“Bantayi Kanunay ang Ministeryo nga Imong Gidawat Diha sa Ginoo”
“Bantayi kanunay ang ministeryo nga imong gidawat diha sa Ginoo, nga imong matuman kini.”—COL. 4:17.
1, 2. Unsay kaakohan sa mga Kristohanon ngadto sa katawhan?
KITA adunay bug-at nga kaakohan sa mga tawo. Ang ilang mga desisyon nga himoon karon magkahulogan ug kinabuhi o kamatayon inig-abot sa “dakong kasakitan.” (Pin. 7:14) Ang inspiradong magsusulat sa Proverbio nag-ingon: “Luwasa silang ginadala ngadto sa kamatayon; ug kadtong mga nagsusapinday aron pagapatyon, Oh hawiran mo unta sila.” Pagkabug-at nga mga pulong! Kon dili nato pasidan-an ang mga tawo kon unsay angay nilang pagabuhaton, kita ang manubag sa ilang kamatayon. Gani, kining tekstoha nagpadayon: “Kon ikaw magaingon: ‘Tan-awa! Wala kami mahibalo niini,’ dili ba siya nga nagatimbang sa mga kasingkasing makaila niini, ug siya nga nagabantay sa imong kalag mahibalo ug magabalos gayod sa yutan-ong tawo sumala sa iyang kalihokan?” Dili gayod makaingon ang mga alagad ni Jehova nga sila ‘wala mahibalo’ sa kapeligrohan nga giatubang sa katawhan.—Prov. 24:11, 12.
2 Gipabilhan gayod ni Jehova ang kinabuhi. Iyang giawhag ang iyang mga alagad sa paghimo kutob sa ilang maarangan nga makatabang sa pagluwas ug mas daghang kinabuhi. Kinahanglang imantala sa tagsatagsa ka ministro sa Diyos ang nagaluwas-ug-kinabuhi nga mensahe nga anaa sa Pulong sa Diyos. Ang atong buluhaton maoy susama nianang iya sa usa ka magbalantay nga magpasidaan kon makakita siyag nagsingabot nga kapeligrohan. Dili nato gustong paninglan sa dugo niadtong nameligrong malaglag. (Ezeq. 33:1-7) Busa, hinungdanon gayod nga padayon natong “iwali ang pulong”!—Basaha ang 2 Timoteo 4:1, 2, 5.
3. Unsa ang hisgotan niining artikuloha ug sa mosunod nga duha ka artikulo?
3 Kining artikuloha maghisgot kon sa unsang paagi imong mabuntog ang mga babag sa imong nagaluwas-ug-kinabuhi nga ministeryo ug kon sa unsang paagi ikaw makatabang ug mas daghan pang mga tawo. Ang mosunod nga artikulo magsusi kon sa unsang paagi imong maugmad ang arte sa pagpanudlo sa hinungdanong mga kamatuoran. Ang ikatulong tun-anang artikulo adunay mga taho bahin sa makapadasig nga mga kasinatian sa mga magmamantala sa Gingharian sa tibuok kalibotan. Apan sa dili pa nato hisgotan kining mga ulohana, maayo nga ato unang hisgotan kon nganong makuyaw kaayo ang atong panahon.
Kon Nganong Daghan ang Walay Paglaom
4, 5. Unsay nasinatian sa katawhan, ug unsay reaksiyon sa daghan?
4 Ang mga panghitabo sa kalibotan nagpaila nga kita nagkinabuhi sa “kataposan sa sistema sa mga butang” ug ang kataposan haduol na kaayo. Nasinatian na sa katawhan ang mga panghitabo ug mga kahimtang nga giingon ni Jesus ug sa iyang mga tinun-an nga mahitabo sa “kataposang mga adlaw.” Ang “mga kaul-ol sa kasakit,” nga naglakip sa mga gubat, kanihit sa pagkaon, mga linog, ug uban pang katalagman, naghampak sa katawhan. Kaylap ang pagkamalapason, kahakog, ug dili-diyosnong mga tinamdan. Bisan alang sa mga tawong naningkamot nga magkinabuhi subay sa mga sukdanan sa Bibliya, kini maoy “makuyaw nga mga panahong lisod sagubangon.”—Mat. 24:3, 6-8, 12; 2 Tim. 3:1-5.
5 Ugaling, ang kinabag-an sa katawhan wala mahibalo sa tinuod nga kahulogan sa mga panghitabo sa kalibotan. Tungod niana, daghan ang nabalaka bahin sa ilang kasegurohan ug sa ilang mga pamilya. Ang pagkamatay sa mga minahal o uban pang mga katalagman nagsakit sa daghan. Kay walay tukmang kahibalo kon nganong nagakahitabo kining mga butanga ug kon asa makaplagan ang solusyon niini, kining mga tawhana wala gayoy paglaom.—Efe. 2:12.
6. Nganong wala makatabang ang “Dakong Babilonya” sa iyang mga ginsakpan?
6 Ang “Dakong Babilonya,” ang tibuok-kalibotang imperyo sa bakak nga relihiyon, wala makahupay sa katawhan. Iya hinuong gilibog sa espirituwal ang daghang katawhan pinaagi sa “bino sa iyang pagpakighilawas.” Gawas pa, sama sa usa ka babayeng bigaon, gidani ug gikontrolar sa bakak nga relihiyon ang “mga hari sa yuta,” ginamit ang bakak nga mga doktrina ug mga buhat sa espiritismo aron ang kinabag-an sa katawhan padayong magpaulipon sa ilang mga kagamhanan. Busa ang bakak nga relihiyon nakabaton ug gahom ug impluwensiya, apan sa samang higayon, bug-os niyang gisalikway ang kamatuoran.—Pin. 17:1, 2, 5; 18:23.
7. Unsay dulnganan sa kadaghanan sa katawhan, apan sa unsang paagi matabangan ang uban?
7 Si Jesus nag-ingon nga ang kadaghanan sa katawhan nagsubay sa haluag nga dalan padulong sa kalaglagan. (Mat. 7:13, 14) Ang pipila ka tawo anaa nianang dalana tungod kay tinuyo nilang gisalikway ang mga pagtulon-an sa Bibliya, apan ang uban anaa dinha tungod kay sila nalimbongan o nabutaan sa kon unsay tinuod nga gikinahanglan ni Jehova kanila. Basin usbon sa uban ang ilang pagkinabuhi kon sila matudloan ug tin-awng makasabot sa Kasulatanhong mga rason sa paghimo niana. Apan kadtong magpabilin sa Dakong Babilonya ug padayong magsalikway sa mga sukdanan sa Bibliya dili maluwas inig-abot sa “dakong kasakitan.”—Pin. 7:14.
Padayon sa Pagsangyaw nga ‘Walay Hunong’
8, 9. Unsay gihimo sa unang-siglong mga Kristohanon sa dihang sila gilutos, ug ngano?
8 Si Jesus miingon nga ang iyang mga tinun-an kinahanglang magwali sa maayong balita sa Gingharian ug maghimog tinun-an. (Mat. 28:19, 20) Busa, kanunayng giisip sa matuod nga mga Kristohanon ang pagpakigbahin sa buluhatong pagsangyaw ingong pagkamaunongon ngadto sa Diyos ug usa ka pangunang kinahanglanon sa ilang pagtuo. Mao nga ang unang mga sumusunod ni Jesus padayong nagsangyaw bisan pag sila gilutos. Sila misalig kang Jehova alang sa kusog ug nag-ampo nga iya silang tabangan nga makapadayon sa “pagsulti sa [iyang] pulong uban ang bug-os nga kaisog.” Agig tubag sa ilang pag-ampo, gihatagan sila ni Jehova ug balaang espiritu, ug sila maisogong nagsulti sa pulong sa Diyos.—Buh. 4:18, 29, 31.
9 Sa dihang migrabe ang paglutos, mihunong ba ang mga sumusunod ni Jesus sa pagsangyaw sa maayong balita? Wala gayod. Kay naglagot sa pagsangyaw sa mga apostoles, gidakop, gihulga, ug gibunalan sila sa Hudiyong relihiyosong mga lider. Apan ang mga apostoles “wala mohunong sa pagpanudlo ug sa pagpahayag sa maayong balita bahin kang Kristo, si Jesus.” Tin-aw nilang nasabtan nga kinahanglan nilang “sugton ang Diyos ingong magmamando inay ang mga tawo.”—Buh. 5:28, 29, 40-42.
10. Unsang mga pagsulay ang giatubang sa mga Kristohanon karon, apan lagmit unsay moresulta sa ilang maayong panggawi?
10 Ang kadaghanan sa mga alagad sa Diyos karon mahimong dili makaagom ug mga pagbunal o pagkabilanggo tungod sa ilang pagsangyaw. Hinunoa, ang tanang matuod nga mga Kristohanon makaatubang ug lainlaing mga pagsulay. Pananglitan, ang imong nabansay-sa-Bibliya nga tanlag basin magdiktar kanimo sa pagsunod sa dili-popular nga pagkinabuhi nga maghimo kanimong lahi sa kadaghanan. Tingali matingala kanimo ang imong mga higala, mga eskolmet, o mga silingan tungod kay imong gipasukad ang imong mga desisyon sa mga prinsipyo sa Bibliya. Apan dili ka angayng mabalaka niana. Ang kalibotan anaa sa espirituwal nga kangitngit, apan ang mga Kristohanon kinahanglang “[mosidlak] ingong mga magbabanwag.” (Filip. 2:15) Basin makita ug mapabilhan sa pipila ka sinserong maniniid ang imong maayong panggawi ug moresulta kini sa kahimayaan ni Jehova.—Basaha ang Mateo 5:16.
11. (a) Unsa kahay reaksiyon sa uban bahin sa buluhatong pagsangyaw? (b) Unsang matanga sa pagsupak ang nasinatian ni apostol Pablo, ug unsay iyang reaksiyon?
11 Gikinahanglan nato ang kaisog aron padayon kitang makasangyaw sa mensahe sa Gingharian. Mahimong biaybiayon o paluyahon ka sa pipila ka tawo, bisan sa imong mga paryente. (Mat. 10:36) Sa makadaghan, si apostol Pablo gibunalan tungod sa iyang pagsangyaw. Matikdi kon unsay iyang reaksiyon sa maong pagsupak: “Human kami mag-antos una ug gipasipalahan,” matod niya, “kami nakabaton ug kaisog pinaagi sa atong Diyos nga isulti kaninyo ang maayong balita sa Diyos uban ang hilabihang pakigbisog.” (1 Tes. 2:2) Dayag nga gikinahanglan gayod ni Pablo ang kaisog aron padayon niyang ikawali ang maayong balita human siya gidakop, gihuboan, gigarote, ug gibilanggo. (Buh. 16:19-24) Sa unsang paagi iyang nabatonan ang kaisog? Siya nagmaisogon tungod sa iyang dakong tinguha sa pagtuman sa buluhatong pagsangyaw nga gihatag sa Diyos kaniya.—1 Cor. 9:16.
12, 13. Unsang mga kalisdanan ang giatubang sa uban, ug sa unsang paagi ilang gisagubang kini?
12 Mahimong malisod usab ang paghupot sa atong kasibot diha sa mga teritoryo diin ang mga tawo kanunayng wala sa balay o ang kadaghanan dili interesado sa mensahe sa Gingharian. Unsay atong mahimo sa maong mga kahimtang? Kinahanglan tingali kitang magbaton ug dugang kaisog sa pagsangyaw sa mga tawo diha sa di-pormal nga paagi. Mahimong ipasibo usab nato ang atong eskedyul sa pagsangyaw o anha mosangyaw sa mga dapit diin atong mahibalag ang mas daghang tawo.—Itandi ang Juan 4:7-15; Buh. 16:13; 17:17.
13 Daghan usab ang nagsagubang sa pagkatigulang ug dili-maayong panglawas mao nga limitado na lang ang ilang mahimo sa pagsangyaw. Kon kana ang imong kahimtang, ayawg kaluya. Si Jehova nahibalo sa imong mga limitasyon ug nagpabili sa kon unsay imong maarangan. (Basaha ang 2 Corinto 8:12.) Bisag unsa pang matanga sa kalisdanan ang imong giatubang—pagsupak, kawalay interes, o dili-maayong panglawas—buhata ang tanan nimong maarangan sa pagpaambit sa maayong balita ngadto sa uban.—Prov. 3:27; itandi ang Marcos 12:41-44.
‘Bantayi Kanunay ang Imong Ministeryo’
14. Unsang panig-ingnan ang gihatag ni apostol Pablo ngadto sa iyang mga isigka-Kristohanon, ug unsay iyang gitambag?
14 Makugihong gituman ni apostol Pablo ang iyang ministeryo, ug iyang gidasig ang iyang mga isigkamagtutuo sa pagsundog kaniya. (Buh. 20:20, 21; 1 Cor. 11:1) Ang usa ka tawo nga ilabinang gidasig ni Pablo sa unang siglo mao ang usa ka Kristohanon nga ginganlag Arquipo. Sa iyang sulat ngadto sa mga taga-Colosas, si Pablo miingon: “Sultihi si Arquipo: ‘Bantayi kanunay ang ministeryo nga imong gidawat diha sa Ginoo, nga imong matuman kini.’” (Col. 4:17) Wala kita masayod kon kinsa gayod si Arquipo o kon unsay iyang mga kahimtang, apan dayag nga iyang gidawat ang usa ka asaynment ingong ministro. Kon ikaw usa na ka dedikadong Kristohanon, ikaw midawat usab ug usa ka asaynment ingong ministro. Gibantayan mo ba kanunay ang imong ministeryo aron matuman kini?
15. Unsay nalangkit sa Kristohanong pagpahinungod, ug unsang mga pangutana ang motungha?
15 Sa wala pa kita bawtismohi, atong gipahinungod ang atong kinabuhi kang Jehova diha sa kinasingkasing nga pag-ampo. Kini nagkahulogan nga determinado kitang mobuhat sa iyang kabubut-on. Busa angay natong pangutan-on ang atong kaugalingon karon, ‘Ang pagbuhat sa kabubut-on sa Diyos mao ba gayod ang labing hinungdanong butang sa akong kinabuhi?’ Tingali aduna kitay nagkalainlaing mga responsabilidad nga gidahom ni Jehova nga atong buhaton, sama sa pagtagana sa mga panginahanglan sa atong pamilya. (1 Tim. 5:8) Apan giunsa nato paggamit ang uban natong panahon ug kusog? Unsa bay labing hinungdanon sa atong kinabuhi?—Basaha ang 2 Corinto 5:14, 15.
16, 17. Unsang mga kahigayonan ang angayng hunahunaon sa batan-ong mga Kristohanon o niadtong wala pay daghang obligasyon?
16 Ikaw ba usa ka batan-on nga dedikadong Kristohanon nga nakagraduwar na o hapit nang mograduwar sa pag-eskuyla? Lagmit, wala ka pay bug-at nga mga kaakohan sa pamilya. Busa, unsa may gusto nimong buhaton sa imong kinabuhi? Unsay angay nimong himoon aron matuman mo ang imong panaad nga buhaton ang kabubut-on ni Jehova? Giorganisar sa daghan ang ilang mga kalihokan aron sila makapayunir, ug ilang naangkon ang dakong kalipay ug katagbawan tungod niana.—Sal. 110:3; Eccl. 12:1.
17 Tingali ikaw hohamtong na ug may bug-os-panahong sekular nga trabaho apan wala pay daghang obligasyon gawas sa pagsuportar lamang sa imong kaugalingon. Walay duhaduha nalipay ka sa pagpakigbahin sa mga kalihokan sa kongregasyon segun sa itugot sa imong eskedyul. Posible bang madugangan pa ang imong kalipay? Nakahunahuna ka ba sa pagpalapad sa imong ministeryo? (Sal. 34:8; Prov. 10:22) Diha sa pipila ka teritoryo, gikinahanglan pa ang dakong pagpaningkamot aron ikapaabot sa tanan ang nagahatag-ug-kinabuhi nga mensahe sa kamatuoran. Makahimo ka bag mga kausaban sa imong kinabuhi, tingali sa pag-alagad sa usa ka dapit diin mas dako ang panginahanglan sa mga magmamantala sa Gingharian?—Basaha ang 1 Timoteo 6:6-8.
18. Unsang mga kausaban ang gihimo sa usa ka magtiayon, ug unsay miresulta?
18 Tagda ang panig-ingnan ni Kevin ug Elena nga taga-Amerika.a Sama sa kadaghanan sa mga bag-ong minyo sa ilang dapit, gusto usab nilang makapalit ug balay. Sila nagtrabaho nga bug-os-panahon aron mamentinar ang ilang hamugaway nga kinabuhi. Apan wala na kaayo silay panahon sa pagsangyaw tungod sa ilang sekular nga trabaho ug mga buluhaton sa balay. Sila nakaamgo nga halos ila nang gigugol ang ilang panahon ug kusog sa ilang mga kabtangan. Hinunoa, sa dihang naobserbahan ni Kevin ug Elena ang yanong pagkinabuhi sa usa ka malipayong payunir nga magtiayon, nakahukom sila sa pag-usab sa ilang mga prioridad. Human moampo kang Jehova sa pagtabang kanila nga makahimog maalamong desisyon, ilang gibaligya ang ilang balay ug mibalhin sa usa ka apartment. Gikunhoran ni Elena ang iyang oras sa pagtrabaho ug nagpayunir. Kay nadasig sa malipayong mga kasinatian sa iyang asawa, si Kevin miundang sa iyang bug-os-panahong trabaho ug nagpayunir usab. Paglabay sa pipila ka panahon, mibalhin sila ngadto sa usa ka nasod sa Amerika del Sur diin dako ang panginahanglan sa mga magmamantala sa Gingharian. Matod ni Kevin: “Malipayon kanunay ang among panagtiayon, apan sa dihang gipauswag namo ang among pag-alagad kang Jehova, mas nagmalipayon pa gayod kami.”—Basaha ang Mateo 6:19-22.
19, 20. Nganong ang pagsangyaw sa maayong balita mao ang labing hinungdanong buluhaton karon?
19 Ang pagsangyaw sa maayong balita mao ang labing hinungdanong buluhaton nga ginahimo sa yuta karon. (Pin. 14:6, 7) Kini nakatabang sa pagbalaan sa ngalan ni Jehova. (Mat. 6:9) Ang mensahe sa Bibliya nakapauswag sa kinabuhi sa libolibong katawhan nga midawat niini matag tuig, ug mosangpot kini sa ilang kaluwasan. Apan, “unsaon . . . nila pagkadungog kon walay magwali?” nangutana si apostol Pablo. (Roma 10:14, 15) Sa pagkatinuod, lisod gayod kon walay magwali. Busa, nganong dili magmadeterminado sa pagbuhat kutob sa imong maarangan sa pagtuman sa imong ministeryo?
20 Ang laing paagi nga makatabang ka sa mga tawo nga makasabot sa kahulogan niining makuyaw nga mga panahon ug sa mga sangpotanan sa mga desisyon nga ilang pagahimoon mao ang pagpauswag sa imong katakos sa pagpanudlo. Hisgotan sa sunod artikulo kon unsaon nimo paghimo niini.
[Footnote]
a Ang mga ngalan giilisan.
Unsay Imong Tubag?
• Unsay kaakohan sa mga Kristohanon ngadto sa katawhan?
• Sa unsang paagi atong mabuntog ang mga babag sa atong pagsangyaw?
• Sa unsang paagi atong matuman ang ministeryo nga atong gidawat?
[Hulagway sa panid 5]
Gikinahanglan ang kaisog sa pagsangyaw bisan pa sa pagsupak
[Hulagway sa panid 7]
Unsay imong himoon kon ikaw nagsangyaw diha sa mga teritoryo diin ang mga tawo kanunayng wala sa balay?