Mga Pangutana Gikan sa mga Magbabasa
Unsa ang bawtismo sa mga patay?
Sa paghisgot mahitungod sa langitnong pagkabanhaw, si apostol Pablo nagsulat ug usa ka labing makapaikag nga teksto. Sa Ang Balaan nga Kasulatan nga gipatik sa Philippine Bible Society, atong mabasa: “Kon dili pa, unsa man lamay ipasabot sa mga tawo sa ilang pagpabawtismo alang sa mga patay? Kon ang mga patay dili man ugaling banhawon, nganong bawtismohan pa man ang mga tawo alang sa mga patay?” Ug ang Maayong Balita (Cebuano Popular Version) naghubad niining tekstoha: “Karon, unsa na may dangatan niadtong mga tawo nga gibunyagan alang sa mga patay? Unsa may ilang mahimo? Kon tinuod ang giingon nila nga dili banhawon ang mga patay ngano man nga gibunyagan sila alang sa mga patay?”—1 Corinto 15:29.
Gipasabot ba dinhi ni Pablo nga ang mga tawong buhi bawtismohan alang niadtong nangamatay nga wala mabawtismohi? Morag mao kini ang gipasabot kon pinasikad niini ug sa uban pang mga hubad sa Bibliya. Apan, ang pagsusi pag-ayo sa Kasulatan ug sa orihinal nga Grego nga gigamit ni Pablo nagsugyot ug laing konklusyon. Gipasabot ni Pablo nga ang dinihogang mga Kristohanon bawtismohan, o ituslob sa tubig, ngadto sa usa ka dalan sa kinabuhi nga motultol sa usa ka kamatayon tungod sa integridad sama nianang kang Kristo. Human niana, sila banhawon ngadto sa usa ka espirituhanong kinabuhi sama kaniya.
Gisuportahan sa Kasulatan kini nga katin-awan. Sa iyang sulat ngadto sa mga taga-Roma, si Pablo miingon: “Wala ba kamo mahibalo nga kitang tanan nga gibawtismohan ngadto kang Kristo Jesus gibawtismohan ngadto sa iyang kamatayon?” (Roma 6:3) Sa iyang sulat ngadto sa mga taga-Filipos, si Pablo naghisgot sa iyang kaugalingon, nga nag-ingon: “Ang panag-ambitay diha sa mga pag-antos [ni Kristo], nga nagatugyan sa akong kaugalingon sa kamatayon nga sama sa iyaha, aron makita kon ako sa bisan unsang paagi makabaton sa mas sayo nga pagkabanhaw gikan sa mga patay.” (Filipos 3:10, 11) Gipunting ni Pablo nga ang kinabuhi sa usa ka dinihogang sumusunod ni Kristo naglangkit ug usa ka dalan nga nagahupot sa integridad ilalom sa pagsulay, adlaw-adlaw nga pag-atubang sa kamatayon, ug sa kataposan usa ka kamatayon tungod sa integridad, nga sundan sa langitnong pagkabanhaw.
Makaiikag nga kini ug ang ubang mga teksto nga direktang naghisgot sa kamatayon may kalabotan sa mga bawtismado nagpunting sa buhing mga indibiduwal nga nabawtismohan ug dili niadtong nangamatay. Gisultihan usab ni Pablo ang kaubang dinihogan nga mga Kristohanon: “Kamo gilubong uban kaniya diha sa iyang bawtismo, ug pinaagi sa relasyon uban kaniya kamo usab duyog nga gibangon pinaagi sa inyong pagtuo sa pagpalihok sa Diyos, nga nagbangon kaniya gikan sa mga patay.”—Colosas 2:12.
Ang Gregong preposisyon nga hy·perʹ, nga gihubad “alang” o “alang sa” sa lainlaing mga hubad sa Bibliya diha sa 1 Corinto15:29, mahimo usab nga nagpasabot nga “aron.” Busa, uyon sa ubang mga teksto sa Bibliya, ang Bag-ong Kalibotang Hubad sa Balaang Kasulatan hustong naghubad niining bersikuloha: “Unsay buhaton nila nga gibawtismohan aron mahimong mga patay? Kon ang mga patay dili man gayod bangonon, ngano man nga sila gibawtismohan usab aron mahimong ingon niana?”