Among mga Magbabasa Nangutana
Sa Unsang Paagi si Jesus ug ang Iyang Amahan Usa Ra?
“Ako ug ang Amahan usa ra,” miingon si Jesus. (Juan 10:30) Ang uban mokutlo niining tekstoha sa pagpamatuod nga si Jesus ug ang iyang Amahan maoy bahin sa Trinidad. Mao ba kanay gipasabot ni Jesus sa iyang gisulti?
Atong susihon ang palibot nga mga teksto niini. Sa bersikulo 25, si Jesus miingon nga ang mga butang nga iyang gihimo, gibuhat niya sa ngalan sa iyang Amahan. Sa bersikulo 27 ngadto sa 29, siya naghisgot bahin sa simbolikong mga karnero nga gihatag kaniya sa iyang Amahan. Kini nga mga pulong ni Jesus makapalibog gayod sa iyang mga mamiminaw kon siya ug ang iyang Amahan usa ra. Hinunoa, ang buot ipasabot ni Jesus mao, ‘Ako ug ang akong Amahan nagkahiusa gayod mao nga walay makasakmit sa mga karnero gikan kanako, sama ra nga walay makasakmit niana gikan sa akong Amahan.’ Mahimo kining itandi sa usa ka anak nga miingon ngadto sa kaaway sa iyang amahan, ‘Kon imong dagmalan ang akong amahan, sama rag imo kong gidagmalan.’ Niini nga pananglitan, dili gayod kita maghunahuna nga ang anak ug ang amahan usa ra. Apan, atong masabot nga silang duha suod kaayo.
Dugang pa, si Jesus ug ang iyang Amahan, si Jehova nga Diyos, “usa ra” sa diwa nga sila bug-os nga nagkahiusa sa ilang mga katuyoan ug sukdanan. Lahi kang Satanas nga Yawa ug sa unang magtiayon nga si Adan ug Eva, si Jesus wala gayod magtinguha nga mahimong independente sa Diyos. Si Jesus miingon: “Ang Anak dili makahimo ug usa ka butang sa iyang kaugalingong pagbuot, apan kon unsa lamang ang iyang nakita nga ginabuhat sa Amahan. Kay bisan unsa nga butang nga ginabuhat niana nga Usa, kining mga butanga ginabuhat usab sa Anak sa samang paagi.”—Juan 5:19; 14:10; 17:8.
Tinuod, nagkahiusa gayod sila, apan kana wala magpasabot nga ang Diyos ug ang iyang Anak nga si Jesus wala nay kalainan. Sila managlahi gayod nga persona. Ang matag usa kanila adunay kaugalingong personalidad. Si Jesus adunay kaugalingong pagbati, panghunahuna, mga kasinatian, ug katakos nga modesisyon para sa iyang kaugalingon. Bisan pa niana, siya mipili sa pagpasakop sa kabubut-on sa iyang Amahan. Sumala sa Lucas 22:42, si Jesus miingon: “Matuman unta dili ang akong kabubut-on, kondili ang imoha.” Kining mga pulonga dili gayod masulti ni Jesus kon siya walay katakos sa paghimog kaugalingong desisyon. Kon si Jesus ug ang iyang Amahan usa ra ka persona, nganong si Jesus miampo sa Diyos ug mapaubsanong miangkon nga dunay mga butang nga ang iyang Amahan ray nahibalo?—Mateo 24:36.
Ang mga membro sa daghang relihiyon nagsimba sa mga diyos nga gikaingong nakig-away sa mga membro sa ilang kaugalingong pamilya. Pananglitan, sa Gregong mitolohiya, giilog ni Cronus ang trono sa iyang amahan nga si Uranus, ug iyang gilamoy ang iyang mga anak. Kana sukwahi gayod sa panaghiusa ni Jehova nga Diyos ug sa iyang Anak nga si Jesus nga gipasukad sa tinuod nga gugma! Tungod sa panaghiusa ni Jehova ug ni Jesus, mas milawom pa ang atong gugma kanila. Sa pagkatinuod, dako kaayo ang atong pribilehiyo nga mahiusa sa duha ka kinalabwang Persona sa tibuok uniberso. Maylabot sa iyang mga sumusunod, si Jesus miampo: “Naghangyo ako . . . nga silang tanan mahimong usa, ingon nga ikaw, Amahan, nahiusa kanako ug ako nahiusa kanimo, nga sila usab mahiusa unta kanato.”—Juan 17:20, 21.
Busa, sa dihang si Jesus miingon, “Ako ug ang Amahan usa ra,” siya wala maghisgot bahin sa misteryosong Trinidad, kondili sa ilang talagsaong panaghiusa—ang labing suod nga relasyon tali sa duha ka persona.