Nahibalo Ka Ba?
Kinsa ang mga eskriba nga misupak kang Jesus?
Panahon sa ministeryo ni Jesus, siya nakahibalag ug mga eskriba dili lamang sa Jerusalem kondili diha usab sa gagmayng mga lungsod ug baryo. Sa gawas sa Jerusalem—ug bisan sa Hudiyong mga komunidad sa gawas sa Palestina—ang mga eskriba nag-alagad ingong mga luyoluyong opisyal nga batid sa Balaod, nga mga tigkopya sa Kasulatan o mga maghuhukom.—Marcos 2:6; 9:14; Lucas 5:17-21.
Sa Jerusalem, ang trabaho sa mga eskriba konektado sa Hudiyong kagamhanan. (Mateo 16:21) Sumala sa The Anchor Bible Dictionary, sila “lagmit kauban sa mga saserdote panahon sa mga husay ug sa pagpatuman sa Hudiyohanong mga tradisyon ug balaod, ug sa adlaw-adlaw nga buluhaton diha sa Sanhedrin.” Ingong tag-as-ug-ranggo nga mga magtutudlo sa Balaod, ang pipila ka eskriba maoy membro sa Sanhedrin, ang hataas nga korte sa mga Hudiyo. Sila nag-alagad kauban sa pangulong mga saserdote ug mga Pariseo.
Ang mga eskriba sagad hubiton sa Bibliya ingong mga magsusupak ni Jesus. Apan ang uban kanila wala mosupak kaniya. Pananglitan, dihay usa ka eskriba nga miingon kang Jesus: “Mosunod ako kanimo bisan asa ka mopaingon.” Ngadto sa laing eskriba, si Jesus miingon: “Ikaw dili halayo sa gingharian sa Diyos.”—Mateo 8:19; Marcos 12:28-34.
Unsay kahulogan sa pagdihog sa usa ka tawo?
Sa Tungang Sidlakan, sa kapanahonan sa Bibliya, ang pagdihog ug lana sa ulo maoy timailhan sa pagkapinaboran o kaha pagpakitag pagkamaabiabihon ngadto sa usa ka bisita. Kasagaran, ang gamiton maoy lana sa olibo nga gisagolag pahumot. Ang mga Hebreohanon magdihog ug lana sa ulo sa usa ka tawo sa dihang itudlo siya alang sa taas nga posisyon. Pananglitan, si Aaron gidihogan aron mag-alagad ingong hataas nga saserdote. (Levitico 8:12) Sa kahimtang ni Haring David, “gikuha ni Samuel ang sungay nga may lana ug gidihogan siya . . . , ug ang espiritu ni Jehova milihok diha kang David sukad niadtong adlawa.”—1 Samuel 16:13.
Sa Hebreohanong pinulongan, ang termino nga gigamit sa pagdihog maoy ma·shachʹ, nga gigikanan sa pulong ma·shiʹach, o Mesiyas. Ang katumbas niini sa Grego maoy khriʹo, nga gigikanan sa pulong khri·stosʹ, o Kristo. Busa, si Aaron ug David matawag nga mesiyas, o dinihogan. Si Moises matawag usab nga kristo, o dinihogan, sa diwa nga siya gitudlo sa Diyos ingong Iyang hawas.—Hebreohanon 11:24-26.
Si Jesus nga taga-Nasaret gitudlo mismo sa Diyos alang sa usa ka hataas nga awtoridad. Siya gidihogan dili pinaagig lana, kondili pinaagi sa balaang espiritu sa Diyos. (Mateo 3:16) Ingong Dinihogan ni Jehova, si Jesus haom gayod nga tawgong Mesiyas, o Kristo.—Lucas 4:18.