Among mga Magbabasa Nangutana

Tinuod ba nga Persona ang Yawa?

Oo, ang Bibliya nagtudlo nga si Satanas nga Yawa maoy usa ka tinuod nga persona. Apan ang mga kritiko nagsaway sa maong pagkahubit sa Yawa. Matod pa nila, si Satanas kono mao ang pagkadaotan nga anaa sa sulod sa tawo.

Angay ba kitang matingala kon nganong naglibog ang mga tawo kon kinsa gayod si Satanas? Dili gayod. Sa pag-ilustrar: Ang usa ka kriminal mahimong magpapas sa iyang fingerprint diha sa dapit nga gihimo ang krimen aron siya dili mailhan ug busa makapadayon siya sa iyang ilegal nga mga buhat. Sa susama, si Satanas, nga maoy nagpaluyo sa tanang pagkadaotan, naghimo sa iyang daotang mga laraw sa paagi nga dili siya mailhan. Giyagyag mismo ni Jesus nga si Satanas ang responsable sa tanang pagkadaotan dinhi sa yuta. Iyang gitawag si Satanas nga “magmamando niining kalibotana.”—Juan 12:31.

Sa unsang paagi mitungha ang Yawa? Sa sinugdan, siya gilalang ingong usa ka hingpit nga manulonda, apan iyang gihimo ang iyang kaugalingon nga Yawa sa dihang siya mirebelde sa Diyos. Iyang gitinguha nga siya ang simbahon sa mga tawo inay ang Diyos. Diha sa Bibliya, atong mabasa ang panag-estoryahay ni Satanas ug ni Jesus dinhi sa yuta, diin nadayag ang hakog nga ambisyon sa Yawa. Gitental ni Satanas si Jesus aron siya ‘mohapa ug mohimog usa ka buhat sa pagsimba’ kaniya.—Mateo 4:8, 9.

Dugang pa, diha sa basahon ni Job, atong mabasa ang panag-estoryahay ni Satanas ug ni Jehova, diin gipadayag ni Satanas ang iyang motibo. Iyang buhaton ang tanan aron isalikway sa mga tawo ang Diyos.—Job 1:13-19; 2:7, 8.

Hunahunaa kini: Kon husto ang gipangangkon sa mga kritiko nga si Satanas mao ang pagkadaotan nga anaa sa sulod sa usa, unsaon niya pagpakigsulti kang Jehova nga Diyos ug kang Jesu-Kristo? Imposible gayod nga adunay pagkadaotan sa sulod sa Diyos o sa iyang Anak! Dayag nga si Satanas maoy usa ka tinuod nga persona—usa ka daotang espiritu nga walay pagtahod kang Jehova o kang Jesus.

Ang daotang buhat sa mga tawo nagpamatuod sa paglungtad sa Yawa. Pananglitan, pasagdan lang sa gobyerno nga mausik ang sobrang pagkaon, samtang daghang tawo ang walay makaon. Ang mga nasod naggastog dako aron makabaton ug nukleyar nga mga armas nga makapatay ug daghang tawo. Sila nagdaot sa kinaiyahan sa yuta. Apan kadaghanan sa mga tawo wala mahibalo kon kinsa gayoy nagpaluyo sa maong daotang mga buhat. Ngano?

Ang Bibliya nag-ingon nga si Satanas “nagbuta sa mga hunahuna sa mga dili-magtutuo.” (2 Corinto 4:4) Aron makontrolar ni Satanas ang mga tawo, siya naggamit ug dili makita nga organisasyon. Si Satanas mao ang “magmamando sa mga demonyo.” (Mateo 12:24) Sa pag-ilustrar, ang usa ka lider sa sindikato makahimo sa pagdumala sa iyang mga sakop, bisan pag siya dili magpaila kanilang tanan. Sa susama, si Satanas naggamit sa iyang dili makitang organisasyon nga gilangkoban sa mga demonyo sa pagkontrolar sa mga tawo, ug ang maong mga tawo wala mahibalo nga ang Yawa maoy nagkontrolar kanila.

Mapasalamaton gayod kita nga gipadayag sa Bibliya ang kamatuoran bahin sa Yawa ug sa iyang dili makita nga organisasyon! Tungod niana, atong masuklan ang iyang mga impluwensiya. Ang Bibliya nag-awhag kanato: “Magpasakop kamo sa Diyos; apan sukli ang Yawa, ug siya mokalagiw gikan kaninyo.”—Santiago 4:7.