3 Sayra ang Kamatuoran Bahin Kang Jesus

“Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.”—Juan 3:16.

UNSAY BABAG? Ang pipila moingon nga si Jesus wala gayod maglungtad. Ang uban nagtuo nga si Jesus naglungtad, apan alang kanila siya usa lamang ka ordinaryong tawo ug dugay nang namatay.

UNSAON NIMO PAGBUNTOG ANG BABAG? Sundoga ang tinun-ang si Natanael.a Gisultihan siya sa iyang higala nga si Felipe nga iyang nakita ang Mesiyas—“si Jesus, nga anak ni Jose, nga taga-Nasaret.” Apan, si Natanael wala dayon motuo niini. Hinunoa, siya mitubag: “Aduna bay maayo nga gikan sa Nasaret?” Bisan tuod nagduhaduha siya, iyang gidawat ang imbitasyon ni Felipe kinsa miingon “dali ug tan-awa” siya. (Juan 1:43-51) Ikaw usab makabenepisyo kon imong susihon ang mga ebidensiya bahin kang Jesus. Unsay imong mahimo?

Susiha ang ebidensiya sa kasaysayan nga si Jesus tinuod nga naglungtad. Si Josephus ug Tacitus maoy mga historyano nga nagkinabuhi sa unang siglo ug sila dili mga Kristohanon. Sila naghisgot kang Jesu-Kristo ingong usa ka tawo nga nagkinabuhi sa yuta. Si Tacitus misulat kon giunsa pagpasangil sa Romanong emperador nga si Nero ang mga Kristohanon maylabot sa pagkasunog sa Roma niadtong 64 C.E. Siya miingon: “Si Nero nag-akusar ug nagpahamtang ug kinagrabehang pagsakit diha sa usa ka pundok sa mga tawo nga gitawag ug mga Kristohanon, kinsa gidumtan tungod sa ilang panggawi. Si Christus [Kristo], nga maoy gigikanan sa ngalan sa ilang grupo, gisilotan ug kamatayon panahon sa pagmando ni Tiberio pinaagi sa usa sa atong mga gobernador, si Poncio Pilato.”

Maylabot sa paghisgot sa mga historyano sa una ug ikaduhang siglo bahin kang Jesus ug sa unang mga Kristohanon, ang Encyclopædia Britannica, 2002 nga Edisyon, nag-ingon: “Kining maong mga rekord nagpakita nga sa karaang panahon bisan kadtong supak sa Kristiyanidad wala gayod magduhaduha sa paglungtad ni Jesus, apan kana gikuwestiyon sa unang higayon, bisag walay basehanan, sa ika-18, ika-19, ug sa sinugdanan sa ika-20ng siglo.” Sa 2002, ang usa ka magsusulat sa The Wall Street Journal miingon: “Kadaghanan sa mga eskolar, gawas lang sa pipila ka ateyista, mituo na nga si Jesus nga taga-Nasaret tinuod nga naglungtad.”

Tagda ang ebidensiya nga si Jesus nabanhaw. Sa dihang si Jesus gidakop sa iyang mga magsusupak, siya gibiyaan sa iyang labing suod nga mga kauban, ug siya gilimod sa iyang higala nga si Pedro tungod sa kahadlok. (Mateo 26:55, 56, 69-75) Human dakpa si Jesus, nagkatibulaag ang iyang mga sumusunod. (Mateo 26:31) Dayon, kalit nga nahimong aktibo kaayo ang iyang mga tinun-an. Maisogong giatubang ni Pedro ug Juan ang mga lalaki nga maoy hinungdan sa kamatayon ni Jesus. Ang mga tinun-an ni Jesus napalig-on pag-ayo ug sila nagpakaylap sa iyang mga pagtulon-an sa tibuok Imperyo sa Roma, nga andam gayong mamatay imbes mokompromiso sa ilang pagtuo.

Nganong kalit mang nausab ang ilang tinamdan? Si apostol Pablo nag-ingon nga si Jesus gibanhaw ug “nagpakita kang Cefas [Pedro], unya ngadto sa napulog-duha.” Si Pablo midugang: “Human niana siya nagpakita sa kapin sa lima ka gatos ka igsoon sa usa ka higayon.” Buhi pa ang kadaghanan sa nakasaksi sa pagkabanhaw ni Jesus sa dihang gisulat ni Pablo kining mga pulonga. (1 Corinto 15:3-7) Dali ra tingaling ipanghimakak sa mga maduhaduhaon ang testimonya sa usa o duha ka saksi. (Lucas 24:1-11) Apan ang testimonya sa kapig lima ka gatos ka saksi nagpamatuod gayod nga si Jesus gibanhaw gikan sa mga patay.

UNSAY KAAYOHAN? Kadtong nagtuo ug nagsunod kang Jesus mapasaylo sa ilang mga sala ug makahupot ug hinlong konsensiya. (Marcos 2:5-12; 1 Timoteo 1:19; 1 Pedro 3:16-22) Kon sila mamatay, si Jesus nagsaad nga siya magbanhaw kanila sa “kataposang adlaw.”—Juan 6:40.

Alang sa dugang impormasyon, tan-awa ang kapitulo 4, “Kinsa si Jesu-Kristo?,” ug kapitulo 5, “Ang Lukat—Ang Labing Maayong Gasa sa Diyos,” sa librong Unsay Tinuod nga Gitudlo sa Bibliya?b

[Mga footnote]

[Hulagway sa panid 7]

Sama kang Natanael, susiha ang ebidensiya bahin kang Jesus