“Ang Espiritu ug ang Pangasaw-onon Nagpadayon sa Pag-ingon: ‘Umari Ka!’”
“Ang espiritu ug ang pangasaw-onon nagpadayon sa pag-ingon: ‘Umari ka!’ . . . Si bisan kinsa nga giuhaw paaria; si bisan kinsa nga may tinguha paimna sa tubig sa kinabuhi nga walay bayad.”—PIN. 22:17.
1, 2. Unsay angayng dapit sa intereses sa Gingharian diha sa atong kinabuhi, ug ngano?
UNSAY angayng dapit sa intereses sa Gingharian diha sa atong kinabuhi? Si Jesus nag-awhag sa iyang mga sumusunod sa ‘pagpadayon sa pagpangita pag-una sa gingharian,’ nga nagpasalig kanila nga kon buhaton nila kana, ihatag sa Diyos ang ilang gikinahanglan. (Mat. 6:25-33) Iyang gitandi ang Gingharian sa Diyos sa usa ka perlas nga bililhon kaayo nga sa pagkakita niini, ang nagapanaw nga magpapatigayon “nagbaligya dayon sa tanang butang nga iyang nabatonan ug nagpalit niini.” (Mat. 13:45, 46) Dili ba nga angay usab natong himoon nga labing hinungdanong bahin sa atong kinabuhi ang buluhatong pagsangyaw ug paghimog mga tinun-an?
2 Sumala sa atong nasayran sa nag-unang duha ka artikulo, ang pagsulti nga maisogon ug paggamit sa Pulong sa Diyos sa hanas nga paagi diha sa ministeryo nagpakita nga kita giniyahan sa espiritu sa Diyos. Kini nga espiritu adunay hinungdanong papel usab sa atong regular nga pagpakig-ambit sa buluhatong pagsangyaw sa Gingharian. Atong tan-awon kon sa unsang paagi.
Pagdapit nga Gipaabot Ngadto sa Tanan!
3. Unsang matanga sa tubig nga gidapit ang tanang tawo sa pag-inom?
3 Ang usa ka pagdapit gipaabot ngadto sa mga tawo pinaagi sa balaang espiritu. (Basaha ang Pinadayag 22:17.) Kana nag-awhag kanila sa pag-inom ug pagtagbaw sa ilang kauhaw pinaagi niining talagsaon kaayong matang sa tubig. Kini dili-ordinaryong tubig nga gilangkoban sa duha ka atomo sa idroheno ug usa ka atomo sa oksiheno. Bisan tuod gikinahanglan ang literal nga tubig aron mabuhi, si Jesus naghisgot ug laing matang sa tubig sa dihang siya miingon sa babayeng Samarianhon diha sa usa ka atabay: “Bisan kinsa nga magainom sa tubig nga akong igahatag kaniya dili na gayod pagauhawon pa, hinuon ang tubig nga akong igahatag kaniya mahimong usa ka tuboran sa tubig diha kaniya nga magabugwak aron mohatag ug kinabuhing walay kataposan.” (Juan 4:14) Kining talagsaong tubig nga niana gidapit ang mga tawo sa pag-inom maghatag ug kinabuhing walay kataposan.
4. Sa unsang paagi mitungha ang panginahanglan alang sa tubig sa kinabuhi, ug unsay gihawasan niana?
4 Ang panginahanglan alang sa maong tubig sa kinabuhi mitungha sa dihang ang unang tawo, si Adan, miduyog sa iyang asawa nga si Eva, sa pagsupak sa naglalang kanila—si Jehova nga Diyos. (Gen. 2:16, 17; 3:1-6) Ang unang magtiayon gipapahawa sa ilang tanamang puy-anan ‘aron dili ituy-od [ni Adan] ang iyang kamot ug mokuha usab sa bunga gikan sa kahoy sa kinabuhi ug mokaon ug mabuhi hangtod sa panahong walay tino.’ (Gen. 3:22) Ingong amahan sa katawhan, si Adan maoy hinungdan nga ang tawo mamatay. (Roma 5:12) Ang tubig sa kinabuhi naghawas sa tanang tagana sa Diyos sa pagpasig-uli sa masinugtanong katawhan gikan sa sala ug kamatayon ug sa paghatag kanilag walay-kataposang hingpit nga kinabuhi sa Paraiso sa yuta. Kini nga mga tagana nahimong posible tungod sa halad lukat ni Jesu-Kristo.—Mat. 20:28; Juan 3:16; 1 Juan 4:9, 10.
5. Kang kinsa naggikan ang pagdapit nga ‘moinom sa tubig sa kinabuhi nga walay bayad’? Ipatin-aw.
5 Kang kinsa naggikan ang pagdapit nga ‘moinom sa tubig sa kinabuhi nga walay bayad’? Sa dihang ang tanang tagana alang sa kinabuhi pinaagi ni Jesus bug-os nang mabatonan sa katawhan sulod sa Milenyal nga Pagmando ni Kristo, gihulagway kini ingong “usa ka suba sa tubig sa kinabuhi, ingon katin-aw sa kristal.” Ang maong suba nakita nga “nagaagos gikan sa trono sa Diyos ug sa Kordero.” (Pin. 22:1) Busa si Jehova, ang Maghahatag-ug-Kinabuhi, mao ang Tinubdan sa tubig nga maghatag kinabuhi. (Sal. 36:9) Siya ang Usa nga naghatag sa maong tubig pinaagi sa “Kordero,” si Jesu-Kristo. (Juan 1:29) Kining simbolikong suba mao ang paagi ni Jehova sa pagwagtang sa tanang kadaot nga naagoman sa katawhan tungod sa pagsupak ni Adan. Oo, si Jehova nga Diyos mao ang Tinubdan sa pagdapit nga “umari ka.”
6. Kanus-a nagsugod pag-agos ang “suba sa tubig sa kinabuhi”?
6 Bisan tuod ang “suba sa tubig sa kinabuhi” bug-os nga moagos sulod sa Usa ka Libo ka Tuig nga Pagmando ni Kristo, kini nagsugod pag-agos sa “adlaw sa Ginoo.” Ang maong adlaw nagsugod sa dihang naentrono ang “Kordero” didto sa langit niadtong 1914. (Pin. 1:10) Busa, ang pipila ka tagana alang sa kinabuhi mabatonan na human niadto. Naglakip kana sa Pulong sa Diyos, ang Bibliya, kay ang mensahe niini gihisgotan ingong “tubig.” (Efe. 5:26) Ang pagdapit sa ‘pag-inom sa tubig sa kinabuhi’ pinaagi sa pagpamati ug pagsanong sa maayong balita sa Gingharian gipaabot ngadto sa tanan. Apan kinsa ang naghimo sa aktuwal nga pagdapit panahon sa adlaw sa Ginoo?
“Ang Pangasaw-onon” Nag-ingon, “Umari Ka!”
7. Sa “adlaw sa Ginoo,” kinsa ang unang nagpaabot sa pagdapit nga “umari ka,” ug ngadto kang kinsa?
7 Ang mga membro sa pangasaw-onon nga matang—ang dinihogan-sa-espiritu nga mga Kristohanon—mao ang unang nagpaabot sa pagdapit nga “umari ka.” Ngadto kang kinsa? Aw, ang pangasaw-onon wala moingon, “Umari ka!” sa iyang kaugalingon. Kini iyang giingon niadtong naglaom nga makabaton ug kinabuhing walay kataposan sa yuta human sa “gubat sa dakong adlaw sa Diyos nga Labing Gamhanan.”—Basaha ang Pinadayag 16:14, 16.
8. Unsay nagpakita nga ang dinihogang mga Kristohanon nagpaabot sa pagdapit ni Jehova sukad pa sa 1918?
8 Ang dinihogang mga sumusunod ni Kristo nagpaabot sa maong pagdapit sukad pa sa 1918. Nianang tuiga, ang pakigpulong publiko nga nag-ulohang “Minilyong Buhi Karon Mahimong Dili na Gayod Mamatay” naghatag ug paglaom nga daghan ang makabaton ug kinabuhi sa paraisong yuta human sa gubat sa Armagedon. Ang usa ka pakigpulong nga gihatag panahon sa kombensiyon sa mga Estudyante sa Bibliya sa Cedar Point, Ohio, U.S.A., niadtong 1922 nag-awhag sa mga mamiminaw sa ‘pagmantala sa Hari ug sa iyang gingharian.’ Kini nga pag-awhag nagtabang sa nanghibilin sa pangasaw-onon nga matang sa pagpaabot sa maong pagdapit ngadto sa mas daghan pang tawo. Niadtong 1929, ang Marso 15 nga gula sa The Watchtower adunay artikulo nga nag-ulohang “Gracious Invitation” (Mainitong Pagdapit), diin ang Pinadayag 22:17 maoy temang teksto niini. Sa bahin, ang artikulo nag-ingon: “Ang matinumanong nanghibilin nga matang miduyog [sa Labing Hataas] niining mainitong pagdapit ug miingon, ‘Umari ka.’ Kini nga mensahe igamantala ngadto sa mga tawo nga nagtinguha sa pagkamatarong ug kamatuoran. Angay kining himoon karon.” Sa atong adlaw, ang pangasaw-onon nga matang nagpadayon sa pagpaabot sa maong pagdapit.
“Si Bisan Kinsa nga Nagpatalinghog Paingna: ‘Umari Ka!’”
9, 10. Sa unsang paagi kadtong nagpatalinghog gidapit sa pag-ingon, “Umari ka!”?
9 Komosta kadtong nagpatalinghog sa pagdapit nga “umari ka”? Sila giawhag sa pag-ingon sa uban, “Umari ka!” ingong sanong sa pagdapit. Pananglitan, ang Agosto 1, 1932, nga gula sa The Watchtower nag-ingon sa panid 232: “Giawhag ang mga dinihogan sa pagdasig sa tanang buot makigbahin sa pagmantala sa maayong balita sa gingharian. Dili kinahanglan nga mahimo silang dinihogan sa Ginoo aron imantala ang mensahe sa Ginoo. Usa ka dakong kalipay alang sa mga Saksi ni Jehova ang pagkahibalo karon nga sila gitugotan sa pagdala sa tubig sa kinabuhi ngadto sa usa ka matang sa mga tawo nga mahimong makalabang sa Armagedon ug hatagag kinabuhing walay kataposan sa yuta.”
10 Nagpasiugda sa responsibilidad sa nagpatalinghog sa pag-ingon, “Umari ka!” ang The Watchtower sa Agosto 15, 1934, sa panid 249, nag-ingon: “Kadtong sakop sa Jonadab nga matang angayng moduyog niadtong sakop sa mahulagwayong Jehu nga matang, sa ato pa, ang mga dinihogan, ug imantala ang mensahe sa gingharian, bisan tuod sila dili dinihogang mga saksi ni Jehova.” Niadtong 1935, mas tin-awng nailhan kon kinsa ang “dakong panon” nga gihisgotan sa Pinadayag 7:9-17. Tungod niana, sila nahimong mas masiboton sa pagpaabot sa pagdapit sa Diyos ngadto sa uban. Sukad niadto, ang nagkadaghan nga dakong panon sa matuod nga mga magsisimba—kapin na sa pito ka milyon—misanong sa maong pagdapit. Ingong pagpabili sa mensahe nga ilang nadunggan, sila nagpahinungod sa Diyos, nagpabawtismo sa tubig, ug miduyog sa pangasaw-onon nga matang sa pagdapit sa uban sa ‘pag-inom sa tubig sa kinabuhi nga walay bayad.’
“Ang Espiritu” Nag-ingon, “Umari Ka!”
11. Sa unang siglo K.P., sa unsang paagi ang balaang espiritu nalangkit sa buluhatong pagsangyaw?
11 Sa dihang nagsangyaw sa usa ka sinagoga sa Nasaret, gibuksan ni Jesus ang linukot nga basahon ni manalagnang Isaias ug gibasa kini: “Ang espiritu ni Jehova ania kanako, tungod kay siya nagdihog kanako aron sa pagpahayag sa maayong balita ngadto sa mga kabos, siya nagpadala kanako aron sa pagwali sa kagawasan ngadto sa mga binihag ug sa kapasig-ulian sa panan-aw ngadto sa mga buta, aron sa pagpalakat sa mga dinaogdaog uban ang kagawasan, aron sa pagwali sa dalawatong tuig ni Jehova.” Dayon gipadapat ni Jesus kining mga pulonga sa iyang kaugalingon, nga nag-ingon: “Karong adlawa kining kasulatan nga bag-o lang ninyo nga nadungog natuman.” (Luc. 4:17-21) Sa wala pa siya mokayab sa langit, giingnan ni Jesus ang iyang mga tinun-an: “Kamo magadawat ug gahom sa dihang ang balaang espiritu mokunsad kaninyo, ug kamo mahimong akong mga saksi . . . hangtod sa kinalay-ang dapit sa yuta.” (Buh. 1:8) Sa unang siglo, ang balaang espiritu adunay hinungdanong papel diha sa buluhatong pagsangyaw.
12. Sa unsang paagi ang espiritu sa Diyos nalangkit sa buluhatong pagdapit sa atong adlaw?
12 Sa unsang paagi ang balaang espiritu sa Diyos nalangkit sa buluhatong pagdapit sa atong adlaw? Si Jehova ang Tinubdan sa balaang espiritu. Iyang gigamit ang espiritu sa pagbukas sa kasingkasing ug hunahuna sa pangasaw-onon nga matang aron ilang masabtan ang iyang Pulong, ang Bibliya. Ang espiritu nagtukmod kanila sa pagpaabot sa pagdapit ug sa pagpatin-aw sa mga kamatuoran sa Kasulatan niadtong adunay paglaom nga mabuhing walay kataposan sa Paraiso sa yuta. Komosta kadtong midawat sa pagdapit, nahimong mga tinun-an ni Jesu-Kristo, ug nagpaabot sa pagdapit ngadto sa uban pa? Ang espiritu nalangkit usab niana. Kay nabawtismohan sa ‘ngalan sa balaang espiritu,’ sila milihok nga kaharmonya sa paggiya sa espiritu ug misalig sa tabang niini. (Mat. 28:19) Hunahunaa usab ang mensahe nga gisangyaw sa mga dinihogan ug sa nagkadaghang dakong panon. Kini naggikan sa Bibliya—ang basahon nga gisulat ilalom sa paggiya sa espiritu sa Diyos. Busa, ang pagdapit gipaabot pinaagi sa balaang espiritu. Sa pagkatinuod, kita gigiyahan sa maong espiritu. Unsay angayng epekto niana sa gidak-on sa panahon nga atong gigugol sa pagpakigbahin sa buluhatong pagdapit?
Sila “Nagpadayon sa Pag-ingon: ‘Umari Ka!’”
13. Unsay buot ipasabot sa mga pulong nga “ang espiritu ug ang pangasaw-onon nagpadayon sa pag-ingon: ‘Umari ka!’”?
13 “Ang espiritu ug ang pangasaw-onon” dili kay kas-a rang miingon ug “Umari ka!” Ang berbo sa orihinal nga pinulongan nga gigamit dinhi nagpasabot ug mapinadayonong paglihok. Maylabot niini, ang Bag-ong Kalibotang Hubad nag-ingon: “Ang espiritu ug ang pangasaw-onon nagpadayon sa pag-ingon: ‘Umari ka!’” Kana nagpasabot ug pagkaregular sa pagpaabot sa pagdapit sa Diyos. Komosta kadtong nagpatalinghog ug midawat sa pagdapit? Sila usab miingon, “Umari ka!” Ang dakong panon sa matuod nga mga magsisimba gihisgotan nga ‘nagahatag ug sagradong pag-alagad adlaw ug gabii diha sa templo ni Jehova.’ (Pin. 7:9, 15) Unsay buot ipasabot sa ‘adlaw ug gabii nga pag-alagad’? (Basaha ang Lucas 2:36, 37; Buhat 20:31; 2 Tesalonica 3:8.) Ang panig-ingnan sa tigulang nga manalagnang si Ana ug ni apostol Pablo nagpakita nga ang ‘adlaw ug gabii nga pag-alagad’ nagpasabot ug pagkamakanunayon ug tim-os nga pagpaningkamot diha sa ministeryo.
14, 15. Sa unsang paagi gipakita ni Daniel nga hinungdanon ang pagkaregular diha sa pagsimba?
14 Gipakita usab ni manalagnang Daniel nga hinungdanon ang pagkaregular diha sa pagsimba. (Basaha ang Daniel 6:4-10, 16.) Wala niya usba ang iyang espirituwal nga rutina—ang pag-ampo sa Diyos “makatulo sa usa ka adlaw, . . . ingon sa iyang ginahimo una pa niana”—maski sulod lang sa usa ka bulan, bisan pag nagkahulogan kana nga siya itambog sa langob sa mga leyon. Dayag kaayo sa mga naniid kaniya nga wala nay mas hinungdanon pa kay sa iyang regular nga pagsimba kang Jehova.—Mat. 5:16.
15 Human makagugol si Daniel ug usa ka gabii sa langob sa mga leyon, ang hari miadto didto ug miingon: “Oh Daniel, alagad sa buhing Diyos, ang imong Diyos ba nga kanunay nimong gialagaran nakaluwas kanimo gikan sa mga leyon?” Dihadiha si Daniel mitubag: “Oh hari, mabuhi ka gayod hangtod sa mga panahong walay tino. Ang akong Diyos nagpadala sa iyang manulonda ug nagtak-om sa baba sa mga leyon, ug wala nila ako unsaa, sanglit sa iyang atubangan nakaplagan ako nga inosente; ug sa imong atubangan, Oh hari, wala ako makahimo ug daotang buhat.” Gipanalanginan ni Jehova si Daniel tungod kay siya nag-alagad nga ‘makanunayon.’—Dan. 6:19-22.
16. Ang panig-ingnan ni Daniel magtukmod kanato sa pagsukna sa atong kaugalingon sa unsang mga pangutana maylabot sa atong pagpakigbahin sa ministeryo?
16 Si Daniel andam mamatay inay magpabaya sa iyang espirituwal nga rutina. Komosta man usab kita? Unsang mga sakripisyo ang atong ginahimo o andam nga himoon aron imantala ang maayong balita sa Gingharian sa Diyos nga makanunayon? Aw, dili nato tugotan nga molabay ang usa ka bulan nga wala kita makasulti sa uban bahin kang Jehova! Kon posible, dili ba nga angay kitang maningkamot sa pagpakigbahin sa ministeryo kada semana? Bisan pag nalimitahan kita pag-ayo sa pisikal ug makasangyaw lang ug 15 minutos sulod sa usa ka bulan, angay natong itaho kana. Ngano? Tungod kay, duyog sa espiritu ug sa pangasaw-onon, buot natong magpadayon sa pag-ingon, “Umari ka!” Oo, gusto natong buhaton ang tanan natong maarangan sa pagpabiling regular ingong magmamantala sa Gingharian.
17. Unsang mga kahigayonan sa pagpaabot sa pagdapit ni Jehova ang dili nato angayng palabyon?
17 Kinahanglan kitang maningkamot sa pagpaabot sa pagdapit ni Jehova sa tanang kahigayonan, dili lamang sa mga panahon nga atong gigahin alang sa publikong ministeryo. Pagkadakong pribilehiyo ang pagdapit sa mga giuhaw nga ‘moinom sa tubig sa kinabuhi nga walay bayad’ sa ubang mga panahon usab, sama sa dihang kita mamalit, magbiyahe, magbakasyon, magtrabaho, o mag-eskuyla! Bisan pag idili sa mga awtoridad ang buluhatong pagsangyaw, magpadayon kita sa pagbuhat niana nga mainampingon—tingali pinaagi sa pagduaw ug pipila lamang ka balay sa usa ka lugar ug dayon mobalhin sa lain o sa paggugol ug dugang panahon sa di-pormal nga pagsangyaw.
Padayon sa Pag-ingon, “Umari Ka!”
18, 19. Sa unsang paagi nimo ipakita nga imong gipabilhan ang pribilehiyo sa pagkahimong isigkamagbubuhat sa Diyos?
18 Sa kapin nag 90 ka tuig, ang espiritu ug ang pangasaw-onon nagpadayon sa pag-ingon, “Umari ka!” niadtong giuhaw sa tubig sa kinabuhi. Nakadungog ka ba sa ilang makapalipay nga pagdapit? Nan giawhag ka sa pagpaabot niini nga pagdapit ngadto sa uban.
19 Wala kita mahibalo kon hangtod kanus-a ipaabot ni Jehova kanang mahigugmaong pagdapit, apan ang atong pagsanong niana pinaagi sa pag-ingon, “Umari ka!” maghimo kanato nga mga isigkamagbubuhat sa Diyos. (1 Cor. 3:6, 9) Pagkadakong pribilehiyo kana! Hinaot nga ipakita nato nga atong gipabilhan ang maong pribilehiyo ug ‘magtanyag kanunay sa Diyos ug halad sa pagdayeg’ pinaagi sa pagsangyaw nga regular. (Heb. 13:15) Duyog sa pangasaw-onon nga matang, kita nga adunay yutan-ong paglaom magpadayon sa pag-ingon, “Umari ka!” Ug hinaot nga daghan pa ang ‘moinom sa tubig sa kinabuhi nga walay bayad’!
Unsay Imong Nakat-onan?
• Kang kinsa gipaabot ang pagdapit nga “umari ka”?
• Nganong ikaingon nga ang pagdapit nga “umari ka” naggikan kang Jehova?
• Unsay papel sa balaang espiritu diha sa pagpaabot sa pagdapit nga “umari ka”?
• Nganong maningkamot kita nga mahimong regular diha sa ministeryo?
[Chart/Mga hulagway sa panid 16]
(Alang sa aktuwal nga pagkahan-ay, tan-awa ang publikasyon)
Padayon sa Pag-ingon, “Umari Ka!”
1914
5,100 ka magmamantala
1918
Daghan ang makabaton ug kinabuhi sa Paraiso sa yuta
1922
“Imantala, imantala, imantala, ang Hari ug ang iyang gingharian”
1929
Ang matinumanong nanghibilin nag-ingon, “Umari ka!”
1932
Dili lamang sa mga dinihogan gipaabot ang pagdapit nga “Umari ka!”
1934
Ang Jonadab nga matang gidapit sa pagsangyaw
1935
Nailhan ang “dakong panon”
2009
7,313,173 ka magmamantala