Sundoga ang Ilang Pagtuo

Gibuksan Niya ang Iyang Kasingkasing Kang Jehova Diha sa Pag-ampo

SI Ana puliki kaayo sa pagpangandam alang sa panaw ug naningkamot nga dili maghunahuna sa iyang mga problema. Angay unta nga kana maoy usa ka malipayong panahon. Nabatasan sa iyang bana nga si Elkana nga dad-on ang tibuok pamilya matag tuig sa pagsimba sa tabernakulo sa Shilo. Gusto ni Jehova nga malipayon ang maong okasyon. (Deuteronomio 16:15) Sa walay duhaduha, si Ana nalipay gayod sa pagtambong sa maong mga pista sukad pa sa iyang pagkabata. Apan sa milabayng pipila ka tuig, nausab ang iyang kahimtang.

Siya gihigugma sa iyang bana. Apan si Elkana dunay laing asawa. Ang iyang ngalan maoy Penina, ug morag wala na siyay laing gustong buhaton kondili himoong miserable ang kinabuhi ni Ana. Si Penina nakakitag paagi nga maguol si Ana bisan sa panahon sa tinuig nga mga pista. Unsay iyang gibuhat? Ug sa unsang paagi ang pagtuo ni Ana kang Jehova nakatabang kaniya nga masagubang ang problema nga daw wala nay solusyon? Kon ikaw nawad-ag kalipay tungod sa mga problema, lagmit madasig ka gayod sa kasinatian ni Ana.

“Nganong Masulub-on ang Imong Kasingkasing?”

Ang Bibliya naghisgot sa duha ka dakong problema ni Ana. Ang una mao nga aduna siyay karibal sa iyang bana kinsa naglagot kaniya. Ug ang ikaduha, siya baog. Lisod kaayo kana alang sa usa ka babaye nga gustog anak, ilabina sa kultura ug panahon ni Ana. Ang matag pamilya gustog anak aron dili mawala ang ilang kaliwat. Kon ang usa baog, siya daw tinunglo ug kini dakong kaulawan.

Maantos ra unta ni Ana ang iyang problema kon dili pa tungod ni Penina. Dili gayod sayon kon ang lalaki daghag asawa. Sagad nga kana moresulta sa pangabugho, away, ug kahiubos diha sa pamilya. Sukwahi kana sa sukdanan nga gilatid sa Diyos didto sa tanaman sa Eden nga ang lalaki angay nga usa ray asawa.a (Genesis 2:24) Busa gipakita sa Bibliya nga dili maayo ang daghag asawa ingon sa nahitabo sa panimalay ni Elkana.

Dayag nga mas pinangga ni Elkana si Ana. Ang mga Hudiyo nagtuo nga si Ana ang unang gipakaslan, ug pipila ka tuig sa ulahi si Penina. Wala kita makaseguro niana, apan ang segurado mao nga si Penina nagselos pag-ayo kang Ana ug daghan siyag gihimo aron pasakitan si Ana. Nakabentaha si Penina kay siya dili baog. Samtang nagkadaghan ang iyang anak, misamot ang iyang pagkamapahitas-on. Imbes kaluy-an ug hupayon si Ana, iya hinuong gipahimuslan ang situwasyon ni Ana. Ang Bibliya nag-ingon nga si Ana gibiaybiay pag-ayo ni Penina “aron siya masamok.” (1 Samuel 1:6) Gituyo ni Penina nga pasakitan si Ana, ug milampos siya.

Ang paboritong kahigayonan ni Penina sa pagbiaybiay kang Ana mao ang tinuig nga panaw paingon sa Shilo. Nianang panahona hatagan ni Elkana ug bahin ang tagsa-tagsa ka “anak nga lalaki ug babaye” ni Penina aron ihalad kang Jehova. Apan usa lang ka bahin ang madawat ni Ana. Dayon ipabati gyod ni Penina nga labaw siya kang Ana ug pahinumdoman siya sa iyang pagkabaog, nga tungod niana magbakho intawon si Ana ug dili na ganahang mokaon. Siyempre, wala malilong kang Elkana nga ang iyang pinalanggang si Ana nagminghoy ug wala mokaon, mao nga gusto niyang hupayon siya. “Ana,” siya nangutana, “nganong naghilak ka, ug nganong dili ka mokaon, ug nganong masulub-on ang imong kasingkasing? Dili ba ako labi pang maayo alang kanimo kay sa napulo ka anak nga lalaki?”—1 Samuel 1:4-8.

Nasabtan ni Elkana nga naguol si Ana tungod kay wala siyay anak. Ug seguradong gipabilhan ni Ana ang pasalig sa gugma sa iyang bana.b Apan walay rekord sa Bibliya nga si Elkana naghisgot sa gibuhat ni Penina o nga si Ana misumbong kang Elkana. Tingali naghunahuna si Ana nga kon isumbong niya si Penina, mosamot lang ang iyang problema. Unsa man poy mahimo ni Elkana? Dili kaha mograbe lang ang pagdumot ni Penina kang Ana, ug basin hasta ang mga anak ug ulipon ni Penina maglagot na kaniya? Mahimo na hinuon siyang sinalikway diha sa iyang kaugalingong panimalay.

Nahibalo man o wala si Elkana sa gipangbuhat ni Penina, kanang tanan nakita ni Jehova. Girekord kana diha sa Bibliya aron magsilbing pasidaan nga si Jehova dili malipay bisan sa daw ginagmayng buhat sa kasina ug pagdumot. Sa laing bahin, ang mga tawong buotan ug dili-palaaway sama ni Ana madasig sa pagkahibalo nga ang Diyos maoy mohatag ug hustisya sa iyang gitakdang panahon. (Deuteronomio 32:4) Lagmit nasayod niana si Ana mao nga siya midangop kang Jehova.

“Wala na Magmabalak-on”

Kaadlawon pa lang, puliki na kaayo ang tibuok pamilya. Ang tanan, bisan ang mga bata, nangandam sa biyahe paingon sa Shilo. Sila magbaktas ug mga usa o duha ka adlaw latas sa bukirong dapit sa Epraim nga kapin sa 30 kilometros ang gilay-on.c Nahibalo si Ana kon unsa na poy buhaton sa iyang karibal. Apan mikuyog ra gihapon siya. Siya nagpakitag maayong panig-ingnan alang sa tanang alagad sa Diyos kaniadto ug karon. Dili gayod nato tugotan nga maapektohan ang atong pag-alagad sa Diyos tungod sa dili-maayong panggawi sa uban. Kon magpaapekto kita, dili nato madawat ang mga panalangin nga makatabang kanato sa paglahutay.

Human sa tibuok adlawng pagbinaktas, sa kataposan duol na gayod sila sa Shilo. Kini nahimutang sa usa ka bungtod nga gilibotan sa ubang mas habog nga mga bungtod. Samtang nagkaduol sila, si Ana lagmit namalandong kon unsay iyang iampo kang Jehova. Pag-abot nila sa Shilo, nangaon ang tibuok pamilya. Dayon si Ana miadto sa tabernakulo ni Jehova. Atua didto ang Hataas nga Saserdote nga si Eli nga naglingkod daplin sa pultahan. Apan ang atensiyon ni Ana nasentro sa Diyos. Hugot ang iyang pagtuo nga dunggon ang iyang pag-ampo diha sa tabernakulo. Kon wala may makasabot sa iyang problema, segurado nga ang iyang Amahan sa langit nakasabot kaniya. Wala na niya kapugngi ang giluom niyang kasakit ug siya mihilak.

Nagbakho si Ana samtang nakigsulti kang Jehova. Ang iyang ngabil nagkibotkibot samtang hilom siyang nagpahungaw sa iyang gibati. Sa iyang taas nga pag-ampo, iyang gihabwa ang iyang kasingkasing ngadto sa iyang Amahan. Apan ang iyang giampo dili lang ang pagbatog anak. Gawas nga buot niyang makadawat ug panalangin, siya nagtinguha nga mohatag sa Diyos sa iyang maarangan. Busa nanaad siya nga kon hatagan siyag anak nga lalaki, iyang ihalad kang Jehova ang bata aron tibuok-kinabuhing mag-alagad Kaniya.—1 Samuel 1:9-11.

Si Ana naghatag ug maayong panig-ingnan alang sa tanang alagad sa Diyos maylabot sa pag-ampo. Si Jehova nagdapit sa iyang mga alagad nga dili magpanuko sa pag-ampo kaniya, ug ihabwa ang tanang kabalaka ngadto kaniya samag usa ka bata nga may bug-os nga pagsalig sa iyang mahigugmaong ginikanan. (Salmo 62:8; 1 Tesalonica 5:17) Si apostol Pedro giinspirar sa pagsulat niining makahupayng mga pulong maylabot sa pag-ampo kang Jehova: “Itugyan kaniya ang tanan ninyong mga kabalaka, kay siya may kahingawa kaninyo.”—1 Pedro 5:7.

Ang mga tawo dili sama ka masinabtanon ug mabination kang Jehova. Samtang si Ana nag-ampo nga naghilak, dihay misulti. Tingog kadto sa Hataas nga Saserdote nga si Eli, kinsa naniid kaniya. Si Eli miingon: “Hangtod kanus-a nga maghinubog ka? Kuhaa ang bino gikan kanimo.” Namatikdan ni Eli ang pagkibotkibot sa ngabil ni Ana ug ang iyang pagbakho. Inay mangutana kon naunsa siya, naghunahuna dayon si Eli nga hubog siya.—1 Samuel 1:12-14.

Seguradong nasakitan si Ana kay problemado na gani siya, gipasanginlan pa gyod siya sa usa ka tinahod nga tawo! Bisan pa niana, nagpakita gihapon siyag maayong panig-ingnan sa pagtuo. Wala niya tugoti ang kasaypanan sa uban nga makababag sa iyang pag-alagad kang Jehova. Matinahoron niyang gisulti kang Eli ang iyang kahimtang. Sanglit nakaamgo si Eli sa iyang sayop, siya mitubag, lagmit sa malumong paagi: “Lakaw sa kalinaw, ug hinaot ang Diyos sa Israel maghatag kanimo sa imong gipangaliya kaniya.”—1 Samuel 1:15-17.

Unsay epekto kang Ana sa dihang iyang gibubo ang iyang kasingkasing kang Jehova ug sa iyang pagsimba Kaniya didto sa tabernakulo? Ang Bibliya miingon: “Ang babaye milakaw ug mikaon, ug ang iyang nawong wala na magmabalak-on.” (1 Samuel 1:18) Ang Biblia sa Kristohanong Katilingban naghubad niini nga nag-ingon: “Wala nay lama sa kasubo ang iyang panagway.” Migaan ang pagbati ni Ana. Mora bag gipasa na niya ang kabug-at nga iyang gibati ngadto sa usa nga mas kusgan kaniya, ang iyang langitnong Amahan. (Salmo 55:22) Aduna bay problema nga bug-at kaayo alang kang Jehova? Wala gayod!

Kon kita nabug-atan o naguol pag-ayo, atong sundogon si Ana pinaagi sa pagbubo sa tanan natong problema sa Usa nga gitawag sa Bibliya nga “Tigpatalinghog sa pag-ampo.” (Salmo 65:2) Kon atong buhaton kana uban ang pagtuo, ang atong kaguol mapulihan ug “kalinaw sa Diyos nga labaw sa tanang panghunahuna.”—Filipos 4:6, 7.

“Walay Bato nga Sama sa Atong Diyos”

Pagkasunod buntag, si Ana mibalik sa tabernakulo uban kang Elkana. Lagmit iyang gisulti kaniya ang iyang hangyo ug panaad kang Jehova, kay sumala pa sa Moisesnong Balaod ang bana may katungod sa pagbakwi sa panaad sa iyang asawa kon siya dili uyon niana. (Numeros 30:10-15) Apan wala kana himoa sa iyang diyosnong bana. Hinunoa, si Ana ug Elkana nag-uban sa pagsimba kang Jehova diha sa tabernakulo una sila mipauli sa ilang lungsod.

Kanus-a nakaamgo si Penina nga wala nay epekto ang iyang ginahimo kang Ana? Wala kana hisgoti sa Bibliya, apan ang ekspresyon nga “wala na magmabalak-on” nagpakita nga wala na siya maguol human siya mag-ampo. Lagmit namatikdan dayon ni Penina nga wala nay epekto ang iyang pagpasakit kang Ana. Human niadto, wala na hisgoti sa Bibliya ang iyang ngalan.

Sa paglabay sa mga bulan, ang kalinaw sa hunahuna ni Ana nasapawag tumang kalipay. Mabdos siya! Sa iyang pagmaya, wala gayod siya malimot kon kinsay tinubdan sa maong panalangin. Sa dihang nahimugso ang iyang anak nga lalaki, iyang ginganlan ang bata ug Samuel, nga nagkahulogang “Ngalan sa Diyos,” nga dayag nga nagtumong sa pagsangpit sa balaang ngalan, sama sa gihimo ni Ana. Nianang tuiga, wala siya mokuyog kang Elkana ug sa tibuok pamilya didto sa Shilo. Iyang giatiman ang bata sulod sa tulo ka tuig hangtod nga siya nalutas. Dayon giandam ni Ana ang iyang kaugalingon sa adlaw nga ihalad niya ang iyang pinalanggang anak.

Dili gayod sayon nga mahimulag sa anak. Tinuod, nahibalo si Ana nga atimanon pag-ayo si Samuel didto sa Shilo, tingali sa mga babayeng nag-alagad sa tabernakulo. Pero gamay pa kaayo siya, ug kinsa nga inahan ang gustong mahimulag sa iyang anak? Apan, ang pagdala ni Ana ug Elkana sa bata dili pinugos kondili kinabubut-on. Sila naghalad diha sa balay sa Diyos, ug ilang gidala si Samuel kang Eli ug gipahinumdoman siya sa panaad ni Ana pipila ka tuig ang milabay.

Dayon si Ana mibungat ug pag-ampo nga giisip sa Diyos nga takos ilakip diha sa Bibliya. Kon imong basahon ang iyang pag-ampo diha sa 1 Samuel 2:1-10, imong makita diha sa matag tudling pulong ang kadako sa iyang pagtuo. Iyang gidayeg si Jehova tungod sa iyang talagsaong gahom—makahimo Siya sa pagpaubos sa mapahitas-on, sa paghatag ug panalangin sa dinaogdaog, ug sa pagtapos sa kinabuhi o pagluwas niini gikan sa kamatayon. Iyang gidayeg ang iyang Amahan tungod sa Iyang pagkabalaan, hustisya, ug pagkamaunongon. Busa si Ana nakaingon: “Walay bato nga sama sa atong Diyos.” Si Jehova kasaligan gayod, dili-mausab, ug dangpanan sa tanang tawo nga dinaogdaog.

Bulahan ang batang si Samuel kay ang iyang inahan lig-on kaayog pagtuo kang Jehova. Siyempre mibati siyag kamingaw sa iyang inahan samtang siya nagdako, apan wala gayod niya batia nga gikalimtan siya sa iyang inahan. Sa matag tuig, si Ana moadto sa Shilo nga magdalag gamayng kupo alang kang Samuel aron gamiton sa pag-alagad sa tabernakulo. Iya kanang gihagoan pagtahi kay gimahal niya pag-ayo ang iyang anak. (1 Samuel 2:19) Atong mahanduraw nga iyang sul-oban ang iyang anak sa bag-ong kupo, hapyoron kini samtang malipayong nagtan-aw ug lumong nakig-estorya kaniya. Si Samuel gipanalanginan ug buotang inahan, ug siya nahimong panalangin sa iyang ginikanan ug sa tibuok Israel.

Kon bahin kang Ana, siya wala usab kalimti. Gibuksan ni Jehova ang iyang tagoangkan ug sila ni Elkana nakaanak pag lima. (1 Samuel 2:21) Apan ang kinalabwang panalangin nga nabatonan ni Ana mao nga sa paglabay sa katuigan siya mas nasuod sa iyang Amahan nga si Jehova. Hinaot nga ikaw usab mas masuod pa kang Jehova samtang imong sundogon ang pagtuo ni Ana.

[Footnote]

[Kahon sa panid 17]

Duha ka Talagsaong Pag-ampo

Ang duha ka pag-ampo ni Ana, nga narekord sa 1 Samuel 1:11 ug 2:1-10, adunay talagsaong mga bahin. Pananglitan:

◼ Ang unang pag-ampo iyang gipahinungod kang “Jehova sa mga panon.” Diha sa Bibliya, siya ang unang naggamit niana nga titulo. Mabasa kana sa 285 ka beses ug nagtumong sa awtoridad sa Diyos sa pagdumala sa dako kaayong panon sa manulonda.

◼ Matikdi nga gipahayag ni Ana ang iyang ikaduhang pag-ampo, dili sa dihang gipanganak niya si Samuel, kondili sa dihang gidala nila ni Elkana si Samuel sa Shilo aron mag-alagad kang Jehova. Busa nalipay siya, dili tungod kay nahilom na ang iyang karibal nga si Penina kondili tungod kay gipanalanginan siya ni Jehova.

◼ Sa dihang si Ana miingon, “Ang akong sungay nabayaw pinaagi kang Jehova,” tingali anaa sa iyang hunahuna ang torong baka nga kusgan ug sungay. Sa diwa, si Ana miingon: ‘Jehova, gihimo ko nimong kusgan.’—1 Samuel 2:1.

◼ Ang mga pulong ni Ana bahin sa “dinihogan” sa Diyos giisip nga usa ka tagna. Ang maong pulong samag kahulogan sa pulong “mesiyas,” ug si Ana ang unang gihisgotan sa Bibliya nga naggamit sa maong pulong sa pagtumong sa umaabot nga dinihogang hari.—1 Samuel 2:10.

◼ Mga 1,000 ka tuig sa ulahi, ang inahan ni Jesus nga si Maria nagpahayag ug mga pulong sa pagdayeg kang Jehova nga sama sa mga pulong ni Ana.—Lucas 1:46-55.

[Hulagway sa panid 16]

Naguol pag-ayo si Ana kay siya baog, ug gihimo ni Penina ang tanan aron mahimong miserable ang iyang kinabuhi

[Hulagway sa panid 16, 17]

Nganong dili nimo sundogon ang kinasingkasing nga pag-ampo ni Ana?

[Hulagway sa panid 17]

Wala mapandol si Ana bisan pa sa sayop nga akusasyon ni Eli