Pauswaga ang Imong Espirituwalidad Pinaagi sa Pagsundog Kang Pablo
“Gibugno ko na ang maayong bugno, natapos ko na ang pagdagan sa lumba, nasunod ko na ang pagtuo.”—2 TIM. 4:7.
1, 2. Unsang mga kausaban ang gihimo ni Saulo nga taga-Tarso sa iyang kinabuhi, ug unsang hinungdanong buluhaton ang iyang gisugdan?
SIYA intelihente ug lig-og baroganan. Apan, siya ‘migawi uyon sa mga tinguha sa iyang unod.’ (Efe. 2:3) Sa ulahi, iyang gihubit ang iyang kaugalingon nga “usa ka tigpasipala ug maglulutos ug tawong bagis.” (1 Tim. 1:13) Siya mao si Saulo nga taga-Tarso.
2 Sa ngadtongadto, si Saulo mihimog dakong kausaban sa iyang kinabuhi. Iyang gibiyaan ang iyang kanhing paagi sa pagkinabuhi ug siya naningkamot gayod ‘nga dili mangita sa iyang kaugalingong kaayohan kondili nianang sa daghan.’ (1 Cor. 10:33) Siya malumo na ug iya nang gimahal ang mga igsoon sa kongregasyon nga kanhi biktima sa iyang kayugot. (Basaha ang 1 Tesalonica 2:7, 8.) Siya misulat: “Nahimo akong ministro . . . . Nganhi kanako, [nga] usa ka tawong ubos pa kay sa labing ubos sa tanang balaan, kining dili-takos nga kalulot gihatag, aron ipahayag ko ngadto sa kanasoran ang maayong balita bahin sa dili-matugkad nga bahandi ni Kristo.”—Efe. 3:7, 8.
3. Sa unsang paagi makatabang kanato ang pagtuon sa mga sulat ni Pablo ug sa rekord sa iyang ministeryo?
3 Si Saulo, nga nailhan usab nga Pablo, mihimog dakong pag-uswag sa espirituwal. (Buh. 13:9) Ang usa ka seguradong paagi aron mouswag dayon kita diha sa kamatuoran mao ang pagtuon sa mga sulat ni Pablo ug sa rekord sa iyang ministeryo, ug ang pagsundog sa iyang pagtuo. (Basaha ang 1 Corinto 11:1; Hebreohanon 13:7.) Hisgotan nato kon sa unsang paagi ang paghimo niana makatabang kanato sa pagbaton ug maayong rutina sa pagtuon, sa pag-ugmad ug tiunay nga gugma alang sa mga tawo, ug sa pagbatog hustong panglantaw sa atong kaugalingon.
Ang Rutina ni Pablo sa Pagtuon
4, 5. Sa unsang paagi ang personal nga pagtuon nakahatag ug kaayohan kang Pablo?
4 Ingong usa ka Pariseo nga naedukar “sa tiilan ni Gamaliel [ug] natudloan sumala sa pagkaestrikto sa Balaod sa katigulangan,” si Pablo diha nay kahibalo sa Kasulatan. (Buh. 22:1-3; Filip. 3:4-6) Human sa iyang bawtismo, siya ‘miadto [dayon] sa Arabia’—lagmit didto sa Desyerto sa Sirya o kaha sa usa ka mingawng dapit sa Arabianhong Peninsula diin makapamalandong siyag maayo. (Gal. 1:17) Lagmit gustong pamalandongon ni Pablo ang mga kasulatan nga nagpamatuod nga si Jesus ang Mesiyas. Dugang pa, gusto ni Pablo nga maandam ang iyang kaugalingon sa buluhaton nga ihatag kaniya. (Basaha ang Buhat 9:15, 16, 20, 22.) Si Pablo naggahig panahon sa pagpamalandong sa espirituwal nga mga butang.
5 Ang kahibalo ug ang lawom nga pagsabot ni Pablo sa Kasulatan tungod sa iyang maayong rutina sa pagtuon nakatabang kaniya nga mahimong epektibo sa pagtudlo sa kamatuoran. Pananglitan, diha sa sinagoga sa Antioquia sa Pisidia, si Pablo mikutlo sa Hebreohanong Kasulatan sa labing menos lima ka higayon aron pamatud-an nga si Jesus mao ang Mesiyas. Makadaghan usab niyang gihisgotan ang mga asoy sa Bibliya. Makapakombinsir kaayo ang iyang mga argumento nga gipasukad sa Bibliya mao nga “daghan sa mga Hudiyo ug sa mga kinabig nga nagsimba sa Diyos misunod kang Pablo ug kang Bernabe” aron makakat-on pag dugang. (Buh. 13:14-44) Mga pipila ka tuig sa ulahi sa dihang ang usa ka grupo sa Romanhong mga Hudiyo miduaw kaniya didto sa iyang giabtan, gipatin-aw ni Pablo ang mga butang ngadto kanila “pinaagi sa paghatag ug bug-os nga pagpamatuod mahitungod sa gingharian sa Diyos ug pinaagi sa pagkombinsir kanila mahitungod kang Jesus pinasukad sa balaod ni Moises ug ingon man sa mga Manalagna.”—Buh. 28:17, 22, 23.
6. Unsay nakatabang kang Pablo nga magpabiling lig-on sa espirituwal sa dihang siya nag-atubang ug mga pagsulay?
6 Sa dihang si Pablo nag-atubang ug mga pagsulay, siya nagpadayon sa pagsusi sa Kasulatan ug siya nalig-on niining inspiradong mensahe. (Heb. 4:12) Samtang nabilanggo si Pablo sa Roma sa wala pa siya patya, iyang gihangyo si Timoteo nga dad-on ngadto kaniyaang “mga linukot nga basahon” ug ang “mga pergamino.” (2 Tim. 4:13) Lagmit kadto maoy mga bahin sa Hebreohanong Kasulatan nga gigamit ni Pablo sa iyang matukiong pagtuon. Ang pagkuhag kahibalo sa Kasulatan pinaagig maayong rutina sa pagtuon hinungdanon alang kang Pablo aron makapabilin siyang matinumanon.
7. Unsang mga kaayohan ang imong matagamtam tungod sa regular nga pagtuon sa Bibliya?
7 Ang regular nga pagtuon sa Bibliya, nga inubanag mapuslanong pagpamalandong, motabang kanato nga mouswag sa espirituwal. (Heb. 5:12-14) Mahitungod sa kabililhon sa Pulong sa Diyos, ang salmista miawit: “Ang balaod sa imong baba maayo alang kanako, labaw pa kay sa linibo ka pirasong bulawan ug plata. Ang imong sugo naghimo kanako nga mas maalamon kay sa akong mga kaaway, kay akoa kini hangtod sa panahong walay tino. Gipugngan ang akong mga tiil gikan sa tanang daotan nga alagianan, aron makatuman ako sa imong pulong.” (Sal. 119:72, 98, 101) Aduna ka bay maayong rutina sa pagtuon sa Bibliya? Nangandam ka ba aron mahimong kuwalipikado sa dugang mga pribilehiyo sa pag-alagad pinaagi sa pagbasa sa Bibliya adlaw-adlaw ug sa pagpalandong niana?
Si Saulo Nakakat-on sa Paghigugma sa mga Tawo
8. Sa unsang paagi gitratar ni Saulo kadtong dili sakop sa Hudaismo?
8 Sa wala pa mahimong Kristohanon si Saulo, masiboton siya sa iyang relihiyon, apan wala siyay kahangawa sa mga tawo nga dili sakop sa Hudaismo. (Buh. 26:4, 5) Siya miuyon ug siya nag-apong samtang gibato sa mga Hudiyo si Esteban. Lagmit nga tungod sa iyang nasaksihan, si Saulo nahimo pang mas determinado nga lutoson ang mga Kristohanon, ug lagmit giisip niya nga si Esteban takos sa maong silot nga kamatayon. (Buh. 6:8-14; 7:54–8:1) Ang inspiradong asoy nag-ingon: “Si Saulo nagpadayon sa pagdaot sa kongregasyon. Nga gipanaka ang balay ug balay ug, nga gipangtaral ang mga lalaki ug mga babaye, iyang gipangbanlod sila sa bilanggoan.” (Buh. 8:3) Iyang ‘gilutos sila hangtod pa gani sa mga siyudad nga atua sa gawas.’—Buh. 26:11.
9. Unsang kasinatian ang nagpalihok kang Saulo sa pagsusi kon giunsa niya pagtratar ang ubang tawo?
9 Samtang nagpaingon si Saulo sa Damasco aron lutoson ang mga Kristohanon didto, si Ginoong Jesus nagpakita kaniya. Kay sulaw kaayo ang dagway sa Anak sa Diyos, si Saulo nabuta mao nga siya giagak sa iyang mga kauban. Sa dihang gipasig-uli ni Jehova ang panan-aw ni Saulo pinaagi kang Ananias, ang tinamdan ni Saulo ngadto sa mga tawo bug-os nang nausab. (Buh. 9:1-30) Sa dihang nahimo siyang sumusunod ni Kristo, naningkamot siya pag-ayo nga sundogon si Jesus sa pagpakiglabot sa mga tawo. Kini nagpasabot nga iya nang gitalikdan ang kapintasan ug siya ‘nakigdinaitay [na] sa tanang tawo.’—Basaha ang Roma 12:17-21.
10, 11. Sa unsang paagi gipakita ni Pablo ang tiunay nga gugma ngadto sa mga tawo?
10 Si Pablo wala lamang magmakigdaiton sa uban. Gusto niyang ipakita kanila ang tiunay nga gugma, ug ang Kristohanong ministeryo naghatag kaniyag kahigayonan sa paghimog niana. Sa iyang unang misyonaryong panaw, iyang gisangyaw ang maayong balita sa Asia Minor. Bisan pa sa grabeng pagsupak, si Pablo ug ang iyang mga kauban naningkamot pag-ayo sa pagtabang sa mga maaghop nga mahimong Kristohanon. Ilang giduaw pag-usab ang Listra ug Iconio, bisan pag ang mga magsusupak sa maong mga siyudad misulay sa pagpatay kang Pablo.—Buh. 13:1-3; 14:1-7, 19-23.
11 Sa ulahi, si Pablo ug ang iyang mga kauban miadto sa Filipos, nga usa ka siyudad sa Macedonia, aron pangitaon ang mga tawo nga gustong moalagad sa Diyos. Usa ka Hudiyang proselita nga ginganlag Lydia ang namati sa maayong balita ug nahimong Kristohanon. Sila si Pablo ug Silas gipusposan ug gipabilanggo sa sibil nga mga awtoridad. Apan, gisangyawan ni Pablo ang magbalantay sa bilanggoan mao nga siya ug ang iyang pamilya nabawtismohan ug nahimong mga magsisimba ni Jehova.—Buh. 16:11-34.
12. Unsay nagpalihok sa tawong bagis nga si Saulo nga mahimong mahigugmaong apostol ni Jesu-Kristo?
12 Nganong ang kanhing maglulutos mianib man sa relihiyon sa iyang mga biktima? Unsay nagpalihok niining tawong bagis nga mahimong buotan ug mahigugmaong apostol nga andam magpameligro sa iyang kinabuhi aron makakat-on ang uban bahin sa Diyos ug kang Kristo? Si Pablo mismo nagpatin-aw: “Gikahimuot sa Diyos, kinsa . . . nagtawag kanako pinaagi sa iyang dili-takos nga kalulot, nga ipadayag ang iyang Anak maylabot kanako.” (Gal. 1:15, 16) Gisulatan ni Pablo si Timoteo: “Ako gipakitaag kaluoy [aron] nga pinaagi kanako, ingong kinalabwang pananglitan, si Kristo Jesus makapasundayag sa tanan niyang hataas-nga-pailob ingong usa ka sanglitanan niadtong magabutang sa ilang pagtuo kaniya alang sa kinabuhing walay kataposan.” (1 Tim. 1:16) Gipasaylo ni Jehova si Pablo, ug kay nadawat niya ang dili-takos nga kalulot ug kaluoy sa Diyos, siya napalihok sa pagpakitag gugma ngadto sa uban pinaagi sa pagsangyaw sa maayong balita ngadto kanila.
13. Unsay angayng magtukmod kanato sa pagpakitag gugma sa uban, ug sa unsang paagi mahimo nato kana?
13 Sa samang paagi, si Jehova nagpasaylo sa atong mga sala ug kasaypanan. (Sal. 103:8-14) “Kon mga kasaypanan mao pa ang imong gibantayan, Oh Jah, Oh Jehova, kinsa ba ang makabarog?” miingon ang salmista. (Sal. 130:3) Kon dili pa tungod sa kaluoy sa Diyos, walay usa kanato ang makatagamtam sa kalipay sa pag-alagad kaniya, o kaha sa kinabuhing walay kataposan sa umaabot. Dako gayod ang dili-takos nga kalulot sa Diyos kanatong tanan. Busa sama kang Pablo, kinahanglang paninguhaon nato nga ipakita ang gugma ngadto sa uban pinaagi sa pagsangyaw ug pagtudlo kanila bahin sa kamatuoran ug sa pagpalig-on sa atong mga igsoon sa pagtuo.—Basaha ang Buhat 14:21-23.
14. Sa unsang paagi atong mapauswag ang atong ministeryo?
14 Si Pablo gustong mouswag ingong magwawali sa maayong balita, ug ang panig-ingnan ni Jesus nakatabang kaniya. Ang usa sa mga paagi nga gipakita sa Anak sa Diyos ang iyang dakong gugma sa mga tawo maoy pinaagi sa buluhatong pagsangyaw. Si Jesus miingon: “Dako ang alanihon, apan diyutay ra ang mga mamumuo. Busa, pangamuyo kamo sa Agalon sa pagpangani nga magpadalag mga mamumuo ngadto sa iyang pagpangani.” (Mat. 9:35-38) Si Pablo lagmit nag-ampo alang sa dugang mangangani ug siya milihok uyon niana pinaagi sa pagkahimong masibotong magwawali. Komosta sa imong bahin? Mapauswag ba nimo ang imong katakos sa pagsangyaw? Madugangan pa ba nimo ang oras nga imong gigugol sa ministeryo, tingali moalagad pa gani ingong payunir? Ipakita nato ang atong tiunayng gugma ngadto sa uban pinaagi sa pagtabang kanila sa ‘pagpangupot nga hugot sa pulong sa kinabuhi.’—Filip. 2:16.
Kon Giunsa Paglantaw ni Pablo ang Iyang Kaugalingon
15. Unsay panglantaw ni Pablo sa iyang kaugalingon ug sa iyang mga isigka-Kristohanon?
15 Ingong usa ka Kristohanong ministro, si Pablo naghatag ug lain pang panig-ingnan alang kanato. Bisag daghan siyag pribilehiyo sulod sa kongregasyon, si Pablo nahibalo nga wala niya madawat kana tungod sa iyang katakos. Para niya, ang maong mga panalangin maoy dili-takos nga kalulot gikan sa Diyos. Giila ni Pablo nga ang ubang mga Kristohanon epektibo usab nga mga ministro sa maayong balita. Bisan pa sa iyang posisyon taliwala sa katawhan sa Diyos, siya nagpabiling mapaubsanon.—Basaha ang 1 Corinto 15:9-11.
16. Giunsa pagpakita ni Pablo ang pagkamapaubsanon sa dihang mitungha ang isyu sa pagpatuli?
16 Tagda kon giunsa pagdumala ni Pablo ang problema nga mitungha sa Antioquia, nga usa ka siyudad sa Sirya. Ang kongregasyon didto nabahin tungod sa isyu bahin sa pagpatuli. (Buh. 14:26–15:2) Sanglit si Pablo man ang gitudlo sa pagpanguna sa buluhatong pagsangyaw ngadto sa dili-tinuli nga mga Hentil, lagmit naghunahuna siya nga makahimo siya sa pagsulbad sa maong problema. (Basaha ang Galacia 2:8, 9.) Apan sa dihang wala siya molampos, mapaubsanon siyang misunod sa kahikayan nga moduol sa nagamandong lawas didto sa Jerusalem aron hisgotan ang maong butang. Siya bug-os nga nakigtambayayong sa nagamandong lawas sa dihang ilang gisusi ang maong isyu, sa dihang sila mihimog desisyon, ug sa dihang gitudlo nila siya ingong usa sa magpahibalo sa ilang desisyon ngadto sa mga kongregasyon. (Buh. 15:22-31) Busa si Pablo ‘nanguna sa pagpakitag pasidungog’ sa iyang mga isigkaalagad.—Roma 12:10b.
17, 18. (a) Unsay gibati ni Pablo sa mga igsoon sa mga kongregasyon? (b) Unsay atong makat-onan bahin kang Pablo base sa reaksiyon sa mga ansiyano sa Efeso sa iyang pagbiya?
17 Ang mapaubsanong si Pablo dili lisod duolon sa mga igsoon sa kongregasyon. Hinunoa, siya adunay suod nga relasyon kanila. Sa konklusyon sa iyang sulat ngadto sa mga taga-Roma, iyang ginganlan ang 20 ka tawo ug gipangomosta sila. Kadaghanan kanila wala hisgoti sa ubang bahin sa Kasulatan, ug pipila lamang kanila ang adunay espesyal nga pribilehiyo sa pag-alagad. Apan sila maoy maunongong mga alagad ni Jehova, ug sila gimahal pag-ayo ni Pablo.—Roma 16:1-16.
18 Ang pagkamapaubsanon ug pagkamahigalaon ni Pablo nagpalig-on sa mga kongregasyon. Human siya makigkita sa mga ansiyano sa Efeso sa kataposang higayon, “ilang gigakos si Pablo sa liog ug gihalokan siya nga mabination, tungod kay sila ilabinang nasakitan sa pulong nga iyang gisulti nga sila dili na makakita pag-usab sa iyang nawong.” Kon si Pablo mapahitas-on ug lisod duolon, dili unta ingon niana ang ilang reaksiyon sa iyang pagbiya.—Buh. 20:37, 38.
19. Sa unsang paagi atong ikapakita ang “pagpaubos sa hunahuna” diha sa atong pagpakiglabot sa atong mga igsoon?
19 Si bisan kinsa nga gustong mouswag sa espirituwal kinahanglang magmapaubsanon sama kang Pablo. Iyang gitambagan ang iyang mga isigka-Kristohanon “nga dili magabuhat ug bisan unsa tungod sa pagkamatigion o tungod sa pagpaimportante sa kaugalingon, kondili uban sa pagpaubos sa hunahuna nga magaisip nga ang uban labaw kay kaninyo.” (Filip. 2:3) Sa unsang paagi mapadapat nato kining tambaga? Ang usa ka paagi mao ang pagpakigtambayayong sa mga ansiyano sa atong kongregasyon, pagsunod sa ilang pagtultol, ug pagpaluyo sa ilang hudisyal nga mga desisyon. (Basaha ang Hebreohanon 13:17.) Ang laing paagi mao ang pagpakitag halalom nga pagtahod sa tanan natong igsoon sa pagtuo. Ang mga kongregasyon sa katawhan ni Jehova kasagarang gilangkoban sa mga tawo nga lainlaig nasyonalidad, kultura, rasa, ug kagikan. Dili ba angay nga sundogon nato si Pablo pinaagi sa paghigugma sa tanan nga walay pagpihigpihig? (Buh. 17:26; Roma 12:10a) Kita gidasig nga ‘dawaton ang usag usa, ingon nga si Kristo usab midawat kanato, alang sa himaya sa Diyos.’—Roma 15:7.
‘Dagana nga Malahutayon’ ang Lumba sa Kinabuhi
20, 21. Unsay makatabang kanato aron atong matapos ang lumba sa kinabuhi?
20 Ang kinabuhi sa usa ka Kristohanon nahisama sa layog-distansiya nga lumba sa dagan. Si Pablo misulat: “Natapos ko na ang pagdagan sa lumba, nasunod ko na ang pagtuo. Sukad niining panahona adunay gigahin alang kanako nga purongpurong sa pagkamatarong, nga ihatag kanako sa Ginoo, ang matarong nga maghuhukom, isip ganti nianang adlawa, ngani dili lamang kanako, kondili sa tanan usab nga nahigugma sa iyang pagpadayag.”—2 Tim. 4:7, 8.
21 Ang pagsunod sa panig-ingnan ni Pablo makatabang kanato nga matapos ang lumba sa kinabuhing walay kataposan. (Heb. 12:1) Nan, magpadayon kita sa pag-uswag sa espirituwal pinaagi sa pagbatog maayong rutina sa pagtuon sa Bibliya, pag-ugmad ug lawom nga gugma alang sa mga tawo, ug paghupot ug mapaubsanong tinamdan.
Unsay Imong Tubag?
• Sa unsang paagi nakabenepisyo si Pablo sa regular nga pagtuon sa Kasulatan?
• Nganong ang matuod nga mga Kristohanon kinahanglang magpakitag lawom nga gugma ngadto sa mga tawo?
• Unsang mga hiyas ang makatabang kanimo sa pagtratar sa uban nga dili mapihigon?
• Sa unsang paagi ang panig-ingnan ni Pablo makatabang kanimo sa pagpakigtambayayong sa mga ansiyano sa inyong kongregasyon?
[Hulagway sa panid 23]
Palig-ona ang imong kaugalingon pinaagi sa Kasulatan sama kang Pablo
[Hulagway sa panid 24]
Ipakita ang gugma pinaagi sa pagpaambit sa maayong balita ngadto sa uban
[Hulagway sa panid 25]
Nahibalo ka ba kon nganong si Pablo gimahal sa mga igsoon?