Mga Magmamantala sa Gingharian Nagtaho
Ang Maminatud-ong mga Tawo Makahatag ug Pagdayeg Kang Jehova
SA TIBUOK yuta, ang mga Saksi ni Jehova—bata ug tigulang—ilado sa ilang pagkamaminatud-on. Tagda ang mga pananglitan gikan sa tulo ka kontinente.
Ang 17-anyos nga si Olusola, nga nagpuyo sa Nigeria, nagpauli sa balay gikan sa eskuylahan usa ka adlaw niana sa dihang siya nakakitag pitaka sa dalan. Gidala niya kadto sa prinsipal, nga nag-ihap sa kuwarta, ug ang kantidad niadto maoy ₦6,200 (mga $45, U.S.). Giuli sa prinsipal ang pitaka ngadto sa maestrong nawad-an niana. Isip pasalamat, gihatagan sa maestro si Olusola ug ₦1,000 (mga $7, U.S.) ug gisultihan siya nga ibayad kadto sa mga bayranan sa eskuylahan. Sa nadunggan sa ubang mga estudyante kon unsay nahitabo, ilang gibugalbugalan si Olusola. Pipila ka semana sa ulahi, usa ka estudyante mitaho nga ang iyang kuwarta gikawat, mao nga ang mga magtutudlo gihangyo sa pagsusi sa tanang estudyante. “Tindog diri,” matod sa magtutudlo kang Olusola. “Nasayod ko nga ingong Saksi ni Jehova, dili ka mangawat.” Ang kuwarta nakaplagan didto sa duha ka lalaki nga nagbugalbugal kang Olusola, ug sila grabeng gisilotan. Si Olusola misulat: “Nalipay ko kaayo nga ako nailhang Saksi ni Jehova, nga dili gayod mangawat, sa ingon niana makadayeg kang Jehova.”
Sa pagbiya sa balay usa niana ka adlaw, si Marcelo, nga lumad nga taga-Argentina, nakakitag usa ka maletin diha sa yuta pipila ka metro lang gikan sa ilang pultahan sa likod. Sa gidala nila sa iyang asawa sa sulod sa balay ang maletin, ilang mainampingong giablihan kini. Sa ilang dakong kahingangha, ilang nakita ang daghang kuwarta, mga credit card, ug ubay-ubay nga pirmadong mga tseke, nga usa niana maoy alang sa usa ka milyong pesos (250,000 euros). Sa usa ka resibo, ilang nakaplagan ang usa ka numero sa telepono. Ilang giteleponohan ang tag-iya ug gihikay nga iuli ang maletin uban ang mga sulod niini didto sa dapit nga gitrabahoan ni Marcelo. Pag-abot sa tag-iya, siya daw ginerbiyos. Gisultihan siya sa amo nga magkalma lang, kay si Marcelo usa ka Saksi ni Jehova. Isip ganti sa pagkakaplag sa maletin, ang tag-iya mihatag lamang kang Marcelo ug 20 pesos (mga $6, U.S.). Nasuko kaayo ang amo sa gamayng kantidad nga gihatag tungod kay siya nakadayeg pag-ayo sa pagkamaminatud-on ni Marcelo. Mihatag kadto ug higayon kang Marcelo nga isaysay nga ingong Saksi ni Jehova, buot niya nga magmaminatud-on sa tanang panahon.
Ang mosunod nga kasinatian naggikan sa Kyrgyzstan. Si Rinat, sayis-anyos nga batang lalaki, nakakitag pitaka nga iyaha sa usa ka babayeng nagpuyo sa duol nila. Ang pitaka may sulod nga 1,100 som (mga $25, U.S.). Sa giuli ni Rinat ang nawalang pitaka ngadto sa babaye, iyang giihap ang kuwarta ug unya giingnan ang inahan ni Rinat nga kulang kinig 200 som. Miingon si Rinat nga wala niya kuhai ang maong kuwarta. Unya gipangita nilang tanan ang nawalang kuwarta ug ilang nakaplagan kadto duol sa dapit diin nakit-an ang pitaka. Nahingangha ang babaye. Nagpasalamat siya kang Rinat ug sa iyang inahan, nahauna tungod sa pag-uli sa nawalang kuwarta ug ikaduha, tungod sa pagmatuto sa iyang inahan kaniya aron siya mahimong Kristohanon.