Mga Manulonda—Kon Kinsa Sila

ANG hari sa usa ka gamhanang imperyo dili makatuo sa iyang nakita. Ang tulo ka lalaking gisilotan nga mamatay sa nagdilaab nga hudno giluwas gikan sa ngilit sa kamatayon! Kinsay nagluwas kanila? Ang hari mismo miingon ngadto sa tulo nga naluwas: “Dalayegon ang [inyong Diyos], nga nagpadala sa iyang manulonda ug nagluwas sa iyang mga alagad nga misalig kaniya.” (Daniel 3:28) Kadtong magmamando sa Babilonya sa kapig duha ka milenyo kanhi maoy usa ka saksing-nakakita sa maong pagluwas pinaagi sa usa ka manulonda. Ang milyonmilyong tawo sa nangagi nagtuo sa mga manulonda. Ang daghan karong adlawa wala lang magtuo nga ang mga manulonda naglungtad kondili sila mibati usab nga ang ilang mga kinabuhi mismo apektado sa usa ka paagi sa mga manulonda. Kinsa ang mga manulonda, ug diin sila gikan?

Sumala sa Bibliya, ang mga manulonda maoy mga espiritu, maingon nga ang Diyos mismo maoy Espiritu. (Salmo 104:4; Juan 4:24) Dako ang pamilya sa mga manulonda, nga mokabat ug milyonmilyon. (Pinadayag 5:11) Ug silang tanan “gamhanan sa kusog.” (Salmo 103:20) Bisag ang mga manulonda maoy sama ra sa mga tawo sa pagkaagi nga sila adunay personalidad ug gihatagag kagawasan sa pagpili, wala sila magsugod sa ilang kinabuhi ingong mga tawo. Ngani, gilalang sa Diyos ang mga manulonda nga dugay na kaayo sa wala pa mopatim-aw ang mga tawo—una pa gani sa paglalang sa planetang Yuta. Sa dihang ang Diyos ‘nagtukod sa yuta,’ matod sa Bibliya, “ang mga bituon sa kabuntagon [mga manulonda] nagdungan paghugyaw sa kalipay, ug ang tanang anak sa Diyos misinggit sa pagdayeg.” (Job 38:4, 7) Sanglit ang mga manulonda maoy mga linalang sa Diyos, sila gitawag ug mga anak sa Diyos.

Unsay katuyoan nga gilalang sa Diyos ang mga manulonda? Unsa, kon duna man, ang papel sa mga manulonda diha sa kasaysayan sa tawo? Ang ato bang kinabuhi karon apektado nila? Sanglit sila maoy mga linalang nga adunay kagawasan sa pagpili, may mga manulonda ba nga misunod sa dalan ni Satanas nga Yawa ug naghimo sa ilang kaugalingon nga mga kaaway sa Diyos? Ang Bibliya naghatag ug matinud-anong mga tubag sa maong mga pangutana.