‘Panglakaw Kamo ug Paghimog mga Tinun-an, nga Magabawtismo Kanila’
“Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila . . . , nga magatudlo kanila sa pagtuman sa tanang butang nga akong gisugo kaninyo.”—MATEO 28:19, 20.
1. Unsang desisyon ang gihimo sa nasod sa Israel didto sa tiilan sa Bukid sa Sinai?
MGA 3,500 ka tuig kanhi, ang usa ka nasod nanaad sa Diyos. Nagtigom didto sa tiilan sa Bukid sa Sinai, ang mga Israelinhon nagpahayag: “Andam kami sa pagbuhat sa tanan nga gisulti ni Jehova.” Sukad nianang panahona, ang Israel nahimong katawhan nga napahinungod sa Diyos, iyang “linaing katigayonan.” (Exodo 19:5, 8; 24:3) Sila naglaom nga makadawat sa iyang proteksiyon ug magpuyo ang ilang sunodsunod nga kaliwatan diha sa yuta nga “nagaagay sa gatas ug dugos.”—Levitico 20:24.
2. Unsang relasyon ang mahimong mabatonan sa mga tawo uban sa Diyos karon?
2 Apan sama sa giila sa salmista nga si Asap, ang mga Israelinhon ‘wala motuman sa pakigsaad sa Diyos, ug midumili sa pagsubay sa iyang balaod.’ (Salmo 78:10) Wala nila tumana ang panaad sa ilang mga katigulangan kang Jehova. Sa ngadtongadto, ang nasod nawad-an nianang talagsaong relasyon uban sa Diyos. (Ecclesiastes 5:4; Mateo 23:37, 38) Busa, ang Diyos ‘miliso sa iyang pagtagad ngadto sa kanasoran aron sa pagkuha gikan kanila ug usa ka katawhan alang sa iyang ngalan.’ (Buhat 15:14) Ug niining kataposang mga adlaw, iyang gitigom ang “usa ka dakong panon, nga walay tawong makaihap, gikan sa tanang kanasoran ug mga tribo ug katawhan ug mga pinulongan,” kinsa malipayong miila: “Ang kaluwasan utang namo sa atong Diyos, nga naglingkod sa trono, ug sa Kordero.”—Pinadayag 7:9, 10.
3. Unsang mga lakang ang kinahanglang himoon sa usa aron makabaton ug personal nga relasyon uban sa Diyos?
3 Aron mahilakip niadtong makabaton nianang bililhong relasyon uban sa Diyos, ang usa kinahanglang magpahinungod kang Jehova ug magpasimbolo niana sa dayag pinaagi sa pagpabawtismo sa tubig. Kini maoy pagsugot sa direktang sugo ni Jesus sa iyang mga tinun-an: “Busa panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagtuman sa tanang butang nga akong gisugo kaninyo.” (Mateo 28:19, 20) Ang mga Israelinhon namati sa pagbasa sa “basahon sa pakigsaad.” (Exodo 24:3, 7, 8) Busa, ilang nasabtan ang ilang mga obligasyon ngadto kang Jehova. Mao man usab karon, gikinahanglan ang tukmang kahibalo sa kabubut-on sa Diyos nga makita diha sa iyang Pulong, ang Bibliya, sa dili pa magpabawtismo ang usa.
4. Unsay kinahanglang buhaton sa usa aron mahimong takos sa bawtismo? (Ilakip ang kahon sa ibabaw.)
4 Klaro nga nagtinguha si Jesus nga ang iyang mga tinun-an makabaton ug lig-ong patukoranan sa ilang pagtuo sa dili pa sila magpabawtismo. Iyang gisugo ang iyang mga sumusunod dili lamang sa pagpanglakaw ug paghimog mga tinun-an kondili sa pagtudlo usab kanila ‘sa pagtuman sa tanang butang nga iyang gisugo.’ (Mateo 7:24, 25; Efeso 3:17-19) Busa, kadtong takos sa bawtismo kasagarang nakatuon na sa Bibliya sulod sa daghang bulan o bisan sa usa o duha ka tuig, aron mapalandong nila kini pag-ayo sa dili pa sila modesisyon nga magpabawtismo. Sa panahon mismo sa bawtismo, ang mga kandidato motubag ug oo sa duha ka yawing mga pangutana. Tungod kay gipasiugda ni Jesus nga ang ‘atong Oo kinahanglang magkahulogang Oo, ang atong Dili, Dili,’ makatabang kanatong tanan ang pagsubli nga detalyado sa kahulogan niining duha ka pangutana sa bawtismo.—Mateo 5:37.
Paghinulsol ug Pagpahinungod
5. Unsang duha ka hinungdanong mga lakang ang gipasiugda sa unang pangutana sa bawtismo?
5 Ang unang pangutana sa bawtismo nagsukna sa kandidato kon siya ba naghinulsol na sa iyang kanhing dalan sa kinabuhi ug nagpahinungod na sa iyang kinabuhi kang Jehova aron buhaton ang iyang kabubut-on. Kining pangutanaha nagpasiugda sa duha ka hinungdanong mga lakang nga kinahanglang himoon sa dili pa magpabawtismo, nga mao ang paghinulsol ug pagpahinungod.
6, 7. (a) Nganong ang paghinulsol kinahanglanon alang sa tanang kandidato sa bawtismo? (b) Unsang mga kausaban ang kinahanglang himoon human ang usa maghinulsol?
6 Nganong ang usa ka tawo kinahanglang maghinulsol sa dili pa magpabawtismo? Si apostol Pablo nagpatin-aw: “Kitang tanan kaniadto nanaggawi nga nahiuyon sa mga tinguha sa atong unod, nga nagbuhat sa mga butang nga gipangandoy sa unod.” (Efeso 2:3) Sa wala pa kita makadangat sa tukmang kahibalo sa kabubut-on sa Diyos, kita nagkinabuhi nga kaharmonya sa kalibotan, sumala sa mga prinsipyo ug mga sukdanan niini. Ang atong dalan sa kinabuhi gikontrolar sa diyos niining sistemaha, si Satanas. (2 Corinto 4:4) Apan, human nato mahibaloi ang kabubut-on sa Diyos, kita nakahukom nga magkinabuhi “dili na alang sa mga tinguha sa mga tawo, kondili alang sa kabubut-on sa Diyos.”—1 Pedro 4:2.
7 Kining bag-ong dalan sa kinabuhi makahatag ug daghang kaayohan. Labaw sa tanan, kini magbukas sa dalan nga ang usa makabaton ug bililhong relasyon uban kang Jehova, nga gitandi ni David sa pagdapit nga mosulod sa “tolda” ug “bukid nga balaan” sa Diyos—usa gayod ka dakong pribilehiyo. (Salmo 15:1) Makataronganon nga si Jehova dili magdapit kang bisan kinsa na lang kondili niadto lamang “nagalakaw nga walay-ikasaway ug nagabuhat sa pagkamatarong ug nagasulti sa kamatuoran diha sa [ilang] kasingkasing.” (Salmo 15:2) Tungod sa lainlain natong mga sirkumstansiya sa wala pa kita makakat-on sa kamatuoran, ang pagkab-ot niining maong mga kinahanglanon mahimong magkahulogan nga kita kinahanglang mohimog pipila ka kausaban—sa panggawi ug sa personalidad. (1 Corinto 6:9-11; Colosas 3:5-10) Ang panukmod sa maong mga kausaban mao ang paghinulsol—dulot nga pagbasol sa atong kanhing dalan sa kinabuhi ug lig-ong determinasyon nga pahimut-an si Jehova. Kini motultol ngadto sa bug-os nga kausaban—pagtalikod sa mahakogon, kalibotanon nga paagi sa pagkinabuhi ug pagsubay sa dalan nga makapahimuot sa Diyos.—Buhat 3:19.
8. Sa unsang paagi himoon nato ang atong pagpahinungod, ug unsay kalabotan niini sa bawtismo?
8 Ang ikaduhang bahin sa unang pangutana sa bawtismo nagsukna sa mga kandidato kon sila nagpahinungod na ba sa ilang kaugalingon kang Jehova aron buhaton ang iyang kabubut-on. Ang pagpahinungod maoy hinungdanong lakang nga kinahanglang buhaton sa dili pa magpabawtismo. Himoon kini pinaagi sa pag-ampo, diin atong ipahayag ang atong tinguha nga ideboto ang atong kinabuhi kang Jehova pinaagi kang Kristo. (Roma 14:7, 8; 2 Corinto 5:15) Unya si Jehova mahimong atong Agalon ug Tag-iya, ug sama kang Jesus kita malipay sa pagbuhat sa kabubut-on sa Diyos. (Salmo 40:8; Efeso 6:6) Kining seryosong panaad ngadto kang Jehova kas-a lang buhaton. Apan, tungod kay gihimo nato ang atong pagpahinungod sa pribado, ang pagpahayag niini sa dayag sa panahon sa bawtismo magpahibalo sa tanan nga kita nakahimo na niining seryosong pagpahinungod ngadto sa atong langitnong Amahan.—Roma 10:10.
9, 10. (a) Unsay nalangkit sa pagtuman sa kabubut-on sa Diyos? (b) Sa unsang paagi nga bisan ang mga opisyales sa Nazi nakasabot sa kahulogan sa atong pahinungod?
9 Unsay nalangkit sa pagsunod sa panig-ingnan ni Jesus sa pagbuhat sa kabubut-on sa Diyos? Si Jesus miingon sa iyang mga tinun-an: “Kon adunay buot mosunod kanako, padumilia siya sa iyang kaugalingon ug ipapas-an ang iyang estaka sa pagsakit ug magpadayon sa pagsunod kanako.” (Mateo 16:24) Dinhi iyang gilatid ang tulo ka butang nga angay natong buhaton. Una, atong ‘dumilian’ ang atong kaugalingon. Sa ato pa, atong talikdan ang atong mahakogon, dili-hingpit nga mga kiling ug motuman sa tambag ug sugo sa Diyos. Ikaduha, atong ‘pas-anon ang atong estaka sa pagsakit.’ Sa adlaw ni Jesus ang estaka sa pagsakit maoy simbolo sa kaulawan ug pag-antos. Ingong mga Kristohanon, atong gidawat ang atong bahin sa pag-antos tungod sa maayong balita. (2 Timoteo 1:8) Bisan tuod bugalbugalan o sawayon kita sa kalibotan, sama kang Kristo ‘dili nato igsapayan ang kaulaw,’ nga malipay sa pagkahibalo nga kita nakapahimuot sa Diyos. (Hebreohanon 12:2) Sa kataposan, kita “magpadayon” sa pagsunod kang Jesus.—Salmo 73:26; 119:44; 145:2.
10 Makaiikag nga bisan ang pipila ka magsusupak nakasabot sa kahulogan sa pagpahinungod nga gihimo sa mga Saksi ni Jehova ngadto sa Diyos nga alagaron siya sa bug-os. Pananglitan, sa kampong konsentrasyon sa Buchenwald sa Nazi nga Alemanya, ang mga Saksi nga midumili sa pagsalikway sa ilang pagtuo gipapirma sa mosunod nga pinatik nga pahayag: “Ako usa gihapon ka debotadong Estudyante sa Bibliya ug dili gayod nako pakyason ang akong panumpa kang Jehova.” Klaro nga gipahayag niini ang tinamdan sa tanang dedikado, matinumanon, nga mga alagad sa Diyos!—Buhat 5:32.
Naila Ingong Usa sa mga Saksi ni Jehova
11. Unsang pribilehiyo ang mabatonan niadtong mabawtismohan?
11 Ang ikaduhang pangutana nagsukna sa mga kandidato, una sa tanan, kon nasabtan ba niya nga ang iyang bawtismo magpaila nga siya usa na ka Saksi ni Jehova. Human sa iyang bawtismo, siya mahimong ordinadong ministro nga nagdala sa ngalan ni Jehova. Kini maoy usa ka dakong pribilehiyo ug usa ka seryosong responsibilidad. Pinaagi niini ang usa nga nabawtismohan aduna usay paglaom nga makabaton ug walay-kataposang kaluwasan, basta siya magmatinumanon kang Jehova.—Mateo 24:13.
12. Unsang obligasyon ang nalangkit sa kadungganan nga magdala sa ngalan ni Jehova?
12 Tino nga usa ka dakong kadungganan nga magdala sa ngalan sa labing gamhanan nga Diyos, si Jehova. Ang manalagnang si Miqueas miingon: “Ang tanang mga katawhan, sa ilang bahin, magalakaw ang tagsatagsa sa ngalan sa iyang diyos; apan kita, sa atong bahin, magalakaw sa ngalan ni Jehova nga atong Diyos hangtod sa panahong walay tino, bisan hangtod sa kahangtoran.” (Miqueas 4:5) Bisan pa niana, adunay obligasyon nga nalangkit niining maong kadungganan. Kinahanglang maningkamot kita sa pagkinabuhi sa paagi nga maghatag ug kadungganan sa ngalan nga atong gidala. Ingon sa gipahinumdom ni Pablo sa mga Kristohanon sa Roma, kon ang usa dili magbuhat sa kon unsay iyang gisangyaw, ang ngalan sa Diyos ‘mapasipalahan,’ o mapakaulawan.—Roma 2:21-24.
13. Nganong ang dedikadong mga alagad ni Jehova adunay responsibilidad nga magpamatuod bahin sa ilang Diyos?
13 Sa dihang ang usa ka tawo mahimong usa sa mga Saksi ni Jehova, iyang gidawat usab ang responsibilidad nga magpamatuod bahin sa iyang Diyos. Gidapit ni Jehova ang dedikadong nasod sa Israel nga mahimong iyang mga saksi aron magpamatuod sa iyang walay-kataposang pagka-Diyos. (Isaias 43:10-12, 21) Apan ang nasod napakyas sa pagtuman niining maong papel, ug sa ngadtongadto sila bug-os nga nawad-an sa pabor ni Jehova. Karon, ang matuod nga mga Kristohanon mapasigarbohon nga nakabaton sa pribilehiyo nga magpamatuod bahin kang Jehova. Gibuhat nato kana tungod kay kita nahigugma kaniya ug nagtinguha nga mabalaan ang iyang ngalan. Makaako kaha kita sa pagpakahilom sa dihang nahibalo kita sa kamatuoran bahin sa atong langitnong Amahan ug sa iyang katuyoan? Kita mobati sama sa gibati ni apostol Pablo sa dihang siya miingon: “Ang panginahanglan gikapatong ibabaw kanako. Sa pagkatinuod, alaot ako kon dili ko ipahayag ang maayong balita!”—1 Corinto 9:16.
14, 15. (a) Unsay papel sa organisasyon ni Jehova diha sa atong pag-uswag sa espirituwal? (b) Unsang mga tagana ang mabatonan sa pagtabang kanato sa espirituwal?
14 Ang ikaduhang pangutana magpahinumdom usab sa kandidato sa iyang responsibilidad nga makigtambayayong sa organisasyon nga tinultolan sa espiritu ni Jehova. Wala kita mag-inusara sa pag-alagad sa Diyos, ug kita nagkinahanglan sa tabang, pagpaluyo, ug pagdasig sa “tibuok kapunongan sa mga igsoon.” (1 Pedro 2:17; 1 Corinto 12:12, 13) Ang organisasyon sa Diyos adunay hinungdanong papel sa atong pag-uswag sa espirituwal. Kini nagtagana ug daghan kaayong publikasyon sa Bibliya nga motabang kanato sa pag-uswag sa tukmang kahibalo, sa paglihok nga maalamon sa dihang kita mag-atubang ug mga problema, ug sa pag-ugmad ug suod nga relasyon uban sa Diyos. Sama sa usa ka inahan nga magtino nga ang iyang anak maayong-pagkapakaon ug inatiman, “ang matinumanon ug maalamong ulipon” nagtagana ug dagayang espirituwal nga pagkaon aron kita mouswag sa espirituwal.—Mateo 24:45-47; 1 Tesalonica 2:7, 8.
15 Sa senemanang mga tigom, ang katawhan ni Jehova makadawat sa gikinahanglang pagbansay ug pagdasig aron mahimong matinumanon nga mga Saksi ni Jehova. (Hebreohanon 10:24, 25) Ang Tunghaan sa Teokratikanhong Ministeryo nagtudlo kanato sa pagsulti sa publiko, ug ang Tigom sa Pag-alagad nagbansay kanato sa pagpresentar sa atong mensahe sa epektibong paagi. Diha sa atong mga tigom ug pinaagi sa atong personal nga pagtuon sa mga publikasyon sa Bibliya, atong makita ang espiritu ni Jehova nga naglihok, nga nagtultol sa iyang organisasyon. Pinaagi niining regular nga mga tagana, ang Diyos nagtabang kanato nga makabantay sa mga kapeligrohan, nagbansay kanato nga mahimong epektibong mga ministro, ug nagtabang kanato nga kanunayng magtukaw sa espirituwal.—Salmo 19:7, 8, 11; 1 Tesalonica 5:6, 11; 1 Timoteo 4:13.
Ang Motibo sa Maong Desisyon
16. Unsay nagtukmod kanato sa pagpahinungod sa atong kaugalingon kang Jehova?
16 Sa ingon ang duha ka pangutana sa bawtismo magpahinumdom sa mga kandidato sa kahulogan sa bawtismo sa tubig ug sa mga responsibilidad nga nalangkit niana. Nan, unsay angayng magtukmod kanila sa pagdesisyon nga magpabawtismo? Kita nahimong bawtismadong mga tinun-an, dili tungod kay dunay nagpugos kanato, kondili tungod kay si Jehova ‘nagkabig’ kanato. (Juan 6:44) Tungod kay “ang Diyos gugma,” siya nagmando sa iyang mga linalang pinaagi sa gugma, dili sa paagi nga pinugos. (1 Juan 4:8) Kita nadani kang Jehova tungod sa iyang malulot nga mga hiyas ug sa paagi nga siya nakiglabot kanato. Si Jehova naghatag kanato sa iyang bugtong Anak ug nagtanyag kanato sa kinamaayohang kaugmaon. (Juan 3:16) Sa baylo, kita matukmod sa paghalad kaniya—sa pagpahinungod kaniya—sa atong kinabuhi.—Proverbio 3:9; 2 Corinto 5:14, 15.
17. Sa unsa nga wala nato ipahinungod ang atong kaugalingon?
17 Kita nagpahinungod sa atong kaugalingon, dili sa usa ka kawsa o sa usa ka buluhaton, kondili kang Jehova mismo. Ang buluhaton nga ipabuhat sa Diyos sa iyang katawhan mausab, apan ang ilang pagpahinungod kaniya magpabiling mao ra gihapon. Pananglitan, ang iyang gipabuhat kang Abraham lahi kaayo sa iyang gipabuhat kang Jeremias. (Genesis 13:17, 18; Jeremias 1:6, 7) Bisan pa niana, silang duha nagtuman sa espesipikong buluhaton nga gipabuhat sa Diyos kanila tungod kay sila nahigugma kang Jehova ug nagtinguha sa pagbuhat sa iyang kabubut-on nga matinumanon. Niining panahon sa kataposan, ang tanang bawtismadong mga sumusunod ni Kristo maningkamot sa pagtuman sa sugo ni Kristo nga magwali sa maayong balita sa Gingharian ug maghimog mga tinun-an. (Mateo 24:14; 28:19, 20) Ang kinasingkasing nga pagbuhat niana maoy maayong paagi nga atong ikapakita nga kita nahigugma sa atong langitnong Amahan ug nga kita tinuod nga nagpahinungod kaniya.—1 Juan 5:3.
18, 19. (a) Unsay atong gipahayag sa mga tawo pinaagi sa atong pagpabawtismo? (b) Unsay hisgotan sa sunod nga artikulo?
18 Sa walay duhaduha, ang pagpabawtismo magbukas sa dalan ngadto sa daghang panalangin, apan kini angayng palandongon pag-ayo. (Lucas 14:26-33) Kini magpakita sa determinasyon nga kinahanglang maoy unahon kay sa ubang responsibilidad. (Lucas 9:62) Sa dihang kita mabawtismohan, sa pagkatinuod kita nagpahayag niini sa mga tawo: “Kini nga Diyos mao ang atong Diyos hangtod sa panahong walay tino, bisan hangtod sa kahangtoran. Siya magagiya kanato hangtod sa atong pagkamatay.”—Salmo 48:14.
19 Ang sunod nga artikulo magsusi sa dugang mga pangutana nga mahimong motungha maylabot sa bawtismo sa tubig. Aduna bay lig-ong mga katarongan nga ang usa dili magpabawtismo? Makaapektar ba ang pangedaron? Sa unsang paagi ang tanan makahatag ug dignidad sa okasyon sa pagbawtismo?
Makapatin-aw Ka Ba?
• Nganong ang matag Kristohanon kinahanglang maghinulsol sa dili pa magpabawtismo?
• Unsay nalangkit sa pagpahinungod ngadto sa Diyos?
• Unsang mga responsibilidad ang nalangkit sa kadungganan nga magdala sa ngalan ni Jehova?
• Unsay angayng magtukmod kanato sa pagdesisyon nga magpabawtismo?
[Kahon/Hulagway sa panid 22]
Ang Duha ka Pangutana sa Bawtismo
Pinasukad sa halad ni Jesu-Kristo, ikaw ba naghinulsol na sa imong mga sala ug nagpahinungod na sa imong kaugalingon kang Jehova aron buhaton ang iyang kabubut-on?
Nasabtan mo ba nga ang imong pagpahinungod ug pagpabawtismo magpaila nga ikaw usa na ka Saksi ni Jehova nga nakig-uban sa organisasyon nga tinultolan sa espiritu sa Diyos?
[Hulagway sa panid 23]
Ang pagpahinungod maoy seryosong panaad nga gihimo ngadto kang Jehova pinaagi sa pag-ampo
[Hulagway sa panid 25]
Ang atong buluhatong pagsangyaw nagpasundayag sa atong pagpahinungod sa Diyos