“Hangtod Kanus-a . . . nga Ako Magatuaw Alang sa Tabang?”

“Gusto nakong mawala na ang kasakit!” mimulo si Jayne. Siya adunay kanser, ug kini mikuyanap na sa iyang lawas. Ang iyang pamilya ug mga higala nangandoy gayod nga siya mamaayo ug mahupayan sa iyang pag-antos! Sila miampo sa Diyos nga tabangan siya. Mamati kaha ang Diyos? Tagdon kaha niya ang ilang pag-ampo?

ANG Diyos nasayod sa kahimtang sa mga tawo. Ang iyang Pulong, ang Bibliya, nag-ingon: “Ang tibuok kalalangan duyog nga nagpadayon sa pag-agulo ug anaa sa kasakitan.” (Roma 8:22) Ang Diyos nahibalo nga matag adlaw adunay ginatos ka milyong tawo, sama kang Jayne, nga nag-antos sa pisikal, emosyonal, o mental nga kasakit. Nakita sa Diyos ang 800 ka milyong tawo nga matulog nga gutom kada gabii, ang minilyong uban pa nga biktima sa kapintasan sulod sa panimalay, ug ang daghang ginikanan nga nabalaka sa kaugmaon ug kaayohan sa ilang mga anak. Aduna kahay buhaton ang Diyos sa pagsulbad niini? Kon kita gustong motabang sa atong mga minahal, ang Diyos ba usab gustong motabang sa mga tawo nga iyang gilalang?

Daghan na kaayo ang nakasukna sa maong mga pangutana ug lagmit usa ka kanila. Kapin sa 2,600 ka tuig kanhi, ang matinumanong alagad nga si Habacuc mibati sama sa pagbati sa kadaghanan karon, ug siya nangutana sa Diyos: “Hangtod kanus-a, Oh Jehova, nga ako magatuaw alang sa tabang, ug ikaw dili mamati? Hangtod kanus-a nga ako magpakitabang kanimo tungod sa kapintasan, ug ikaw dili magaluwas? Nganong gipakita mo kanako ang makadaot, ug ikaw nagatan-aw lamang sa kasamok? Ug nganong ang pagpanglaglag ug kapintasan ania sa akong atubangan, ug nganong adunay panag-away, ug nganong nagakahitabo ang panagbangi?” (Habacuc 1:2, 3) Si Habacuc, nga usa ka Hebreohanong propeta, nakasaksi sa grabeng kapintasan sa iyang adlaw. Sa atong panahon, ang susamang mga kapintasan nagakahitabo adlaw-adlaw, ug kini nakapaguol sa mabinationg mga tawo.

Gitagad ba sa Diyos ang mga kabalaka ni Habacuc? Oo. Ang Diyos namati sa sinserong mga pangutana ni Habacuc, ug dayon iyang gihupay ug gidasig ang naguol nga tawo. Gipalig-on ni Jehova ang pagtuo ni Habacuc pinaagi sa pagsaad kaniya nga Iyang taposon ang pag-antos. Ang maong mensahe sa paglaom makapalig-on usab kanimo, sama nga kini nakapalig-on kang Jayne ug sa iyang pamilya. Ang mosunod nga mga artikulo magtubag niining mga pangutanaha: Unsaon nato pagtino nga ang Diyos nagatagad gayod kanato? Unsay buhaton sa Diyos aron sa pagtapos sa pag-antos, ug kanus-a niya kana himoon?