Mga Magmamantala sa Gingharian Nagtaho

Pagpamatuod sa mga Tawo Diha sa Ilang Trabahoan

SA UNSANG paagi ang mga apostoles nga si Mateo, Pedro, Andres, Santiago, ug Juan managsama? Silang tanan gitawag ni Jesus samtang didto sila sa ilang trabahoan. Sila Pedro, Andres, Santiago, ug Juan puliki sa ilang buluhaton labot sa pagpangisda sa dihang gidapit sila ni Jesus, nga nag-ingon: “Sunod kamo kanako.” Si Mateo atua sa buhatan sa buhis sa dihang gidapit siya nga mahimong tinun-an ni Jesus.—Mateo 4:18-21; 9:9.

Ang pagsangyaw sa mga tawo diha sa ilang dapit sa trabaho magantihon. Kay nakaamgo niini, ang mga Saksi ni Jehova sa Japan di pa dugayng mihimog hiusang paningkamot sa pagpakigbahin niining matanga sa ministeryo. Unsay mga resulta? Sulod sa pipila ka bulan, libolibong pagbalikduaw ang nahimo, ug mga 250 ka pagtuon sa Bibliya ang nasugdan. Tagda ang mosunod nga mga kasinatian.

Usa ka bug-os-panahong ministro sa Tokyo ang nakahibalag ug usa ka manedyer sa restawran kinsa nakaestorya na ug usa ka Saksi sa dihang estudyante pa siya mga 30 ka tuig na ang milabay. Bisan tuod wala kaayo masabti sa manedyer ang mga gihisgotan niadtong tungora, siya nainteres sa Bibliya. Karon nga napukaw pag-usab ang iyang interes, iya dayong gidawat ang usa ka pagtuon sa Bibliya ginamit ang librong Kahibalo nga Motultol sa Kinabuhing Walay Kataposan.a Dugang pa, nagsugod siya ug iyang kaugalingong eskedyul sa pagbasag Bibliya kada gabii una matulog.

Usa ka espesyal nga payunir nga ministro miduaw sa usa ka opisina. Bisan tuod wala niya makaestorya ang manedyer, ang batan-ong babaye nga nakatubag sa telepono sa manedyer nangutana, “Buot ka bang makig-estorya nako?” Human sa mubong pakighisgot diha sa telepono, ang babaye migula ug miingon nga interesado siyang mobasag Bibliya. Ang espesyal nga payunir mihikay nga mobalik nga magdalag Bibliya ug gisugdan ang pagtuon sa Bibliya uban kaniya, nga gihimo diha sa duol nga parke sayo sa buntag una pa motrabaho.

Sa laing opisina, nakita sa usa ka tawo ang iyang kauban sa trabaho nga midawat ug mga magasin nga Bantayanang Torre ug Pagmata! apan gilabay dayon kini paglakaw sa Saksi. Pag-abot sa tawo diha sa ilang balay, iyang gisulti ngadto sa iyang Saksi nga asawa ang maong hitabo ug miingon nga kon siya pa unta ang gitanyagan sa magasin maminaw unta siya sa makadiyot. Nadunggan kini sa iyang anak nga babaye ug gisugilon ang nahitabo ngadto sa usa ka Saksi nga tigsangyaw sa maong teritoryo sa komersiyo. Giduaw dayon sa Saksi ang bana diha sa opisina ug gisugdan siya ug pagtuon sa Bibliya. Wala madugay, ang tawo misugod na sa pagtambong nga regular sa mga tigom ma-Dominggo.

Ang pagsangyaw sa mga tawo diha sa ilang trabahoan aduna pay laing kaayohan. Daghang magmamantala sa Japan ang nahanas sa paghimog mga pagbalikduaw diha sa mga tindahan, pabrika, ug mga opisina. Dugang pa, tungod niining paagiha sa pagsangyaw, daghang dili-aktibo ang nakaplagan ug nasugdan ug mga pagtuon. Ang mga resulta maayo kaayo. Usa ka kongregasyon sa sentro sa Tokyo mitaho di pa dugay ug 108 ka pagtuon sa Bibliya diha sa balay, nga sobra pa sa doble sa gidaghanon sa gitaho sa miaging tuig.

[Footnote]