Pakigsuod sa Diyos

Siya Naghatag ug Konsiderasyon sa Atong mga Limitasyon

Levitico 5:2-11

“GIBUHAT nako ang tanan, apan daw kulang pa gyod.” Mao kanay giingon sa usa ka babaye maylabot sa iyang mga paningkamot nga pahimut-an ang Diyos. Modawat ba si Jehova sa kon unsay maarangan sa iyang mga magsisimba? Mohatag ba siyag konsiderasyon sa ilang mga limitasyon? Sa pagtubag niining mga pangutanaha, makatabang ang pagsusi sa kon unsay giingon sa Balaod ni Moises bahin sa mga halad nga gihisgotan sa Levitico 5:2-11.

Ilalom sa maong Balaod, ang Diyos nagsugo nga ang mga tawo kinahanglang maghalad aron mapasaylo ang ilang mga sala. Gihisgotan sa teksto ang mga kahimtang diin ang usa ka tawo nakasala nga wala tuyoa. (Bersikulo 2-4) Sa dihang siya makaamgo sa iyang sala, iyang isugid kana ug dayon maghalad ug “usa ka bayeng nating karnero o usa ka bayeng nating kanding.” (Bersikulo 5, 6) Komosta man kon siya kabos ug dili makaarang sa paghalad ug karnero o kanding? Gisugo ba sa Balaod nga kinahanglan siyang mangutang ug hayop nga ihalad? Kinahanglan ba nga motrabaho una siya hangtod nga makaarang siya sa pagpalit niana ayha pa mapasaylo ang iyang sala?

Sa pagbanaag sa mahigugmaong konsiderasyon ni Jehova, ang Balaod nag-ingon: “Kon ugaling siya dili makaarang sa usa ka karnero, nan siya magdala ingong iyang halad-sa-pagkasad-an alang sa sala nga iyang nahimo ug duha ka tukmo o duha ka piso sa salampati ngadto kang Jehova.” (Bersikulo 7) Ang pamulong nga “kon ugaling siya dili makaarang” nagpasabot nga kon ang usa ka Israelitas kabos kaayo nga dili makapalit ug karnero, ang Diyos malipay sa pagdawat sa halad nga iyang maarangan—duha ka tukmo o duha ka salampati.

Komosta man kon dili pa gihapon siya makaarang sa pagpalit ug duha ka langgam? “Nan dad-on niya ingong iyang halad alang sa iyang sala nga nahimo ang ikanapulo sa usa ka ephah [walo o siyam ka tasa] sa pinong harina ingong halad-sa-sala,” nag-ingon ang Balaod. (Bersikulo 11) Alang niadtong kabos kaayo, si Jehova nagpakitag konsiderasyon pinaagig pagtugot kanila sa pagtanyag ug halad nga walay dugo.a Sa Israel, ang kakabos dili babag aron ang usa makabaton ug kapasayloan sa iyang sala o maayong relasyon uban sa Diyos.

Unsay atong makat-onan bahin kang Jehova diha sa balaod maylabot sa mga halad sa sala? Atong nakat-onan nga ang Diyos maluluy-on, masinabtanon, ug naghatag ug konsiderasyon sa kon unsay maarangan sa iyang mga magsisimba. (Salmo 103:14) Gusto niya nga kita moduol ug makigsuod kaniya bisan pag makasinati kitag malisod nga mga kahimtang tungod sa pagkatigulang, sakit, o mga obligasyon sa pamilya ug sa uban. Makapadasig gayod ang pagkahibalo nga si Jehova malipay kon atong buhaton ang atong maarangan sa pag-alagad kaniya.

[Footnote]