Unsay Nalangkit sa Pagkaila sa Ngalan sa Diyos?

ADUNA bay kahulogan ang imong ngalan? Sa ubang bahin sa kalibotan, nabatasan na ang paghatag sa bata ug ngalan nga nindot ug kahulogan. Ang napiling ngalan lagmit may kalabotan sa tinuohan ug mga prinsipyo sa ginikanan o kaha sa ilang mga tinguha ug pangandoy alang sa ilang anak.

Dugay nang nabatasan ang paghatag ug ngalan nga dunay kahulogan. Sa kapanahonan sa Bibliya, ang usa ka tawo hatagag ngalan nga magpakita kon unsa unya ang iyang mga hiyas o papel sa umaabot. Pananglitan, sa dihang gisulti ni Jehova kang David ang papel unya sa iyang anak nga si Solomon, Siya miingon: “Solomon [gikan sa pulong nga nagkahulogang “Pakigdait”] ang mahimo niyang ngalan, ug pakigdait ug kalinaw akong ihatag sa Israel sa iyang mga adlaw.”—1 Cronicas 22:9.

Usahay ilisan ni Jehova ang ngalan sa usa ka tawo tungod sa iyang bag-ong papel. Ang baog nga asawa ni Abraham giilisag ngalan nga Sara, nga nagkahulogang “Prinsesa.” Ngano man? Si Jehova miingon: “Ako magpanalangin kaniya ug maghatag usab kanimo ug usa ka anak nga lalaki gikan kaniya; ug ako magpanalangin kaniya ug siya mahimong mga nasod; mga hari sa mga katawhan magagikan kaniya.” (Genesis 17:16) Busa, kay atong nahibaloan ang bag-ong papel ni Sara, atong nasabtan kon nganong giusab ang iyang ngalan.

Nan unsay kahulogan sa labing halangdong ngalan nga Jehova? Sa dihang gipangutana ni Moises ang Diyos bahin sa Iyang ngalan, si Jehova mitubag: “Ako mamao kon unsay mamao ako.” (Exodo 3:14) Kini nga teksto gihubad sa Rotherham nga bersiyon sa Bibliya, nga nag-ingon: “Ako Mamahimong bisan unsa nga gusto nako.” Gipakita sa ngalan ni Jehova nga siya dunay daghang papel. Sa pag-ilustrar: Ang inahan dunay lainlaing papel matag adlaw kon bahin sa pag-atiman sa iyang mga anak—siya mahimong nars, kosinera, o maestra—depende sa panginahanglan. Susama niana si Jehova. Aron matuman ang iyang nindot nga katuyoan alang sa katawhan, siya mamahimong bisan unsa nga gusto niya, depende sa panginahanglan. Busa ang pagkaila sa ngalan ni Jehova naglangkit sa pagkahibalo ug pag-apresyar sa lainlain niyang papel.

Ikasubo, ang nindot nga personalidad sa Diyos wala mahibaloi sa mga tawong wala makaila sa iyang ngalan. Apan kon ikaw magtuon sa Bibliya, imong masabtan ang papel ni Jehova ingong maalamong Magtatambag, gamhanang Manluluwas, ug mahigugmaong Magtatagana, ug uban pa. Sa pagkatinuod, makapahingangha gayod ang ngalang Jehova kay kini makahuloganon kaayo.

Ugaling lang, daghan ang wala makaila sa ngalan sa Diyos. Ang hinungdan niini hisgotan sa sunod nga artikulo.