Salig sa Espiritu sa Diyos sa Pag-atubang sa mga Kausaban sa Kahimtang sa Kinabuhi

“Buhata ang kutob sa imong maarangan nga itanyag ang imong kaugalingon sa Diyos ingong inuyonan.”—2 TIMOTEO 2:15.

1. Unsang mga kausaban ang mahimong usa ka pagsulay sa atong espirituwal nga kahimsog?

ANG kalibotan alirong nato kanunayng nagakausab. Makita nato ang talagsaong siyentipikanhon ug teknolohikanhong kauswagan nga giubanan ug grabeng pagkadaot sa mga sukdanan sa moralidad. Sumala sa atong gihisgotan sa miaging artikulo, kinahanglang suklan sa mga Kristohanon ang kontra-Diyos nga espiritu sa kalibotan. Hinuon, samtang mausab ang kalibotan kita mausab usab sa daghang paagi. Moagi kita sa pagkabata hangtod sa pagkahamtong. Kita mahimong makabaton ug mawad-ag bahandi, kahimsog, ug mga minahal. Dili nato mapugngan ang maong mga kausaban, ug kana makapatunghag bag-o ug lisod nga mga pagsulay sa atong espirituwal nga kahimsog.

2. Sa unsang paagi si David nakasinatig mga kausaban sa kahimtang sa iyang kinabuhi?

² Pipila ra ka tawo ang makasinatig grabeng mga kausaban sa kahimtang sa ilang kinabuhi nga sama kang David, ang anak ni Jese. Gikan sa pagkadili-ilado ingong magbalantay ug karnero, kalit nga nausab ang kahimtang ni David ngadto sa pagkabantogan ingong bayani sa nasod. Sa ulahi siya nahimong kagiw, gipangita nga samag hayop sa usa ka masinahong hari. Human niadto, si David nahimong hari ug mananaog. Nag-antos siya sa masakit nga mga resulta sa bug-at nga sala. Nakaagom siyag trahedya ug pagkabahinbahin sulod sa iyang pamilya. Siya nahimong bahandianon, natigulang, ug nakasinatig mga kaluyahon sa pagkatigulang. Bisan pa sa daghang kausaban sa kahimtang sa iyang kinabuhi, hinunoa, si David nagpadayag ug pagsalig kang Jehova ug sa Iyang espiritu sa iyang tibuok kinabuhi. Iyang gihimo ang iyang maarangan sa pagtanyag sa iyang kaugalingon nga ‘inuyonan sa Diyos,’ ug siya gipanalanginan sa Diyos. (2 Timoteo 2:15) Bisan pag ang atong mga kahimtang lahi sa kang David, kita makakat-on sa iyang paagi sa pagsagubang sa mga kahimtang sa iyang kinabuhi. Ang iyang panig-ingnan makatabang kanato sa pagsabot kon sa unsang paagi padayon natong mabatonan ang espiritu sa Diyos samtang atubangon nato ang mga kausaban sa kahimtang sa atong kinabuhi.

Pagkamapaubsanon ni David—Usa ka Maayong Panig-ingnan

3, 4. Sa unsang paagi si David nabantog sa tibuok nasod gikan sa pagkadili-ilado ingong magbalantay ug karnero?

³ Samtang bata pa, si David dili ilado bisan sulod sa iyang pamilya. Sa dihang ang manalagnang si Samuel miabot sa Betlehem, gipaila sa amahan ni David ang pito sa iyang walo ka anak lalaki. Si David, ang kinamanghoran, nag-atiman lang sa mga karnero. Bisan pa niana, si Jehova nagpili kang David aron mahimong umaabot nga hari sa Israel. Gipatawag si David gikan sa kapatagan. Dayon, ang talaan sa Bibliya nag-ingon: “Gikuha ni Samuel ang sungay nga may lana ug gidihogan siya atubangan sa iyang mga igsoon. Ug ang espiritu ni Jehova milihok diha kang David sukad niadtong adlawa.” (1 Samuel 16:12, 13) Si David misalig sa maong espiritu sa tibuok niyang kinabuhi.

⁴ Sa wala madugay ang maong magbalantay ug karnero nabantog sa tibuok nasod. Gipatawag siya aron sa pag-alagad sa hari ug pagtugtog alang kaniya. Gipatay niya ang manggugubat nga si Goliat, usa ka higante nga mabangis kaayo nga bisan ang eksperyensiyadong mga sundalo sa Israel nahadlok nga moatubang kaniya. Sa gitudlo ingong pangulo sa mga manggugubat, si David malamposong nakigbugno sa mga Filistehanon. Gimahal siya sa mga tawo. Sila mikomposo pa ganig mga awit nga nagdayeg kaniya. Sayo pa niana, ang usa ka magtatambag ni Haring Saul nagbatbat sa batan-ong si David dili lang ingong “batid magpatokar” ug alpa kondili ingon usab nga “maisog, gamhanan nga tawo ug usa ka manggugubat ug makinaadmanong manulti ug usa ka tawong maanindot ug panglawas.”—1 Samuel 16:18; 17:23, 24, 45-51; 18:5-7.

5. Unsa unta ang makahimo kang David nga hambogiro, ug giunsa nato pagkahibalo nga siya wala mahimong hambogiro?

⁵ Kabantog, kaambongan, pagkabatan-on, pagkamaayong-manulti, mga kahanas sa musika, kabatid sa panggubatan, pag-uyon sa Diyos—maorag naangkon ni David kanang tanang maayong hiyas. Ang bisan usa nianang mga hiyasa makahimo unta kaniya nga hambogiro, apan wala siya mahimong hambogiro. Matikdi ang tubag ni David kang Haring Saul, kinsa mitanyag sa iyang anak babaye kang David aron iyang minyoan. Uban ang tinuod nga pagkamapaubsanon, si David miingon: “Kinsa ba ako ug kinsa ang akong kabanayan, ang banay sa akong amahan, diha sa Israel, nga mahimo akong umagad sa hari?” (1 Samuel 18:18) Sa pagkomento bahin niining bersikuloha, usa ka eskolar misulat: “Ang ipasabot ni David mao, nga pinasukad sa iyang personal nga mga katakos, sa iyang kahimtang sa katilingban, sa iyang kaliwatan, siya dili gayod makapangangkon nga takos sa kadungganan ingong umagad sa hari.”

6. Nganong angay natong ugmaron ang pagkamapaubsanon?

⁶ Ang pagkamapaubsanon ni David nagsukad sa iyang pagkaila nga si Jehova labaw kaayo kay sa dili-hingpit nga mga tawo sa tanang paagi. Natingala si David nga ang Diyos nagtagad pa gani sa tawo. (Salmo 144:3) Nahibalo usab si David nga ang kabantogan nga iyang naangkon maoy tungod lamang kay si Jehova nagpakitag pagkamapaubsanon, nga nagpaubos sa iyang kaugalingon aron sa pagsustento, pagpanalipod, ug pag-atiman kaniya. (Salmo 18:35) Pagkanindot nga pagtulon-an alang kanato! Ang atong linaing mga katakos, atong mga nalampos, ug atong mga pribilehiyong teokratikanhon dili angayng maghimo kanatong mapahitas-on. “Sa pagkatinuod, unsay anaa kanimo nga wala nimo madawat?” misulat si apostol Pablo. “Kon, karon, tinuod man nga nadawat nimo kini, nganong ikaw manghambog nga daw wala nimo kini madawat?” (1 Corinto 4:7) Aron makabaton sa balaang espiritu sa Diyos ug makatagamtam sa iyang pag-uyon, kinahanglang ugmaron nato ug padayong huptan ang pagkamapaubsanon.—Santiago 4:6.

“Ayaw Kamo Pagpanimalos”

7. Unsang kahigayonan sa pagpatay kang Haring Saul ang miabot kang David?

⁷ Bisan pag ang kabantog ni David wala maghimo kaniya nga hambogiro, kadto nagpatunghag makapatayng kasina diha kang Haring Saul, nga nawad-an na sa espiritu sa Diyos. Bisag si David walay gibuhat nga daotan, siya mikalagiw tungod kay nameligro ang iyang kinabuhi ug siya mipuyo sa kamingawan. Usa ka higayon, panahon sa porsigidong paggukod kang David, si Haring Saul misulod sa usa ka langob, nga wala mahibalo nga si David ug ang iyang mga kauban nagtago diay didto. Ang mga tawo ni David miawhag kaniya sa pagpahimulos sa daw gimbut-an-sa-Diyos nga kahigayonan sa pagpatay kang Saul. Makahanduraw kita nga sila mihunghong kang David diha sa kangitngitan: “Ania na ang adlaw nga giingon ni Jehova kanimo, ‘Tan-awa! Itugyan ko sa imong kamot ang imong kaaway, ug buhaton mo kaniya ang sumala sa maayo sa imong mga mata.’”—1 Samuel 24:2-6.

8. Nganong si David nagpugong sa pagpanimalos?

⁸ Si David midumili sa pagdaot kang Saul. Kay nagpakitag pagtuo ug pailob, kontento siya nga itugyan ang mga butang diha sa mga kamot ni Jehova. Sa paggawas sa hari sa langob, si David misinggit ngadto kaniya ug miingon: “Hinaot si Jehova maghukom tali kanako ug kanimo; ug si Jehova manimalos kanimo alang kanako, apan ang akong kamot dili gayod magdapat kanimo.” (1 Samuel 24:12) Bisan pag nahibalo siya nga si Saul sad-an, si David wala manimalos; ni misulti siyag pasipala kang Saul o bahin kaniya. Sa daghang ubang mga higayon, si David nagpugong sa iyang kaugalingon sa pagpanimalos. Hinunoa, siya misalig kang Jehova sa pagtul-id sa mga butang.—1 Samuel 25:32-34; 26:10, 11.

9. Nganong dili kita angayng manimalos kon makasinati kitag pagsupak o paglutos?

⁹ Sama kang David, basin masugamak ka sa lisod nga mga kahimtang. Tingali supakon o lutoson ka sa mga kauban sa tunghaan, kaubang empleyado, mga membro sa pamilya, o uban pa nga dili sama kanimog relihiyon. Ayaw pagpanimalos. Paghulat kang Jehova, nga mangayo sa iyang balaang espiritu sa pagtabang kanimo. Basin ang maong mga dili-magtutuo makadayeg sa imong maayong panggawi ug mahimong mga magtutuo. (1 Pedro 3:1) Bisag unsay pay mahitabo, salig nga si Jehova makakita sa imong kahimtang ug may himoon bahin niana sa iyang gitakda nga panahon. Si apostol Pablo misulat: “Ayaw kamo pagpanimalos, mga hinigugma, kondili hatagig dapit ang kapungot; kay nahisulat: ‘Akoa ang panimalos; ako magabalos, nag-ingon si Jehova.’”—Roma 12:19.

“Patalinghog sa Disiplina”

10. Sa unsang paagi si David nasugamak sa sala, ug sa unsang paagi iyang gisulayan ang pagtago niana?

¹⁰ Miaginod ang mga katuigan. Si David nahimong minahal nga hari nga nailado kaayo. Ang iyang pagkinabuhi nga may talagsaong pagkamatinumanon, duyog ang maanindot nga mga salmo nga iyang gisulat nga nagdayeg kang Jehova, tingali daling mohatag ug impresyon nga siya maoy tawo nga dili gayod masugamak sa bug-at nga sala. Apan nakahimo siyag bug-at nga sala. Usa ka adlaw, ang hari nga didto sa iyang bubongan nakakitag usa ka matahom nga babaye nga naligo. Nanukitsukit siya kon kinsa kadtong bayhana. Sa pagkahibalo nga kadtong bayhana mao si Batseba ug ang iyang bana, si Urias, didto sa panggubatan, gipakuha siya ni David ug nakigrelasyon kaniya. Sa ulahi, iyang nahibaloan nga si Batseba namabdos. Pagkadako unta nga eskandalo ang mahitabo kon kadtong butanga mayagyag! Ubos sa Moisesnong Balaod, ang pagpanapaw maoy sala nga silotan ug kamatayon. Ang hari lagmit naghunahuna nga basin matagoan ra ang maong sala. Busa siya nagpadalag mensahe ngadto sa kasundalohan, nga nagmando nga si Urias mopauli sa Jerusalem. Si David naglaom nga si Urias mopalabay sa kagabhion kauban ni Batseba, apan kana wala mahitabo. Tungod kay niadtong tungora nawad-ag paglaom, gipabalik ni David si Urias ngadto sa gubat nga may sulat kang Joab, ang komandante sa kasundalohan. Ang sulat nagsugo nga si Urias ipuwesto sa dapit nga moresulta sa iyang kamatayon. Si Joab misunod, ug namatay si Urias. Human sa pagtuman ni Batseba sa naandang yugto sa pagbangotan, gipangasawa siya ni David.—2 Samuel 11:1-27.

11. Unsang kahimtang ang gipahayag ni Natan kang David, ug unsay iyang reaksiyon?

¹¹ Ang plano morag milampos, bisan pag si David angay untang nahibalo nga ang tibuok nga butang dayag kang Jehova. (Hebreohanon 4:13) Milabay ang daghang bulan, ug natawo ang bata. Unya, sa pagtultol sa Diyos, si Natan nga manalagna miadto kang David. Ang manalagna nagpahayag ngadto sa hari sa usa ka kahimtang diin ang usa ka tawong dato nga daghag karnero nagkuha ug nag-ihaw sa bugtong, minahal nga karnero nga iya sa usa ka tawong kabos. Ang sugilanon nakapukaw sa pagbati sa hustisya ni David apan kadto wala makapukaw ug katahap bahin sa natagong kahulogan niadto. Gihukman dayon ni David ang tawong dato. Nga nanginit sa kasuko, siya miingon kang Natan: “Ang tawo nga nagbuhat niini angay nga mamatay!”—2 Samuel 12:1-6.

12. Unsang paghukom ang gipahayag ni Jehova batok kang David?

¹² “Ikaw mismo ang maong tawo!” mitubag ang manalagna. Si David naghukom sa iyang kaugalingon. Sa walay duhaduha, ang kasuko ni David sa madali nailisan ug dakong kaulaw ug dulot nga kasubo. Nga nahiugnok, siya namati samtang gipahayag ni Natan ang dili-malikayan nga paghukom ni Jehova. Walay mga pulong sa kahupayan. Si David nagtamay sa pulong ni Jehova pinaagi sa pagbuhat kon unsay daotan. Wala ba niya ipapatay si Urias ginamit ang espada sa kaaway? Ang usa ka espada dili gayod mobulag sa balay ni David. Wala ba niya kuhaa nga sekreto ang asawa ni Urias? Ang susamang pagkadaotan modangat kaniya, dili sa sekreto, kondili sa dayag.—2 Samuel 12:7-12.

13. Unsay reaksiyon ni David sa disiplina ni Jehova?

¹³ Ang nakabentaha ni David, wala niya ilimod ang iyang pagkasad-an. Wala niya kasab-i ang manalagnang si Natan. Wala niya basola ang uban o ipakamatarong ang iyang nahimo. Sa dihang gisukmatan sa iyang mga sala, giangkon ni David ang tulubagon, nga miingon: “Ako nakasala batok kang Jehova.” (2 Samuel 12:13) Ang Salmo 51 nagpakita sa iyang kaguol tungod sa iyang sala ug sa kadulot sa iyang pagbasol. Nangaliyupo siya kang Jehova: “Ayaw ako isalikway gikan sa imong atubangan; ug ayaw kuhaa ang imong balaang espiritu gikan kanako.” Nagtuo siya nga si Jehova, tungod sa iyang kaluoy, dili magtamay “sa usa ka kasingkasing nga gun-ob ug dugmok” tungod sa sala. (Salmo 51:11, 17) Si David nagpadayon pagsalig sa espiritu sa Diyos. Bisan pag si Jehova wala manalipod kang David batok sa grabeng mga sangpotanan sa iyang sala, siya nagpasaylo kang David.

14. Unsay angay natong reaksiyon sa disiplina ni Jehova?

¹⁴ Kitang tanan dili hingpit, ug kitang tanan makasala. (Roma 3:23) Usahay kita masugamak sa bug-at nga sala, sama kang David. Sama nga disiplinahon sa usa ka mahigugmaong amahan ang iyang mga anak, tul-iron usab ni Jehova kadtong nagtinguha sa pag-alagad kaniya. Hinuon, bisan pag makaayo ang disiplina, kini dili daling dawaton. Ngani, may mga higayon nga kini “makapaguol.” (Hebreohanon 12:6, 11) Apan kon kita ‘magpatalinghog sa disiplina,’ mahibalik ang atong maayong relasyon kang Jehova. (Proverbio 8:33) Aron matagamtam ang padayong pagpanalangin sa espiritu ni Jehova, kinahanglang dawaton nato ang pagtul-id ug maningkamot nga mauyonan sa Diyos.

Ayaw Paglaom sa Walay-Kasegurohang Bahandi

15. (a) Sa unsang mga paagi gigamit sa pipila ka tawo ang ilang bahandi? (b) Unsay tinguha ni David bahin sa paggamit sa iyang bahandi?

¹⁵ Walay timailhan nga si David naggikan sa alta-sosyedad o nga ang iyang pamilya maoy bahandianon. Hinuon, panahon sa iyang pagkahari, si David nakabaton ug daghan kaayong bahandi. Ingong nasayran na nimo, daghan ang magtipig sa ilang bahandi, nga sa kahakog magtinguha nga padaghanon kana, o gastohon kana sa hinakog nga paagi. Ang uban mogamit sa ilang salapi sa paghimaya sa ilang kaugalingon. (Mateo 6:2) Gigamit ni David ang iyang bahandi sa laing paagi. Nangandoy siya sa pagpasidungog kang Jehova. Gipahayag ni David kang Natan ang iyang tinguha sa pagtukod ug usa ka templo alang kang Jehova aron masudlan sa arka sa pakigsaad, nga didto niadto sa Jerusalem “nagpuyo sa taliwala sa mga tabil sa tolda.” Nahimuot si Jehova sa tuyo ni David apan pinaagi ni Natan giingnan siya nga ang anak ni David nga si Solomon mao ang magtukod sa templo.—2 Samuel 7:1, 2, 12, 13.

16. Unsang mga pagpangandam ang gihimo ni David alang sa pagtukod sa templo?

¹⁶ Gitigom ni David ang mga materyales nga gamiton niining dakong proyekto sa pagpanukod. Si David miingon kang Solomon: “Ako nag-andam alang sa balay ni Jehova ug usa ka gatos ka libo ka talantong bulawan ug usa ka milyon ka talantong plata, ug ang tumbaga ug ang puthaw walay paaging matimbang tungod kay kini labihan ka daghan; ug ako nag-andam ug mga kahoy ug mga bato, apan dugangan mo kini sila.” Gikan sa iyang kaugalingong bahandi, siya miamot ug 3,000 ka talantong bulawan ug 7,000 ka talantong plata.a (1 Cronicas 22:14; 29:3, 4) Ang dagayang pagpanghatag ni David maoy dili pagpagawal kondili pagpadayag sa pagtuo ug pagkamahinalaron kang Jehova nga Diyos. Kay nakaila sa Tinubdan sa iyang bahandi, siya miingon kang Jehova: “Ang tanang butang gikan kanimo, ug gikan sa imong kaugalingong kamot kami naghatag kanimo.” (1 Cronicas 29:14) Ang mahinatagong kasingkasing ni David nagtukmod kaniya sa pagbuhat sa tanan niyang maarangan sa pagpausbaw sa maputling pagsimba.

17. Sa unsang paagi ang tambag sa 1 Timoteo 6:17-19 mapadapat sa dato ug kabos?

¹⁷ Sa susama, hinaot gamiton nato ang atong materyal nga kahinguhaan sa pagbuhat ug maayo. Inay tinguhaon ang materyalistikong pagkinabuhi, mas maayo ang pagtinguha sa pag-uyon sa Diyos—kana ang paagi sa matuod nga kaalam ug kalipay. Si Pablo misulat: “Sugoa ang mga dato niini nga sistema sa mga butang nga dili magmapahitas-on sa kaisipan, ug magbutang sa ilang paglaom, dili sa walay-kasegurohang bahandi, kondili sa Diyos, nga dagayang naghatag kanato sa tanang butang aron atong pagakalipayan; nga magbuhat sa maayo, nga magmadato sa maayong mga buhat, nga magmahinatagon, andam sa pagpaambit, nga maampingong magtipig alang sa ilang kaugalingon ug usa ka maayong patukoranan alang sa umalabot, aron sila makapangupot pag-ayo sa tinuod nga kinabuhi.” (1 Timoteo 6:17-19) Bisan kon unsa ang atong kahimtang sa pangabuhi, mosalig kita sa espiritu sa Diyos ug sundon ang pagkinabuhi nga maghimo kanato nga “dato ngadto sa Diyos.” (Lucas 12:21) Walay butang nga mas bililhon kay sa inuyonan nga pagbarog uban sa atong mahigugmaon nga langitnong Amahan.

Itanyag ang Imong Kaugalingon sa Diyos Ingong Inuyonan

18. Sa unsang paagi si David naghatag ug maayong panig-ingnan alang sa mga Kristohanon?

¹⁸ Sa tibuok niyang kinabuhi, gitinguha ni David ang pag-uyon ni Jehova. Diha sa awit, siya mipatugbaw: “Pakitai ako ug kaluoy, Oh Diyos, pakitai ako ug kaluoy, kay ang akong kalag midangop kanimo.” (Salmo 57:1) Wala makawang ang iyang pagsalig kang Jehova. Si David natigulang, nga “tagbaw sa mga adlaw.” (1 Cronicas 23:1) Bisag si David nakahimog bug-at nga mga sayop, siya mahinumdoman ingong usa sa daghang saksi sa Diyos nga nagpasundayag ug talagsaong pagtuo.—Hebreohanon 11:32.

19. Sa unsang paagi makatanyag kita sa atong kaugalingon ingong inuyonan sa Diyos?

¹⁹ Samtang atubangon nimo ang nagakausab nga mga kahimtang sa kinabuhi, hinumdomi nga sama ra nga si Jehova nagsustento, nagpalig-on, ug nagtul-id kang David, Iyang buhaton ang sama alang kanimo. Si apostol Pablo, sama kang David, miatubang ug daghang kausaban sa kahimtang sa kinabuhi. Bisan pa niana, siya usab nagpabiling matinumanon pinaagi sa pagsalig sa espiritu sa Diyos. Siya misulat: “Sa tanang butang ako adunay kusog pinaagi kaniya nga naghatag ug gahom kanako.” (Filipos 4:12, 13) Kon mosalig kita kang Jehova, siya motabang kanato aron kita molampos. Buot niyang kita molampos. Kon kita magpatalinghog kaniya ug makigsuod kaniya, siya mohatag kanato sa kusog sa pagbuhat sa iyang kabubut-on. Ug kon mopadayon kita sa pagsalig sa espiritu sa Diyos, kita makaarang sa ‘pagtanyag sa atong kaugalingon sa Diyos ingong inuyonan’ karon ug hangtod sa kahangtoran.—2 Timoteo 2:15.

[Mga footnote]

Unsaon Nimo Pagtubag?

• Sa unsang paagi makabantay kita batok sa garbo?

• Nganong dili kita angayng manimalos?

• Unsang hunahuna bahin sa disiplina ang angay natong batonan?

• Nganong angayng mosalig kita sa Diyos ug dili sa bahandi?

[Hulagway sa panid 16, 17]

Si David misalig sa espiritu sa Diyos ug nagtinguha sa iyang pag-uyon. Ginabuhat mo ba ang samang butang?

[Hulagway sa panid 18]

“Ang tanang butang gikan kanimo, ug gikan sa imong kaugalingong kamot kami naghatag kanimo”