Tabang Gikan sa ‘Diyos nga Nagtaganag Pagkamainantoson ug Paghupay’

MGA 2,000 ka tuig kanhi, ang magsusulat sa Bibliya nga si Pablo naghubit kang Jehova ingong usa ka ‘Diyos nga nagtaganag pagkamainantoson ug paghupay.’ (Roma 15:5) Sanglit ang Bibliya nagpasalig man kanato nga si Jehova dili mausab paglabay sa panahon, makasalig kita nga ang Diyos maghupay gihapon niadtong nag-alagad kaniya. (Santiago 1:17) Sa pagkatinuod, ang Bibliya nagbutyag nga si Jehova nagtaganag kahupayan sa lainlaing paagi niadtong nanginahanglan. Unsa ang pipila niini? Ang Diyos naghatag ug kusog niadtong moduol kaniya pinaagi sa pag-ampo, nga nangayo sa iyang tabang. Palihokon usab niya ang matuod nga mga Kristohanon sa pagtaganag paghupay sa mga isigkamagtutuo. Ug si Jehova nagtaganag makapadasig nga mga asoy diha sa iyang Pulong, ang Bibliya, nga ilabinang makapalig-on niadtong nagbangotan tungod sa pagkamatay sa ilang anak. Usa-usahon nato paghisgot kining tulo ka matang sa paghupay.

“Gidungog ni Jehova”

Si Haring David misulat bahin sa atong Maglalalang, si Jehova: “Salig kamo kaniya sa tanang panahon, Oh katawhan. Sa atubangan niya ibubo ninyo ang inyong kasingkasing. Ang Diyos maoy atong dalangpanan.” (Salmo 62:8) Nganong ingon niana ang pagsalig ni David kang Jehova? Naghisgot bahin sa iyang kaugalingon, si David misulat: “Kining sinakit mitawag, ug gidungog ni Jehova. Ug Siya nagluwas kaniya gikan sa tanan niyang kasakit.” (Salmo 34:6) Sa tanang malisod nga mga kahimtang nga iyang naagian, si David kanunayng nag-ampo sa Diyos alang sa tabang, ug si Jehova kanunayng nagtabang kaniya. Si David nahibalo sumala sa iyang kasinatian nga ang Diyos mopaluyo ug motabang kaniya nga makalahutay.

Ang nagbangotan nga mga ginikanan kinahanglang mahibalo nga si Jehova motabang kanila nga makaagwanta sa ilang grabeng kaguol, sama sa iyang gihimo kang David. Sila makaduol sa dakong “Tigpatalinghog sa pag-ampo,” uban ang pagsalig nga siya motabang kanila. (Salmo 65:2) Si William, nga gikutlo diha sa nag-unang artikulo, miingon: “Pagkamatay sa akong anak, dihay mga higayon nga wa na koy ganang mabuhi pa, ug mihangyo ko kang Jehova nga hupayon ko. Siya kanunayng naghatag kanakog kusog ug kalig-on aron ako makalahutay.” Kon mag-ampo sab ka kang Jehova uban ang pagtuo, ang dakong Diyos sa langit motabang kanimo. Sa pagkatinuod, si Jehova nga Diyos nagsaad niadtong naningkamot sa pag-alagad kaniya: “Ako, si Jehova nga imong Diyos, nagahawid sa imong tuong kamot, ang Usa nga nag-ingon kanimo, ‘Ayaw kahadlok. Ako magatabang kanimo.’”—Isaias 41:13.

Tabang Gikan sa Tinuod nga mga Higala

Kadtong namatyan ug anak sagad nga nagkinahanglag panahon aron monaya-naya sa ilang kaguol nga silasila ra. Apan, dili maalamon nga magpalain sila sa ilang kaugalingon sa taas nga panahon. Sumala sa Proverbio 18:1, “Ang nagalain sa iyang kaugalingon” lagmit nga mahiagom sa kadaot. Busa, kadtong nagbangotan angayng magbantay nga dili ilain ang ilang kaugalingon.

Ang mahinadlokon-sa-Diyos nga mga higala makahatag ug hinungdanong tabang niadtong anaa sa kagul-anan. Ang Proverbio 17:17 nag-ingon: “Ang tinuod nga higala mahigugma sa tanang panahon, ug maoy usa ka igsoon nga natawo alang sa panahon sa kasakit.” Si Lucy, nga gihisgotan usab sa nag-unang artikulo, nakasinati sa paghupay sa tinuod nga mga higala sa dihang namatay ang iyang anak. Bahin sa iyang mga higala diha sa kongregasyon, siya miingon: “Nakatabang ug dako ang ilang pagduaw, bisag dihay mga panahon nga wala ra kaayo silay gisulti. Ang usa nako ka higala moduaw sa dihang mag-inusara ko. Nahibalo siya nga anaa ko sa balay nga naghilak, mao nga adtoon ko niya ug mohilak pod siya uban nako. Ang lain pod nako ka higala adlaw-adlawng manawag aron dasigon ko. Ang uban mangimbitar sab namo nga mangaon sa ilang balay, ug ginabuhat pa gihapon nila kana hangtod karon.”

Bisag dili dayon mawala ang grabeng kaguol nga bation sa mga ginikanan sa dihang mamatyan silag anak, ang pag-ampo sa Diyos ug ang pagpakig-uban sa Kristohanong mga higala maghatag ug tinuod nga kahupayan niadtong nagbangotan. Daghang Kristohanong mga ginikanan nga namatyag anak ang nakasinati nga si Jehova nagpaluyo kanila. Oo, si Jehova “nagaayo sa mga may gun-ob nga kasingkasing, ug nagabugkos sa ilang masakit nga mga bahin.”—Salmo 147:3.

Mga Asoy sa Bibliya nga Nagtaganag Kahupayan

Gawas pa sa pag-ampo ug makapalig-ong panag-ubanay, ang sinulat nga Pulong sa Diyos maoy tinubdan sa kahupayan alang niadtong nagbangotan. Ang mga asoy sa Bibliya nagpadayag nga si Jesus adunay dulot nga tinguha ug katakos nga wagtangon ang kaguol sa nagbangotan nga mga ginikanan pinaagi sa pagbanhaw sa mga patay. Ang maong mga asoy naghatag ug tinuod nga kahupayan niadtong nag-antos sa grabeng kaguol. Tagdon nato ang duha sa maong mga asoy.

Ang Lucas kapitulo 7 naghubit kon unsay nahitabo sa dihang nakasugat si Jesus ug usa ka prosesyon sa lubong sa siyudad sa Nain. Ilubongay na sa mga tawo ang bugtong anak sa usa ka babayeng balo. Ang bersikulo 13 nag-ingon: “Sa nakit-an siya sa Ginoo, siya giabot ug kaluoy kaniya, ug siya miingon kaniya: ‘Ayaw na paghilak.’”

Wala gayoy makaako sa pagpahilom sa usa ka inahan nga naghilak panahon sa lubong sa iyang anak. Kon mao, nganong gisulti man kadto ni Jesus? Tungod kay nahibalo siya nga hapit nang mawala ang kaguol sa inahan. Nagpadayon ang maong asoy: “[Si Jesus] miduol ug [iyang] gihikap ang andas, ug ang nagyayong mihunong, ug siya miingon: ‘Dong, ingnon ko ikaw, Bangon!’ Ug ang patay nga tawo milingkod ug misugod sa pagsulti, ug iyang gihatag siya ngadto sa iyang inahan.” (Lucas 7:14, 15) Tingali nianang tungora, ang inahan mihilak pag-usab, apan tungod na sa kalipay.

Sa laing higayon, si Jesus giduol sa usa ka tawo nga ginganlag Jairo, nga nagpakitabang kay grabeng nasakit ang iyang 12-anyos nga anak nga babaye. Pagkataudtaod, miabot ang balita nga patay na ang dalagita. Puwerteng guola ni Jairo pagkadungog niya niini, apan giingnan siya ni Jesus: “Ayaw kahadlok, ipasundayag lamang ang pagtuo.” Pag-abot nila sa balay, giadto ni Jesus ang patayng lawas sa dalagita. Gigunitan niya ang kamot niini ug miingon: “Inday, magaingon ako kanimo, Bangon!” Unsay nahitabo? “Dihadiha ang dalagita mibangon ug misugod paglakaw.” Unsa may reaksiyon sa iyang mga ginikanan? “Sila nalipay pag-ayo.” Sa dihang gigakos ni Jairo ug sa iyang asawa ang ilang anak, mibati silag hilabihang kalipay. Daw nagdamgo sila.—Marcos 5:22-24, 35-43.

Ang maong detalyadong mga asoy sa Bibliya bahin sa pagkabanhaw sa mga bata nagpakita sa mga ginikanan karon nga namatyan ug anak kon unsay ilang madahom sa umaabot. Matod pa ni Jesus: “Ang takna nagsingabot nga ang tanan nga anaa sa handomanang mga lubnganan makadungog sa iyang tingog ug manggula.” (Juan 5:28, 29) Kabubut-on ni Jehova nga banhawon sa iyang Anak kadtong nangamatay. Ang milyon-milyong mga bata nga nangamatay “makadungog sa iyang tingog” sa dihang mosulti siya kanila: ‘Magaingon ako kaninyo, Bangon!’ Ang maong mga bata molakaw ug mosulti pag-usab. Ug sama ni Jairo ug sa iyang asawa, ang mga ginikanan sa maong mga bata ‘malipay pag-ayo.’

Kon namatyan kamog anak nga lalaki o babaye, palihog hibaloi nga ang inyong kagul-anan mapulihan ni Jehova ug kalipay pinaagi sa pagkabanhaw. Aron makabenepisyo kamo niining nindot kaayo nga palaaboton, tumana ang tambag sa salmista: “Pangitaa si Jehova ug ang iyang kusog. Pangitaa ang iyang nawong sa kanunay. Hinumdomi ang iyang katingalahang mga buhat nga iyang gihimo, ang iyang mga milagro.” (Salmo 105:4, 5) Oo, alagara ang matuod nga Diyos, si Jehova, ug simbaha siya sa paagi nga dalawaton kaniya.

Unsay dihadihang resulta kon inyong ‘pangitaon si Jehova’? Makadawat kamog kusog pinaagi sa pag-ampo sa Diyos, mahupayan kamo sa mahigugmaong kabalaka sa tinuod nga Kristohanong mga kauban, ug madasig kamo pinaagi sa pagtuon sa Pulong sa Diyos. Dugang pa, sa haduol nga umaabot, inyong maeksperyensiyahan ang ‘katingalahang mga buhat ug mga milagro’ nga himoon ni Jehova alang sa inyong dumalayong kaayohan ug alang usab sa inyong anak nga namatay.

[Kahon sa panid 5]

“Paanhia ra ang Babaye nga Namatyag Duha ka Anak”

Si Kehinde ug Bintu, usa ka magtiayon sa Nigeria nga mga Saksi ni Jehova, namatyan ug duha ka anak tungod sa aksidente sa sakyanan. Sukad niadto, nag-antos sila sa grabeng kaguol tungod sa maong masakit nga kasinatian. Bisan pa niana, sila nakalahutay tungod sa ilang pagsalig kang Jehova, ug sila padayong nagpaambit sa mensahe sa paglaom nga anaa sa Bibliya uban sa ilang mga silingan.

Namatikdan sa uban ang malinawong tinamdan ug kalig-on ni Kehinde ug Bintu. Usa ka adlaw niana, ang usa ka babaye nga ginganlag Gng. Ukoli miingon sa usa sa mga higala ni Bintu: “Paanhia ra ang babaye nga namatyag duha ka anak nga nagsangyaw gihapon sa mensahe sa Bibliya. Gusto kong masayod kon unsay nakahatag kaniyag kusog nga nakalahutay man siya.” Pag-adto ni Bintu sa balay sa babaye, giingnan siya ni Gng. Ukoli: “Gusto kong masayod kon nganong nagsangyaw gihapon ka bahin sa Diyos nga maoy nagpatay sa imong mga anak. Gikuha sa Diyos ang akong bugtong anak nga babaye. Sukad niadto, di na ko motuo ug Diyos.” Gigamit ni Bintu ang Bibliya sa pagsaysay sa hinungdan kon nganong mamatay ang tawo ug kon nganong anaa kitay seguradong paglaom nga mabanhaw ang atong mga minahal nga nangamatay.—Buhat 24:15; Roma 5:12.

Human niana, si Gng. Ukoli miingon: “Abi nakog ang Diyos maoy hinungdan sa kamatayon sa tawo. Karon nahibalo na ko sa kamatuoran.” Nakahukom siya nga magtuon sa Bibliya uban sa mga Saksi ni Jehova aron makakat-on pag dugang bahin sa mga saad sa Diyos.

[Kahon sa panid 6]

‘Gusto Kong Motabang, Apan Wala Ko Mahibalo Kon Unsay Buhaton’

Samtang nagbangotan ang mga ginikanan ug mga igsoon sa bata nga namatay, ang ilang mga higala tingali magpanagana. Gusto nilang motabang sa pamilya apan nahadlok nga basin makasulti o makabuhat silag dili mao nga makapasamot sa kaguol sa hingtungdan. Aniay pipila ka sugyot alang niadtong naghunahuna nga, ‘Gusto kong motabang, apan wala ko mahibalo kon unsay buhaton.’

❖ Ayawg likay-likayi ang namatyan tungod lang kay wala ka mahibalo kon unsay isulti o buhaton. Ang imong presensiya dako nag mahimo aron malig-on sila. Wala ka bay mahunahunaang isulti? Ang paghalog ug sinserong pagsulti ug “Nasubo ko sa nahitabo” magpahibalo kanila nga nagtagad ka kanila. Nahadlok ka ba nga kon mohilak ka, mosamot ang ilang kasubo? Ang Bibliya nag-ingon: “Hilak uban sa mga tawong nanghilak.” (Roma 12:15) Ang imong paghilak magpakita nga naguol sab ka, ug makapahupay kana kanila.

❖ Pagpakitag inisyatibo. Makahimo ka ba sa pagdegamo alang sa pamilya? Makahimo ka ba sa paghugas sa nagtipun-og nang mga hugason? Makahimo ka ba sa pag-atiman sa ginagmayng mga atimanonon? Ayawg sulti ug, “Pahibal-a lang ko kon duna moy gikinahanglan.” Bisag sinsero ang imong pagsulti niana, bation sa daghang hingtungdan nga puliki kaayo ka ug busa dili ka makatabang kanila. Hinunoa, pangutan-a sila, “Unsa may akong ikatabang ninyo?” ug dayon buhata kon unsay ilang ihangyo. Apan likayi ang pagsulod sa pribadong bahin sa ilang panimalay o ang pagpanghilabot sa ilang kinabuhi.

❖ Likayi ang pagsulti ug, “Nahibalo ko kon unsay imong gibati.” Dili-managsama ang bationg kaguol sa matag-usa tungod sa kamatayon sa usa ka minahal. Bisag namatyan sab kag anak kaniadto, wala ka mahibalo kon unsa gayoy ilang gibati.

❖ Dangtan pag taas-taas nga panahon usa mobalik sa normal ang ilang pagkinabuhi. Padayon sa pagtabang kutob sa imong maarangan. Ang pamilya nga namatyan sagad nga hatagan ug daghan kaayong atensiyon sa sinugdan, apan dili lang kay sa sinugdan nga sila nagkinahanglan niana. Tagda ang ilang mga panginahanglan sa mosunod nga mga semana ug mga bulan.a

[Footnote]

[Mga hulagway sa panid 7]

Ang mga asoy sa Bibliya nagpakita nga si Jesus adunay gahom ug tinguha sa pagbanhaw sa mga bata