo niadto? “Tungod niini daghan sa iyang mga tinun-an ang namalik ngadto sa mga butang nga ilang gitalikdan ug wala na molakaw kauban niya.”—Juan 6:50-66.
Niadtong makuyaw nga gutlo, si Jesus miliso ngadto sa 12 ka apostoles ug nangutana sa masinabotong pangutana: “Buot ba usab ninyong mobiya?” Si Pedro mitubag: “Ginoo, kang kinsa man kami moadto? Ikaw mao ang may mga pulong mahitungod sa kinabuhing walay kataposan; ug kami mituo ug nahibalo nga ikaw mao ang Balaang Usa sa Diyos.”—Juan 6:67-69.
Unsang dungog ang naugmad ni Pedro? Ang tawong nakabasa sa mga asoy bahin kaniya mahingangha gayod sa iyang pagkamatinud-anon ug pagkaprangka, sa iyang pagkamaunongon, ug iyang kaandam modawat sa iyang mga kahuyangan. Pagkamaayong ngalan ang iyang giugmad alang sa iyang kaugalingon!
Unsay Nahinumdoman sa mga Tawo Bahin Kang Jesus?
Ang ministeryo ni Jesus sa yuta milungtad sa tulo ug tunga ka tuig lamang. Bisan pa niana, sa unsang paagi siya nahinumdoman sa iyang mga sumusunod? Tungod kay siya hingpit, walay sala, siya ba tigpalain? Nagharihari ba siya tungod kay nasayod siya nga siya ang Anak sa Diyos? Iya bang gihadlok ug gipugos ang iyang mga sumusunod aron mosunod kaniya? Siya ba nag-isip sa iyang kaugalingon nga seryoso nga siya walay katistis? Puliki ba kaayo siya nga wala siyay panahon alang sa mga maluyahon ug mga masakiton o alang sa mga bata? Nakatamay ba siya sa mga tawong lahi ug rasa ug sa mga babaye, sama sa kalalakin-an niadtong panahona? Unsay gisulti sa talaan kanato?
Interesadog mga tawo si Jesus. Ang pagtuon bahin sa iyang ministeryo mopadayag nga sa daghang higayon siya nag-ayog mga bakol ug mga masakiton. Nanlimbasog siya pag-ayo sa pagtabang sa mga kabos. Siya nagpakitag interes sa mga bata, nga nagsugo sa iyang mga tinun-an: “Pasagdi ang mga bata nga moduol kanako; ayaw sila pagpugngi.” Unya “gikugos [ni Jesus] ang mga bata ug gipanalanginan sila, nga gitapion ang iyang mga kamot diha kanila.” Ikaw ba mohatag ug panahon alang sa mga bata, o ikaw ba puliki kaayo nga dili gani makamatikod nga sila anaa?—Marcos 10:13-16; Mateo 19:13-15.
Sa dinhi si Jesus sa yuta, ang mga Hudiyo nabug-atan sa relihiyosong mga lagda nga lapas na sa mga kinahanglanon sa Balaod. Ang ilang relihiyosong mga pangulo nagpahamtang ug bug-at nga mga lulan sa mga tawo, samtang sila mismo dili motarog sa mga lulan pinaagi sa usa sa ilang mga tudlo. (Mateo 23:4; Lucas 11:46) Busa, pagkalahi ni Jesus! Siya miingon: “Umari kanako, kamong tanang nabudlayan ug nabug-atan, ug ako magapalagsik kaninyo.”—Mateo 11:28-30.
Nalagsik ang mga tawo sa dihang nakig-uban sila kang Jesus. Wala niya hadloka ang iyang mga tinun-an, mao nga sila nahadlok nga mopahayag sa ilang hunahuna. Sa pagkamatuod, siya nangutana kanila aron ipahayag nila ang ilang hunahuna. (Marcos 8:27-29) Ang Kristohanong mga magtatan-aw angayng mangutana sa ilang kaugalingon: ‘Kana ba ang impresyon sa isigkamagtutuo kanako? O ang ubang mga ansiyano mosulti ba gayod kon unsay ilang pagtuo, o magpanuko sila sa pagsulti?’ Pagkamakapadasig sa dihang ang mga magtatan-aw daling maduolan, mamati sa uban, ug magpabilin nga daling mopahiuyon! Ang pagkadili-makataronganon mobabag lamang sa prangka ug walay-pagpanuko nga panaghisgot.
Bisan pag si Jesus mao ang Anak sa Diyos, wala gayod siya mag-abuso sa iyang gahom o awtoridad. Hinunoa, nangatarongan siya sa iyang mga tigpatalinghog. Kana ang kahimtang sa dihang ang mga Pariseo misulay sa pagbitik kaniya pinaagi sa bitik nga pangutana: “Subay ba sa balaod nga mobayad ug buhis por ulo ngadto kang Cesar o dili?” Gisultihan sila ni Jesus nga ipakita kaniya ang usa ka sensilyo ug nangutana kanila: “Kansang dagway ug sinulat kini?” Mitubag sila: “Kang Cesar.” Unya siya miingon kanila: “Busa, ibayad ninyo kang Cesar ang mga butang ni Cesar, apan ang mga butang sa Diyos ngadto sa Diyos.” (Mateo 22:15-21) Ang yano nga pagpangatarongan igo na.
May katistis ba si Jesus? Ang pipila ka magbabasa mahimong makamatikod sa katistis sa dihang makabasa sila sa kasulatan diin si Jesus miingon nga mas sayon pa sa usa ka kamelyo nga makalusot sa mata sa dagom kay sa usa ka datong tawo nga makasulod sa Gingharian sa Diyos. (Mateo 19:23, 24) Ang ideya mismo nga ang usa ka kamelyo mosulay paglusot sa mata sa literal nga dagom sa panahi maoy hinobrang pagsulti. Ang laing pananglitan sa ingon nga hinobrang pagsulti mao ang pagkakita sa uhot diha sa mata sa usa ka igsoon apan dili pagkakita sa salagunting diha sa iyang kaugalingong mata. (Lucas 6:41, 42) Dili, si Jesus dili usa ka estriktong disiplinaryan. Madasigon ug mahigalaon siya. Alang sa mga Kristohanon karon, ang katistis makapasanag sa mangiob nga panahon sa kalisdanan.
Pagkamabination ni Jesus Alang sa mga Babaye
Unsay pagbati sa mga babaye kon anaa si Jesus? Segurado nga siya may daghang sumusunod nga babaye, lakip ang iyang inahan mismo, si Maria. (Lucas 8:1-3; 23:55, 56; 24:9, 10) Ang mga babaye wala magpanuko sa pagduol kang Jesus nga sa usa ka higayon ang usa ka babaye nga ‘nailhan nga usa ka makasasala’ naghugas sa iyang mga tiil pinaagi sa iyang mga luha ug nagpahid niana sa pinahumotan nga lana. (Lucas 7:37, 38) Ang laing babaye, kinsa nag-antos sa pagtalinugo sa daghang katuigan, miukiok agi sa panon aron makahikap sa iyang besti aron siya maayo. Gidayeg ni Jesus ang iyang pagtuo. (Mateo 9:20-22) Oo, alang sa mga babaye, si Jesus daling maduolan.
Sa laing higayon, si Jesus nakigsulti sa usa ka babayeng Samarianhon diha sa usa ka atabay. Ang babaye natingala nga siya miingon: “Naunsa ba nga ikaw, bisan pa usa ka Hudiyo, nangayo kanakog mainom, nga ako babayeng Samarianhon man?” Abi mo, ang mga Hudiyo walay pagpakiglabot sa mga Samarianhon. Si Jesus mipadayon sa pagtudlo kaniya ug kahibulongang kamatuoran bahin sa ‘tubig nga magabugwak aron mohatag ug kinabuhing walay kataposan.’ Siya relaks uban sa mga babaye. Wala siya mobating giduhaduhaan ang iyang posisyon.—Juan 4:7-15.
Si Jesus mahinumdoman tungod sa iyang daghang maluluy-on nga mga hiyas, lakip ang iyang nagasakripisyo-sa-kaugalingong espiritu. Siya ang kahugpongan sa diyosnong gugma. Gihatag ni Jesus ang sumbanan alang sa tanan nga gustong mahimong iyang mga sumusunod. Unsa ka suod ang imong pagsunod sa iyang panig-ingnan?—1 Corinto 13:4-8; 1 Pedro 2:21.
Sa Unsang Paagi Nahinumdoman ang mga Kristohanon sa Modernong Adlaw?
Sa modernong panahon, ang libolibo nga matinumanong mga Kristohanon namatay na, nga ang daghan kanila sa tigulang nga edad, ang uban batabata pa. Apan sila nagbilin ug maayong dungog. Ang pipila, sama kang Crystal, kinsa namatay nga tigulang na, nahinumdoman tungod sa ilang gugma ug makihugoyon nga kinaiya. Ang uban, sama kang Dirk, kinsa namatay sa edad nga mga 43 pa lang, nahinumdoman tungod sa pagkamangayaon ug pagkamatinabangon.
Unya anaa ang panig-ingnan ni José nga taga-Espanya. Niadtong katuigang 1960, sa dihang ang buluhatong pagsangyaw sa mga Saksi ni Jehova gidili sa maong nasod, si José minyo na ug may tulo ka bata pang mga anak nga babaye. May permanente siyang trabaho sa Barcelona. Apan niadtong panahona, may panginahanglan alang sa hamtong nga Kristohanong mga ansiyano sa habagatang Espanya. Gibiyaan ni José ang iyang permanenteng trabaho ug mibalhin ngadto sa Málaga kauban sa iyang pamilya. Gisagubang nila ang lisod nga pangabuhi, nga sagad walay panarbaho.
Bisan pa niana, nailhan si José tungod sa iyang matinumanon, kasaligan nga panig-ingnan diha sa ministeryo ug tungod sa sulondan nga pagmatuto sa iyang mga anak nga babaye, nga iyang nalampos uban sa tabang sa iyang mapaluyohong asawa, si Carmela. Sa dihang gikinahanglan ang usa ka tawo aron mag-organisar ug Kristohanong mga kombensiyon sa rehiyon, si José andam kanunay nga mohimo niana. Ikasubo, samtang siya mga 50 anyos lang, siya gitakboyan ug seryosong sakit nga maoy hinungdan sa iyang kamatayon. Bisan pa niadto, siya nagbilin ug dungog ingong kasaligan, kugihang ansiyano ug mahigugmaong bana ug amahan.
Busa, sa unsang paagi ikaw mahinumdoman? Kon ikaw namatay gahapon, unsay isulti sa mga tawo bahin kanimo karon? Kini maoy pangutana nga mahimong magdasig kanatong tanan sa pagpauswag sa atong panggawi.
Unsay mahimo nato aron maugmad ang maayong dungog? Makapauswag kita kanunay sa pagpasundayag sa mga bunga sa espiritu pananglitan ang gugma, hataas-nga-pailob, kalulot, kalumo, ug pagpugong-sa-kaugalingon. (Galacia 5:22, 23) Oo, sa pagkatinuod, “ang usa ka [maayong] ngalan mas maayo pa kay sa maayong lana, ug ang adlaw sa kamatayon kay sa adlaw nga natawhan.”—Ecclesiastes 7:1; Mateo 7:12.
[Hulagway sa panid 5]
Si Abigail nahinumdoman tungod sa iyang maayong panghukom
[Hulagway sa panid 7]
Si Pedro nahinumdoman tungod sa iyang mapahinaykon apan matinud-anong personalidad
[Hulagway sa panid 8]
Si Jesus mihatag ug panahon sa mga bata