Kon Unsay Atong Makat-onan Kang Jesus

Bahin sa Kaugmaon sa Katawhan

Si Jesus ba nagsaad nga adunay mga tawo nga mabuhi sa langit?

Oo, siya nagsaad gayod niana! Si Jesus mismo gibanhaw, ug siya mikayab sa langit aron mahiuban sa iyang Amahan. Apan sa wala pa siya mamatay ug banhawa, iyang gisultihan ang iyang 11 ka matinumanong mga apostoles: “Sa balay sa akong Amahan adunay daghang puloy-anan. . . . Ako moadto aron sa pag-andam ug dapit alang kaninyo.” (Juan 14:2) Apan, diyutay lamang ang makadawat niini nga pribilehiyo. Gitin-aw kini ni Jesus sa dihang iyang giingnan ang iyang mga disipulo: “Ayaw kahadlok, gamayng panon, tungod kay giuyonan sa inyong Amahan ang paghatag kaninyo sa gingharian.”—Lucas 12:32.

Unsay buhaton sa “gamayng panon” didto sa langit?

Gusto sa Amahan nga kining gamayng grupo sa mga tawo mahimong bahin sa kagamhanan sa langit uban ni Jesus. Giunsa nato pagkahibalo niana? Human banhawa si Jesus, iyang gipadayag kang apostol Juan nga dunay pipila ka matinumanong tawo nga “magamando ingong mga hari ibabaw sa yuta.” (Pinadayag 1:1; 5:9, 10) Usa kini ka maayong balita. Ang katawhan nanginahanglan gayod ug usa ka maayong kagamhanan. Unsay mapalampos sa kagamhanan nga mandoan ni Jesus? Si Jesus miingon: “Sa paglalang-pag-usab, sa dihang ang Anak sa tawo molingkod sa iyang mahimayaong trono, kamo nga nagsunod kanako molingkod usab sa napulog-duha ka trono.” (Mateo 19:28) Ang pagmando ni Jesus ug sa iyang mga sumusunod moresulta unya sa “paglalang-pag-usab” sa hingpit nga kahimtang nga napahimuslan sa unang magtiayon dinhi sa yuta sa wala pa sila makasala.

Unsang paglaom ang gitanyag ni Jesus alang sa ubang mga tawo?

Ang mga tawo gilalang aron mabuhi sa yuta, dili sama kang Jesus nga gilalang aron mabuhi sa langit. (Salmo 115:16) Busa si Jesus miingon: “Kamo gikan sa mga dapit sa ubos; ako gikan sa mga dapit sa itaas.” (Juan 8:23) Si Jesus naghisgot ug nindot kaayong paglaom alang sa mga tawo sa yuta. Kas-a, siya miingon: “Malipayon ang mga malumog-buot, sanglit sila magapanunod sa yuta.” (Mateo 5:5) Iyang gihisgotan ang giingon sa basahon sa Salmo: “Apan ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait. Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.”—Salmo 37:11, 29.

Busa gawas sa “gamayng panon” nga moadto sa langit, aduna pay mga tawo nga makabaton ug kinabuhing walay kataposan. Si Jesus naghisgot ug paglaom nga bukas alang sa milyon-milyong tawo sa tibuok kalibotan. Siya miingon: “Gihigugma pag-ayo sa Diyos ang kalibotan nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.”—Juan 3:16.

Sa unsang paagi wagtangon sa Diyos ang pag-antos nga nasinati sa mga tawo?

Si Jesus naghisgot nga ang mga tawo mahupayan unya sa duha ka hinungdan sa pag-antos, sa dihang siya miingon: “Karon adunay paghukom niining kalibotana; karon ang magmamando niining kalibotana palagpoton.” (Juan 12:31) Una, ang dili-diyosnong mga tawo nga maoy hinungdan sa pag-antos hukman ug laglagon. Ikaduha, si Satanas itambog sa kahiladman ug dili na makapahisalaag sa mga tawo.

Komosta ang mga tawong nangamatay nga wala makabatog kahigayonan sa pagkat-on bahin sa Diyos ug kang Kristo ug sa pagpasundayag ug pagtuo kanila? Gisultihan ni Jesus ang usa ka daotang tawo nga gisilotag kamatayon diha sa Iyang tupad: “Ikaw makauban nako sa Paraiso.” (Lucas 23:43) Ang maong tawo, uban sa milyon-milyon pa, makabaton ug kahigayonan nga makakat-on bahin sa Diyos sa dihang siya banhawon ni Jesus sa paraisong yuta. Busa siya aduna unyay kahigayonan nga mahilakip sa maaghop ug matarong nga mga tawo nga makadawat ug kinabuhing walay kataposan dinhi sa yuta.—Buhat 24:15.

Alang sa dugang impormasyon, tan-awa ang kapitulo 3 ug 7 sa librong Unsay Tinuod nga Gitudlo sa Bibliya?a

[Footnote]

[Hulagway sa panid 23]

“Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.”—Salmo 37:29