Pakigsuod sa Diyos
Gusto Niya nga Molampos Kita
GUSTO sa mahigugmaong mga ginikanan nga ang ilang mga anak magmalamposon ug makabatog makahuloganon ug malipayong kinabuhi. Sa susama, gusto sa atong langitnong Amahan nga si Jehova nga ang iyang yutan-ong mga anak magmalamposon. Iyang gipakita ang iyang gugma pinaagi sa pagtug-an kanato kon sa unsang paagi molampos kita. Tagda pananglitan ang iyang gipamulong kang Josue nga mabasa sa Josue 1:6-9.
Handurawa ang kahimtang nga makita sa tuo. Pagkamatay ni Moises, si Josue na ang lider sa Israel nga may minilyong ginsakpan. Ang mga Israelitas nangandam sa pagsulod sa yuta nga gisaad sa Diyos sa ilang mga katigulangan. Ang Diyos adunay tambag kang Josue. Kon sundon, kini makatabang kaniya nga magmalamposon. Apan kini nga tambag dili lamang para kang Josue. Kon ato kining ipadapat, kita usab magmalamposon.—Roma 15:4.
Giingnan ni Jehova si Josue nga magmaisogon ug magmakusganon—dili lamang kas-a kondili sa tulo ka higayon. (Bersikulo 6, 7, 9) Dayag nga si Josue nagkinahanglag kaisog ug kusog aron siya molampos sa pagpanguna sa nasod sa pagsulod sa Yutang Saad. Apan sa unsang paagi iyang mabatonan kining mga hiyasa?
Mahimong mabatonan ni Josue ang maong mga hiyas gikan sa inspiradong mga sinulat. Si Jehova miingon: “Pag-amping sa pagbuhat sumala sa tanang balaod nga gisugo kanimo.” (Bersikulo 7) Sa panahon ni Josue, pipila pa lang ka basahon sa Bibliya nga nasulat ang iyang nabatonan.a Apan ang pagbaton lamang sa Pulong sa Diyos dili garantiya sa kalamposan. Aron makabenepisyo gikan niini, kinahanglang buhaton ni Josue ang duha ka butang.
Una, kinahanglang pun-on kanunay ni Josue ang iyang kasingkasing sa pulong sa Diyos. Si Jehova miingon: “Sa hinayng tingog kinahanglang magbasa ka niini adlaw ug gabii.” (Bersikulo 8) Ang usa ka reperensiya nag-ingon: “Ang Diyos nagsugo kang Josue sa paghinumdom sa Iyang Balaod pinaagi sa ‘hagawhaw nga pagbasa’ niini ug ‘pagpamalandong’ niini.” Ang pagbasa ug pagpamalandong sa Pulong sa Diyos sa matag adlaw motabang kang Josue sa pag-atubang sa mga kalisdanan.
Ikaduha, kinahanglang ipadapat ni Josue ang iyang mga nakat-onan sa Pulong sa Diyos. Si Jehova miingon kaniya: “Ikaw mag-amping sa pagbuhat sumala sa tanang nahisulat niini; kay sa ingon magmalamposon ka sa imong dalan.” (Bersikulo 8) Ang kalamposan ni Josue nagdepende sa iyang pagbuhat sa kabubut-on sa Diyos. Ngano? Tungod kay ang kabubut-on sa Diyos molampos gayod.—Isaias 55:10, 11.
Gituman ni Josue ang tambag ni Jehova. Ingong resulta, siya nakatagamtam ug malipayong kinabuhi ingong matinumanong magsisimba ni Jehova.—Josue 23:14; 24:15.
Gusto ka bang makabaton ug malipayong kinabuhi, sama kang Josue? Buot ni Jehova nga molampos ka. Apan ang paghupot lamang ug Bibliya dili igo. Ang usa ka matinumanong Kristohanon sulod sa dugay nang panahon misugyot: “Basaha ang Bibliya ug ipadapat kini.” Kon kanunay nimong pun-on ang imong kasingkasing sa pulong sa Diyos ug ipadapat sa imong kinabuhi ang imong mga nakat-onan, nan sama kang Josue, “magmalamposon ka sa imong dalan.”
[Footnote]
a Ang inspiradong mga sinulat nga lagmit nabatonan ni Josue mao ang lima ka basahon ni Moises (Genesis, Exodo, Levitico, Numeros, ug Deuteronomio), ang basahon ni Job, ug ang usa o duha ka salmo.