Paghimog mga Desisyon—Hagit nga Dili Kalikayan
“WALA nay mas lisod, ug busa mas bililhon kay sa pagkahibalo kon unsaon paghimog desisyon,” matod pa kanhi ni Napoleon Bonaparte, ika-19ng siglo nga emperador sa Pransiya. Tingali mouyon ka niining duha ka bahin sa paghimog desisyon, tungod kay importante para sa kadaghanang tawo nga silay magbuot sa ilang kaugalingong kinabuhi. Sa samang higayon, ilang nasayran nga usahay lisod kaayo ang paghimog mga desisyon.
Sayon man o lisod, ang paghimog mga desisyon dili kalikayan. Kita modesisyon sa matag adlaw. Inigbangon mabuntag, kinahanglang modesisyon kita kon unsay isul-ob, unsay ipamahaw, ug kon unsaon pag-atubang ang daghang ubang mga butang sa tibuok adlaw. Ang kadaghanan niining maong mga desisyon dili ra kaayo importante. Panagsa ra nga kita maghunahuna pag-usab bahin niini. Talagsa ra nga kita dili makatulog ug maayo sa pagsigeg hunahuna kon kining mga desisyona husto ba o dili.
Sa laing bahin, ang ubang mga desisyon dakog epekto. Daghang batan-on sa kalibotan karon kinahanglang modesisyon kon unsay ilang kuhaon nga propesyon. Tingali kinahanglang modesisyon sila kon unsang matanga sa edukasyon ang ilang gikinahanglan ug kon unsa ka dugay silang moeskuyla. Sa madugay ug sa madali ang kadaghanan kanila modesisyon kon magminyo ba o magpabiling dili-minyo. Kadtong nakahukom nga magminyo kinahanglang modesisyon: ‘Husto na ba ang akong edad ug hamtong na aron magminyo? Unsang matanga sa kapikas ang akong gusto, o mas importante, unsang matanga sa kapikas ang akong gikinahanglan?’ Ang atong desisyon sa pagpilig kapikas dako kaayog epekto sa atong kinabuhi.
Sa mga butang nga importante kaayo, hinungdanon ang paghimog maalamong mga desisyon, tungod kay ang kalipay nag-agad ug dako niini. Ang ubang mga tawo tingali nagtuo nga sila makamaong mohimo ug ingon niana nga mga desisyon ug tingali sila dili modawat ug tabang sa dihang itanyag kini. Maalamon kaha kana? Atong tan-awon.
[Picture Credit Line sa panid 3]
Napoleon: From the book The Pictorial History of the World