“Ang mga Maaghop Magapanunod sa Yuta”—Sa Unsang Paagi?

“LAGMIT pamilyar ka sa makapadasig nga mga pulong ni Jesus nga ‘ang mga maaghop magapanunod sa yuta.’ Apan tungod sa tanang gibuhat sa mga tawo ngadto sa usag usa ug ngadto sa yuta, sa imong hunahuna aduna pa bay mapanunod ang mga maaghop?”—Mateo 5:5; Salmo 37:11; King James Version.

Si Myriam, usa sa mga Saksi ni Jehova, naggamit niining pangutanaha sa pagsugod ug panaghisgot sa Bibliya. Ang tawo nga iyang kaestorya mitubag nga kon si Jesus maoy misaad niini, ang yuta takos gayong tawgon ingong panulondon ug dili usa ka gun-ob o dili-mapuy-ang dapit.

Positibo gayod ang maong tubag. Apan aduna ba kitay katarongan sa pagbaton sa maong positibong panglantaw? Aduna gayod, tungod kay ang Bibliya naghatag kanato ug lig-ong mga katarongan sa pagtuo nga matuman ang maong saad. Sa pagkatinuod, ang katumanan nianang saara dakog kalabotan sa katuyoan sa Diyos alang sa mga tawo ug sa yuta. Ug gipasaligan kita nga kon unsay katuyoan sa Diyos, iya kining pagatumanon. (Isaias 55:11) Busa, unsa may orihinal nga katuyoan sa Diyos alang sa mga tawo, ug sa unsang paagi kini matuman?

Ang Walay-Kataposang Katuyoan sa Diyos Alang sa Yuta

Gilalang ni Jehova nga Diyos ang yuta alang sa usa ka tinong katuyoan. “Mao kini ang giingon ni Jehova, ang Maglalalang sa mga langit, Siya nga mao ang matuod nga Diyos, ang Mag-uumol sa yuta ug ang Magbubuhat niini, Siya nga mao ang Usa nga lig-ong nagtukod niini, nga wala maglalang niini sa wala lamay kapuslanan, nga nag-umol niini aron pagapuy-an: ‘Ako si Jehova, ug wala nay lain.’” (Isaias 45:18) Busa, ang yuta gilalang aron puy-an gayod sa mga tawo. Dugang pa, katuyoan sa Diyos nga ang yuta mahimong walay-kataposang pinuy-anan sa mga tawo. “Gitukod niya ang yuta ibabaw sa pihong mga dapit niini; kini dili matarog hangtod sa panahong walay tino, o hangtod sa kahangtoran.”—Salmo 104:5; 119:90.

Ang katuyoan sa Diyos maylabot sa yuta gipadayag usab diha sa sugo nga iyang gihatag ngadto sa unang tawhanong magtiayon. Si Jehova nag-ingon kang Adan ug Eva: “Magmabungahon ug magdaghan kamo ug pun-a ang yuta ug gamhi kini, ug pagabut-i ang mga isda sa dagat ug ang nagalupad nga mga linalang sa kalangitan ug ang matag buhing linalang nga nagalihok diha sa yuta.” (Genesis 1:28) Ang yuta, nga gipiyal sa Diyos ngadto kang Adan ug Eva, mao unta ang walay-kataposang pinuy-anan nila ug sa ilang nga anak. “Kon bahin sa mga langit, iya ni Jehova ang mga langit,” miingon ang salmista daghang siglo sa ulahi, “apan ang yuta iyang gihatag sa mga anak sa mga tawo.”—Salmo 115:16.

Aron matuman kanang kahibulongang palaaboton, kinahanglang dawaton nila ni Adan ug Eva, maingon man sa ilang mga anak, si Jehova nga Diyos, ang Maglalalang ug Maghahatag-ug-Kinabuhi, ingong ilang Soberano ug andam nga mosugot kaniya. Giklaro gayod ni Jehova kining butanga sa dihang gibaoran niya ang lalaki: “Gikan sa tanang kahoy sa tanaman makakaon ka hangtod sa pagkatagbaw. Apan kon bahin sa kahoy sa kahibalo sa maayo ug sa daotan dili ka gayod mokaon gikan niini, kay sa adlaw nga mokaon ka gikan niini mamatay ka gayod.” (Genesis 2:16, 17) Aron magpabiling buhi si Adan ug Eva diha sa tanaman sa Eden, sila kinahanglang mosugot nianang yano ug tin-aw nga sugo. Ang pagbuhat niana maoy pagpahayag sa ilang pagkamapasalamaton sa tanang nahimo sa langitnong Amahan alang kanila.

Sa dihang si Adan ug Eva tinuyong misupak sa Diyos pinaagi sa paglapas sa sugo nga gihatag kanila, sa pagkatinuod ilang gisalikway ang usa nga naghatag kanila sa tanan nga ilang nabatonan. (Genesis 3:6) Sa pagbuhat niana, giwala nila ang matahom nga Paraisong pinuy-anan dili lang para sa ilang kaugalingon kondili para usab sa ilang mga anak. (Roma 5:12) Napakyas ba ang katuyoan sa Diyos sa paglalang sa yuta tungod sa pagsupak sa unang magtiayon?

Usa ka Diyos nga Wala Mausab

Pinaagi sa iyang manalagna nga si Malaquias, ang Diyos miingon: “Ako si Jehova; ako dili mausab.” (Malaquias 3:6) Nagkomento bahin niining bersikuloha, ang Pranses nga eskolar sa Bibliya nga si L. Fillion nag-ingon nga kining maong pahayag dakog kalabotan sa katumanan sa mga saad sa Diyos. “Mahimo untang laglagon ni Jehova ang iyang rebelyosong katawhan,” misulat si Fillion, “apan tungod kay dili niya mahimong usbon ang iyang mga saad, iya gayong tumanon ang iyang mga gisaad kanhi bisag unsa pay mahitabo.” Ang mga saad sa Diyos, ngadto man sa usa ka tawo, usa ka nasod, o sa tibuok katawhan, dili gayod makalimtan kondili pagatumanon sa iyang gitakdang panahon. “Siya nahinumdom sa iyang pakigsaad hangtod sa panahong walay tino, ang pulong nga iyang gisugo, hangtod sa usa ka libo ka kaliwatan.”—Salmo 105:8.

Apan, sa unsang paagi makaseguro kita nga wala usba ni Jehova ang iyang orihinal nga katuyoan may kalabotan sa yuta? Makaseguro kita niini tungod kay diha sa tibuok inspiradong Pulong sa Diyos, ang Bibliya, atong mabasa nga ang katuyoan sa Diyos mao ang paghatag sa yuta ngadto sa masinugtanong mga tawo. (Salmo 25:13; 37:9, 22, 29, 34) Dugang pa, ang Kasulatan naghubit niadtong gipanalanginan ni Jehova ingong nagpuyo sa kasegurohan, nga ang matag usa naglingkod “ilalom sa iyang paras ug ilalom sa iyang kahoyng igos,” nga “walay usa nga magpakurog kanila.” (Miqueas 4:4; Ezequiel 34:28) Kadtong gipili ni Jehova “magtukod [gayod] ug mga balay ug magpuyo niini; ug sila gayod magtanom ug kaparasan ug magkaon sa ilang mga bunga.” Ilang matagamtam ang pakigdait bisan uban sa mga mananap sa kapatagan.—Isaias 11:6-9; 65:21, 25.

Ang Bibliya naghatag kanatog pasiunang pagtan-aw sa saad sa Diyos sa laing paagi. Panahon sa pagmando ni Haring Solomon, ang nasod sa Israel nakatagamtam ug kalinaw ug kauswagan. Ilalom sa iyang pagmando, “ang Juda ug Israel nagpadayon sa pagpuyo sa kasegurohan, ang matag usa ilalom sa iyang kaugalingong paras ug ilalom sa iyang kaugalingong kahoyng igos, gikan sa Dan ngadto sa Beer-seba, sa tanang adlaw ni Solomon.” (1 Hari 4:25) Ang Bibliya nag-ingon nga si Jesus “labaw pa kay kang Solomon,” ug mahitungod sa iyang pagmando, ang salmista matagnaong nagpahayag: “Sa iyang mga adlaw molambo ang matarong, ug ang kadagaya sa pakigdait hangtod nga ang bulan mahanaw na.” Nianang panahona, “aduna unyay dagayang lugas sa ibabaw sa yuta; sa tumoy sa kabukiran adunay pagsugwak.”—Lucas 11:31; Salmo 72:7, 16.

Kay matinud-anon sa iyang pulong, paneguroon ni Jehova nga Diyos nga ang gisaad nga panulondon dili lamang mabatonan kondili mahibalik usab sa bug-os nga katahom niini. Sa Pinadayag 21:4, ang Pulong sa Diyos nag-ingon kanato nga sa gisaad nga bag-ong kalibotan, “pagapahiran [sa Diyos] ang tanang luha gikan sa . . . mga mata [sa mga tawo], ug ang kamatayon mawala na, ni may pagbangotan ni pagtiyabaw ni may kasakit pa.” Sa pagkatinuod, ang gisaad mao gayod ang Paraiso.—Lucas 23:43.

Kon sa Unsang Paagi Makaambit sa Gisaad nga Panulondon

Ang paghimo sa yuta nga usa ka paraiso mahitabo ilalom sa usa ka kagamhanan nga magmando gikan sa langit, usa ka Gingharian nga si Jesu-Kristo maoy Hari. (Mateo 6:9, 10) Una, ang maong Gingharian ‘magalaglag sa mga nagalaglag sa yuta.’ (Pinadayag 11:18; Daniel 2:44) Dayon, ingong “Prinsipe sa Pakigdait,” tumanon ni Jesu-Kristo kining matagnaong mga pulong: “Sa kadagaya sa prinsipenhong pagmando ug sa pakigdait walay kataposan.” (Isaias 9:6, 7) Ilalom sa maong Gingharian, milyonmilyong tawo, lakip niadtong pagabanhawon, ang adunay kahigayonan sa pagpanunod sa yuta.—Juan 5:28, 29; Buhat 24:15.

Kinsa ang makatagamtam nianang kahibulongang panulondon? Palandonga ang mga pulong ni Jesus: “Malipayon ang mga malumog-buot, sanglit sila magapanunod sa yuta.” (Mateo 5:5) Unsay kahulogan sa pagkahimong malumog-buot, o maaghop? Ang mga diksiyonaryo sagad naghubit sa “maaghop,” o “malumo,” ingong maluloton, kasarangan, mapinasakopon, hilomon, maulawon pa gani. Apan, ang orihinal nga Gregong pulong nga gigamit mas lalom pag kahulogan. “Adunay pagkamaluloton” sa maong pulong, matod pa sa New Testament Wordbook ni William Barclay, “apan luyo sa pagkamaluloton adunay kalig-on nga sama sa puthaw.” Kini nagpasabot ug usa ka tinamdan sa hunahuna nga makapaarang sa usa ka tawo sa pag-antos sa kadaot nga dili mayugot o maghunahunang mobalos, ang tanan ingong resulta sa pagkaadunay maayong relasyon uban sa Diyos, ug ang maong relasyon nahimong usa ka tinubdan sa iyang kalig-on.—Isaias 12:2; Filipos 4:13.

Ang usa ka tawong maaghop mapainubsanong modawat sa mga sukdanan sa Diyos sa tanang bahin sa iyang kinabuhi; dili siya mamugos nga sundon ang iyang panghunahuna o ang panghunahuna sa ubang mga tawo. Siya dali usab nga matudloan, andam nga magpatudlo kang Jehova. Ang salmistang si David misulat: “Palakton [ni Jehova] ang mga maaghop diha sa iyang hudisyal nga mga hukom, ug tudloan niya ang mga maaghop sa iyang dalan.”—Salmo 25:9; Proverbio 3:5, 6.

Mahilakip ka kaha sa “mga maaghop” nga makapanunod sa yuta? Pinaagi sa pagkahibalo bahin kang Jehova ug sa iyang kabubut-on pinaagi sa makugihong pagtuon sa iyang Pulong ug pagpadapat sa imong nakat-onan, ikaw makalaom usab nga makapanunod sa usa ka yutan-ong paraiso ug makapuyo diha niana sa walay kataposan.—Juan 17:3.

[Hulagway sa panid 5]

Ang katuyoan sa Diyos alang sa yuta makita diha sa sugo nga iyang gihatag ngadto kang Adan ug Eva

[Hulagway sa panid 6, 7]

Ang kalinaw ug kasegurohan panahon sa pagmando ni Solomon naghatag ug pasiunang pagtan-aw sa gisaad nga panulondon

[Credit Lines]

Sheep and background hill: Pictorial Archive (Near Eastern History) Est.; Arabian oryx: Hai-Bar, Yotvata, Israel; farmer plowing: Garo Nalbandian

[Hulagway sa panid 7]

Ang usa ka matarong nga bag-ong kalibotan anaa sa unahan—atua ka ba unya didto?