Ang Pagkatawo ni Jesus—Kon sa Unsang Paagi Kini Magdalag Pakigdait

ANG gimantala nga “pakigdait taliwala sa mga tawo nga iyang gikahimut-an” dili lang mao ang bugtong tagna nga nalangkit sa pagkatawo ni Jesus. Dugang pa sa gipahibalo sa mga manulonda ngadto sa nahinganghang mga magbalantay, ang langitnong mga mensahero nagsulti nag inspirado-sa-Diyos nga mga mensahe bahin sa bag-ong natawo nga si Jesus ngadto kang Maria ug sa iyang bana nga si Jose. Ang pagkonsiderar niining mga mensahea motabang kanato sa pagbaton ug mas lawom nga pagsabot bahin sa pagkatawo ni Jesus ug sa tinuod nga kahulogan sa saad sa manulonda nga pakigdait taliwala sa katawhan.

Sa wala pa niya ipakatawo si Jesus, bisan gani sa wala pa siya magsabak, si Maria giduaw sa usa ka manulonda nga ginganlan diha sa Bibliya ug Gabriel. “Maayong adlaw, usa nga pinaboran kaayo, si Jehova nagauban kanimo” maoy pangomosta sa manulonda. Mahanduraw tingali nimo nga natugaw kaayo si Maria niini ug basin medyo nahadlok usab. Unsa kahay kahulogan sa maong pangomosta?

Si Gabriel mipatin-aw: “Tan-awa! ikaw manamkon sulod sa imong tagoangkan ug manganak ug usa ka anak nga lalaki, ug pagatawgon mo ang iyang ngalan nga Jesus. Kini siya mahimong bantogan ug pagatawgong Anak sa Labing Hataas; ug ihatag kaniya ni Jehova nga Diyos ang trono ni David nga iyang amahan, ug magamando siya ingon nga hari sa balay ni Jacob hangtod sa kahangtoran, ug walay pagkatapos ang iyang gingharian.” Si Maria nangutana kon sa unsang paagi mahitabo kini, sanglit siya, nga usa ka ulay, wala man makigdulog sa usa ka lalaki. Mitubag si Gabriel nga ang bata isamkon pinaagi sa balaang espiritu sa Diyos. Kini dili usa ka ordinaryong bata.—Lucas 1:28-35.

Gitagna nga Hari

Ang mga pulong ni Gabriel lagmit nakatabang kang Maria sa pagsabot nga ang bata nga iyang isamkon mao ang gitumong sa karaang mga tagna. Ang gibutyag sa manulonda nga ihatag ni Jehova sa anak ni Maria “ang trono ni David nga iyang amahan” nakapahunahuna kang Maria—ug sa pagkatinuod ni bisan kinsang Hudiyo nga sinati sa Kasulatan—sa saad nga gihimo sa Diyos kang Haring David sa Israel.

Pinaagi ni manalagnang Natan, giingnan ni Jehova si David: “Ang imong balay ug ang imong gingharian mahimong malig-on hangtod sa panahong walay tino sa imong atubangan; ang imong trono matukod nga malig-on hangtod sa panahong walay tino.” (2 Samuel 7:4, 16) Si Jehova miingon bahin kang David: “Pabarogon ko gayod ang iyang binhi hangtod sa kahangtoran ug ang iyang trono ingon sa mga adlaw sa langit. Ang iyang binhi maoy hangtod sa panahong walay tino, ug ang iyang trono ingon sa adlaw sa atubangan ko.” (Salmo 89:20, 29, 35, 36) Busa, dili kay naatol lang nga si Maria kaliwat ni David, maingon man usab si Jose.

Aduna pay laing mga tagna diha sa Hebreohanong Kasulatan bahin sa harianong anak ni David. Si Maria lagmit nahibalo usab sa tagna ni Isaias: “Adunay usa ka bata nga natawo alang kanato, adunay usa ka anak nga lalaki nga gihatag kanato; ug ang prinsipenhong pagmando mahipatong sa iyang abaga. Ug ang iyang ngalan pagatawgon nga Kahibulongang Magtatambag, Diyos nga Gamhanan, Amahang Walay Kataposan, Prinsipe sa Pakigdait. Sa kadagaya sa prinsipenhong pagmando ug sa pakigdait walay kataposan, ibabaw sa trono ni David ug ibabaw sa iyang gingharian aron kini matukod nga lig-on ug mapatunhay kini pinaagi sa hustisya ug pinaagi sa pagkamatarong, sukad karon ug hangtod sa panahong walay tino. Ang kasibot mismo ni Jehova sa mga panon ang mobuhat niini.”—Isaias 9:6, 7.

Busa, ang mensahe nga gisulti ni Gabriel kang Maria dakog kahulogan, dili lang kadto bahin sa milagrosong pagkatawo sa usa ka batang lalaki. Ang iyang anak mamahimong manununod sa trono ni Haring David—ang permanente ug walay-kataposang manununod sa Gingharian nga gitukod sa Diyos. Ang mga tagna ni Gabriel bahin sa umaabot nga papel ni Jesus hinungdanon kaayo alang kanatong tanan.

Sa dihang nahibaloan ni Jose nga nagsabak ang iyang pangasaw-onon, siya mihukom nga makigbulag kaniya. Nahibalo siya nga dili iya ang bata kay wala pa sila sukad magdulog sa iyang trato. Imong mahanduraw nga lisod gayod alang kang Jose nga tuohan ang pagsaysay ni Maria kon nganong nagsabak siya. Ang asoy sa Ebanghelyo nagtaho: “Ang manulonda ni Jehova nagpakita kaniya diha sa usa ka damgo, nga nag-ingon: ‘Jose, anak ni David, ayaw kahadlok sa pagdala kang Maria nga imong asawa sa imong balay, tungod kay ang iyang gisamkon maoy pinaagi sa balaang espiritu. Siya manganak ug usa ka anak nga lalaki, ug imong pagatawgon ang iyang ngalan nga Jesus, kay siya magluwas sa iyang katawhan gikan sa ilang mga sala.’”—Mateo 1:20, 21.

Wala isulti sa Bibliya kon nasabtan ba gayod ni Jose kon unsaon ‘pagluwas sa bata sa iyang katawhan gikan sa ilang mga sala.’ Bisan pa niana, ang mensahe igo na aron motuo si Jose nga ang nagsabak nga si Maria walay nahimong sala. Gituman niya ang sugo sa manulonda ug gidala niya si Maria sa iyang balay, nga maoy paagi kaniadto sa pagpaila nga sila kasado na.

Sa tabang sa impormasyon nga makaplagan sa ubang bahin sa Kasulatan, atong masabtan kon unsay gipasabot sa manulonda. Sa sayong bahin sa kasaysayan sa tawo, gikuwestiyon sa usa ka rebelyosong manulonda ang pagkasoberano ni Jehova. Ang Hebreohanong Kasulatan nagpakita nga kining maong rebelde nangangkon, lakip sa ubang butang, nga ang paagi sa Diyos sa pagmando dili makataronganon ug walay tawo nga magpabiling matinumanon kang Jehova kon mailalom sa pagsulay. (Genesis 3:2-5; Job 1:6-12) Si Adan usa niana. Ingong resulta sa iyang sala, ang tanang tawo nakapanunod ug sala, ug ang bunga niana maoy kamatayon. (Roma 5:12; 6:23) Apan, si Jesus natawo nga walay sala tungod kay wala siya isamkon pinaagi sa tawhanong amahan. Pinaagi sa paghatag sa iyang hingpit tawhanong kinabuhi ingong lukat nga katumbas gayod sa nawala ni Adan, si Jesus adunay katungod sa pagluwas sa mga tawo gikan sa ilang mga sala ug sa pagtanyag kanila sa palaaboton nga kinabuhing dayon.—1 Timoteo 2:3-6; Tito 3:6, 7; 1 Juan 2:25.

Panahon sa iyang yutan-ong ministeryo, abanteng gipakita ni Jesus kon unsa unya ang mahitabo sa dihang wad-on na ang mga epekto sa sala. Iyang giayo ang tanang matang sa pisikal nga sakit sa mga tawo ug iya pa ganing gibanhaw ang mga patay. (Mateo 4:23; Juan 11:1-44) Ang maong mga milagro maoy pasiuna lamang sa kon unsa unyay iyang buhaton sa umaabot. Si Jesus mismo miingon: “Ang takna nagsingabot nga ang tanan nga anaa sa handomanang mga lubnganan makadungog sa [akong] tingog ug manggula.”—Juan 5:28, 29.

Ang maong saad bahin sa umaabot nga pagkabanhaw nagpatin-aw kon nganong ang pagkatawo—ug ilabina ang kamatayon—ni Jesus hinungdanon kaayo alang kanato. Gipadala sa Diyos ang iyang anak sa kalibotan “aron pagaluwason ang kalibotan pinaagi kaniya,” nag-ingon ang Juan 3:17. Kining maanindot nga balita magpahinumdom kanato sa mga pulong nga gimantala ngadto sa mga magbalantay nga nagbantay sa ilang mga panon sa gabii nga natawo si Jesus.

“Maayong Balita sa Dakong Kalipay”

Usa gayod ka “maayong balita sa dakong kalipay” alang sa katawhan sa dihang gipahibalo sa mga manulonda ang pagkatawo sa “usa ka Manluluwas, nga mao ang Kristo nga Ginoo.” (Lucas 2:10, 11) Kining bataa maoy nahimong Mesiyas, ang dakong Manalagna ug Magmamando nga dugay nang gipaabot sa katawhan sa Diyos. (Deuteronomio 18:18; Miqueas 5:2) Ang iyang kinabuhi ug kamatayon sa yuta dakog papel sa pagbindikar sa pagkasoberano ni Jehova sa tibuok uniberso, busa nakaingon ang mga manulonda: “Himaya sa Diyos sa kahitas-an.”—Lucas 2:14.

Si Jesus, nga gitawag diha sa Bibliya nga “kataposang Adan,” nagpakita nga posible alang sa mga tawo nga magmatinumanon kang Jehova bisan ilalom sa kinagrabehang pagsulay. (1 Corinto 15:45) Busa iyang gipamatud-an nga daotan ug bakakon si Satanas. Mao kini ang hinungdan sa kalipay sa langit taliwala sa matinumanong mga manulonda.

Apan, mobalik ta sa pangutana nga, “Aduna bay realistikong paglaom nga mamatuman gayod ang gimantala sa manulonda sa gabii nga natawo si Jesus?” Ang tubag maoy dakong oo! Ang pakigdait hinungdanon kaayo aron matuman ang katuyoan sa Diyos sa yuta, nga naglakip sa pagpasig-uli sa paraisonhong mga kahimtang. Sa dihang matuman na kana sa tibuok yuta, ang tanang katawhan magmahigugmaon ug magmaunongon na. Busa, ang pagpalampos sa katuyoan ni Jehova nagkahulogan usab nga wagtangon ang tanan nga supak sa iyang pagkasoberano. Dili kini maayong balita ni bisan kinsa nga midapig kang Satanas sa pag-insistir nga sayop ang mga sukdanan sa Diyos. Sila pagalaglagon.—Salmo 37:11; Proverbio 2:21, 22.

Palihog matikdi nga wala mag-ingon ang mga manulonda ngadto sa mga magbalantay nga ang tanang tawo adunay pakigdait ug maayong kabubut-on. Hinunoa, ang ilang gipahibalo maoy “pakigdait taliwala sa mga tawo nga iyang gikahimut-an.” Kini nagtumong sa mga tawo nga giuyonan ug gikahimut-an sa Diyos. Kadtong adunay tiunayng pagtuo kang Jehova mahimong matinumanong mga sumusunod ug tigsundog ni Jesus. Ang maong mga lalaki ug babaye andam sa pagpakitag pagkamanggihatagon ug pagkamasinabtanon ngadto sa uban, dili lamang sa pipila ka adlaw sa matag tuig, kondili sa matag adlaw.

Magpakitag Kristohanong Espiritu sa Tibuok Tuig?

Ang gahom sa maayong balita nga gisangyaw ni Jesus nakatandog sa kinabuhi sa daghang mga tawo. Daghan ang nagpadapat sa Kristohanong mga prinsipyo diha sa tanang bahin sa ilang kinabuhi. Ang mga tawo nga makikaugalingon kaniadto misugod sa pagpangutana kon unsa kahay buhaton ni Jesus kon siya ang anaa sa ilang kahimtang. Ang pipila nga nagsentro sa ilang kinabuhi sa mga kabtangan ug kalingawan nakaamgo sa kahinungdanon sa espirituwal nga mga prinsipyo ug sa pagpaambit niini ngadto sa ilang mga silingan. Ang mga tawo nga nagbuhat niini naningkamot sa pagpakitag pagkamanggihatagon ug kalulot sa tibuok tuig. Dili ba kana ang imong madahom sa matuod nga mga Kristohanon?

Kon ang tanang sinserong tawo mamalandong sa kahinungdanon ug kahulogan sa mensahe sa mga manulonda bahin sa pakigdait ug molihok uyon niana, mas maayo unta ang kahimtang sa kalibotan.

Ang mga tagna bahin sa pagkatawo ni Jesus nagpasalig niadtong gikahimut-an sa Diyos nga mahimo nilang matagamtam ang tinuod nga pakigdait hangtod sa hangtod. Dili ba mao kanay imong gitinguha? Makaseguro kita nga ang mahimayaon nga matagnaong pahibalo bahin sa pakigdait nga gihimo sa mga manulonda sa dihang natawo si Jesus mamatuman gayod. Inay usa ka way-kahulogan nga pulong panahon sa Pasko, ang pakigdait seguradong mamatuman ug molungtad sa walay kataposan.

[Mga hulagway sa panid 7]

Ang Kristohanong espiritu mahimo ug angay nga ipakita sa tibuok tuig